Tag: seanca

Rigels Seliman
Pas më shumë se gjashtë muajsh zvarritje dhe seanca të dështuara, çështja e shumëpërfolur “Partizani” vazhdon të qëndrojë në vendnumëro në Gjykatën e Posaçme. Ashtu si herët e kaluara, edhe këtë herë seanca paraprake u shty, për shkak të mungesës së një avokati, duke e bërë vendimmarrjen e gjyqtares Flojera Davidhi një proces të pafund. Në qendër të kësaj dosjeje qëndrojnë emra të njohur të politikës dhe biznesit, me ish-kryeministrin Sali Berisha dhe dhëndrin e tij, Jamarbër Malltezi, si dy nga të pandehurit kryesorë. Afera “Partizani” përfaqëson një nga përballjet më të mëdha të drejtësisë së re me korrupsionin e lartë politik dhe pastrimin e parave në nivelet më të larta të shtetit. Ndërkohë që palët mbrojtëse përdorin çdo mekanizëm për të vonuar procesin, kreu i SPAK, Altin Dumani, ka ngritur shqetësimin për zvarritjen e seancave dhe rrezikimin e afateve ligjore. Tashmë sytë janë kthyer nga seanca e 18 prillit, e cila pritet të vendosë nëse kjo çështje do të kalojë më në fund në gjykim, teksa Berisha në çdo dalje publike vijon të hedhë akuza ndaj SPAK.
Detajet
Konkretisht vendimmarrja e gjyqtarit të seancës paraprake për dosjen “Partizani” po duket si një mision i pamundur në Gjykatën e Posaçme. Edhe dje seanca u shty. Avokati i njërit prej të pandehurve nuk u paraqit, pasi ndodhej në një proces paralel po në këtë gjykatë. Seanca ishte parashikuar në orën 14.00, por avokati Sokol Hazizi i cili mbron biznesmenin Fatmir Bektashi, nuk u shkëput nga seanca e dosjes “Plumbi i artë” që kishte nisur që në orën 10-të paradites, megjithëse u prit rreth 60 minuta nga prokurorët, gjykata dhe avokatët e tjerë. Në këto kushte gjyqtarja Flojera Davidhi vendosi ta shtyjë seancën për të premten e 18 prillit në orën 09:30 ku pritet të dëgjohen prokurorët dhe gjykata të japë vendimin. Të pandehur në aferën Partizani janë ish-kryeministri Sali Berisha, dhëndri i tij, Jamarbër Malltezi dhe 3 të tjerë. Prej 24 tetorit të vitit 2024, gati 6 muaj tashmë, seanca vetëm është shtyrë përmes makinacioneve të ndryshme. Në dy herët e fundit avokatët, një herë i Malltezit e më tej i të pandehurit Xhimi Begeja paraqitën raporte mjekësore si të sëmurë. Dërgimi në gjyq i dosjes do të ishte përballja e parë reale e Berishës dhe Malltezit me drejtësinë shqiptare. Berisha ndodhet në masë “detyrim paraqitje” për korrupsion pasiv, masë të cilën e ka ankimuar në Gjykatën e Lartë.
Dhëndri i tij Malltezi po hetohet në arrest shtëpie, i pandehur për korrupsion pasiv dhe pastrim parash. Po këtë të martë edhe gjykata e lartë shtyu për në 22 prill shqyrtimin e rekursit për masat e sigurisë për Berishën pasiv dhe dhëndrin e tij Malltezit. Nga privatizimi i klubit sportiv ku përfitues ishte dhëndri i Berishës, u ndërtuan të paktën 19 kulla pallatesh. Me Berishën e Malltezin të pandehur janë edhe bashkëpunëtorët e tyre, biznesmeni Fatmir Bektashi, i pandehur për “korrupsion aktiv” dhe “pastrim parash”. Akuza e “pastrimit të parave” i është komunikuar edhe ortakut të Malltezit, Xhimi Begeja, trashëgimtar i tokës dhe bashkëpronar i ‘Homeplan’, si dhe Andia Pustinës, financieres që kryente të gjitha operacionet financiare dhe ligjore të Homeplan. Shqetësimin për zvarritjen e seancave e ngriti një ditë më parë edhe kreu i SPAK, Altin Dumani. Gjatë raportimit para KLP, Dumani tha se zvarritja e seancave paraprake po kthehet në shqetësim, ndërsa theksoi se rrezikohen edhe afatet e paraburgimit.
Dosja “Partizani”, të pandehurit:
1. Sali Berisha, ish kryeministër – akuzohet për “Korrupsionit pasiv të funksionarëve të lartë shtetërore ose të zgjedhurve vendorë”, kryer në bashkëpunim, me Jamarbër Malltezin parashikuar nga neni 260 e 25 i Kodit Penal.
2. Jamarbër Malltezi – dhëndri i ish-kryeministrit – akuzohet për “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin e ish Kryeministrit, ka arritur të marrë përfitimet e parregullta! Akuzohet dhe për “Pastrimit të produkteve të veprës penale ose veprimtarisë kriminale”, parashikuar nga neni 287 paragrafi i dytë i Kodit Penal
3. Fatmir Bektashi – Ndërtuesi akuzohet “Korrupsionit aktiv të funksionarëve të lartë shtetërorë”, parashikuar nga neni 245 i Kodit Penal dhe ‘pastrim parash’
4. Xhimi Begeja- Ortaku i Malltezit, trashëgimtar i tokës dhe bashkëpronar i ‘Homeplan’ akuzohet për “Pastrim Parash”
5. Andia Pustina – Financierja që kryente të gjitha operacionet financiare dhe ligjore të Homeplan sh.p.k – Akuzohet për “Pastrim Parash”
Berisha akuza SPAK
Ndërkohë kreu i Partisë Demokratike, Sali Berisha, ka folur pas raportit vjetor të prezantuar nga Altin Dumani para KLP. Gjatë një konference për shtyp nga selia blu, Berisha ka akuzuar Dumanin se po kërkon të ndryshojë Kushtetutën me qëllim zgjatjen e mandatit të tij në krye të Prokurorisë së Posaçme. Sipas Berishës, një veprim i tillë është i papranueshëm dhe tregon se Dumani ka frikë nga pasojat e punës së tij si drejtues i SPAK. “Ta harrojë! Kushtetuta nuk ndryshon për karrigen e tij. Nëse ke kryer detyrat në përputhje me ligjin, nuk ke pse të kesh frikë nga puna jote”, deklaroi Berisha. Ai shtoi se nuk është e lejueshme që një prokuror të ushtrojë kontroll mbi gjykatësin e një çështjeje dhe kërkoi ndryshime urgjente për ta ndaluar këtë praktikë. “Kushtetuta do të ndryshojë, por për të hequr të drejtën që prokurori të kontrollojë gjykatësin. Kjo nuk ndodh askund në botë”, tha Berisha. Ai kritikoi performancën e SPAK ndërsa theksoi se përkundër pritshmërive, nuk ka pasur asnjë dënim serioz nga Dumani ndaj kriminelëve apo zyrtarëve të korruptuar. Madje, ai e ka akuzuar edhe për pazare. “Ku i ke dënimet ti? Asnjë! Ndërsa Prokuroria e Krimeve të Rënda ka dhënë dhjetëra dënime të përjetshme për kriminelë të rrezikshëm. Ti s’ke asnjë, se bën pazare”, shtoi ai. Berisha e ka cilësuar Dumanin si të “obsesuar” me qëndrimin në post dhe paralajmëroi se nëse nuk ka punuar me integritet, do të japë llogari.