Adriatik BALLA
Partizani hodhi dje një hap të madh drejt finales së Kupës së Shqipërisë, pasi fitoi duelin e parë gjysmëfinal me Egnatian, në stadiumin e kësaj të fundit, me shifrat 1-0. Më shumë se goli i realizuar, për të kuqtë është një mundësi që të menaxhojnë epërsinë në duelin e kthimit dhe të sigurojnë kalimin në finale. Ndeshja e djeshme e luajtur në Rrogozhinë pa vendasit më të fortë e më shumë aktiv në fushë, por në rezultat ishte Partizani që siguroi pritshmëritë. Ndeshja po mbërthehej në barazim pa gola deri në minutën e 81-të, por një aksion pa shumë pretendime i të kuqve nxori skuadrën te goli. Pikërisht në këtë minutë, u dha penallti për Partizanin! Një kundërsulm i shpejtë nxjerr Kekon të vetëm pranë portës, me sulmuesin i cili rrëzohet në zonë pas kontaktit me Zejnullain. Gjyqtari nuk heziton e bën shenjë nga pika e bardhë. Dhe Keko nga 11-metërshi shënon duke kaluar në avantazh Partizanin. Në minutat e fundit, kur Egnatia ishte hedhur e gjitha përpara, Partizani mund të shënonte edhe golin e dytë në kundërsulm.
Ardhja e trajnerit Skënder Gega sjell fryte
Duhet theksuar se ardhja e trajnerit Skënder Gega po jep rezultate magjike në krye të demave të kuq. Dy ndeshje-dy fitore për trajnerin e rikthyer në pankinën e Partizanit, fillimisht fitore ndaj Laçit në kampionat, e tani fitore në duelin e parë gjysmëfinal me Egnatian. Fitorja e djeshme në transfertë i jep Partizanit avantazhe të dukshme për duelin e kthimit, që do të luhet në “Arenën e Demave” dhe të kuqve tani u del detyrë të menaxhojnë epërsinë e krijuar. Me trajnerin Gega në stol gjërat duken më të thjeshta dhe një rikthim i tillë sensacional i trajnerit mund të ndihmojë skuadrën të jetë efikase si në kampionat dhe në Kupën e Shqipërisë. E në lidhje me kupën, fitorja e djeshme ndaj Egnatias vlen shumë. nëse Partizani fiton trofeun e Kupës për këtë sezon, atëherë do të sigurojë dy objektiva njëherësh. Së pari merr trofe, së dyti arrin të marrë pjesë në Ligën e Konferencës së UEFA-s. Pra, Partizani me Gegën është rikthyer në shinat e duhura dhe po jep shpresë tek tifozët se mund të mbyllë një sezon të suksesshëm. Mjaftuan dy ndeshje, dy fitore dhe gjithçka duket se flet për Partizanin.
Elbasani shpreson ta përmbysë Partizanin për “Final Four”
Edhe pse duket një sipërmarrje e vështirë, sepse diferenca me Partizanin është katër pikë, në kampin verdheblu të Elbasanit nuk janë dorëzuar. Synimi është që deri në përballjen e fundit mes tyre, diferenca të shkojë së paku në tri pikë, në mënyrë që të kenë shansin në sfidën direkte për ta mundur, pasi edhe me pikë të barabarta janë të besuarit e Gvozdenoviç që marrin këtë pozicion, sepse janë në avantazh në ndeshjet e tyre direkte. Për këtë arsye, elbasanasit duan që së paku të rikuperojnë një pikë ndaj të kuqve në tri sfidat e ardhshme. Një objektiv i arritshëm duke parë edhe ecurinë e javëve të fundit. Gjithsesi, fillimisht verdheblutë duhet të kalojnë pengesat e tyre që kanë rrugës, sepse nuk kanë ndeshje të lehta. E para që duhet të kalojnë me sukses është ajo ndaj kampionëve të Egnatias këtë të hënë në fushën e këtyre të fundit.
