Tag: përplasja

Rigels Seliman
Nga shpërthimi tragjik në Gërdec në vitin 2008, e deri te gjaku i derdhur në bulevard më 21 janar 2011, ish-presidenti Bamir Topi ka thyer heshtjen pas më shumë se një dekade, ndërsa ka nxjerrë në dritë skenarët e errëta që u thurën në majat e pushtetit. Ai tregon se pas tragjedisë së Gërdecit nisi përplasja e parë me kryeministrin Berisha, e cila më pas u shndërrua në një luftë institucionale për jetë a vdekje. Sipas tij, ndryshimet kushtetuese të vitit 2008 ishin pjesë e një marrëveshjeje të fshehtë që synonte kapjen e shtetit dhe transformimin e Shqipërisë në një republikë kryeministrore. Ish-presidenti deklaron se u përjashtua nga çdo vendimmarrje dhe çdo informacion, ndërkohë që strukturat e drejtësisë u sulmuan për të mbyllur dosjen e 21 Janarit. Ai zbulon se thirri Këshillin e Sigurisë Kombëtare menjëherë pas Gërdecit, por alarmin e tij nuk e dëgjoi askush. “Pas 21 janarit, mbajta qëndrim të fortë publik dhe mbështeta drejtësinë, ndërkohë që pushteti e kishte shpallur atë armike”, thekson Topi, duke zbardhur një nga periudhat më të errëta të shtetit shqiptar.
U përjashtova si President, përplasja me Berishën u bë institucionale
Konkretisht ish-presidenti Bamir Topi iu rikthye përplasjeve të forta dhe publike me Sali Berishën në vitet 2008 dhe më pas në vitin 2011, kohë kur ai mbante postin e Kryeministrit. Në emisionin “Të Paekspozuarit”, Topi tha se përplasja e parë ndodhi pas shpërthimit në Gërdec ku vdiqën 26 njerëz dhe u plagosën mbi 300 të tjerë, pas të cilës edhe u bë edhe marrëveshja Berisha-Rama për ndryshimet kushtetuese. Ndërsa kulmi i përplasjeve institucionale ndodhi pas vrasjes së 4 protestuesve në bulevard, përpara kryeministrisë më 21 janar 2011, gjatë protestës së organizuar nga PS-ja, kut Topi tha se mbështeti organet e drejtësisë që ishin sulmuar ashpër nga kryeministri i asaj kohe, Berisha. “Përplasja e vërtetë me Berishën ka ndodhur në vitin 2008 dhe ka qenë shumë institucionale. Nisi pas 15 marsit 2008 me shpërthimin e Gërdecit. Pasi jemi kthyer nga Bukureshti kur morën ftesën për anëtarësimin në NATO dhe 2-3 ditë pas këtij momenti shikoj flash informativ që vinte nga komisioni i ligjeve dhe çështjeve kushtetuese, i cili po trajtonte marrëveshjen që është votuar më 21 prill 2008. Aty ngrihet një ish-deputete e Shkodrës dhe propozon që ndryshimet kushtetuese që do të bëheshin të kundërfirmoseshin nga kryeministri. Kishte filluar lufta. Ishte një nga normat më antidemokratike.
Ky episod ngriti alarmin se unë s’kisha asgjë në dorë, asnjë letër. Unë mora informacionin se këta po punonin me opozitën. Ishte një projekt i Berishës dhe i Ramës dhe e futën Shqipërinë në një periudhë krizash ciklike. Me kushtetutën që këta realizuan ti mund të zëvendësosheshe për 24 orë me 71 vota jo me 84 si më parë. Kam folur një javë para se të miratohej kjo marrëveshje okulte se dëmi ishte te partitë brenda, beteja kundër institucioneve, kthimi nga republikë parlamentare në republikë kryeministore. Ka 17 vite që unë i bie kësaj melodie që opozita sot e mallkon, por nuk e thotë dot se e ka arkitektin aty brenda. Një javë pas Gërdecit unë thirra Këshillin e Sigurisë Kombëtare dhe në atë takim ka patur diskutime që mbeten aty brenda, janë në Arkivën e Presidencës. Përplasja jonë vjen në 21 janar 2011. Këtu gjërat harrohen shumë shpejt. Pas asaj që ndodhi në bulevard unë kam dalë në një status dhe ka qenë shqetësim maksimal nga ana ime se ishin vrarë njerëz dhe mesa duket ajo që kam cilësuar ka qenë vrasjet në bulevard dhe nuk kam thënë vrasjet në kryeministri. Të gjithë e panë skenën 3D dhe mbajta qëndrim shumë të fortë dhe më pas u dhashë mbështetje publike institucioneve të drejtësisë nga prokurorja e përgjithshme e më tej”, deklaroi dy ditë më parë ndër të tjera ish-presidenti Topi.
Box 1
Mandati i katërt i Ramës, Topi: E frikshme vazhdimësia e pushtetit të një personi
Ish-presidenti Bamir Topi, foli për mandatin e katërt të kryeministrit Edi Rama. Ai u shpreh mjaft kritik duke bërë paralelizëm me sistemin e kaluar totalitar dhe kultin e njëshit. Topi tha se pushteti i Ramës buron nga marrëveshja me Berishën në vitin 2008 dhe ata ndajnë pushtetet, njëri në pozitë dhe tjetri në opozitë. “Rama është kryeministri dhe kryetari i mazhorancës dhe në mënyrë absolute nuk kam patur asnjë nevojë për Edi Ramën. Në jetën politike ka penguar projektin që unë të shkoja në krye të shtetit në vitin 2007. Kam zero përfitim nga mandati i tij. Sot ai i ka marrë të gjithë pushtetet nga marrëveshja e vitit 2008. Këto ide të tij si shteti bektashi janë projekte ekstravagante. Duhet të shkojë në OKB dhe të deklarojë atje nga tribuna projektin për shtetin bektashi. Si ka mundësi që të deklarohet një projekt kur në këtë vend, kur janë gjëra kaq të rëndësishme për një vend, duhet të diskutohet, të merren strukturat, apo të shkohet edhe te zgjedhja referendare që ne e kemi harruar. Ky është një vend i vogël që i kaluar një herë një sistem. Duket sikur po shkojmë te gjurmët e pushtetit të njëshit. Do ta konsideroja të frikshme idenë e vazhdimësisë së pushtetit të një personi. Demokracia nuk po ndihet të ekzistojë më sepse janë në komoditet njëri në pushtet tjetri monopolist i 25 partive.  Është çështja e mbajtjes së pushtetit kur ndodhin paradokse të mëdha. Sa më shumë problem të ketë aq më shumë mandate merr. Është një klimë që në mjekësi quhet proces i organizuar, i kalçifikuar dhe nëse nuk hiqet me kirurgji nuk ka recetë që e shëron”, nënvizoi Topi në emisionin “Të Paekspozuarit”.