Tag: piramidale

Ish-deputeti i Partisë Socialiste dhe ish-ministri i Financave, Arben Malaj ka shkëmbyer akuza të forta në distancë me ish-deputetin Myslim Murrizi, ku ky i fundit akuzonte politikën se kishte vjedhur naftën e Ballshit, teksa kërkonte dhe hetime për “Bankers”. Murrizi nxori edhe emrat e disa politikanëve që kanë përfituar miliona euro, duke përfshirë edhe ish-ministrin demokrat Eduard Halimin. Murrizi thotë se PD është e kapur vetë në këtë aferë, ndaj dhe nuk flet. “Prej 21 vitesh qentë, haletë, zagaret dhe fëlliqësirat politike qe ju shqiptarë votoni çdo 4 vjet vjedhin se bashku qindra miliona euro pasuri tuajën dhe ju e bleni naftën e benzinën me shtrenjte se te gjithë vendet e tjera te rajonit e Europes.
Vetëm 3 mender studio ligjore kane mare si “ peshqesh” për 5-6 vite 13,4 milion euro nga viti 2019 kur PD shiti jo dogji mandatet. Alket Hyseni ish deputet i PS dhe ish drejtor i pastrimit te parave ne vitet 2016-2017 ne qeverinë Rama ka mare 6 milion euro nga viti 2018-2025. Studio e Eduart Halimit, ish-ministër dhe ish- deputet i PD ka mare 2.7 milion euro nga shkurti 2019 deri ne qershor 2025 me 2 punonjës te punësuar dhe 720 mijë euro i ka marrë 4 ditë pasi PD dogji mandatet, pra date 23 shkurt. Studio e avokat Besnik Çerekja me gjithë bashkëshorten që përdoret si nga PS dhe nga PD si sekser ligjor për pazare te pista kanë marre 4.4 milion euro nga viti 2020 deri ne qershor 2025”, shkruante ndër të tjera Murrizi.
Përgjigjja e Arben Malajt
Ndërsa Arben Malaj duke kërkuar nga kolegu që të qëndrojë larg gjuhës vulgare dhe të përdorë më shumë argumetat, thotë se në 2005 kur qeveria e parë e Sali Berishës mori pushtetin, vetë bllokoi një hetim të thelluar për rafineritë e naftës. “S’po e kuptoj dot pse kaq heroik Myslymi. Pse kaq poshterues ndaj gjithë të tjerëve, “heroi” mediatik ish-kolegu Myslymi? Kemi folur, shoku Myslym. Kemi folur në parlament, kemi folur në media, kemi apeluar që SPAK duhet të hetojë me prioritet falimentimin e përshpejtuar të Unionit të Përpunimit të Thellë të Naftës. Pse nuk dhe dorëheqje, Myslym, kur pas vitit 2005 autoritetet policore bllokuan hetim të thelluar për rafineritë e naftës dhe ministri juaj i Financave certifikoj qëndrimin e policisë dhe nuk mbrotji autoritetet tatimore??? Pse nuk protestove në atë ditë? Pse nuk i bëre një apel të hapur ministrit të Financave dhe kryeministrit tënd dhe te partise tuaj, qe ajo ishte kapje e shtetit?”, shkruan ish-ministri socialist.
“Aty ke qenë deputet Murriz, kishe të gjithë të drejtën dhe mundësitë ligjore jo thjesht të flisje, por edhe të hetoje çdo vjedhje dhe t’u nxirrje ujë të zi “të zinjve” politikë që futën thellë duart në paratë e zeza të UPTHN-së në Ballsh. Nuk kam asgjë personale, as po e bëj për të mbrojtur ndonjë, sepse, fatmirësisht, hajdutët dhe të babëziturit, përditë e më shumë, do të jenë publikë. Jam krenar që edhe pas 20 viteve dhe pas shpifjeve pa fund të PD-së – ndaj të cilave ti asnjëherë nuk reagove pse e partia jote e bazonte luftën politike vetëm tek shpifjet ndaj kundërshtarëve politikë. Populli i zgjuar shqiptare thotë se kush nuk ha hudhra nuk i vjen ere goja”, replikoi Malaj.
Murrizi e sulmon ashpër
Në përgjigjen e tij, Murrizi shprehet ashpër lidhur me të kaluarën e Malajt, teksa i përmend se mori gradën shkencore në ekonomi tek firmat piramidale, ndërsa mandatin e deputetit e fitoi nga bandat. “Paska çar satokartin Ben Malaj dhe nga rrjedhja e vajit ka djegur motorin e vet dhe gonicionin e disa portaleve. Nuk jam heroik unë o Ben Malaj, por nuk jam piramidal si ti dhe për modesti po të them që nuk jam heroik, por në fakt në krahasim me ty Ben, jam, sepse ti more “gradën” prof. kr. tek firma piramidale e Lefter Cenajt, ndërsa unë kam bllokuar fondacionin piramidal Xhaferri. Nuk kam qenë deputet në 2005 unë o Ben Malaj, por vetëm në 1997-2001 kur ty të bënë bandat deputet, e unë në zonën time nuk pordha për bandat e PS e për komitetet e shpëtimit të leshit që të komandonin ty si top futbolli.
