Policia e Shtetit, gjatë muajit shtator 2025
Punë operacionale intensive kundër kultivimit, shitjes dhe trafikimit të narkotikëve; armëmbajtjes pa leje, vjedhjes, krimeve mjedisore dhe krimeve ekonomike e kibernetike, në funksion të objektivit madhor: garantimin e sigurisë së qytetarëve.
Gjatë muajit shtator:
U finalizuan 114 operacione policore, nga të cilat 21 prej tyre në bashkëpunim me partnerët, për lokalizimin, kapjen dhe ekstradimin e shtetasve të shpallur në kërkim ndërkombëtar;
U vunë në pranga 619 shtetas, të dyshuar për vepra penale të ndryshme;
U asgjësuan 44 671 bimë narkotike, si dhe u sekuestruan rreth 178 kg cannabis, rreth 737 gramë kokainë, dhjetëra doza të këtyre lëndëve, si dhe 30 fara cannabisi;
– Policia e Tiranës goditi 2 raste të trafikimit nga Spanja dhe nga Kanadaja, të rreth 7.6 kg cannabis me përqindje të lartë THC-je;
U sekuestruan 34 armë zjarri, të cilat u kapën në tentativë për t’u shitur ose trafikuar, me qëllim kryerjen e krimeve kundër personit; 13 armë gjahu, 26 armë të ftohta, 3 silenciatorë dhe municion luftarak;
– Në këtë kuadër, policitë e Shkodrës dhe Tiranës zbuluan ambiente të vëna në dispozicion të grupeve kriminale, përkatësisht në lagjen “Guerrile” dhe në rrugën “Myslym Keta”. Bazat kriminale ruanin, për llogari të grupeve, armë zjarri dhe lëndë narkotike;
Ndërhyrja e menjëhershme e Policisë parandaloi përshkallëzimin e konflikteve me armë, me mjete prerëse apo konflikte në familje, në 9 raste;
Si rezultat i hetimeve profesionale, u zbardhën 11 ngjarje kriminale, si: vrasje, tentativë për vrasje, plagosje, djegie automjeti dhe heqje e paligjshme e lirisë;
Strukturat për hetimin e krimeve ekonomike, në bashkëpunim me strukturat e Policisë Kufitare, kanë goditur 10 raste të kontrabandës, 2 raste të mashtrimit me shuma të konsiderueshme parash, si dhe 14 raste të falsifikimit të dokumenteve, vizave dhe kartëmonedhave;
– Po nga strukturat për hetimin e krimeve ekonomike e financiare, u zbulua se në një spital privat në kryeqytet kryhej evazion fiskal dhe punësim i kundërligjshëm;
– Gjithashtu, u sekuestruan 13 pasuri të paluajtshme, 5 llogari bankare dhe 1 automjet “Ferrari”, me vlerë 3.6 milionë euro, të dyshuara të përfituara nga krimet;
Drejtoria për Hetimin e Krimeve Kibernetike dhe seksionet e saj në qarqe goditën krijimin e skemave piramidale në hapësirën virtuale, 1 rast të pornografisë me të mitur dhe raste të kanosjes nëpërmjet rrjeteve sociale;
Agjencitë ligjzbatuese amerikane pranë Ambasadës kontribuan për goditjen e një rrjeti kriminal që iu merrte shtetasve mijëra euro, për t’i çuar ilegalisht në SHBA ose Kanada;
– Policia e Korçës finalizoi gjithashtu një operacion kundër transportimit të kundërligjshëm të emigrantëve;
Më tej, u finalizuan:
– 20 operacione kundër vjedhjes;– 3 operacione kundër organizimit të kundërligjshëm të lojërave të fatit;– 1 operacion në favor të sigurisë ushqimore;
U goditën 175 raste të ndërtimeve të paligjshme në të gjithë vendin;
U proceduan penalisht 18 shtetas që penguan me mjetet e tyre lëvizjen e qytetarëve dhe të mjeteve të tjera;
Gjatë muajit shtator nisi zbatimi i Paketës për Sigurinë në Shkolla dhe programeve “Siguria e të rinjve”;
Në bazë të eksperiencës së fituar për sa i përket menaxhimit të eventeve ndërkombëtare, dhe në zbatim të detyrave të përcaktuara në një plan masash të detajuar, gjatë muajit shtator u garantua mbarëvajtja e ndeshjes së futbollit “Shqipëri–Letoni”;
Shërbimet e Policisë Rrugore, të pajisura me mjete bashkëkohore, kanë vijuar kontrollet në të gjitha akset e vendit, me qëllim konstatimin e shkeljeve rrugore që rrezikojnë jetën e përdoruesve të rrugës.
