Lajmidites.com

Tag: regjisorit

  • “Kinemaja është magji” një dokumentar kushtuar jetës dhe veprës kinematografike të regjisorit Kristaq Mitro

    “Kinemaja është magji” një dokumentar kushtuar jetës dhe veprës kinematografike të regjisorit Kristaq Mitro

    Nga Julia Vrapi
    Kristaq Mitro një nga emrat e rëndësishëm dhe me ndikim në historinë e kinematografisë shqiptare, u përkujtua në 80-vjetorin e tij përmes dokumentarit “Cinema is Magic”. Si regjisor, ai i dha filmit shqiptar një dimension të ri artistik, emocional dhe vizual, duke u bërë pjesë e brezit krijues që e ngriti kinemanë në nivele të larta. Familjarë, miq e kolegë përkujtuan regjisorin, i cili u nda nga jeta dy vite më parë përmes dokumentarit  i realizuar nga studentë të tij. Kristaq Mitro nuk u mjaftua vetëm me krijimin e filmave, por punoi që talenti, pasioni dhe profesionalizmi të vazhdonin përmes nxënësve të tij. “Cinema is Magic” (Kinemaja është magji) dokumentari që u shfaq këto mbrëmje dhjetori në Tiranë dhe i realizuar nga studentët e tij vjen si një udhëtim i jashtëzakonshëm i regjisorit Mitro në kinematografinë shqiptare.
    Filmi dokumentar  me regji nga Dritan Mesareja që u shfaq mbrëmjen e së premtes kushtuar regjisorit Kristaq Mitro u prit me emocione të forta, kujtime dhe mirënjohje. Eliana Mitro bashkëshortja e regjisorit Kristaq  Mitro në mbrëmjen e premierës ndër të tjera theksoi faktin që filmi dokumentar “Cinema is Magic”është punuar me shumë dashuri dhe përkushtim. Ndërsa për të bijën e regjisorit Enida Mitro, dokumentari nuk është thjesht një material artistik, por një homazh i merituar për punën dhe kontributin e tij në kinemanë shqiptare. “U realizua më në fund një vepër, ku vlerësohet figura dhe vepra e tim eti. Ky film është një përmbledhje e të gjithë asaj që ai do të donte”, u shpreh Enida Mitro. Dokumentari “Cinema is Magis” me regji nga Dritan Mesareja pasqyron  vlerat dhe mesazhet që ai vetë i mbante thelbësore, por tregon dhe mënyrën si ai e shihte artin, njeriun dhe profesionin.
    Mevlan Shanaj: Imazhi i arritur ishte tipari dallues i Mitros  
    Regjisori Mevlan Shanaj një nga miqtë e Kristaq Mitros dhe i pranishëm në kinema në premierën e filmit dokumentar vlerëson nivelin profesional të “Cinema is Magic”, si në formë, strukturë, ashtu edhe në gjetjet artistike. Ndërsa për bashkëpunimin në kinematografi të regjisorëve të njohur Kristaq Mitro dhe Ibrahim Muçaj, regjisori dhe aktori Mevlan Shanaj shprehet se ishte një fenomen unik në kinemanë shqiptare. Shanaj thekson harmoni të rrallë artistike dhe profesionale mes tyre. Sipas tij, ky bashkëpunim solli frymë moderne në filmin shqiptar. “Një dokumentar i realizuar mjeshtërisht, si nga forma dhe gjetja artistike. Vendosja e rrëfimit përmes vetë regjisorit mbi punën profesionale e shumë konkrete mbi filmat e realizuar nga dyshja siameze Mitro- Muço apo Muço -Mitro. Bashkëpunimi i tyre i veçantë solli në ekranin shqiptar një kinema moderne.
    Të ftuarit e shumtë plotësuan qëllimin e regjisorit si një bisedë në vazhdim të monologut të Mitros, duke theksuar tiparin më të dukshëm të tij. Imazhi i arritur ishte tipari dallues i Mitros, që në dokumentar u konkretizua me materialet e përzgjedhura mençurisht nga regjisori Mesareja, duke filluar nga filmi i parë “Dimri i fundit” që më 1976 e vendosi dyshen regjisoriale ndër sukseset të ekranit. Standardi i vendosur sipas meje arriti nivelin më të spikatur në ndërtimin filmik me “Nusja dhe shtetrrethimi”. Kështu në zbërthimin e jetës artistike regjisori Mitro erdhi si një figurë e plotësuar e një profesionisti elitar dhënë mjeshtërisht edhe përmes montimit të D.Markja. Hap pas hapi kujtim pas kujtimi filmi u mbyll me emocione njerëzore edhe familjare, duke na dhënë mesazhin e qartë se vepra e regjisorëve, në këtë rast e Mitros ishte një dëshmi si pasuri kombëtare vetëm e çmuar dhe erdhi edhe si një porosi për ta mbrojtur veprën filmike me përkushtim, ashtu siç kishte bërë Mesareja me këtë dokumentar të arritur”, shprehet regjisori Mevlan Shanaj.

