Të gjithë qytetarët që do të rivlerësojnë pronat do të kenë tatim 5%. Edhe pse u kërkua në Komisionin e Ekonomisë si nga Partia Socialiste edhe Partia Demokratike që të ulej norma tatimore për qytetarët të mos ishte e njëjtë me bizneset, amendimet nuk u pranuan. Deputeti i PS-së, Erion Braçe kërkoi që rivlerësimi të jetë 3% për qytetarët, por Ministria e Financave i qëndroi variantit të parë. “Në të gjitha rastet kemi ndarë qytetarët nga bizneset. 5% tatim për zonat rezidenciale, dhe 3% tatim për pasuritë e paluajtshme në zonat rezidenciale. Duhet të shtohen edhe të gjithë ato prona që janë në proces regjistrimi dhe proces legalizimi”, tha Braçe. “I qëndrojmë propozimit me Këshillin e Ministrave”, zv/ministri i financave Endrit Yzeiraj.
“Nuk ka qenë asnjëherë tatimi njësoj për të gjitha kategoritë për qytetarët dhe biznese. Duhet të jetë 3% për qytetarët. Ka prona 35 vjet në proces legalizimi, pse bëhemi të padrejtë” tha Braçe. “Kemi një udhëzim në fuqi që njeh 1% për çdo vit përdorimi, që defakto e ulë normën efektive e tatimit”, u përgjigj drejtoresha e Politikave Fiskale Arjana Dyrmyshi. Prej janari deri në dhjetor të vitit 2026, i gjithë vendi do të përfshihet në fushatën e rivlerësimit të pasurive të paluajtshme. Ky proces do të bëhet përmes një norme tatimore prej 5%, ndryshe nga sa është aktualisht prej 15% nëse shitet prona. Kjo është norma më e lartë tatimore e aplikuar ndonjëherë për këtë proces, që prej kur ka ndodhur rivlerësimi i parë, që është e njëjtë si për bizneset dhe për individët. Tatimi paguhet për diferencën e vlerës mes asaj të regjistruar në kadastër dhe asaj me të cilën shitet. Konkretisht nëse një person ka blerë një pronë 100 mijë euro dhe sot e shet 120 mijë euro, ai do të duhet të paguaj 15% tatimin për këtë diferencë prej 20 mijë eurosh qytetari i detyrohet shtetit 3 mijë euro, ndërsa me këtë ndryshim ligjor kur bëhet përafrimi i çmimit me vlerën e tregut tatimi zbret në 5%, dhe paguan 1000 euro.
Paketa fiskale
Komisioni Parlamentar për Ekonominë, Punësimin dhe Financat miratoi sot projektligjin “Për Marrëveshjen e Paqes Fiskale”, një hap i rëndësishëm për modernizimin e administratës tatimore dhe përmirësimin e marrëdhënieve ndërmjet tatimpaguesve dhe administratës tatimore në Shqipëri. Deputeti i Partisë Demokratike, Enno Bozdo propozoi që sektori i ndërtimit të mos futet në këtë marrëveshje, pasi sipas tij, është e pamundur të kontrollohet nga administrata tatimore. Por zv/ministri i Financave, Endrit Yzeiri theksoi se amendimi i propozuar nuk pranohet nga Ministria e Financave, pasi masa synon të formalizojë të gjithë ekonominë, për më tepër që ndërtimi ka qenë një ndër sektorët me ndikimin më të madh në ekonomi. Ndërsa deputeti i PS-së Erion Braçe propozoi që bizneset e evidentuara me nivel të lartë rreziku të lartë pastrimi parash të përfshihen në këtë marrëveshje vetëm pas dorëzimit të raportit të verifikimit të thelluar të burimit të pasurisë.
Ky projektligj i propozuar synon të krijojë një instrument të përkohshëm ligjor që lejon krijimin e një marrëveshjeje vullnetarizmi për pagimin e tatimit mbi të ardhurat e korporatave dhe bizneset, duke përcaktuar paracaktimin e fitimit të tatueshëm. Projektligji “Për marrëveshjen e paqes fiskale” propozohet si një instrument i përkohshëm, me kohëzgjatje trevjeçare, i cili synon të krijojë një regjim të posaçëm e të paracaktuar të vlerësimit të fitimit të tatueshëm për tatimpaguesit, që përmbushin kritere të caktuara. Gjithashtu, tatimpaguesve u jepet e drejta të zgjedhin të rideklarojnë pasqyrat financiare të 5 viteve të mëparshme, kundrejt pagesës së një tatimi, në masën 5%. Ky instrument do të shërbejë për të siguruar një kuadër të dakordësuar paraprakisht për përmbushjen fiskale dhe për shmangien e mosmarrëveshjeve tatimore lidhur me tatimin mbi të ardhurat e korporatës apo të ardhurave biznesore.
Tatimpaguesit që mund të lidhin marrëveshje me administratën tatimore në kuadër të këtij projektligji janë të gjitha subjektet me të ardhura bruto mbi 14 milionë lekë, qofshin persona fizikë apo entitete dhe që nuk përfitojnë nga aplikimi i normave të reduktuara apo përjashtimet tatimore. Këta tatimpagues, nëpërmjet një marrëveshjeje të veçantë me administratën tatimore, do të kenë mundësi të përcaktojnë paraprakisht bazën e tatueshme dhe detyrimin përkatës tatimor për një vit, me mundësi rinovimi deri në dy vite të tjera.
