“Do kthehemi sërish!” – Saranda rrëmben zemrat e turistëve nga e gjithë bota
Në gjirin e saj të kaltër e nën dritën verbuese të diellit të Mesdheut, Saranda po jeton kulmin e një sezoni që do të mbetet gjatë në kujtesën e turistëve nga mbarë globi. Uji i kristaltë, gatimet e shijshme dhe mbi të gjitha mikpritja shqiptare, janë përbërësit e një përvoje që shumë vizitorë e përshkruajnë me një frazë të vetme, por plot emocion: “Do kthehemi sërish!”
Qyteti i Sarandë është kthyer në një magnet për pushuesit nga të katër anët e botës, që jo vetëm që shijojnë natyrën dhe relaksin, por krijojnë kujtime që duan t’i përjetojnë sërish.
Zërat e turistëve flasin vetë:
“Më pëlqen shumë atmosfera e mbrëmjeve, kam njohur njerëz të mrekullueshëm. Kam ngrënë shumë mirë, kam pirë koktejle të veçanta dhe sigurisht që vitin tjetër mendoj të kthehem sërish.”
“Kemi kaluar një javë fantastike pushimesh. Vizituam shumë vende, por plazhi i Krorëzës më pëlqeu më shumë. Ishte magjik!”
“Unë vij nga Australia – kemi edhe ne shumë bregdete të bukura, por nuk mund të krahasohen me këtë bukuri. Uji është i pastër si kristal, si të ishte nga një botë tjetër.”
Turistët vlerësojnë jo vetëm natyrën, por edhe çmimet ekonomike, veçanërisht kur krahasohen me destinacione të njohura europiane si Spanja apo Portugalia.
“Ushqimi dhe shërbimi ishin shumë të mirë, gjithçka e përgatitur me kujdes. Dhe çmimet? Shumë më të ulëta sesa në Spanjë! Në çdo tur që kemi bërë, kjo ishte një surprizë e këndshme.”
Në këtë mozaik ndërkombëtar emocionesh dhe përshtypjesh, korriku dhe gushti i përkasin veçanërisht turistëve italianë dhe spanjollë, që dominojnë shëtitoret e qytetit, plazhet dhe tavernat buzë detit.
Saranda nuk është më thjesht një destinacion – është një përvojë që lë gjurmë dhe që thërret sërish. Dhe siç thonë vetë turistët me buzëqeshje në fund të pushimeve:
“Do kthehemi sërish!”
Website Saranda Web
Facebook Saranda Web
Instagram saranda.web
Youtube sarandaweb
Tiktok saranda.web
Pinterest sarandaweb
in sarandaweb