    Skënder Jaçe: Filma që i kanë rezistuar kohës
    Filmat që sollën në ekranin e kinemasë regjisorët Kristaq Mitro e Ibrahim Muçaj i kanë rezistuar kohës. Mitro dhe Muçaj janë një dyshe regjisoriale, që sollën modernitet, realizëm, estetikë të lartë dhe personazhe të paharrueshëm në kinemanë shqiptare. Filma që janë pjesë e pasurisë sonë kombëtare, duke treguar dhe përkushtimin e punës së tyre me kinematografinë. Skënder Jaçe producent nënvizon se vlerat artistike të filmave që realizuan Kristaq Mitro dhe Ibrahim Muçaj nuk janë zbehur pavarësisht viteve. “Filmat e dyshes simpatike Kristaqit dhe Ibrahimit, i rezistojnë kohës. Kristaq Mitro ka qenë i kujdesshëm në zgjedhjen e karaktereve të aktorëve, duke na sjellë personazhe real. Ai ka kushtuar vëmendje fotografisë në kuadër me një sfond bardhë e zi si te filmi “Nusja dhe shtetrrethimi”, apo “Dimri i fundit” dhe “Tokë e përgjakur”. Ishte një regjisor me një intuitë artistike dhe këmbëngulës në realizimin e veprës”, shprehet Skënder Jaçe.
    “Cinema is Magic” një dokumentar kushtuar Kristaq Mitros, si një nga regjisorët që i kanë dhënë emër kinemasë shqiptare në një vizion të ri vjen i ndërtuar edhe përmes disa rrëfimeve për të nga miq dhe kolegë të tij, si regjisorët Piro Milkani , Esat Musliu e Mevlan Shanaj apo dhe Ilir Butka, etj, si dhe aktorët Timo Flloko, Rajmonda Bulku, Kastriot Çaushi e Bujar Asqeriu. Për producentin Skënder Jaçe dokumentari kushtuar Kristaq Mitros vjen si një realizim me cilësi të lartë estetike dhe regjisoriale. Sipas tij “Cinema is Magic” vjen si një realizim artistik që tregon me emocion punën e Kristaq Mitros, ndërsa respekton dhe nderon edhe rolin e Ibrahim Muçajt si bashkëpunëtor dhe regjisor. “Një dokumentar i arrirë nga ana artistike, me një montazh që ruante ritmin në mënyrë të harmonizuar, duke mos e lënë spektatorin të lodhet në kuadër.
    Filmi përcjell me nota emocionuese punën e bukur të regjisorit Kristaq Mitro, duke respektuar dhe kolegun e tij të paharruar Ibrahim Muçaj”, shprehet Skënder Jaçe producent filmash. Nga bashkëpunimi Kristaq Mitro dhe Ibrahim Muçaj u realizuan 13 filma artistikë, ku “Dimri i fundit”, “Tokë e përgjakur”, “Njeriu i mirë”, “Duaje emrin tënd”, “Liri a vdekje”, “Nusja dhe shtetrrethimi”, “Telefoni i një mëngjesi”, “Apasionata” janë vetëm disa prej tyre. Kristaq Mitro u nda nga jeta në prill 2023, por për disa vite me radhë kontributi i  tij ishte edhe si pedagog pranë Akademisë të Arteve në degën Regji-Filmi.

