Tag: petroleum

Avokati Leonard Karaj, në një intervistë për “NTV”, ka bërë një seri akuzash të rënda mbi marrëdhëniet e qeverive shqiptare me kompaninë Bankers Petroleum, duke përshkruar një skemë të gjatë manipulimesh financiare, lidhjesh të errëta pronësie dhe vendimesh të qeverive që, sipas tij, i kanë kushtuar qindra milionë euro shtetit. Karaj deklaroi se nga viti 2004 deri sot, kompania ka raportuar gjithmonë humbje në Shqipëri, megjithëse ka deklaruar fitime mbi 10 miliardë euro në dokumente të publikuara nga arbitrazhet ndërkombëtare.
Ai theksoi se pronësia e Bankers është e mbështjellë në një rrjet kompanish offshore në Hong Kong, Ishujt Kajman dhe Kinë, duke e bërë të pamundur identifikimin e përfituesit real. Sipas Karajt, gjatë qeverisjes së Sali Berishës, Bankers jo vetëm që u favorizua me vendime të Këshillit të Ministrave si heqja e TVSH-së, por edhe rezultoi ndër donatorët kryesorë të fondacionit të Liri Berishës, duke dhuruar shuma të mëdha ndërkohë që deklaronte humbje. Ai përmendi gjithashtu transaksione të dyshimta financiare të lidhura me ish-ministra dhe familjarë të tyre.
Karaj akuzoi edhe qeverinë e Edi Ramës për zbutje të qëndrimit ndaj kompanisë pas një raporti të AKBN dhe Tatimeve që zbulonte 247 milionë euro shpenzime fiktive në vitin 2011, duke i shkaktuar shtetit një dëm prej 60 milionë euro vetëm atë vit. Në intervistë, avokati foli edhe për ndërhyrjen e ish-ambasadorit amerikan Donald Lu për të ndaluar hetimet mbi dëmtimet e shtëpive në Patos nga shpërthimet e Bankers, për arbitrazhe të humbura nga Shqipëria dhe për paga marramendëse të administratorëve të kompanisë.
Ja çfarë thotë avokati Leonard Karaj
“Çfarë vazhdoi me qeverisjen Berisha? Ka qenë një gjë e tillë që ta kuptojmë: kur erdhi këtu në qershor të 2004-s, 50% e koncesionit i mbetej qeverisë shqiptare dhe 50% i mbetej Bankers Petroleum. Çfarë rezultonte nga ky koncesion? Kompania do fillonte të ndante fitim në momentin kur do kishte fitim. Pra, në momentin kur ti del me humbje, supozohet që ti nuk ndan fitim. Tani pyetja është: si është e mundur që një kompani nga 2004 deri në 2025-ën del gjithmonë me humbje, kur ndërkohë ka deklaruar të paktën 10 miliardë euro fitime? 10 miliardë euro. Këto shifra kanë dalë nga institucionet shqiptare dhe ato ndërkombëtare, për shkak se kompania ka shkuar të paktën dy herë në arbitrazh dhe prandaj kanë dalë këto shifra. Nuk është se u shpikën këto histori.
Çfarë është Bankers Petroleum në vetvete? Për të kuptuar dhe pastaj për të ardhur më tej: Bankers Petroleum në vetvete ka shkelur ligjin shqiptar minimalisht në regjistrimin e saj, sepse ne kemi një ligj ku të gjitha kompanitë, sado të vogla apo të mëdha qofshin, kanë detyrimin që ta regjistrojnë pronarin përfitues. Kush është ai që përfiton nga të ardhurat? Bankers Petroleum Albania, siç thashë, pjesë e BNK-së, e Kelgary Group të George Sorosit, ka si kompani mëmë Bankers Petroleum International, e cila ka një pikëlidhje në Kanada, ka dhe në Poloni, në Hungari zyra, madje dhe në Holandë, kam përshtypje. Ndërkohë që, po ta shikosh në ÇKB-në e kësaj kompanie, në ÇKR-në e kësaj kompanie nuk del asnjë pronar. Pronari i kësaj del Charter P. International LTD limited. Kjo kompani është e regjistruar në Hong Kong. Ndërkohë që Charter Poëer International është bija e kompanisë Geo Jade International e regjistruar në Kinë, kompani publike kineze, të cilëve nuk u njihet pronari.
