Lajmidites.com

Tag: prekjes

  • Çfarë ndjejnë qentë kur i përkëdhelim?

    Çfarë ndjejnë qentë kur i përkëdhelim?

    Për shumë kujdestarë qensh, momentet e përkëdheljes janë nga më të dashurat e ditës.

    Mjafton një prekje e butë në kokë dhe menjëherë sjellja e qenit ndryshon: trup i çlodhur, frymëmarrje më e qetë dhe një ndjenjë e dukshme rehatie. Por çfarë ndodh në të vërtetë në organizmin e tyre? Çfarë ndjejnë qentë kur ne i përkëdhelim?

    Rezultatet janë më interesante nga sa duket, sepse lidhen me mënyrën si funksionon truri i tyre, por edhe me mënyrën si formohet lidhja e fortë mes qenit dhe njeriut.

    Roli i prekjes në jetën e qenit

    Edhe pse qentë njihen për nuhatjen dhe dëgjimin e tyre të jashtëzakonshëm, edhe ndjesia e prekjes ka rëndësi të madhe në komunikim, socializim dhe stabilitet emocional. Këlyshët e porsalindur, përpara se të hapin sytë, mbështeten tek prekja për të gjetur nënën, për t’u ushqyer dhe për t’u ndier të sigurt. Që në minutat e para të jetës, kontakti fizik nënkupton mbrojtje dhe lidhje.

    Kur përkëdhelim një qen, aktivizohen pikërisht ato qendra nervore që dikur i jepnin ndjenjën e sigurisë pranë nënës. Ngrohtësia e dorës, ritmi i butë dhe kontakti i vazhdueshëm e bëjnë këtë gjest një përvojë qetësuese.

    Çfarë ndodh në trurin e qenit?

    Përkëdhelja nuk është thjesht një veprim i këndshëm. Ajo aktivizon reaksione hormonale të rëndësishme:
    • Rritet niveli i oksitocinës, “hormoni i dashurisë”, që lidhet me afeksionin dhe besimin.
    • Shtohen dopamina dhe serotonina, substanca që përmirësojnë gjendjen e humorit dhe krijojnë një ndjenjë mirëqenieje.
    • Ulet kortizoli, hormoni i stresit.

    Këto ndryshime shpjegojnë pse qeni shpesh fillon të marrë frymë më ngadalë, relakson trupin dhe lëviz bishtin në mënyrë të butë kur e përkëdhelim.

    Gjuha e prekjes: Si komunikojnë qentë

    Ndryshe nga njerëzit që mbështeten shumë te fjala, qentë komunikojnë kryesisht me gjuhë trupi dhe energji.

    Për këtë arsye, përkëdhelja ka kuptim të veçantë për ta. Një përkëdhelje e ngadaltë në shpinë ose në gjoks transmeton siguri dhe pranueshmëri. Një kruajtje e lehtë pas veshëve i jep kënaqësi. Afrimi nga anash, jo nga lart, perceptohet si më miqësore dhe më pak kërcënuese.

    Për qenin, përkëdhelja është më shumë se kontakt fizik, është një formë komunikimi.

    Si forcohet lidhja mes qenit dhe njeriut

    Besimi është themeli i marrëdhënies mes qenit dhe njeriut.

    Përkëdhelja e ndihmon këtë marrëdhënie të thellohet, duke krijuar përvoja të vazhdueshme pozitive. E kombinuar me lojën, shëtitjet dhe kujdesin e përditshëm, prekja e butë përforcon mesazhin se qeni është i sigurt pranë nesh.

    Interesante është se këto përfitime nuk janë njëanshme.

    Edhe tek njerëzit rriten oksitocina dhe hormonët e mirëqenies, duke ulur stresin dhe në disa raste edhe tensionin e gjakut. Kjo është një arsye pse shumë njerëz raportojnë qetësi të menjëhershme kur përkëdhelin qenin e tyre.

    Por jo të gjithë qentë duan të njëjtën lloj prekje.

    Ashtu si njerëzit, edhe qentë kanë preferencat e tyre. Personaliteti, përvoja e mëparshme, raca dhe mjedisi ndikojnë fort në mënyrën si reagojnë ndaj prekjes.

    Disa qentë nuk e pëlqejnë prekjen në kokë nga një person i panjohur. Disa nuk e duan përqafimin. Qentë më të ndjeshëm mund të shqetësohen nga lëvizjet e papritura.

    Kjo nuk do të thotë se nuk duan njerëzit, thjesht kanë kufijtë e tyre, njësoj si ne.

    Si ta përkëdhelim saktë një qen

    Disa parime të përgjithshme mund të ndihmojnë që përvoja të jetë e këndshme dhe e sigurt.