Në këtë kuadër:
– janë vënë në pranga 197 drejtues mjetesh, nga të cilët 128 për drejtim mjeti në gjendje të dehur dhe 69 për drejtim mjeti pa leje drejtimi;– janë pezulluar 329 leje drejtimi, për tejkalim të normave të shpejtësisë, drejtim mjeti nën ndikimin e alkoolit apo për shkelje të tjera të Kodit Rrugor, për të cilat parashikohet kjo masë;– janë vënë 20 714 masa administrative për shpejtësi mbi normën e lejuar, me sanksion pezullimin e lejes së drejtimit. Në këto raste, drejtuesit e automjeteve kanë paguar dyfishin e gjobës maksimale dhe janë penalizuar me zbritje nga 6 deri në 12 pikë nga leja e drejtimit. Shërbimet e Policisë Kufitare kanë intensifikuar kontrollet, me objektiv goditjen e paligjshmërive në kufi dhe tentativave për lëvizje të paligjshme.
U dha ndihmë në det, në zonat turistike e malore, 35 shtetasve, kryesisht turistë e vizitorë të huaj, që kishin mbetur të bllokuar, rrezikoheshin nga dallgët apo kishin humbur orientimin për t’u kthyer në destinacion;
21 mjete lundruese u bllokuan pasi drejtuesit e tyre shkelën rregullat për pajisjen me dokumentacion dhe për sigurinë e pushuesve.
Janë evidentuar dhe goditur:– 50 raste të kalimit të paligjshëm të kufijve;– 14 raste të tentativës për të kaluar kufijtë me dokumente false;– 6 raste të mosdeklarimit të shumave të parave;– 6 raste të trafikimit të lëndëve narkotike;– 6 raste të trafikimit të mjeteve motorike.
Tag: raste
-
Goditje të grupeve kriminale, arrestime dhe operacione anti drogë/ Bilanci i policisë në 1 muaj
-
KLSH zbardh krizën në Shëndetësi: Mungesë barnash jetike, ilaçe të skaduara dhe abuzime në sistemin farmaceutik
foto ilustruese
TIRANË- Raporti i fundit i Kontrollit të Lartë të Shtetit (KLSH) ka zbuluar një krizë serioze në trajtimin e pacientëve me tumor në Shqipëri, duke hedhur dritë mbi një sërë shkeljesh dhe neglizhencash institucionale që vënë në rrezik jetën e mijëra qytetarëve.
Sipas raportit, nga 253 barna antitumorale të autorizuara për tregtim në vend, 116 prej tyre, ose 46%, nuk janë importuar asnjëherë gjatë periudhës janar 2021 deri në mars 2025, thuajse gjysma e ilaçeve të listuara si të vlefshme për përdorim në luftën kundër kancerit nuk kanë qenë asnjëherë të aksesueshme për pacientët shqiptarë.
Situata rëndohet edhe më shumë nga fakti se për 39 prej këtyre barnave, të përfshira në listën e rimbursueshme për vitin 2024, Fondi i Sigurimeve të Detyrueshme të Kujdesit Shëndetësor nuk ka lidhur asnjë kontratë me importues, duke e bërë praktikisht të pamundur sigurimin e tyre nga spitalet publike.
Në të njëjtën kohë, raporti evidenton praninë në sistemin elektronik të barnave të skaduara, të cilat ndonëse nuk shpërndahen, vijojnë të figurojnë si pjesë e stokut aktiv. Konkretisht, medikamentet Ifosfamide dhe Methotrexate, të cilat kanë dalë jashtë afatit të përdorimit, rezultojnë ende në gjendje në sistemin “Pentaho”, duke krijuar një panoramë artificiale të furnizimit dhe duke penguar procesin normal të furnizimeve të reja. Kjo gjendje ka çuar në mosbërjen e kërkesave për furnizim të ri nga QSUNT, duke rritur rrezikun për mungesë kritike të barnave thelbësore.
