Adriatik Lapaj
TIRANË- Adriatik Lapaj, kreu i lëvizjes “Shqipëria Bëhet”, vijon të qëndrojë përballë Kryeministrisë edhe pas përplasjes së regjistruar mbrëmjen e djeshme me policinë. Lapaj e nisi protestën mbrëmjen e 8 dhjetorit, fillimisht i vetëm, e më pas iu bashkuar qytetarë të ndryshëm.
Me qëllimin për të larguar kryeministrin Edi Rama, Lapaj shprehet i vendosur për të vazhduar me qëndresën. Përmes një lidhjeje direkte në rrjetet sociale, Lapaj falenderon qytetarët që i janë bashkuar rezistencës dhe angazhimit për këtë kauzë. Lapaj ndan edhe pak detaje nga tensionet e një nate më parë, ku thotë se mbi 100 policë kanë shkuar për të hequr 2 çadra kampingu.
“Kjo është nata e dytë në të cilën ne po mblidhemi për të vazhduar këtë qëndresë qe e kemi nisur mbrëmjen e 8 dhejtorit. Nuk është e lehtë, por domosdoshmëri. Ju falenderoj për pjesëmarrjen pasi vazhdimësia e përditshme në këtë kauzë është shumë e rëndësishme. Ne jemi sot këtu për të vazhduar rezistencën dhe angazhimin për një bashkim përballë autokracisë së Edi Ramës. Mbrëmë kanë ardhur mbi 100 policë për të hequr dy cadra të vogla kampingu. Pse ndodh kjo? Kjo ndodh pasi shqipëria nuk është një vend demokratik.”, shprehet Lapaj.
Gjatë mbrëmjes së djeshme Lapaj dhe mbështetësit u përplasën me punonjësit e policisë, të cilët nuk i lejuan që të vendosnin disa çadra kampingu, në mënyrë që të qëndronin aty gjatë natës, duke marrë parasysh dhe temperaturat e ulëta të këtij Dhjetori. Lapaj është shpehur se protesta e tij do të jetë pa ndalim, ndërkohë që çdo ditë në orën 17 atij do t’i bashkohen dhe qytetarë e mbështetës të tjerë.
Policia e Tiranës ka proceduar penalisht Adriatik Lapajn, pas protestës së tij të pandërprerë përpara godinës së kryeministrisë. Policia e akuzon Lapajn se ka zaptuar hapësirën përpara kryeministrisë, si dhe ka penguar qarkullimin e lirë në zonë./ZËRI