     
     
     
     
     

  • Dokumentari “Jeta si një film-Piro Milkani” kushtuar mjeshtrit të madh të kinemasë shqiptare

    Dokumentari “Jeta si një film-Piro Milkani” kushtuar mjeshtrit të madh të kinemasë shqiptare

    Rinia e studimeve në Pragën e bukur apo dhe momentet kyçe të karrierës në kinematografi janë vetëm një pjesë e asaj çfarë sjell dokumentari “Jeta si një film-Piro Milkani”. Premiera e filmit dokumentar “Jeta si një film-Piro Milkani” në kinema Millennium në Tiranë ishte dhe si një homazh artistik kushtuar mjeshtrit të madh të kinemasë shqiptare.
    Një dokumentar, që ndalet në rrugëtimin e tij të jashtëzakonshëm, nga ditët e para në Kinostudio, tek krijimet që lanë gjurmë. Një nga producentët  Skënder  Jaçe ndërsa shprehet për dokumentarin vlerëson shumë dhe kontributin e  madh të regjisorit Piro Milkani në kinematografinë shqiptare. “Një rrugëtim i bukur artistik që vjen natyrshëm nga rrëfimi emocional i regjisorit tonë të shquar “Artistit të Popullit” , Piro Milkani. Ai la pas një pasuri dhe vlerë kombëtare në kinematografinë shqiptare”, shprehet Skënder Jaçe. Premiera e filmit dokumentar u shfaq në kinema me praninë e familjarëve të regjisorit Piro Milkani, artistëve të ndryshëm, përfaqësues të institucioneve e më gjerë. Nga të pranishmit filmi u prit me shumë interes, një vlerësim dhe për punën e bërë për realizimin e tij. Dokumentari “Jeta si një film”, prodhuar nga “Cinemania” producent Jaklid Gaçen, skenarist Bashkim Hoxha, regjia është nga Rigers Plaka, Marviks Shantoja, kamera Toni Qelemeni, montazh dhe grafi Enea Pjerza dhe producent ekzekutiv Skënder Jaçe dhe është financuar nga Qendra Kombëtare e Kinematografisë e Bashkia Tiranë. Ajo që e bën këtë film dokumentar të veçantë është zëri i vetë regjisorit Piro Milkani, i përdorur si një element rrëfyes, një narrator që udhëheq publikun nëpër kujtime, emocione dhe reflektime. Piro Milkani, krijoi dhe kontribuoi në kinematografinë shqiptare për mbi gjysëm shekulli.
    Gjithë jetën e tij, i’a dedikoi kinematografisë, audiovizualit dhe edukimit të brezave të rinj, duke lënë pas vepra cilësore e të dashura për publikun brenda e jashtë vendit. Piro Milkani u nda nga jeta në moshën 86-vjeçare.

  • “Kohë në pentagram”, mbrëmja gala në nder të regjisorit Nikolin Gurakuqi për 70-vjetorin e lindjes

    “Kohë në pentagram”, mbrëmja gala në nder të regjisorit Nikolin Gurakuqi për 70-vjetorin e lindjes

    “Kohë në Pentagram” është shfaqja që fton publikun këtë të shtunë në një mbrëmje gala në nder të regjisorit Nikolin Gurakuqi në 70-vjetorin e lindjes.

    Mjeshtri i Madh rikthehet në Teatrin e Operas dhe Baletit, aty ku është lidhur shpirtërisht që në fëmijëri kur këtë skenë ia prezantoi i ati, regjisori Luigj Gurakuqi dhe ku më pas ndoqi të njëjtin rrugëtim artistik.
    Teatri i Operas është esenca e jetës për Nikolin Gurakuqin, që me modestinë që e karakterizon, e cilëson këtë mbrëmje një festë mes kolegëve dhe artdashësve.
    “Kjo është një festë e institucionit, këtu festohen sukseset e institucionit, edhe kolegëve i kam thënë ‘mblidhuni për të festuar si teatër, këtë herë sebepi jam unë, nesër do të jetë dikush tjetër”, është shprehur regjisori Nikolin Gurakuqi.
    Gurakuqi i dha jetë mbi 80 produksioneve operistike, duke sjellë në skenën shqiptare vizion bashkëkohor dhe ndjeshmëri të thellë dramatike.
    “Nikolini nuk është vetëm një regjisor, por është një personazh. Duke qenë vetë këngëtar, ai ka ndërtuar personazhet, i ka prekur personazhet, si nëpërmjet kantos, po ashtu edhe nëpërmjet anës regjisoriale të tij, duke skalitur çdo tip, çdo karakter”, tha dirigjenti Dritan Lumshi.
    Vepra të mëdha si “Tosca”, “Carmen”, “Aida”, “Otello”, “Një ballo me maska”, “Goca e Kaçanikut” mbajnë firmën e tij regjisoriale, por cila është e preferuara e tij?
    “Kur janë shumë vepra, e ke të vështirë të zgjedhësh, por do të veçoja operën ‘Aida’ dhe ‘Turandot’ dhe një tjetër vepër me një personazh, që është opera ‘Zëri njerëzor’, që e kam vënë në skenë me Edit Mihalin”, tha Gurakuqi.
    Pas 5 dekadave krijimtari, nuk ka ndër mend të ndalet, dhe zbulon dëshirën për të sjellë një tjetër vepër, që e lë surprizë për publikun.
    “Ia kam vënë syrin, por mbetet për t’u parë”.
    Nën drejtimin muzikor të maestro Edmond Doko dhe Dritan Lumshi, publiku do të udhëtojë përmes kryeveprave të repertorit botëror si Verdi, Puccini, Bizet e Rossini.
     