Po ta hapësh dhe sot e kësaj dite – unë e kam hulumtuar dhe e kam parë aty – do të shikosh që përfituesit e kësaj kompanie janë: pronari numër një ka aq aksione kuota, po flasim për miliarda euro, pronari numër dy, pronari numër tre. Pra, nuk dihet në mënyrë absolute se kush është pronari. Të gjitha këto kompani janë të regjistruara pastaj në Ishujt Kajman, pra në offshore, ku, siç e dinë, për ata që nuk e dinë, nuk është e detyrueshme që ti të japësh pronarin fundor përfitues. Kjo e mbulon me një mister të jashtëzakonshëm, për të mos thënë super korruptiv. Ikim nga kjo pjesë, sepse shpjegova kush është pronari. Në dhjetor të 2007-ës, kjo kompani, me urdhër dhe vendim të Genc Rulit, asokohe ministër i Ekonomisë dhe Financave, ka dërguar në Këshillin e Ministrave një shkresë ku kërkonte që Bankers Petroleum Albania të hiqte dhe 20% të TVSH-së, pra TVSH zero. Pra, në qoftë se bënte 100 ALL fitim, 20 ALL i takonin shtetit dhe këtë 20 lekësh të mos e paguante fare. Ky është vendim i Këshillit të Ministrave, i marrë nga qeveria e zotit Berisha asokohe. Po ta jap dhe datën: ka qenë më duket 17 ose 18 dhjetor 2007.
Kërkesa ka qenë e ministrit të Financave, Genc Ruli. Le ta hulumtojnë kush të dojë. Unë mbaj përgjegjësi për fjalët që them. Nga kjo rezulton që pas 2009-s, kjo kompani, Bankers Petroleum, është ndër 82 kompanitë më prestigjioze në Shqipëri, e cila ishte donatore e Fondacionit të zonjës Liri Berisha, bashkëshortes së zotit Sali Berisha. Po të hulumtosh sot tek fondacioni, nuk i gjen më këto kompani, po kanë ngelur ca gjëra. Po t’i shikosh, unë e kam atë listën e atyre 82 kompanive shqiptare dhe të huaja. Bankers Petroleum ka qenë e katërta që jepte donacione. Pyetja është: një kompani që del me humbje, si ishte e mundur që jep donacione? Dhe po flas për donacione jo të vogla: 100.000€, 200.000€, 500.000€. Këtu po flas për zotin Sali Berisha. SPAK ka pasur në dorë, dhe Prokuroria e Fierit ka pasur në dorë, edhe një transaksion të çuditshëm të 1.5 milionë eurove të një personi që quhet Denis AlihMehmeti, i cili ia ka kaluar një personi, një Klajd Froga, dhe ky i fundit ia ka kaluar djalit të Ridvan Bodes, në kohën kur Ridvan Bode ishte ministër i Financave, 1.5 milionë euro. Transaksioni i dyshimtë i asaj që ka ndodhur.
Raporti
Në vitin 2013, në qeveri vjen Edi Rama. Edi Rama, në 2014-ën, kërkon ndoshta me dashamirësi për të bërë një punë, apo ndoshta për t’i bërë presion, sepse tani ishe i atij dhe duhet të bëhesh i imi. Pra, tani ishe i Berishës, tani duhet të kolliteshe te Berisha, tani duhet të kollitesh tek unë. Nuk e di këtë. Ose ndoshta edhe nga fakti që vërtetë Edi Rama në 2013-ën duhet të bënte shtet, ta bëjmë të qartë si ide, ka futur AKBN-në, Alpetrolin, tatimet, për të bërë një raport të hollësishëm financiar të Bankers Petroleum. Raportin e ka bërë Brisida Shehaj me vartësit e vet. Është një nga raportet më të mirë që mund të ketë pasur në raport me Bankers Petroleum. Këtë e them me bindje të plotë. Merreni Brisida Shehaj, aty e keni, flisni dhe shikoni. Dhe jo pa qëllim Brisida Shehaj në 2015-ën, po ta mbani mend, u dekorua në një farë mënyre nga Edi Rama si “bleta punëtore”.
