Tag: sanchez

Kryeministri spanjoll Pedro Sánchez është në Pekin, ndalesa e tij e dytë në një turne në dy vende në Azi, i cili vjen në një sfond tensionesh serioze gjeopolitike, për shkak të luftës tarifore të Donald Trump.

Gjatë vizitës së tij në qytetin Ho Chi Minh në Vietnam të mërkurën, Sánchez vlerësoi pauzën e tarifave, si “një portë për negociatat dhe marrëveshjen midis vendeve”, pasi Trump pezulloi taksat për shumicën e vendeve, me përjashtim të Kinës, për 90 ditë.

Përpara vizitës së tij, Shtëpia e Bardhë paralajmëroi qeverinë spanjolle, që të mos rehatohej me Pekinin.

Në një intervistë me Fox Neës të mërkurën, Sekretari i Thesarit Scott Bessent tha se të shikosh nga Kina në vend të Shteteve të Bashkuara, do të ishte një “bast i humbur për evropianët” dhe ishte i ngjashëm me “prerjen e fytit tuaj”.

Sánchez është lideri i parë evropian që bën një vizitë zyrtare në Kinë, që nga përshkallëzimi i tensioneve tarifore midis SHBA-së dhe pjesës tjetër të botës.

Çekuilibër në favor të Pekinit

Nivelet e tregtisë mes Spanjës dhe Kinës vazhdojnë të rriten, por me një çekuilibër të theksuar në favor të gjigantit aziatik.

Në vitin 2024, importet spanjolle nga Kina tejkaluan 45 miliardë euro, ndërsa eksportet mezi arritën në 7.4 miliardë euro, sipas të dhënave nga Ministria e Ekonomisë.

Kjo e vendos Kinën si partnerin e katërt më të madh tregtar të Spanjës, furnizuesin e dytë më të madh të mallrave, por vetëm destinacionin e dymbëdhjetë më të madh për eksportet spanjolle.

“Vetëm multilateralizmi dhe solidariteti midis kombeve, mund të trajtojnë këto lloj sfidash globale. Spanja mbron një botë me dyer të hapura. Një botë në të cilën tregtia bashkon njerëzit tanë dhe i bën ata më të begatë,” tha Sánchez në Vietnam.

Ndër produktet që Spanja blen nga Kina janë makineritë, tekstilet dhe mallrat e konsumit. Vitet e fundit rëndësi ka marrë, edhe importi i automobilave dhe motoçikletave.

Kompanitë spanjolle kryesisht eksportojnë kimikate, minerale dhe komponentë industrialë. Kina është vendosur si tregu kryesor aziatik për shitjet spanjolle, dhe më shumë se 14,500 kompani spanjolle mbajnë marrëdhënie tregtare me vendin.

Por shifrat e investimeve dypalëshe janë më të balancuara, megjithëse ende modeste.

Në vitin 2023, Kina ndau 131 milionë euro për projektet në Spanjë, ndërsa investimet spanjolle në Kinë arritën në 91 milionë euro.

Megjithëse vëllimet janë ende të vogla, të dyja ekonomitë ruajnë një interes në rritje, për forcimin e lidhjeve në sektorë strategjikë si teknologjia, energjia dhe logjistika.

Kina, në mbrojtje të Sanchez

Kur u pyet për kritikat e Sekretarit të Thesarit të SHBA-së për vizitën e Sanchez-it, zëdhënësi i Ministrisë së Jashtme kineze, Lin Jian u përgjigj me vendosmëri: “Nëse flasim për ‘prerjen e fytit të njëri-tjetrit’, janë pikërisht Shtetet e Bashkuara që, duke abuzuar me tarifat për të kërcënuar dhe shantazhuar të gjithë botën, po përpiqen të shtrydhin politikën e vendeve të tjera për t’i frikësuar qafat e tyre”.

Gjatë një konference për shtyp të enjten, Lin tha gjithashtu se tregtia midis Spanjës dhe Kinës është e rëndësishme për të dyja palët, me tregtinë dypalëshe midis dy vendeve që tejkalon 44 miliardë euro në vitin 2024, ndërsa eksportet spanjolle në Kinë u rritën me 4.3% vitin e kaluar, sipas shifrave të Pekinit.

Përballë kritikave nga Uashingtoni, qeveria socialiste e Spanjës ka mbrojtur hapat ndaj Kinës.

Ministri i Bujqësisë Luis Planas këmbënguli se Spanja ka marrëdhënie të shkëlqyera tregtare me Kinën, të cilat “ne duam qartë që jo vetëm t’i vazhdojmë, por t’i zgjerojmë”./Euronews.