Astronauti më i vjetër amerikan Don Pettit është rikthyer në Tokë në ditëlindjen e tij të 70-të.
Kapsula hapësinore Soyuz MS-26 ku ndodhej Pettit dhe shokët e tij rusë të ekuipazhit, Alexey Ovchinin dhe Ivan Vagner bëri ulje me parashutë në Kazakistan në orën 06:20 me kohën lokale të dielën.
Ata kaluan 220 ditë në bordin e Stacionit Ndërkombëtar të Hapësirës (ISS), tha agjencia amerikane e hapësirës NASA.
Për Pettit, i cili tani ka kaluar gjithsej 590 ditë në hapësirë, ishte misioni i tij i katërt.
Megjithatë, ai nuk është personi më i vjetër që ka fluturuar në orbitë, ky rekord i takon John Glenn, i cili në moshën 77-vjeçare fluturoi në një mision të NASA-s në vitin 1998. Ai vdiq në vitin 2016.
Pettit dhe dy kozmonautët rusë tani do të kalojnë pak kohë duke u përshtatur me gravitetin.
Pas kësaj, Pettit, i cili ka lindur në Oregon më 20 prill 1955, do të fluturojë në Hjuston të Teksasit, ndërsa Ovchinin dhe Vagner do të shkojnë në bazën kryesore të stërvitjes hapësinore të Rusisë në Zvyozdniy Gorodok (Star City) afër Moskës.
Para nisjes së tyre nga ISS, ekuipazhi ia dorëzoi komandën e anijes kozmike astronautit japonez Takuya Onishi.
Muajin e kaluar, dy astronautë të NASA-s, Butch Wilmore dhe Suni Williams, u kthyen në Tokë pasi kaluan më shumë se nëntë muaj në bordin e ISS, edhe pse fillimisht ishte planifikuar të qëndronin vetëm 8 ditë..
Ata fluturuan në ISS në qershor 2024, por problemet teknike me anijen kozmike që përdorën për të arritur në stacionin hapësinor nuk lejuan kthimin pas 8 ditësh. Ata ishin në gjendje të ktheheshin në Tokë vetëm më 18 mars të këtij viti./vizionplus.tv