Mori atë pikërisht edhe për këtë shkak, sepse u bënë orë të tëra punë për të parë se çfarë kishte ndodhur. Çfarë kishte ndodhur? Kishte ndodhur që në vitin 2011 Bankers Petroleum kishte fshehur 247 milionë euro shpenzime, të cilat i kishte kamufluar midis kompanive të tjera: Sinai, Alp Star apo edhe Bolvoil, të cilët kishin bërë fatura fiktive sipas prokurorisë, jo sipas meje, dhe kishin marrë transaksione nga këto. Pse ndodhte kjo? Me qëllim që të mos paguhej një tatim në shtet prej 60 milionë euro. Pra, kjo e kishte ngritur shpenzimet me qëllim që fitimi të dilte sa më i pakët, ose zero, ose minus, me qëllim që ti mos paguash tatim fare.
Të dhënat
Dhe nga raporti doli që 247 milionë euro ishin shpenzime fiktive. Dhe dëmi i shtetit vetëm në vitin 2011 është 60 milionë euro, vetëm 2011. Mos vazhdo 2012, 2013 me radhë. Asokohe në 2014, kur erdhi ky raport Edi Ramës, ai ka dalë në media asokohe, e ka denoncuar, ka kërkuar në një farë mënyre që Bankers të vinte në tutelën ligjore tatimore në Shqipëri. Çfarë ndodhi me Bankers Petroleum? Ata bënë të njëjtën gjë, bënë kundërsulm, presion. “Në qoftë se ti na kërkon këtë gjë, ne do ndërpresim naftën, do ndërpresim këtë histori, do të ndërpresim atë.” Dhe Edi Rama u zbyth, madje tentuan që të shkojnë në arbitrazh, shkuan në arbitrazh pak më vonë për 236 milionë euro. E humbën arbitrazhin.
Edi Rama, të themi, tërhiqet, zbutet nga kjo histori, dhe arsyeja që më bën pastaj të kuptoj se pse ka ndodhur kjo histori, qëndron edhe me takimin e famshëm të Donald Lut në zyrën e Adriatik Lallës. Vetë Adriatik Lalla ka thënë: “Më ka ardhur Donald Lu dhe më ka kërkuar që unë të ndaloj në mënyrë eksplicite çdo lloj hetimi në lidhje me Bankers Petroleum.” Çfarë ndodhte? Ndodhte që Bankers Petroleum po bënte shpërthime në masë në Patos, dhe asokohe një pjesë e madhe e shtëpive të zonës aty po çaheshin, u prishën, u rrënuan. Dhe Prokuroria Shqiptare nisi një hetim asokohe në lidhje me këtë çështje, pikërisht se Bankers Petroleum përdorte një mënyrë teknologjike me gazin natyror – “shi i argjëror” quhet – për të nxjerrë naftë, ti impulson naftë, fut naftë për të nxjerrë një vakum tjetër nafte më të madh, dhe ato shpërthimet ishin për të krijuar liqene të vogla naftëmbajtëse brenda, për të bërë çarje brenda nën tokës shqiptare, me qëllim që të krijoheshin sa më shumë. Mirëpo, çarjet çfarë ndodhën?
Bënin tërmete të vogla deri në katër ballë. Prokuroria nisi hetimin atje, dhe zoti Donald Lu, ambasador i Shteteve të Bashkuara të Amerikës, i shkoi në zyrë dhe i kërkoi: “Ose ti do ikësh nga pozicioni që ke, ose do ndalosh këtë gjë.” Kjo ishte gjëja më e tmerrshme që ka deklaruar Adriatik Lalla. Problemi është që ky është fakt që ndodhi ama. Që u pezullua, u mbyll hetimi. Se unë jam dakort që kam vetëm Adriatik Lallën dhe s’kam Donald Lu, por ama kam faktin tjetër që na ekziston këtu, që është mbyllja e hetimit.  Edhe pastaj në 2017-ën Bankers shkon në arbitrazh. Qëlloi të përkojë me zëvendësimin e administratorëve. Pse ndodhi? Bankers ka pasur katër administratorë kinezë dhe një shqiptar. Çdo administrator kinez, dhe ky shqiptari madje që është larguar nga Bankers, nuk është larguar me të mirë. Secili prej tyre, kur ka ikur, ka filluar të tregojë çfarë ka ndodhur. Të njëjtën gjë ka bërë dhe Leonida Çobo, administratori shqiptar. Edhe ky në 2020-ën ka lënë gjë pa thënë për Bankers Petroleum. Pse? Sepse këta marrin 1 milion euro rrogë, vetëm rrogë në vit.”