    Lejojeni qenin t’ju nuhasë më parë, kështu ju njeh.

    Filloni me zona neutrale si shpina, qafa ose gjoksi.

    Shmangni prekjen në kokë ose fytyrë te një qen i panjohur.

    Qasuni ngadalë dhe me qetësi.

    Mbani lëvizje të buta dhe të qëndrueshme.

    Ndërpriteni herë pas here për të parë reagimin e qenit. Nëse afrohet përsëri, do më shumë. Nëse largohet, respektojeni.

    Kur i përkëdhelim me kujdes dhe respekt, qentë ndjejnë siguri, dashuri dhe një lidhje të thellë me ne.

    Për ta, prekja nuk është vetëm një gjest i ëmbël por një përvojë biologjike dhe emocionale që forcon marrëdhënien me familjen e tyre njerëzore.

  • Ja veprimi që ‘tregon’ se partneri juaj është psikopat

    Ja veprimi që ‘tregon’ se partneri juaj është psikopat

    Nëse deri më tani besonit se një prekje tregon butësi apo rehati, një studim i ri vjen për ta përmbysur këtë bindje dhe për të ngritur alarmin për partnerin tuaj.

    Shkencëtarët në Nju Jork kanë zbuluar se njerëzit me tipare të errëta të personalitetit – përfshirë psikopatinë, narcizmin dhe makiavelianizmin – përdorin prekjen për të manipuluar partnerët e tyre.

    Sipas studimit, prekja mund të “rrisë ndjenjën e pronësisë ndaj objekteve” dhe të “nxisë bindjen nga një person vartës”.

    Pra, nëse partneri juaj përpiqet t’ju përqafojë gjatë një debati verbal, ai mund të jetë një psikopat ose narcisist që përpiqet të ushtrojë kontroll mbi ju.

    Ekspertët theksojnë se kjo mund të ndodhë përmes gjesteve si mbajtja e krahut, prekja e shpatullës, pjesës së pasme të kokës apo edhe e dorës.

    Autori i studimit, profesori i psikologjisë Richard Matson nga Universiteti Binghamton, tha se “jo të gjitha format e prekjes janë dashamirëse” dhe se “jo të gjitha përqafimet janë të padëmshme”.

    “Ato mund të përdoren në shërbim të vetes, në kurriz të partnerit në një marrëdhënie,” – shtoi ai.

    Studiuesit theksojnë se, edhe pse prekja është një nga mënyrat kryesore për të shprehur dashurinë, ajo nuk përjetohet gjithmonë pozitivisht dhe nuk përdoret me mirëbesim nga të gjithë individët.

    Shembujt e prekjes që zakonisht konsiderohen pozitive – si një përqafim miqësor, një shtrëngim duarsh, një krah rreth shpatullave apo gjestet më intime si puthjet – mund të shndërrohen në forma negative të prekjes, në varësi të qëllimit dhe kontekstit.

    Në studimin e tyre, i cili përfshiu 500 studentë mbi 18 vjeç që ishin në një lidhje, pjesëmarrësit plotësuan pyetësorë për të vlerësuar nivelin e tre tipareve të “Triadës së Errët”: psikopatisë, narcizmit dhe makiavelianizmit.

    Rezultatet treguan se si burrat ashtu edhe gratë me këto tipare kishin më shumë gjasa të përdornin prekjen për të manipuluar partnerin, edhe pse mënyrat ndryshonin sipas gjinisë.

    Burrat, që ndiheshin të pasigurt për marrëdhënien, kishin më shumë gjasa të përdornin “prekjen kompulsive” për të kërkuar siguri nga partneret e tyre.

    Gratë, në anën tjetër, ndiheshin më të pakëndshme me prekjen e dorës, por e përdornin atë si mjet manipulimi për të fituar kontroll.

    Për gratë, prekja mund të shërbejë si një metodë për të rritur fuqinë ndërpersonale, pra për të siguruar një formë dominimi në marrëdhënie.

    Interesant është fakti që gratë me ankth të lartë lidhjeje – që kanë frikë nga braktisja – shfaqën një neveri më të madhe ndaj prekjes.

    Sipas ekipit kërkimor, tiparet e “Triadës së Errët” shpesh lidhen me vështirësi në marrëdhëniet romantike, përfshirë debatet e shpeshta dhe madje edhe dhunën. Prandaj, studiuesit paralajmërojnë të jemi të vëmendshëm ndaj shenjave.

    Studimi është botuar në revistën Current Psychology dhe konsiderohet i pari që tregon një lidhje të drejtpërdrejtë midis tipareve të Triadës së Errët dhe përdorimit kompulsiv të prekjes.