     

    Top Channel

  • Ndarja nga jeta e aktorit dhe regjisorit Enver Petrovci, Rama: Keqardhje e madhe

    Ndarja nga jeta e aktorit dhe regjisorit Enver Petrovci, Rama: Keqardhje e madhe

    Kryeministri Edi Rama ka reaguar në rrjetet sociale për ndarjen nga jeta të aktorit e regjisorit të mirënjohur, Enver Petrovci. 
    “Aktor i jashtëzakonshëm, njeri i dashur dhe keqardhje e madhe… Prehu në paqe Enver Petrovci”,- shkruan kreu i qeverisë në rrjetet sociale. 

    Është shuar sot (22 shtator) në moshën 71-vjeçare ikona e filmit dhe teatrit, Enver Petrovci. 
    Enver Petrovci lindi më 28 shkurt 1954 në Prishtinë. Ishte aktor dhe regjisor. Fillimisht ai studioi në Shkollën e Lartë Pedagogjike në Prishtinë në degën e aktrimit, më pastaj mbaroi studimet Universitare për aktor edhe në Fakultetin e Arteve Dramatike në Universitetin e Beogradit. 
    Gjatë karrierës së tij të hershme, Petrovci u bë i njohur në gjithë ish-Jugosllavinë, sidomos për interpretimet e tij në Teatrin “Atelje 212” në Beograd, ku u vlerësua si një ndër aktorët më të shquar të kohës. 
     

  • “U shua një yll”/ Ndarja nga jeta në moshën 89-vjeçare të regjisorit Anagnosti, Presidenti Begaj mesazh ngushëllues

    “U shua një yll”/ Ndarja nga jeta në moshën 89-vjeçare të regjisorit Anagnosti, Presidenti Begaj mesazh ngushëllues

    Presidenti i Republikës, Bajram Begaj, mori pjesë sot në ceremoninë e homazheve të lamtumirës së fundit ndaj regjisorit dhe personalitetit të kinematografisë shqiptare, Dhimitër Anagnosti.
    Kreu i Shtetit vendosi kurorën me lule në arkëmortin e Dhimitër Anagnostit, si dhe i shprehu ngushëllime bashkëshortes së tij, artistes Roza Anagnosti, dhe familjarëve.
    Begaj e cilësoi ndarjen nga jeta të regjisorit Anagnosti si shuarjen e një ylli nga plejada e artistëve të mëdhenj shqiptarë, ndërsa u shpreh se arti i tij do të vazhdojë të magjepsë shqiptarët.
    Në respekt të ditës së zisë kombëtare për ndarjen nga jeta të artistit Dhimitër Anagnosti, Institucioni i Presidentit të Republikës uli këtë të martë flamurin kombëtar në gjysmë shtizë.

  • Homazhe në TKOB në nder të Dhimitër Anagnostit, regjisori do të prehet në vendin e lindjes

    Homazhe në TKOB në nder të Dhimitër Anagnostit, regjisori do të prehet në vendin e lindjes