Një tjetër problematikë e theksuar është mospërputhja e datave të skadencës të regjistruara në sistem me ato reale të barnave të magazinuara. Gjatë auditimit, u zbulua se në disa raste data e skadencës në sistem ishte më e vonë se ajo reale, si në rastin e një medikamenti ku në sistem figuron 31 mars 2027, ndërsa fizikisht data reale ishte 9 shtator 2026. Kjo mospërputhje është pasojë e mosrespektimit të parimit të shpërndarjes sipas afatit më të afërt të skadencës (FIFO), çka mund të çojë në shpërndarje të barnave të skaduara apo afër skadencës pa kontrollin e duhur.
Situata bëhet akoma më alarmante kur bëhet fjalë për fëmijët e prekur nga tumoret. Gjatë viteve 2020–2024, shumë prej tyre janë detyruar të kërkojnë trajtim jashtë vendit ose të sigurojnë medikamentet jetësore privatisht. Në një rast, një pacient është trajtuar në Itali dhe është rikthyer për ndjekje në QSUNT, ndërsa në 11 raste të tjera, 4 fëmijë nuk kanë marrë fare medikamentin Actinomycin D, 5 janë trajtuar me medikament të siguruar privatisht dhe 2 janë ndjekur me një protokoll alternativ (VAC), që nuk përfshinte medikamentin bazë të nevojshëm.
Nga ana tjetër, edhe buxheti i akorduar për barnat nuk i përgjigjet nevojave reale të pacientëve. Sipas KLSH-së, buxheti i Ministrisë së Shëndetësisë dhe ai i QSUNT nuk reflekton kërkesat jetike të të sëmurëve, por është projektuar vetëm për të respektuar “tavanet” financiare. Në periudhën 2021-2024 janë regjistruar 49 raste vonesash të pajustifikuara në furnizim nga importuesit farmaceutikë, ndërsa FSDKSH ka marrë masa administrative vetëm në dy prej tyre. Nëse do të ishin zbatuar penalitetet për të gjitha rastet, vlera totale e gjobave do të shkonte në afro 49 milionë lekë.
Raporti ngre alarmin edhe për mungesën e transparencës dhe saktësisë në dokumentacionin farmaceutik. Janë identifikuar receta të dublikuara, shkarkime barnash për pacientë të gabuar, mungesë shënimesh të plota dhe kërkesa të përsëritura për të njëjtin pacient pa u përmbushur. Në disa raste, në sistem figuronte gjendje pozitive barnash, ndërkohë që inventari real ishte zero, duke krijuar konfuzion dhe pasigurin në menaxhimin e terapisë për pacientët./ZËRI -
Raporti i KLSH: Gjysma e ilaçeve antitumor nuk u importuan kurrë, ilaçe të skaduara dhe me data të ndryshme nga sistemi
Raporti i fundit i Kontrollit të Lartë të Shtetit nxjerr në pah një situatë alarmante në trajtimin e pacientëve me tumor në Shqipëri, ku thuajse gjysma e barnave të autorizuara për këtë sëmundje nuk janë importuar asnjëherë, ndërsa disa prej tyre rezultojnë të skaduara por ende figurojnë në sistem.
***
Gjetjet e KLSH tregojnë një realitet të hidhur për pacientët që po vuajnë nga tumori në Shqipëri. Gati gjysma e barnave që luftojnë një nga sëmundjet më të rënda, nuk janë importuar asnjëherë në vendin tonë.
“Bazuar në të dhënat e vëna në dispozicion nga Sektori i Shpërndarjes mbi importin e barnave, rezulton se nga 253 barna antitumorale të autorizuara për tregtim në Republikën e Shqipërisë, 116 prej tyre ose në masën 46%, nuk janë importuar në asnjë rast gjatë periudhës së auditimit janar 2021-mars 2025. Kjo situatë mbart risqe potenciale mbi efikasitetin e mekanizmave ekzistues”, thuhet në raportin e KLSH-së.
Për 39 ilaçe në listën e rimbursueshme të 2024, FSDKSH nuk ka kontrata me importues, çka bën që në realitet këto barna të mos gjenden në sistemin publik në shërbim të sëmurëve.
Ky fakt vë në dukje mungesën e mekanizmave efektivë që lidhin autorizimin me furnizimin real në treg.
Madje në raport citohen edhe shembuj konkretë që tregojnë situatën e rëndë e shkaktuar nga mungesa e këtyre medikamenteve.
