Pasuria e miliarderëve nga vendet e G20-ës gjatë vitit të kaluar është rritur me 16.5 për qind dhe ka arritur në 15.6 miliardë dollarë, sipas të dhënave nga organizata ndërkombëtare bamirëse dhe humanitare Oxfam.
Shuma e fituar nga miliarderët e G20 vetëm vitin e kaluar prej 2.2 trilionë dollarësh do të ishte më se e mjaftueshme për të nxjerrë 3.8 miliardë njerëz nga varfëria, pasi 1.65 trilionë dollarë në vit do të ishin të mjaftueshme, thuhet në deklaratë.
Vërehet se qeveria e Afrikës së Jugut, e cila kryeson G20 këtë vit, e ka bërë pabarazinë një temë kryesore në samitin e ardhshëm më 22 dhe 23 nëntor.
Afrika e Jugut ngarkoi një grup ekspertësh, të udhëhequr nga fituesi i Çmimit Nobel në ekonomi, Joseph Stiglitz, për të përgatitur një raport mbi këtë çështje.
“Pabarazia është një zgjedhje e qëllimshme politike. Pavarësisht pasurisë rekord në krye të piramidës, pasuria publike është në stanjacion dhe madje në rënie, dhe kriza e borxhit është duke u rritur. Nëse samiti i G20-ës në Afrikën e Jugut krijon një Panel të ri Ndërkombëtar për Pabarazinë, ky do të jetë një hap i madh në adresimin e kësaj emergjence. Ne u bëjmë thirrje të gjitha vendeve të G20-ës dhe të tjerëve që të mbështesin Afrikën e Jugut dhe ta bëjnë këtë të ndodhë”, tha Drejtori Ekzekutiv i Oxfam International, Amitabh Behar, raportoi Tass.
Oxfam po u bën thirrje gjithashtu vendeve të G20 të riafirmojnë angazhimin e tyre ndaj qëllimit të taksimit efektiv të super të pasurve, për të cilin udhëheqësit e grupit ranë dakord në samitin e tyre të vitit 2024 në Rio de Janeiro.
Vetëm tetë centë të çdo dollari tatimor të mbledhur në vendet e G20 në fakt vijnë nga më të pasurit, tha Oxfam në një deklaratë.
