Prej 4 ditësh mijëra qytetarë në të gjithë vendin po luftojnë me ujin në përmbytjet që kanë mbuluar vendin.
Lumenjtë Vjosa e Seman kanë dal nga shtrati duke përmbytur qindra hektarë e banesa. Situatë kritike nga përmbytjet paraqitet në qarkun e Lezhës, Vlorës, Fierit, Gjirokastrës dhe Beratit, ku shkak është bërë infrastruktura e dobët, dëmtimi i argjinaturave si dhe mosfunksionimi i hidrovorëve.
Banorët kanë ngritur akuza ndaj institucioneve, të cilat sipas tyre kanë neglizhuar marrjen e masave dhe kryerjen e investimeve në kohë për të parandaluar dëmtimin e argjinaturave apo mosfunksionimin e hidrovorëve. Në veri probleme janë shënuar edhe me rrëshkitjen e dherave dhe bllokime rrugësh.
SYRI TV
Këto janë pamjet, që tregojnë situatën nga përmbytjet në ultësirën Perëndimore, të vendit, konkretisht në zonën e Barbullojit dhe Rrilës në Lezhë. Qindra hektarë tokë dhe mbi 100 banesa janë përmbytur nga uji, për shkak të çarjes së argjinaturave mbrojtëse dhe mosfunksionimit të hidrovorëve të kanaleve të ujërave të larta.
Dëme të konsiderueshme janë shkaktuar në ekonomitë familjare të banorëve, të cilët kanë humbur bagëti, shpendë shtëpiak apo dhe mekanikë bujqësore.
Situatë e ngjashme është në Vlorë, në zonën e Novoselës ku dalja nga shtrati e Lumit Vjosë, ka shaktuar përmbytjen e të paktën 28 banesave në Mifol, ndërsa banorët kanë akuzuar strukturat shtetërore për situatën e krijuar.
Në bashkinë Sarandë janë përmbytur rreth 26 banesa, në fshatin Çukë, ndërsa banorët janë evakuar duke u shpërndarë ushqime dhe çadra. Këtë të shtunë prurjet e lumenjëve dhe përrenjve, kanë rënë, ndërsa dëmet në infrastrukturë dhe bujqësi janë të mëdha.
Në qarkun e Fieri, për shkak të daljes së lumenjëve Vjosë dhe Seman, janë përmbytur rreth 30 banesa në fshatrat Kashisht, Çerven dhe Ferras. Probleme ka pasur edhe në fshatin Belinë, për shkak të prurjreve të lumit Seman.
Reshjet intensive të shiut kanë shkaktuar probleme serioze në infrastrukturën rrugore të Gramshit. Ura e Shëmrizës ka pësuar dëmtime në njërin krah, duke rrezikuar izolimin e rreth 2500 banorëve.
Në qarkun e Gjirokastrës, për shkak të dëmtimit të urës që lidh aksin rrugor kombëtar me shtatë pesë fshatra të Glinës, ka shkaktuar izolimin e tyre, ndërsa janë bllokuar dhe dy fshatra në Përet dhe Libohovë.
Probleme nga reshjet, janë shkaktuar dhe në qarqet Veriore të vendit, ku për shkak të shirave ka pasur rrëshkitje gurësh dhe bllokim rrugësh në qarkun e Dibrës dhe të shkodrës. Probleme janë raportuar dhe në qarkun e tiranës, ku raportohet për mungesë të energjisë elektrike.