Gjatë periudhës 2020-2024, fëmijë nga 2 deri 18 vjeç që vuajnë nga tumori janë detyruar të largohen jashtë vendit apo të sigurojnë ilaçin privatisht për t’u kuruar.
“Specifikisht, rezultoi se nga 12 pacientë, 1 rast është trajtuar në Itali dhe ka ardhur në QSUNT për ndjekje pas terapisë, me mjekim të marrë jashtë vendit, ndërsa nga 11 rastet e tjera, rezultoi se 4 raste nuk janë trajtuar me medikamentin Actinomycin D, 5 raste janë trajtuar duke siguruar medikamentin privatisht dhe në 2 raste është ndjekur protokolli VAC”.
Por jo vetëm kaq, ka edhe medikamente që janë të skaduara. Edhe pse sipas raportit ato ndodhen në depo dhe nuk shpërndahen, në sistem figuron që këto ilaçe janë në gjendje, duke bërë që autoritetet përkatëse mos bëjnë kërkesë për furnizim.
“Evidentohet se këto barna, bari Ifosfamide dhe Methotrexate, pavarësisht se kanë skaduar rezultojnë ende në sistemin Pentaho duke paraqitur risk për mbajtjen e stoqeve të skaduara në sistem dhe duke rritur artificialisht gjendjen e barnave në sistem. Në këtë kontekst, nuk janë evidentuar masa të mëtejshme nga QSUNT”.
Auditimi, i kryer gjatë muajve të para të këtij viti, në blloqet farmaceutike, zbulon një tjetër fakt shqetësues.
Për disa ilaçe data e skadencës e shënuar në sistem nuk përputhej me atë të verifikuar fizikisht.
Konkretisht data e skadencës e shënuar në sistem ishte 31.03.2027, ndërsa kur u verifikua fizikisht ishte 09.09.2026. Kjo mospërputhje u shkaktua nga mosrespektimi i parimit FIFO, që fillimisht jepen ato që e kanë afatin më të afërt për të skaduar.
Po ashtu ka mungesa të theksuara të dokumentacioneve për mënyrën e shpërndarjeve të ilaçeve.
Dy receta për të njëjtin pacient, apo edhe “ngatërresat” e mjekëve për regjistrimin e medikamentit në kartelat e gabuara ka sjellë paqartësi tek të dhënat zyrtare për shpërndarjen e barnave.
“Nga testimet rezultuan receta të dublikuara gjatë ditës, mungesa shënimesh të plota dhe të sakta, shkarkime të gabuara të barnave në pacientë të tjerë, mungesa barnash nisur nga raporti sasi e kërkuar-sasi e shkarkuar, kërkesa të përsëritura dhe të paplotësuara në më shumë se 1 herë për të njëjtin pacient, periudha me gjendje progresive në sistem barnash ndërkohë që inventari i datës rezulton zero (diferenca në sasi gjendje progresive-inventar sistemi), etj”.
Në raport flitet edhe për mungesën e protokolleve apo pajisjeve të avancuara për përgatitje e dozave të kombinuara për trajtimin e tumorit.
Aktualisht, ato përgatiten nga vetë infermierët, duke u bazuar, siç thuhet edhe në raport, kryesisht në praktika të brendshme të vjetra.
Nga ana tjetër shërbimet spitalore disponojnë vetëm pajisje manuale dhe jo pajisje të specializuara apo edhe të automatizuara. Madje siç thuhet në raport ato nuk janë mirëmbajtur apo kalibruar që nga futja në inventar.
“Përfshirja e personelit infermieror në përgatitjen e barnave citostatike, pa protokolle të shkruara dhe pa mbikëqyrje farmaceutike të dokumentuar, përbën devijim nga praktikat e njohura ndërkombëtare të sigurisë, edhe nëse personeli është i trajnuar. Po kështu, pavarësisht kapaciteteve profesionale, nuk përjashtohet nevoja për monitorim apo dokumentim”.
Buxheti që jep Ministria e shëndetësisë për barnat rezulton sipas raportit, të jetë i nënfinancuar dhe nuk mbulon nevojat reale të shqiptarëve që vuajnë nga kanceri, ndërsa plani buxhetor i QSUNT-së është sa për të për të respektuar “tavanin” financiar, pasi nuk reflekton kërkesat jetike të pacientëve.