    Këtë të martë, janë zhvilluar homazhe në nder të regjisorit të mirënjohur Dhimitër Anagnosti. Familjarë, miq, kolegë, bashkëpunëtorë, figura të shumta të artit, kinemasë e politikës kanë nderuar figurën e të ndjerit Anagnosti. Kryeministri Edi Rama, ministri i Kulturës Blendi Gonxhja, Ministrja e Shtetit për Rininë dhe Fëmijët, Bora Muzhaqi, Ministri i Shtetit për Marrëdhëniet me Parlamentin, Taulant Balla, kryedemorkati Sali Berisha, Presidenti Bajram Begaj i shoqëruar nga Zonja e Parë, Ministrja e Turizmit, Mirela Kumbaro kanë kryer homazhet në Hollin e Teatrit të Operas dhe Baletit në nderim të figurës së arkitektit të kinematografisë shqiptare.
    Ditën e mërkurë (3 shtator) do të bëhet përcjellja e regjisorit Anagnosti për në banesën e fundit, në vendin e lindjes, në Vuno të Himarës.
    Berisha: Ditë zie për artin, do mbahet mend gjithmonë në memorien e kombit
    Ditë zie për artin e konsideron Kryedemokrati Sali Berisha ndarjen nga jeta të “Nderit të Kombit” Dhimitër Anagnosti.
    Ndërsa shpreh ngushëllimet për familjen e regjisorit të ndjerë, Berisha shprehet se veprat dhe krijimtaria e Anagnostit do të jetojë gjatë në memorien e kombit shqiptar.
    “Sot është një ditë e rëndë, ditë zie për artin, filmin kulturën e shqiptarëve, pasi përcjellim për në banesën e fundit një kolos të vërtetë të gjinisë krijuese artistike të kombit shqiptar, Dhimitër Anagnosti.
    Ishte, është, njëri prej krijuesve regjisorëve, skenaristëve shkrimtar, më të shquar të vendit. Lë një trashëgimi në të cilën ai do jetojë për jetë të jetëve. Anagnosti ishte i pamëshirë në kërkim të përsosmërisë artistike në veprën e tij. Ai që në vitet ’90 me emrin, reputacionin e tij u angazhua në mbështetje të përmbysjes së diktaturës dhe forcave demokratike. Në dy legjislatura ishte deputet i PD-së dhe ministër kulture. Një personalitet i rrallë, i cili do mbahet mend gjithmonë në memorien e kombit. U shpreh ngushëllimet e mia më të ndjera Rozës, artistes së mrekullueshme, familjes së tij, miqve e kolegëve”, tha Berisha, pas homazheve ndaj regjisorit të ndjerë dhe mesazhit të lënë në Librin e Përshtypjeve.
    Aktorja Ljarja: Filmat e mjeshtrit Anagnosti do të jenë të paharruar
    Aktorja Marjeta Ljarja i shprehu ngushëllime familjarëve të regjisorit të ndjerë, ndërsa deklaroi se veprat e Dhimitër Anagnostit do të jenë të paharruara.
    “E kam njohur shumë mirë Taon, rozën. Ka qenë mjeshtër, më vjen keq që largohet dhe po lë kaq shumë gjera që vetëm harresës mund të jetë mbi këtë emër dhe mbi këtë mjeshtër. Njeri serioz, këmbëngulës, pasionant. Filmat e tij do jenë të paharruar. Me Rikardin ka qenë mik i veçantë. I përjetshëm qoftë kujtimi i tij! Nuk do të harrohet”, tha ajo.
    Ministri Gonxhja: Korifeu i regjisë iku fizikisht, thesarin e la pas
    Ministri i Kulturës, Blendi Gonxhja shprehu keqardhjen për ndarjen nga jeta të korifeut të regjisë, ndërsa shtoi se trashëgimia që la pas, do kujtohet nga të gjithë brezat.
    “Vërtet ndahet fizikisht një baba i kinemasë, një korife i regjisë, i artit, por është një ndarje që lë pas një thesar, një trashëgimi për të gjithë brezat, për jetën dhe veprën e tij, për t’u mbajtur mend përgjithmonë. I jemi këtu pranë yllit të tij, Roza Anagnostit, familjes, më të dashurve të tij, për t’i shprehur këtë përulje dhe këtë mirënjohje vërtet të thellë dhe shumë të lartë”, tha Gonxhja, pas homazheve të kryera ndaj regjisorit të ndjerë.
    Timo Flloko: Korifeu i artit shqiptar do mbetet i paharruar ngahera
    Aktori i mirënjohur Timo Flloko ka shprehur gjithashtu ngushëllimet për ndarjen nga jeta të atij që e cilësoi si korifeun e artit shqiptar, Dhimitër Anagnosti. Flloko deklaroi se regjisori i ndjerë “do të jetojë” gjithnjë.
    “Në Kinostudio shpërtheu kur pa një provë timen dhe tha: kamera. Dhe ne e xhiruam atë skenë.
    Ato vargje të Nolit, ai ligjërim, ai shpërthim i takojnë atij sot si një homazh final. Ai është përherë këtu mes nesh, është korfie i artit shqiptar dhe do mbetet i paharruar ngahera”, tha Flloko.
    Dhimitër Anagnosti u nda nga jeta ditën e djeshme (1 shtator) në moshën 89-vjeçare duke lënë në pikëllim jo vetëm familjen e tij, por të gjithë artëdashësit.
    Në nderim të regjisorit të njohur Dhimitër Anagnosti, Qeveria shqiptare ka vendosur këtë të martë të shpallë ditë zie kombëtare datën 2 shtator. Në të gjithë vendin, flamujt do të ulen në gjysmështizë, ndërsa institucionet shtetërore do të zhvillojnë homazhe për nder të figurës së tij.
    Dhimitër Anagnosti lindi në 23 janar 1936 në fshatin Vuno të Himarës. Studimet e larta i kreu në Institutin Kinematografik – VGIK, Moskë (1954-1960), ku u diplomua për kinooperator.
    Anagnosti ishte një prej themeluesve dhe figurave më të rëndësishme të kinemasë shqiptare, me shumë filma artistikë dhe dokumentarë që trajtojnë tema të rëndësishme shoqërore, historike dhe psikologjike. Anagnosti dha një kontribut të jashtëzakonshëm edhe si regjisor, skenarist, shkrimtar dhe më vonë si politikan. Skenarët e pothuajse të gjithë filmave të tij ai i shkroi vetë.
    Në karrierën e tij 40-vjeçare, Anagnosti realizoi 14 filma artistikë, 10 filma dokumentarë, fitoi mjaft çmime në konkurse të ndryshme kombëtare e ndërkombëtare. Ai u nderua me titullin “Nderi i Kombit” nga Presidenti Bamir Topi në vitin 2011, si një nga regjisorët më të shquar të inematografisë shqiptare.
    Ndër filmat e tij më të njohur janë “Lulëkuqet mbi mure”, “Përrallë nga e kaluara”, “Kthimi i ushtrisë së vdekur”, “Gurët e shtëpisë sime”, “Gjoleka, djali i Abazit”, me të cilin u nderua me dy çmime ndërkombëtare në Itali.
     

