Foto ilustruesve
ANGLI- Më shumë se 150 psikiatër kanë nënshkruar një letër duke dënuar marrëveshjen për zhvillimin e provimeve në një vend me shkelje të dokumentuara të të drejtave të njeriut. Kolegji Mbretëror i Psikiatërve në Mbretërinë e Bashkuar po përballet me reagime të ashpra nga anëtarët e tij pas një partneriteti të diskutueshëm me ofruesin shtetëror të kujdesit shëndetësor në Katar.
Kolegji ka nënshkruar një kontratë me Korporatën Mjekësore Hamad, që është në pronësi të shtetit të Katarit, për të zhvilluar provimet ndërkombëtare në Doha, duke u mundësuar psikiatërve nga Lindja e Mesme dhe më gjerë të aplikojnë për anëtarësim.
Por vendimi për të zhvilluar provime klinike në një vend me shkelje të dokumentuara të të drejtave të njeriut, ku marrëdhëniet mes personave të të njëjtit seks janë të kriminalizuara, ka nxitur më shumë se 150 psikiatër nga spitalet dhe universitetet kryesore të Mbretërisë së Bashkuar të nënshkruajnë një letër drejtuar presidentit të kolegjit.
“Një marrëdhënie tregtare me sistemin publik të shëndetësisë në Katar, që është de facto pjesë e qeverisë së tij, rrezikon të dëmtojë rëndë reputacionin e kolegjit,” – thuhet në letër, e cila u dërgua në shtator.Në të gjithashtu theksohet se:
“Gratë u mohohen të drejtat e barabarta në disa fusha dhe nuk ka mbrojtje ligjore ndaj dhunës në familje. Marrëdhëniet seksuale mes personave të të njëjtit seks mbeten ligjërisht të dënueshme me vdekje.”
Kolegji tashmë zhvillon provime të përvitshme ndërkombëtare në Singapor, ndërsa Katar do të jetë qendra e dytë ndërkombëtare, ku pritet të marrin pjesë rreth 120 kandidatë në datat 10–13 nëntor.
Letra përmend gjithashtu trajtimin e punëtorëve emigrantë, të cilët përbëjnë mbi 90% të fuqisë punëtore të Katarit:
“Vdekjet dhe lëndimet e punëtorëve emigrantë para Kupës së Botës 2022 çuan në kërkesa për kompensim dhe akuza për shfrytëzim të punëtorëve.”
Në një deklaratë, Kolegji Mbretëror i Psikiatërve tha se prioriteti i tij është “adresimi i pabarazive dhe përmirësimi i kujdesit për shëndetin mendor të grupeve të margjinalizuara” dhe se qëllimi i mbajtjes së provimeve në Lindjen e Mesme është të ofrohet qasje për mjekët nga vendet e jugut global.Kolegji shtoi se kishte marrë reagime mbështetëse nga shumë prej 22,200 anëtarëve të tij.
Dr. Bradley Hillier, psikiatër forensik dhe nënshkrues i letrës, tha:
“Jam realisht i shqetësuar që Kolegji Mbretëror i Psikiatërve po hyn në një marrëdhënie biznesi me një shtet që ka probleme të mëdha me të drejtat e njeriut. Kjo bie qartazi ndesh me vlerat dhe historinë e kolegjit.”Ai shtoi se është e vështirë të imagjinohet se si do të trajtohen çështje të shëndetit mendor që lidhen me disforinë gjinore, statusin HIV apo përvojat e homofobisë.Provimet përfshijnë konsultime të simuluara me aktorë që luajnë rolin e pacientëve, për të vlerësuar mënyrën se si një mjek do të vepronte në situata reale.
Kolegji tha se përmbajtja dhe zhvillimi i provimit në Doha do të respektojnë të njëjtat standarde, vlera dhe mbikëqyrje si provimet që mbahen në Mbretërinë e Bashkuar dhe Singapor, dhe se do të përfshijnë edhe aftësi për trajtimin e problemeve të shëndetit mendor të pacientëve LGBTQ+.
Prof. Annie Bartlett, profesore e kujdesit shëndetësor për të dënuarit në universitetin City St George’s, London, tha se e mirëpriste përpjekjen për të zgjeruar qasjen ndërkombëtare në provime, por shtoi:
“Ka shumë vende të tjera që mund të zgjidheshin, pa u përballur me çështje që lidhen me të drejtat e grave, punëtorët emigrantë dhe dënimin me vdekje për praktika të caktuara të marrëdhënieve të së njëjtës gjini.”“Mendoj se është një gabim,” – tha ajo.
Një tjetër nënshkrues, Prof. Michael Bloomfield, psikiatër dhe drejtues i grupit kërkimor të psikiatrisë translacionale në University College London, e përshkroi partneritetin si “moralisht të papranueshëm”.
“Është jashtëzakonisht e dëmshme që kolegji ynë ka zgjedhur të operojë në një vend që është kushtetuesisht homofobik,” – shtoi ai.
Kolegji kishte njoftuar më herët këtë bashkëpunim si pjesë të përpjekjeve për të zgjeruar qasjen në provimet e tij për psikiatër jashtë vendit. Në fund, në deklaratën e vet, Kolegji Mbretëror i Psikiatërve tha:
“Qasja jonë është kundër diskriminimit dhe e bazuar në prova, duke shmangur qëllimisht një mentalitet kolonial që vendos selektivisht me kë do apo nuk do të punojmë. Ne udhëhiqemi nga nevojat mjekësore, duke punuar me mjekë, jo me qeveri. Vendimet tona drejtohen gjithmonë nga vlerat tona dhe janë në përputhje me pritshmëritë e Komisionit të Bamirësive.”/ZËRI