Po ashtu gjatë periudhës 2021-2024 u shënuan 49 raste vonesash të pajustifikuara nga importuesit farmaceutikë, edhe pse shumë pacientë ishin në pritje të këtyre medikamenteve.
Megjithatë, edhe pse nuk kishte një arsye konkrete për këto vonesa, duke shkelur kështu kontratën, FSDKSH mori masa administrative vetëm për dy raste. Nëse do ishin zbatuar penalitetet, do të kapnin vlerën prej afro 49 milionë lekë. -
Tetori Rozë/ 805 gra e 10 burra me kancer gjiri, 224 gra e vajza humbën jetën vitin e kaluar
Numri i grave të prekura nga kanceri i gjirit është në rritje dhe nuk njeh as moshë e as gjini.
Për vitin 2024 u diagnostikuan 805 raste të reja te gratë me kancer gjiri, por gjithashtu u regjistruan edhe 10 burra.
“Për vitin 2024, bazuar në regjistrin kombëtar të kancerit janë diagnostikuar 805 raste të reja me kancer të gjirit. Është një incidencë që gjatë dhjetëvjeçarit të fundit ka ardhur në rritje me 2.1% çdo vit. Nuk kemi rritje të rasteve me kancer të gjirit te moshat e reja, madje kemi një ulje të lehtë të incidencës tek moshat nën 50 vjeç. Janë identifikura 10 raste të burrave të moshës mbi 50 vjeç” tha Drejtorja e re e Institutit të Shëndetit Publik Dorina Toçi.
Shtrimet spitalore janë dyfishuar në 10-vjeçarin e fundit.Për vitin 2024 humbën jetën për shkak te kancerit të gjirit 224 gra.
-
Tetori Rozë thirrje për kontrolle të vazhdueshme, kanceri i gjirit, mbi 800 raste në vit në Shqipëri
Kanceri i gjirit mbetet sëmundja më e përhapur tek gratë në mbarë botën, duke u renditur i dyti për nga numri i rasteve të reja.
Edhe Shqipëria po përballet me një rritje të ndjeshme të këtij fenomeni, me 805 raste të reja të regjistruara vetëm gjatë vitit 2024.
Sipas të dhënave të Institutit të Shëndetit Publik, më shumë se 75% e rasteve diagnostikohen tek gratë mbi moshën 50 vjeç, ndërsa mosha mediane në momentin e diagnozës është 57 vjeç.
Në raste të rralla, sëmundja është evidentuar edhe tek meshkujt, me 10 raste të raportuara vitin e kaluar.
Drejtoresha e ISHP-së, Dorina Toçi, thekson se pavarësisht rritjes së numrit të rasteve, një zhvillim pozitiv është ulja e vdekshmërisë. “Ajo që shihet nga rastet e zbuluara është se kemi një ulje të vdekshmërisë në popullatë për këtë sëmundje, pasi edhe zbulimi i rasteve po bëhet më shpejt,” tha Toçi. Specialistët e shëndetit publik apelojnë për kontrolle të rregullta dhe ndërgjegjësim të shtuar, duke theksuar se diagnostikimi i hershëm mbetet arma më e fortë në luftën kundër kancerit të gjirit. -
Ndërtime pa leje dhe prerje të pyjeve, procedohen katër persona në Durrës
Durrës/Kontrolle në terren dhe verifikime të koordinuara me organet kompetente, për parandalimin dhe goditjen e krimeve kundër mjedisit.
Konstatohen 4 raste të ndërtimeve dhe 1 rast i prerjes së pyjeve, në kundërshtim me ligjin.
Në përfundim të veprimeve procedurale për këto raste, specialistët për Hetimin e Krimeve të komisariateve të Policisë Shijak dhe Kavajë referuan materialet në Prokurori, ku nisi procedimi në gjendje të lirë për shtetasit:
-E. O., 38 vjeç, M. L., 38 vjeç, F. T., 54 vjeç dhe A. D., 30 vjeç, të katërt banues në Shijak, për veprën penale “Ndërtimi i paligjshëm”;
-L. A., 36 vjeç, banues në Rrogozhinë, pasi dyshohet se ka prerë dru në fshatin Gosë e Madhe, në kundërshtim me ligjin.
Kontrollet kundër këtyre veprimtarive të paligjshme, vijojnë.Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
-
COVID rikthehet në Shqipëri – 500 raste në javë, qytetarët hezitojnë vaksinimin
Në Shqipëri po qarkullon masivisht COVID-19. Në Institutin e Shëndetit Publik raportohen 500 raste çdo javë, por shqiptarët nuk testohen mjaftueshëm.