Madje ti e di mirë që nuk të pordha as ty në mars 1997 kur doje të më hiqje si nën/drejtor tatimesh, e të thashë që je ministër pa vota e nuk të pjerdh. Nëse e ke harruar se kohët e fundit je letuar pak, pyet Flor Mimen. Nuk kam qenë deputet në 2005 o Ben Malaj, por duke qenë që nuk i servilosem kryetarëve të partisë, kam kandiduar i pavarur në zonën 61 të Dushkut të famshëm që bëre ti me Metën, Nanon dhe Kaç Islamin në vitin 2001, kur ma vodhët mandatin me Celibashin në KQZ, që e zgjodhi prapë në 2020 Lyl Basha. Që të jesh i saktë o Ben Malaj, që Murrizi nuk ka qenë deputet në 2005, para se të thuash broçkulla për një rrogë tek Irfani, pyete Boden se e ke pasur koleg tek Banka e Shqipërisë, ose shkruaj Berishës për t’u siguruar, se në 1997-2001 kur unë isha deputet të thërriste Alamudhi i piramidave. Nuk kam qenë deputet në 2005 o Ben Malaj (Cenaj), se po të kisha qenë do flisja për ty si ish-ministër Financash që shite të gjitha pronat e firmave piramidale me Farudin Arapin për 5 lekë.
Nuk kam qenë deputet në 2005 unë o Ben Malaj, se po të kisha qenë do kisha folur për Bankersin që ti me qeverinë Nano ja dhatë kanadezit në 2004, para se të iknit nga pushteti, siç i dhatë turqve BKT, Telekomin, Kurumin, dhe mbushët xhepat. Pastaj, pas 1997-2001 jam bërë deputet në vitin 2017-2021 o Ben Malaj dhe kam ardhur në Komision të Ekonomisë në 2019 kur të shkarkuan ty nga anëtar i Këshillit Mbikëqyrës të Bankës së Shqipërisë, për të mbrojtur se po të luftonte Rama dhe partia jote. Dhe kur kam qenë deputet unë o Ben Malaj në 2017-2021 kam folur për Bankersin qysh në 2019, para 6 vitesh, dhe kam thënë fiks këtë që ka dalë sot ashiqare, që tek Bankersi janë bërë pis të gjitha haletë e politikës, përfshi edhe ty o Ben Hysenbelliu. Habitem shumë edhe me disa port-hale që shkruajnë broçkulla pacientësh pa i verifikuar, e madje u kënaqa shumë nga titulli bombastik i një portali që thoshte: ish-ministri i PS i ul hundën Murrizit.
O port-hale të ç’nderuara: Ministra dhe ish-ministra të këtij lloji nuk i ulin dot hundën Murrizit, por vetëm mund t’i ngrenë k…urajon, se Murrizi as ka firmosur kontrata, as ka firmosur tendera, as ka punuar tek firmat piramidale të ‘95, as punon tek firmat piramidale të 2025, as ka marrë tendera e as ka dhënë tendera. Prandaj, para se të bëni lajm traplliqet e trapave me gradë shkencore “prof. kr.” e me qafore, për një rrogë, nuk do ishte keq që të verifikonit ndonjë trapllik të pacientëve politikë. Një fjalë e urtë thotë: Burri ka kohë boll me u fëlliq, derisa të vdesë. Të shkuara fare o Ben Malaj, dhe nëse pret për ngushëllime nga shtatori, se tani jam me pushime, po të vij për vizitë. Murrizi o Ben Malaj (Hysenbelliu) nuk pjerdh për asnjë mashtrues apo hajdut ordiner, qofshin këta në politikë, në qeveri, në biznes, në drejtësi apo në media, dhe nuk leh për një rrogë për asnjë padrino palaço duke shpifur si i pafytyrë.
Por meqë je me “raport” mjekësor dhe vasal ekonomik, nuk të padis në gjykatë si mashtrues, sepse e di mirë që gjykata nuk i merr për bazë çfarë nxjerrin nga goja ata që kanë rrjedhje vaji. Të rroni vetë Ben Malaj dhe Zoti ju forcoftë për humbjen e madhe të asaj që dallon njeriun nga kafsha – mendjes. Nuk ka më turp kur sheh këta që demek kanë qeverisur Shqipërinë të shndërrohen në zagarë të atyre që kanë vjedhur pronat e shqiptarëve. Prapë do flas për Bankersin o Ben Malaj, dhe për çdo aferë që di, se ma ke ngritur aq shumë k…urajon sa nuk di ku ta derdh këtë energji që më ka dhënë kjo thirrja jote si kukuvajkë e Irfanit.”