  • Homazhe në nderim të regjisorit të madh, lamtumirë Dhimitër Anagnosti

    Homazhe në nderim të regjisorit të madh, lamtumirë Dhimitër Anagnosti

    I jepet sot lamtumira e fundit regjisorit Dhimitër Anagnosti, i cili u nda nga jeta një ditë më parë. Në nderim të tij qeveria ka shpallur këtë të martë, ditë zie kombëtare. Personaliteti i shquar i kinematografisë shqiptare, mjeshtër i ekranit dhe i artit skenik, ndërroi jetë në moshën 89-vjeçare, duke lënë pas një trashëgimi të çmuar kinematografike për brezat.
    Në hollin e Teatrit të Operas dhe Baletit po zhvillohen sot homazhet në nderim të regjisorit të shquar Dhimitër Anagnosti, një prej themeluesve dhe figurave më të rëndësishme të kinemasë shqiptare.
    Qytetarë të shumtë, kolegë, miq dhe personalitete nga fusha e artit, kulturës dhe jetës publike po i japin lamtumirën e fundit mjeshtrit të ekranit, i cili u nda nga jeta një ditë më parë.
    Homazhet nisën në orën 10:00 dhe do të vijojnë deri në orën 13:00. Më pas arkëmorti me trupin e të ndjerit do të përcillet për në banesën e fundit, në vendlindjen e tij në Vuno të Himarës.
    Ndërkohë Këshilli i Ministrave ka shpallur ditë zie kombëtare datën 2 shtator 2025, në nderim të regjisorit të shquar Dhimitër Anagnosti.
    Dhimitër Anagnosti lindi më 23 janar 1936 në Vuno të Himarës. Studimet e larta i kreu në Institutin Kinematografik VGIK, Moskë (1954-1960), ku u diplomua për kinooperator. Me një karrierë mbi katër dekada, Anagnosti dha një kontribut të jashtëzakonshëm si regjisor, skenarist, shkrimtar dhe pedagog, duke lënë gjurmë të pashlyeshme në kinematografinë shqiptare.
    Ai realizoi 14 filma artistikë dhe 10 dokumentarë, duke trajtuar tema të rëndësishme shoqërore, historike dhe psikologjike. Shumë prej skenarëve i hartoi vetë, duke dëshmuar një talent të gjithanshëm. Ndër veprat e tij më të njohura janë “Lulëkuqet mbi mure”, “Përrallë nga e kaluara”, “Kthimi i ushtrisë së vdekur”, “Gurët e shtëpisë sime” dhe “Gjoleka, djali i Abazit”, filmi me të cilin fitoi dy çmime ndërkombëtare në Itali.
    Anagnosti u nderua me një sërë çmimesh kombëtare e ndërkombëtare. Në vitin 2011 mori titullin e lartë “Nderi i Kombit” nga Presidenti i Republikës.