Shifra e të prekurve është më e madhe, gjë që duket tek mungesat e nxënësve në shkolla dhe qytetarëve në punë.
Kur vjen puna tek vaksinimi, qytetarët tregohen skeptikë, ndikuar edhe nga deklaratat e Trump; ata shkojnë të vaksinohen për grip, por e kundërta ndodh me vaksinën e COVID-it, ku hezitojnë.
Ekspertja e ISHP, Rovena Daja thotë: “Kemi shumë raste COVID që dalin pozitiv për aq teste sa kryhen. Nuk po testohen më. Grip nuk kemi kapur ende.”
Shqipëria ka siguruar 280 mijë doza të vaksinës anti-grip, që përmban shtame kundër virusit A dhe B, dhe po ashtu është siguruar sasi e konsiderueshme e vaksinës anti-COVID për nënvariante të reja të Omicron. Por janë shumë të pakët personat që e aplikojnë, vetëm kur kanë rekomandim nga mjeku.
“Janë vetëm ata që janë me kimioterapi apo me imunitet të rënë dhe që kanë një rekomandim nga mjeku për ta bërë, pasi kanë pasur COVID dhe ka pasur edhe të shtruar në spital”, shton Daja.
Vetëm në javën e parë është aplikuar një e treta e sasisë së vaksinave të gripit, gati 60 mijë doza. Është koha e aplikimit, e cila i duhet trupit për të krijuar imunitet, i cili mbron për një periudhë 6-mujore./TCH -
I riu shqiptar gjendet i varur në tabelën sinjalizuese në rrugët e Brukselit, mediat vendase: Metoda e njëjtë me ato që përdorin bandat meksikane
Trupi i një 29-vjeçari u gjet i varur në një tabelë sinjalizuese të dielën e kaluar në Bruksel.
Viktima është me origjinë shqiptare, konfirmon prokuroria e Brukselit, e cila e konsideron ngjarjen si të dyshimtë dhe ka hapur një hetim.
Në vendngjarje janë angazhuar Policia Federale Gjyqësore, një mjek ligjor dhe një hetues.
Ende është herët për të përcaktuar rrethanat e sakta të ngjarjes, dhe nuk përjashtohet mundësia e vetëvrasjes, por gjithsesi bëhet fjalë për një akt dhune ekstreme.
Trupi u gjet pranë Westland Shopping, jo larg zonës së Peterbos, një vend ky strategjik për trafikun e drogës në Bruksel. Edhe pse nuk ka ndonjë lidhje të konfirmuar midis bandës së Peterbos dhe trupit të gjetur, kjo ngjarje përbën një tjetër fakt të rëndësishëm në një zonë të ndjeshme të kryeqytetit.
Nëse lidhja me trafikun e drogës konfirmohet, kjo ngjarje do të vendosë Brukselin në një situatë të re dhe shqetësuese. Një burim i mirëinformuar për gazetën La Capitale thekson se kjo ngjarje i ngjan metodave të përdorura nga bandat meksikane, të njohur për dhunën e tyre ekstreme dhe për përdorimin brutal të dhunës ndaj rivalëve, tradhtarëve apo atyre që nuk respektojnë rregullat e tyre.
Në një intervistë për gazetën Het Laatste Nieuës, drejtori i Drejtorisë së Policisë Federale në Bruksel, Eric Jacobs, përmend praninë e mafias së Marsejës dhe të famshmes Mocro-Mafisou me origjinë veriafrikane. “Të gjithë përdorin të njëjtat metoda: kërcënime, vrasje,” thotë ai. Pyetja është nëse viktima e së dielës i përkiste kësaj bote mafioz dhe nëse u përdor si një paralajmërim për rivalët e tij. Hetimi i policisë do ta zbulojë këtë.
