Moti ekstrem vrau të paktën 30 persona në Pekin, pasi reshjet e shiut të një viti ranë në më pak se një javë, duke detyruar zhvendosjen e më shumë se 80,000 njerëzve, duke dëmtuar rrugët dhe duke ndërprerë energjinë elektrike dhe komunikimet në më shumë se 130 fshatra.
Qindra fluturime dhe një numër shërbimesh treni u vonuan ose u pezulluan ndërsa stuhitë arritën kulmin të hënën në mbrëmje, duke i tendosur aftësitë e kryeqytetit për menaxhimin e fatkeqësive dhe duke i bërë disa ekspertë ta quajnë qytetin një “kurth” shiu.
Pjesa më e madhe e shiut kishte rënë në veriun malor të Pekinit pranë Murit të Madh, me të paktën 28 vdekje të raportuara në distriktin Miyun dhe dy në Yanqing, raportoi Xinhua. Agjencia shtetërore e lajmeve nuk tha se kur ose si ndodhën vdekjet.
“Përmbytja erdhi në një çast, thjesht nuk kishe asnjë hapësirë mbrojtëse”, tha Zhai, 33 vjeç, e cila drejton një dyqan ushqimor në Miyun, tani një zonë katastrofe mes urave të shembura, makinave të dëmtuara dhe tubacioneve të shkatërruara.
Ajo i tregoi Reuters gjurmët e lëna pas ndërsa ujërat e përmbytjes po tërhiqeshin. Ato ishin rritur në 1.5 metra (4.92 ft), duke e zhytur dyqanin e saj për orë të tëra dhe duke i shkatërruar stoqet e ushqimeve dhe pijeve.
Liu, e cila zotëron një restorant aty pranë, ishte gati të qante ndërsa shikonte stolat e përmbysura dhe tavolinat e mbuluara me baltë në restorantin e saj.
Pajisjet e mëdha si frigoriferët kishin qëndruar të zhytura për orë të tëra dhe ka të ngjarë të jenë dëmtuar, tha bashkëshorti i saj Yang, duke vlerësuar dëmin në më shumë se 100,000 juanë (14,000 dollarë).
‘JASHTËZAKONISHT SHKATËRRIMTARE’
Shirat e rrëmbyeshëm filluan më 23 korrik dhe arritën kulmin rreth Pekinit dhe provincave përreth të hënën, me Miyun që përjetoi reshje deri në 573.5 mm (22.6 inç) – nivele që media lokale i përshkroi si “jashtëzakonisht shkatërruese”. Reshjet mesatare vjetore në Pekin janë rreth 600 mm.
Rreshjet më të dendura të shiut ndodhën të shtunën në kodrën Huairou të Pekinit, ku ranë 95.3 mm shi në një orë.
“Sasia kumulative e reshjeve ka qenë jashtëzakonisht e lartë – duke arritur në 80-90% të totalit vjetor vetëm në pak ditë në disa zona”, tha Xuebin Zhang i Universitetit të Viktorias në Kanada dhe Drejtor Ekzekutiv i Konsorciumit të Ndikimeve të Klimës së Paqësorit.
“Shumë pak sisteme janë projektuar për të përballuar një vëllim kaq të madh reshjesh gjatë një periudhe kaq të shkurtër”, tha Zhang.
Topografia lokale – malet në perëndim dhe në veri – “bllokuan” ajrin e lagësht dhe e detyruan atë të ngrihej lart, duke amplifikuar përmbytjen, tha ai.
Veriu zakonisht i thatë i Kinës ka parë shira rekord vitet e fundit, me disa shkencëtarë që e lidhin këtë me ngrohjen globale.
Në verën e vitit 2023, shirat e rrëmbyeshëm dhe përmbytjet vranë të paktën 33 persona në Pekin. Reshjet në qytetin Xingtai në provincën fqinje Hebei tejkaluan 1,000 mm në dy ditë – dyfishi i mesatares vjetore.
‘PËRMBYTJET PO VIJNË’
Shira të rrëmbyeshëm përfshiu gjithashtu provincën Hebei dhe qytetin Tianjin pranë Pekinit.
Në Hebei, tetë persona humbën jetën kur një rrëshqitje dheu goditi një fshat të hënën, pasi rajoni pati shira të mjaftueshëm për gjashtë muaj gjatë fundjavës. Katër persona mbetën të zhdukur.
Në dy fshatra në Tianjin të hënën, vetëm çatitë e shtëpive njëkatëshe ishin të dukshme, raportoi Televizioni Qendror i Kinës (CCTV).
Ministria e menaxhimit të emergjencave tha se situata e ndihmës në rast fatkeqësie kishte qenë “komplekse dhe e rëndë”.
Banorët kërkuan përpjekje më të shpejta shpëtimi në postimet në platformën e mediave sociale Weibo.
“Përmbytja po vjen ende, dhe ende nuk ka energji elektrike apo sinjal, dhe unë ende nuk mund të kontaktoj me familjen time!” shkroi një përdorues i Weibo të martën në mëngjes./ Reuters.