  • Homazhet për Anagnostin, Rama shfaqet i vetëm në ceremoni

    Homazhet për Anagnostin, Rama shfaqet i vetëm në ceremoni

    edi rama

    TIRANË- Kanë nisur në ambientet e Teatrit të Operas dhe Baletit homazhet në nderim të regjisorit Dhimitër Anagnosti, i cili u nda nga jeta një ditë më parë në moshën 89-vjeçare. Ndër të parët që kreu homazhe në nderim të regjisorit, që cilësohet si babai i kinematografisë shqiptare, ishte dhe kreu i qeverisë Edi Rama. Kryeministri u shfaq i vetëm, teksa shprehu ngushëllimet për familjarët dhe shkroi në librin e kujtimeve. Më herët Këshilli i Ministrave vendosi që 2 Shtatori të shpallej ditë zie në nderim të regjisorit, ndërsa flamujtë do të qëndrojnë në gjysmështizë.
    Pjesë e homazheve, që do të vijojnë deri në orën 13:00 janë bërë dhe një sërë personalitetesh të artit dhe kinematografisë shqiptarë, ndërsa Anagnosti do të prehet në vendlindje, në fshatin Vuno. Ka qenë amaneti i tij që banesa e fundit të jetë pikërisht fshati i lindjes së regjisorit.
    Kush ishte Dhimitër Anagnosti
    Në karrierën e tij 40-vjeçare ka realizuar 14 filma artistikë, 10 filma dokumentarë, fitoi mjaft çmime në konkurse të ndryshme kombëtare e ndërkombëtare. Është autor i 15 skenarëve dhe pothuajse në të gjithë filmat e tij skenarin e ka shkruar vetë. 
    Shkollën fillore e kreu në fshatin e lindjes dhe shkollën unike dhe të mesme të përgjithshme i kreu në Vlorë. Më 1954 – 1960 ndoqi Institutin Kinematografik “VGIK” të Moskës, ku u diplomua për kinooperator. Së bashku me Viktor Gjikën xhiruan si punë diplome filmin “Njeriu kurrë nuk vdes”, një ekranizim i tregimit të Ernest Heminguejt, i cili u vlerësua me Çmimin e Parë në Festivalin Botëror të Shkollave Kinematografike, që u zhvillua në Holandë më 1961.
    Filloi punë si operator në Kinostudion “Shqipëria e re” në 1961, me filmin “Debatik” (1961) e më pas me filmin “Toka jonë” (1964). Xhiroi edhe të parin film dokumentar me ngjyra “Gurët dekorativë”. Filmin e parë si regjisor e realizoi në vitin 1966, së bashku me Viktor Gjikën, “Komisari i dritës” dhe një vit më vonë i vetëm si regjisor filmin “Dueli i heshtur”.
    Për cilësitë e tij të rralla artistike, si dhe për veprat e tij dinjitoze është nderuar me titullin “Artist i Popullit”, 1987 dhe me kupën e karrierës në Festivalin e 10të Filmit Shqiptar. Viti 1991 e gjen të impenjuar në lëvizjen demokratike për pluralizmin në Shqipëri, motiv për të cilin zgjidhet edhe deputet i Partisë Demokratike në Kuvendin e Shqipërisë (1991-1996). Në 12 prill 1992 u emërua ministër i Kulturës, Rinisë dhe Sporteve, post të cilin e mbajti deri në 4 dhjetor 1994, ku dha dorëheqjen.
    Anagnosti ishte ideator dhe kryetar i Fondacionit për Artin dhe Kulturën “Fan Noli”, duke mbështetur intelektualët më aktivë, duke u impenjuar në forcimin e kulturës shqiptare në vend e në botë.
    Anagnosti ishte i martuar me aktoren e mirënjohur të skenës dhe ekranit shqiptar, “Artisten e Merituar” Roza Anagnosti./ZËRI

  • Nderimet për regjisorin- I jepet lamtumira Dhimitër Anagnostit, 2 shtatori shpallet ditë zie kombëtare

    Nderimet për regjisorin- I jepet lamtumira Dhimitër Anagnostit, 2 shtatori shpallet ditë zie kombëtare

    Dhimitër Anagnosti

    TIRANË-Sot i jepet lamtumira e fundit regjisorit Dhimitër Anagnosti. Ai do të përcillet për në banesën e fundit, në Vuno të Himarës, vendlindjen e tij. Homazhet në nder të regjisorit të shquar Dhimitër Anagnosti do të zhvillohen sot, 2 shtator, në Hollin e Teatrit të Operës dhe Baletit, nga ora 10:00 deri në 13:00. Ministria e Ekonomisë, Kulturës dhe Inovacionit informoi se ceremonia do të ketë karakter shtetëror dhe do të jetë e hapur për publikun.
    Data 2 shtator është shpallur ditë zie kombëtare në nderim të Dhimitër Anagnostit, regjisorit të madh që u nda nga jeta në moshën 89-vjeçare.