Në një raport të Drejtorisë së Policisë Federale të Drejtësisë në gusht, shkruhet: “Në botën e nëndheshme ndodhin shumë gjëra, kërcënime, frikësime… po, edhe tortura. Nuk kemi raste aktuale të torturave në hetim, por kemi zbuluar raste të tilla nga deshifrimi i komunikimeve sekrete. Këto janë teknika të mafias.” Gazeta La Capitale ka raportuar disa raste të tilla më parë.Top Channel
-
Dosja ‘Veliaj’/ GJKKO vendos sot kalimin ose jo për gjykim të ish-kryebashkiakut
Sot, në orën 12:00, në GJKKO zhvillohet seanca paraprake për Erion Veliajn, bashkëshorten e tij Ajola Xoxa, dhe të pandehurve të tjerë në çëshjen që SPAK e dërgoi për gjykim më 10 shtator.
Gjyqtarja Etleva Deda do të vendosë nëse dosja do të kalojë për gjykim, apo ta rikthejë në Prokurorinë e Posaçme për hetime të mëtejshme.
Veliaj do të përballet në gjykatë me pesë akuza të rënda: korrupsion, pastrim parash, fshehje pasurie, shpërdorim detyre, si dhe futje e sendeve të ndaluara në qeli.
Sipas SPAK, Veliaj akuzohet për korrupsion pasiv në 9 raste, në marrëdhënie me disa kompani që, në këmbim të përfitimeve të parregullta në para dhe pasuri të paluajtshme, kanë përfituar leje ndërtimi apo fonde publike nga Bashkia e Tiranës.
Edhe bashkëshortja e tij, Ajola Xoxa, përballet me akuza për korrupsion pasiv në 9 raste, gjithashtu në lidhje me subjekte tregtare dhe organizata jofitimprurëse. Ajo akuzohet po ashtu për pastrim parash, mosdeklarim pasurie dhe fshehje të të ardhurave.
Përveç Veliajt dhe Xoxës, në këtë çështje janë marrë të pandehur 28 persona dhe shoqëri, përfshirë ish-deputeten Klotilda Bushka, e cila akuzohet për veprime që pengojnë zbulimin e së vërtetës.
Një tjetër i pandehur është Fatjon Baci, gardiani i burgut të Durrësit, i cili akuzohet se i dha telefonin celular Veliajt gjatë transferimit nga qelia në gjykatë, në dy raste të veçanta.
Veliaj ka bërë rekurs edhe në Gjykatën e Lartë, duke kërkuar lirimin nga qelia. Seanca për shqyrtimin e kërkesës është caktuar për 2 tetor, ndërsa relatore e çështjes do jetë gjyqtarja Albana Boksi.
-
Humbja në derbi, Bordin: Tirana bëri ndeshje pozitive, shikojmë përpara
Pas humbjes 1-2 ndaj Dinamos në kampionat, tekniku i Tiranës, Bordin bëri vlerësimin e tij.
“Nuk është se bëmë keq edhe në pjesën e parë. Ata e kishin më shumë topin në zotërim, por kishim disa raste një kundër një në zonë, të cilat mund t’i shfrytëzonim më mirë. Në pjesën e dytë krijuam shumë raste goli, por nuk shënojmë. Për fat të keq ky është momenti.Shqetësime? Fillimisht na duhet që të pësojmë 1-2 gola për të ndryshuar qasjen. Kemi pasur disa rinisje të shpejta duke përfituar nga topat e rikuperuar. Duhet të shmagnim golin e dytë, pasi mund të barazonim me rastin që patëm me penallti. Më vjen keq sepse djemtë bënë një ndeshje të mirë. Sot të paktën meritonim barazimin.
I trishtuar për pikët apo i kënaqur me performancën? Fola me djemtë pak më parë. U thashë se kjo duhet të jetë nisja jonë për qasjen që patëm në fushën e lojës. Është e vështirë situata sepse jemi vend i fundit me një humbje të pa merituar. Duhet të ngremë kokën dhe të punojmë më shumë. Duhet të punojmë në fazën mbrojtëse, pasi golat e pësuar e tregojnë këtë. Gabimet më të pakta kanë qenë në manovrën sulmuese. Kjo ndeshje duhet të jetë shembull për ne.
Kondicioni fizik po përmirësohet ditë pas dite. Vlen më shumë të menduarit, sjellja dhe qasja e lojtarëve. Mentaliteti është shumë i rëndësishëm. Sigurisht që duhet të përmirësohemi fizikisht, por sot kemi treguar që jemi mirë në këtë aspekt. Sot e quaj një ndeshje ndryshe në aspektin mental. Nuk do të kishim humbur nëse do luanim si sot me Egnatian dhe Flamurtarin”, tha Bordin.
© BalkanWeb