Reagon sërish Malaj
Nga ana tjetër në një reagim të gjatë, Malaj e ironizon për formimin e tij “veterinar” dhe e akuzon për shpifje të vazhdueshme, për luhatje politike, për lidhje me maxhorancën aktuale dhe për qëndrime kontradiktore ndaj PD-së dhe ish-kryeministrit Sali Berisha. “Murrizi, ti më kërcënove me bandat e Fierit kur të shkarkova në vitin 1997, si Zëvendësdrejtor i Përgjithshëm i Tatimeve me një arsimim bazë veterinar. Të kishte promovuar Tritan Shehu, që ti tani e përçmon përditë. Të vërtetën e kërcënimeve të tua banale e njeh më mirë se kushdo ish-Drejtori i Përgjithshëm i Tatimeve dhe një nga ekspertët më të respektuar të taksave në Shqipëri, Florian Mima, i cili gjatë qeverisë së Pajtimit Kombëtar vazhdoi Drejtor i Përgjithshëm i Tatimeve. I cili, duke ditur nga arroganca jote banale, më kërkoi t’ju thoja vetë për shkarkimin. Të prita në zyrë, sulmove me fjalorin më të poshtër të një nëpunësi shteti, më kërcënove me rrugaçët dhe të fortët e Fierit.
Të thashë “pushka top” dhe po më detyron të them se ike me bisht ndër shalë. Por një javë më vonë, kur gruaja jote ishte në gjendje jo të mirë shëndetësore, Flori erdhi me nxitim tek unë dhe më ngriti shqetësimin tuaj për këtë rast. Edhe pse ti e kishe kërcënuar familjen time me banditët dhe të fortët e Fierit, urdhërova shefin e kabinetit të bënte urgjent procedurat që, me firmën time si ministër, të sigurohej viza. Në rreth 20 minuta të dhamë kërkesën urgjente në ambasadë dhe të ndihmuam në një moment kritik. Ti, me shpifjet e tua banale dhe pa asnjë shenjë mirënjohjeje, e meriton të të përmenden edhe raste fisnikërie. Sa i përket skemave piramidale, ato lindën, u rritën deri në 50% të PBB-së dhe u shndërruan në gropa të mëdha ku humbën miliona dollarë rreth 1.8 milion shqiptarë, nën qeverisjen varfëruese të partisë për të cilën ti ndihesh herë krenar dhe herë kritik i “rëndësishëm” publik. Pretendon sikur ti mbylle Xhaferin, por ata të penguan.
Kush të pengon? Kush i mbron humbjet e kreditorëve, të fondacioneve deri në 50% përqind? Pikërisht partia jote. Pse u bashkuat përsëri me partinë e piramidave? Vetë Berisha, me shumë vonesë, e pranoi se tolerimi i skemave piramidale ishte gabimi më i rëndë në karrierën e tij politike. Ti, “heroi ynë kombëtar”, kishe gjithë pushtetin me Saliun dhe Ritvanin për të bërë hetimin e skemave piramidale, duke u mburrur se do t’i hidhje “kalbit” në burg. U lodhët shumë dhe gjetët vetëm “qenin e ngordhur” të Kadri Rroshit. Jo vetëm që nuk më futët në burg, por unë në 2005-2006 isha një vit në universitetin më të mirë në botë, në Harvard University, në një program lidershipi. Unë i kam fituar të gjitha gjyqet kundër sulmeve shpifëse të PD-së dhe shpifësve të palodhur si ty. Kur të duash, do të vë në dispozicion një kopje, o shpifës origjinal dhe krenar. Por mbaj mend, o shpifës i zakonshëm, mençurinë e popullit se: “Kush nuk ha hudhra, nuk i mban erë goja”.
Unë profesor në ekonomi, me karrierë të shkëlqyer profesionale që nga 1986, ndoqa rrugëtimin tim profesional, akademik dhe politik. Ndërsa ti, një veteriner, krijove një universitet privat, e rrite dhe e mbylle?! Sipas medias, ti je shitur disa herë tek maxhoranca aktuale për përfitime financiare. Bëj t’i fal Taulantit! E mbaj mend kohën kur të thashë ballë për ballë në korridorin e parlamentit pse u shite për votën për të më shkarkuar nga KMBSH!? Ta thashë, por nuk të shpalla armik, thjesht të shtova si numër statistik në kopenë e shpifësve dhe të vetëshiturve. Do një kopje të procesverbalit të asaj mbledhjeje në Komisionin e Ekonomisë?
Çdo shpifje e jotja është provë se sa i vogël je në shpirt, shumë më i vogël se i vogël. Njerëzit e vegjël mbeten të vegjël edhe kur u bëjnë thirrje më të mëdhenjve për t’u vetëquajtur heronj. Do ta lë këtu këtë përgjigje. Kur të duash, mund ta plotësoj profilin tënd si shpifës i zakonshëm. Nëse nuk ndalesh, nuk është faji im që vetë e meriton shprehjen e popullit tonë të mençur: “Edhe dhi e zgjebosur është dhe bishtin përpjetë”. Kam kohë, prova dhe dëshmitarë që vërtetojnë lehtësisht se në këtë rast je një shpifës i pavetëpërmbajtur. Zoti të ndihmoftë të kuptosh se je duke u bërë deri qesharak!”.