    Regjisori i njohur, Dhimitër Anagnosti u nda nga jeta ditën e djeshme (1 shtator) në moshën 89-vjeçare. Lajmin e trishtë e bëri me dije vajza e tij, Juna Anagnosti përmes një postimi në rrjete sociale. 

    Kush ishte Dhimitër Anagnosti
    Në karrierën e tij 40-vjeçare ka realizuar 14 filma artistikë, 10 filma dokumentarë, fitoi mjaft çmime në konkurse të ndryshme kombëtare e ndërkombëtare. Është autor i 15 skenarëve dhe pothuajse në të gjithë filmat e tij skenarin e ka shkruar vetë. 
    Shkollën fillore e kreu në fshatin e lindjes dhe shkollën unike dhe të mesme të përgjithshme i kreu në Vlorë. Më 1954 – 1960 ndoqi Institutin Kinematografik “VGIK” të Moskës, ku u diplomua për kinooperator. Së bashku me Viktor Gjikën xhiruan si punë diplome filmin “Njeriu kurrë nuk vdes”, një ekranizim i tregimit të Ernest Heminguejt, i cili u vlerësua me Çmimin e Parë në Festivalin Botëror të Shkollave Kinematografike, që u zhvillua në Holandë më 1961.
    Filloi punë si operator në Kinostudion “Shqipëria e re” në 1961, me filmin “Debatik” (1961) e më pas me filmin “Toka jonë” (1964). Xhiroi edhe të parin film dokumentar me ngjyra “Gurët dekorativë”. Filmin e parë si regjisor e realizoi në vitin 1966, së bashku me Viktor Gjikën, “Komisari i dritës” dhe një vit më vonë i vetëm si regjisor filmin “Dueli i heshtur”.
    Për cilësitë e tij të rralla artistike, si dhe për veprat e tij dinjitoze është nderuar me titullin “Artist i Popullit”, 1987 dhe me kupën e karrierës në Festivalin e 10të Filmit Shqiptar. Viti 1991 e gjen të impenjuar në lëvizjen demokratike për pluralizmin në Shqipëri, motiv për të cilin zgjidhet edhe deputet i Partisë Demokratike në Kuvendin e Shqipërisë (1991-1996). Në 12 prill 1992 u emërua ministër i Kulturës, Rinisë dhe Sporteve, post të cilin e mbajti deri në 4 dhjetor 1994, ku dha dorëheqjen.
    Anagnosti ishte ideator dhe kryetar i Fondacionit për Artin dhe Kulturën “Fan Noli”, duke mbështetur intelektualët më aktivë, duke u impenjuar në forcimin e kulturës shqiptare në vend e në botë.
    Anagnosti ishte i martuar me aktoren e mirënjohur të skenës dhe ekranit shqiptar, “Artisten e Merituar” Roza Anagnosti./ZËRI

  • Nesër në TKOB, homazhet për Dhimitër Anagnostin

    Nesër në TKOB, homazhet për Dhimitër Anagnostin

    Homazhet në nder të regjisorit Dhimitër Anagnosti do të zhvillohen ditën e martë, datë 2 shtator, në Hollin e Teatrit të Operës dhe Baletit. Ishte e bija e regjisorit të ndjerë, Juna Anagnosti e cila shkroi në profilin e saj në rrjetet sociale për organizimin e homazheve në TKOB, prej orës 10.00 – 13.00.

    Regjisori i shquar i kinematografisë shqiptare, Dhimitër Anagnosti, mbylli sytë përgjithmonë, ditën e sotme, pas një sëmundjeje të gjatë. Më herët, e bija, shkroi online “Lamtumirë Dhimitër Anagnosti, regjisori i jetës sonë! Pas një lëngimi të gjatë iu binde ligjit të jetës. Lamtumirë babush!”

    Në respekt të thellë, ndaj figurës së shquar e trashëgimisë që la pas Anagnosti, intitucione dhe personalitete të shumta reaguan fill pas këtij lajmi të hidhur./atsh/KultPlus.com