Adriatik BALLA
Java e 32-të e Kategorisë Superiore mbyll dje me një disfatë të rëndë për Tiranën, e cila pasi u mund nga Elbasani 2-1 mbetet tashmë në vend të fundit të renditjes, me vetëm 32 pikë, duke qenë skuadra më e rrezikuar për të rënë nga kategoria. Kjo sidomos e frikshme bëhet kur kemi parasysh se janë edhe 4 xhiro deri në fund të garës dhe vendi i fundit bie automatikisht. Ndërkohë, dje ishte një tjetër ndeshje interesante, ajo që Egnatia bëri me Bylisin dhe që e fitoi 2-0. Kjo fitore e shkëputi edhe një herë tjetër Egnatian në krye të renditjes, duke u shfaqur si skuadër kryesore pretendente për titullin kampion, pavarësisht se për titullin do të luhet një fazë më vete mes katër ekipeve të para që njihet edhe si “Final Four”. Tri ndeshjet e tjera të kësaj xhiroje u luajtën të dielën pasdite, ku ra në sy barazimi i Vllaznisë dhe disfata e Dinamos, apo dhe kthimi tek fitorja e Partizanit menjëherë sapo e mori drejtimin Skënder Gega.
Egnatia se fal Bylisin, fiton dhe shkëputet në krye të renditjes
Egnatia rikthehet te fitorja në kampionat, pas 3 barazimesh radhazi, teksa ditën e sotme mposhti Bylisin me rezultatin 0-2 në duelin e zhvilluar në “Adush Muça”. Ky ishte triumfi i 16-të në 32 javë për rrogozhinasit e Edlir Tetovës, që iu falën golave të Lushkjes dhe Guindos. Ndërkohë në krahun tjetër, për Bylisin ishte humbja e 15-të, e cila e zbres në vendin e parafundit, me pikë të barabarta me Skënderbeun dhe Laçin. Në duelin e radhës Bylisi do të përballet me Vllazninë, ndërsa Egnatia pret Elbasanin. Rrogozhinasit tashmë kryesojnë me 58 pikë, 4 më shumë se Dinamo dhe 6 nga Vllaznia. Në fakt, në top-4 është dhe Partizani, fitorja e të cilit të dielën ndaj Laçit e riktheu në skenë, të paktën për të qenë në garë për titullin nëpërmjet “Final Four”, por në të njëjtën kohë edhe për ta parë minimalisht Partizanin në Europë. Si duket kjo do të jetë edhe ambicia e trajnerit Skënder Gega që mori drejtimin e “demave të kuq” pak ditë më parë.
Tirana bie edhe në Elbasan, tani rrezikon seriozisht rënien nga kategoria
Nëse ka një skuadër që rrezikon seriozisht rënien nga kategoria ajo është Tirana. Humbja e djeshme në Elbasan e vërteton këtë më së miri, për më tepër që bardhebluve do t’u duhet që në katër javët e fundit të mbetura në kampionat të marrin maksimumin për të shpëtuar, në të kundërt përsërisin atë që u ndodhi disa vite më parë kur u rrëzuan nga kategoria. Kurse Elbasani ka mbajtur gjallë shpresat për një vend në “Final Four” me një fitore dramatike në “Elbasan Arena” përballë Tiranës që lufton për mbijetesë. Tirana gjeti e para avantazhin dhe më pas u tërhoq duke menduar që të menaxhonte rezultatin deri në fund të sfidës. Por vendasit kërkuan me ngulm golin duke krijuar një mori rastesh para portës së Selmanit, derisa gjetën barazimin me Qosen. Furia e vendasve nuk u ndal dhe ata tentuan në çdo mënyrë të gjenin edhe golin e fitores, i cili erdhi në shtesë dhe përsëri nga Qose, i cili vulosi një sukses dramatik 2-1 që mban verdheblutë në garë për katërshen e parë, ashtu si edhe Tiranën në fundin e renditjes.
Java 32
Të dielën
Partizani-Laçi 1-0
Skënderbeu-Dinamo 4-1
Vllaznia-Teuta 0-0
Të hënën
Bylis-Egnatia 0-2
Elbasani-Tirana 2-1
Nr.Ekipi Pikë
1.Egnatia 58
2.Dinamo 54
3.Vllaznia 52
4.Partizani 47
5.Elbasani 43
6.Teuta 34
7.Laçi 33
8.Skënderbeu 33
9.Bylis 33
10.Tirana 32
