Tag: përgjithshëm

Elmas Bogdani
Shtatë muaj pas arrestimit, ish-presidenti Ilir Meta tashmë është marrë zyrtarisht i pandehur. Kreut të PL i janë komunikuar ditën e djeshme nga SPAK akuzat e korrupsionit, pastrimit të parave dhe fshehjes së pasurisë. Me të njëjtat akuza Prokuroria e Posaçme Antikorrupsion ka marrë të pandehur edhe ish-bashkëshorten e tij, Monika Kryemadhi. Akuzat i janë komunikuar nga Altin Dumani, Arben Kraja dhe Sotir Kllapi, prokurorët e dosjes e cila përfshiu tre hetime në një, aferën CEZ-DIA, skandalin e lobimit të LSI në SHBA dhe hetimin pasuror.
Nëse Meta dhe Kryemadhi shpallen fajtor për të tre akuzat, korrupsion, pastrim parash dhe fshehje pasurie, ata rrezikojnë deri në 30 vite burg në total, por praktikisht mund të dënohen me një dënim të bashkuar deri në 15 vite burg, sipas praktikës së bashkimit të dënimeve në Kodin Penal. Pastrimi i parave: 5 deri në 15 vjet burg (nëse provohet në rrethana të rënda). Korrupsioni: 4 deri në 12 vjet burg. Fshehja e pasurisë: deri në 3 vjet burg ose gjobë. Pra, Meta rrezikon një dënim të rëndë afatgjatë, në varësi të vendimit përfundimtar të gjykatës dhe provave të SPAK.
Reagimi i Metës
Lajmi për ndryshimin e statusit penal në përballje me drejtësinë bëri që kreu i PL të kishte komunikimin e tij të parë me mediat përmes telefonit të avokatit, ku nuk harroi të sulmonte SPAK, ndërsa e quajti një organizatë në shërbim të verbër të Ramës. Kreu i PL-së hodhi akuza të forta edhe për tradhti e komplot nga brenda PL-së të një personi (nuk ia përmend emrin), që i ka shitur listën me 12 mijë votues të tij tek patronazhistët e PS-së, sepse sipas tij, donte të bëhej Sekretar i Përgjithshëm në vend të Tedi Blushit. Duket se Meta i referohet Endrit Braimllarit, i cili iu bashkua PS, ndonëse nuk e përmend me emër. “Çuditërisht askush nuk është paraqitur të më shoqërojë, kam edhe hallin e avokatit tim që po humbet kohën kot.
Mezi po pres të shkoj që t’i uroj për 83 mandatet që i dhanë me Task Forcën e tyre kundër opozitës, por edhe me Task-Forcën për të mos vepruar kundër terroristëve elektoralë. Ata po presin nga Edi Rama që të jenë të përjetshëm, të përjetshëm sepse nuk i kuptojnë dot krimet intelektuale që bën Rama, si inceneratori që nuk ekziston. Nuk kam kurrë ndër mend të kërkoj as mbylljen me procedurë, mezi po pres sallën e gjyqit ku do jeni ju, ku do ketë gazetarë ndërkombëtarë, të shikojmë edhe faktet edhe provat, e çfarë është kjo organizatë në shërbim të verbër të Edi Ramës. Pjesë e një votimi antikushtetues me 69 vota të një prokurori të përgjithshëm, të Arta Markut, zgjodhi atë në mënyrë të paligjshme dhe pastaj zgjodhi këta. Nuk do të ketë kurrë kërkesë nga Ilir Meta për mbyllje me procedurë, ashtu sikurse nuk ka pasur as në të kaluarën. Ky është një proces që do fitohet ashtu siç i ka fituar presidenti Ilir Meta të gjitha proceset hetimore që bëri parlamenti kundër tij me 120 kartona si President i Republikës.
Falenderoj 8 mijë heronjtë që votuan Ilir Metën, që u rrëmbye në mënyrë terroriste, me vetëdije, me blindat e Altin Dumanit dhe të kolegëve të tij. I falenderoj të gjithë ata shokë dhe miq që punuan, por që u tradhtuan nga një maskara që me porosinë time dhe këtë e di sekretari i Përgjithshëm i PL, i cili dorëzoi listën me 12 mijë vetash që kishin bërë shokët, miqtë, dashamirësit që votonin Ilir Metën, duke ia dorëzuar patronazhistëve, sepse priste që të bëhej sekretar i përgjithshëm në vend të Tedi Blushit, në bashkëpunim edhe me bashkëpunëtorët e tjerë”, tha Meta.
Deklaratat e ashpra të avokatit të Metës
Edhe më i ashpër ishte vetë avokati i ri i Metës, Kujtim Cakrani. “Iu komunikua akuza, do bëjmë kërkimet tona. Do kërkojmë të kryhen disa veprime procedurale. Nuk ka patur ndryshim nga materiali që është paraqitur për të tre akuzat, korrupsioni pasiv, pastrim parash dhe fshehja e pasurisë. Kishte qëndrim, sepse akuzat nuk qëndrojnë, janë shpjeguar edhe gjatë fazës hetimore, edhe kur është marrë në pyetje. Hetimet u përfunduan pas zgjedhjeve dhe jemi në këtë moment, pikërisht në momentin që përfunduan zgjedhjet, për të hequr vëmendjen. Pasi të lexojmë materialet, njihemi edhe me aktet, sepse janë fashikuj të tërë, duhen kohë për t’i studiuar. Meta i ka dhënë shpjegimet para se të merrej masa e arrestit.
Çështja është e montuar, i drejton autokrati të gjitha veprimet, i ka drejtuar të gjitha veprimet ndaj Metës. Janë persona të tjerë që mbajnë përgjegjësi për lobimet, emrat do dalin, kjo çështje nuk përfundon këtu, do thirren ato persona që ka ngritur kartonët edhe në Kuvendin e Shqipërisë. Do jetë procesi i shekullit, kjo gjykatë vendos çfarë kërkon prokuroria. Është qëndrim i Metës, ju keni qenë dëshmitar të rrëmbimi të Metës. Nuk pati veprim nga Policia që të verifikonin këta banditë që rrethuan rrugën dhe e arrestuan në atë mënyrë. Nuk ka asnjë hetim. Meta është regjistruar si person hetim më 10 qershor, dhe është arrestuar më 21 tetor, plot 5 muaj më pas. Pse duhet arrestuar Meta, se u lirua Berisha dhe u arrestua Meta. Të dy jashtë nuk mund të rrinin jashtë për zgjedhje”, tha ai.
Qëndrimi i Kryemadhit
2 orë në SPAK qëndroi dje dhe Monika Kryemadhi, e cila edhe ajo foli për përballje në gjyq. Kryemadhi sulmoi SPAK dhe kryeministrin Edi Rama, ndërsa shtoi se ka frikë vetëm nga drejtësia hyjnore dhe jo ajo njerëzore. “Unë ua kam thënë që në janar nuk them asnjë fjalë aty. Shihemi në gjyq, sepse u firmos e gjithë kjo. Içik muhabet s’do bënim me, ca u bë me zgjedhjet apo kush do të kandidojë për prokuror e BKH? Aty prokuror e BKH është Edi Rama. Sfidat për mua janë me opinionin publik dhe zotin, drejtësia njerëzore është një moment dhe drejtësia hyjnore është ajo që duhet të kemi frikë. Duhet me jetuar fort. Çfarë ka ndodhur në të kaluarën dhe çfarë do të ndodhë në të ardhmen, asnjëri nuk e di”, u shpreh Kryemadhi.