Kryeministri Edi Rama është rikthyer në Universitetin Bujqësor të Tiranës, disa muaj pas arrestimeve që solli zbulimi i skemën korruptive në këtë universitet, për të cilin Rama ushtroi presion të hapur ndaj drejtësisë. Këtë herë, kryeministri vizitoi universitetin për t’ju bërë thirrje maturantëve që të studiojnë degët e Bujqësorit, në kushtet kur të rinjtë po largohen masivisht nga vendi dhe bujqësia e blegtoria janë drejt falimentit.
Syri TV
Disa muaj pasi mori në mbrojtje skemën korruptive në Universitetin Bujqësor të Tiranës dhe pasi i bëri presion drejtësisë për këtë çështje nga mbledhja e grupit parlamentar të PS-së, Kryeministri Edi Rama është rikthyer në këtë universitet për të parë ecurinë e bashkëpunimit me Universitetin BOKU të Vjenës.
Mesazhi i Kryeministrit kishte në fokus maturantët, të cilëve u bëri thirrje publike që të studiojnë në Universitetin Bujqësor, në kushtet kur jo vetëm të rinjtë po largohen masivisht nga vendi, por edhe bujqësia dhe blegtoria ndodhen në prag të falimentimit.
Ajo që e bëri edhe më qesharake vizitën e Kryeministrit në auditore, ishin deklaratat e Rektorit të Universitetit Bujqësor, Fatbardh Sallaku, i cili pak muaj më parë u thirr nga Rama në mbledhjen e grupit parlamentar të PS-së, për të justifikuar arrestimet në Universitetin Bujqësor, me akuzën e një dëmi prej 900 milionë lekësh.
Në përpjekje për t’i bërë lavde punës së Kryeministrit, rektori i Universitetit Bujqësor tregoi se si kishte lindur bashkëpunimi me Universitetin e Vjenës, duke e përshkruar telefonatën nga zyra e Kryeministrit si një “telefonatë hyjnore dhe të pabesueshme”.
Lajkat e rektorit duket se e vunë në siklet edhe vetë Edi Ramën, i cili nisi të tallet publikisht me rektorin Fatbardh Sallaku.
