Edhe tre ditë mungojnë nga fundi i fushatës elektorale për zgjedhjet e 11 maj 2025 në Shqipëri. Ka qenë një fushatë intensive, bazuar sidomos tek rrjetet apo mediat sociale, siç ishte e kuptueshme. Dy kampet kryesore, PS dhe PD- AMSH e impostuan fushatën në dy vizione të ndryshme. Mazhoranca aktuale, tek ajo që ka bërë gjatë 12 viteve të 3 mandateve. PD- ASHM kryesisht tek ajo që do të bëjë, sidomos në aspektin emergjent ekonomik, nëse vjen në qeverisje të vendit.
Në fakt, ka patur edhe një dimension tjetër, i cili mund të konstatohet por duhet hulumtuar më në thellësi e detaje. Në orët e mbrëmjes së kaluar, gjatë natës por edhe mëngjesin e kësaj të enjte, atmosfera mediatike u pushtua nga lajmi se “Berisha mund të udhëtojë drejt SHBA”. Referenca është një publikim në platformën X (Twitter) nga një gazetar amerikan, Marc Caputo, i cili ka pyetur dikë në Departamentin Amerikan të Shtetit. Deri në këto momente, nuk ka pohim apo mohim qoftë nga DASH, ashtu edhe nga Ambasada Amerikane në Tiranë.
Në komunikimin e zakonshëm “Sy m’Sy” të kryeministrit Edi Rama në rrjetet sociale, shefi i qeverisë ka njoftuar se tashmë janë hapur edhe një tjetër grupkapitull i negociatave me BE- në për antarësimin dhe, nëse do të hapen të gjithë brenda këtij viti, do të përbënin një rekord europian. Në pamje të parë, duket si një kundërpeshë e lajmit të dhënë nga gazetari amerikan për Berishën nga DASH. Edhe në rastin e lajmit të Ramës, nuk ka pohim e as mohim qoftë nga Brukseli, ashtu edhe nga Delegacioni i BE- së në Tiranë.
Ky është një detaj i radhës që krijon përshtypjen se edhe fushata zgjedhore në Shqipëri, po impostohet në “përplasjen” globale SHBA- BE pas marrjes së pushtetit nga presidenti Trump. Kryesisht, në dy aspekte: Atë të mbrojtjes së përbashkët në kuadër të NATO-s ku BE po angazhohet seriozisht per riarmatim dhe të çeshtjes së tarifave të mallrave.
Që me hapjen zyrtare të fushatës, qartas PD e ka impostuar atë në stilin amerikan. Duke nisur nga emërtimi i Aleanca për Shqipërinë Madhështore, tek qasja e vetë kryetarit Berisha, që nga imazhi dhe deri tek artikulimi i programit apo premtimeve. Nga ana tjetër, fushata e PS- së dhe Ramës, është impostuar e gjitha në kuadër të integrimit apo pasaportës europiane në vitin 2030.
A do të ketë ndikim kjo qasje e ndryshme edhe në aspektin e reflektimit të “përplasjes” SHBA- BE më shumë se thelbi i prezantuar në programe- premtimet respektive, mbetet të shihet me 11 maj 2025. Në orën 19.00, vullneti i shqiptarëve, brenda e jashtë kufijve, do të jetë i mbyllur në kuti. Nga zbrazja e numërimi i tyre, mund të merret një përgjigje edhe për pyetjen më sipër. Do fitojë qasja amerikane apo europiane e dy subjekteve kryesore politike në vend? /Shënim i ShkodraWeb/
Mund të udhëtosh me qerre, Fiat ose Ferrari. Zgjedhja është në dorën tuaj! Lidhu me SHKODRAWEB, mjafton të klikoni Kontaktoni për të mësuar më shumë.
Ju mirëpresim!
