Adriatik BALLA
Më shumë se dy vjet kishte Pol Pogba që ishte pezulluar nga garat e futbollit pasi u gjet fajtor për përdorim dopingu dhe u pezullua nga VADA, agjencia ndërkombëtare e antidopingut. Në fakt, shumë peripeci kaloi mesfushori francez, i cili atëherë ishte pjesë e Juventusit, por tani ai mund të gëzohet që është kthyer në fushë dhe mund të luajë sërish. Janë vetë mediat sportive që shkruajnë se Pol Pogba pritet të përfshihet në skuadrën e Monakos për ndeshjen ndaj Renes këtë të shtunë, duke shënuar rikthimin e tij në fushë pas 26 muajsh mungesë. Mesfushori francez, 32-vjeçar, nuk ka luajtur që nga 3 shtatori 2023, kur u aktivizua për 28 minuta me Juventusin kundër Empolit. Ky do të jetë debutimi i tij në Ligue 1, pasi ka lënë Le Havre për Mançester Junajtid në moshën 16-vjeçare.
Pogba ishte i pezulluar për përdorim të DHEA, një substancë që rrit nivelin e testosteronit, dhe dënimi i tij fillestar prej katër vitesh u reduktua nga CAS në 18 muaj, duke e bërë të mundur rikthimin e tij nga marsi 2025. Francezi me 91 ndeshje dhe 11 gola për kombëtaren ka stërvitur normalisht gjatë javës dhe, nëse gjithçka shkon sipas planit, do të grumbullojë minutat e para për të rikuperuar ritmin dhe formën e plotë. Plani i klubit është që Pogba të rrisë gradualisht minutat në fushë, deri sa të jetë gati të luajë 90 minuta radhazi. Trajneri i ri i Monakos, Sebastien Pokognoli, e sheh Pogbën si një udhëheqës të rëndësishëm për një skuadër të re që aktualisht renditet e gjashta në Ligue 1, pesë pikë pas Marsejës dhe shtatë pas liderit PSG.
Që nga nënshkrimi i kontratës dyvjeçare në qershor 2025, Monako ka zhvilluar një program të plotë rikuperimi dhe përgatitjeje fizike për Pogbën, duke përfshirë analiza biokimike, teste kognitive dhe stërvitje intensive për të shmangur rrezikun e lëndimeve. Pogba do të vesh fanellën me numrin 8 dhe pritet të nisë kapitullin e ri të karrierës së tij këtë fundjavë, duke sjellë eksperiencën dhe udhëheqjen e tij në një skuadër të rinovuar dhe ambicioze. Rikthimi i Pol Pogba në fushë tregon se ai ka vullnet dhe ka ende energji për të treguar cilësi në fushë. mediat e presin me interes angazhimin e tij në lojë, por mbetet për t’u parë a e gëzon formën e tij më të mirë sportive. Një qëndrim kaq i gjatë larg fushave mund të ketë pasoja, ose të paktën do të kërkojë shumë kohë të kapë nivelin e vet më të mirë. Në këtë moshë duket e vështirë, por ai është kthyer gjithsesi dhe mund të jetë kthimi më mbresëlënës i karrierës së tij të gjatë në fushat e blerta.
