Lajmidites.com

Tag: panairi

  • Panairi tradicional i Gjelit të Detit në Peqin, fermerët: S’ka subvencione nga shteti, importet po na dëmtojnë

    Panairi tradicional i Gjelit të Detit në Peqin, fermerët: S’ka subvencione nga shteti, importet po na dëmtojnë

    Në Peqin u zhvillua panairi tradicional i Gjelit të Detit, një organizim që sjell në vëmendje traditën shumëvjeçare të mbarështimit të këtij shpendi, simboli kryesor i tryezës festive të Vitit të Ri.

    Gjelat e detit këtë vit në Peqin po tregtohen me 1000 deri në 1200 lek për kg. Sezoni sapo ka nisur por fermerët, theksojnë se çmimi nuk e justifikon mundin.

    Ata gjithashtu thonë se gjelat e therur të importit po i dëmtojnë, ndërsa nga shteti nuk kanë përfituar asnjë subvencion që ta vijojnë traditën shumëvjeçare.

    ‘Unë kam 60-70 krerë, po duhet të mos hyjnë nga jashtë që ne të shesim më shumë’, tha një fermerë.

    Deri tani nuk kemi marrë subvencionim nga shteti, ka kosto shumë, po ne e kemi traditë, Peqini nuk e ka humbur këtë traditë’, tha një tjetër.

    ‘Duam ndihmë nga shteti se ushqimet janë shumë të shtrenjta’, tha një tjetër fermer.

    Vetëm në Peqin mbarështohen çdo vit rreth 30 mijë krerë gjela deti. Drejtuesit lokal tregojnë arsyet pse është i veçantë ky shpend në këto zona.

    Panairi i këtij viti u mbajt në muret historike të kalasë së Peqinit. Aktiviteti mblodhi bashkë fermerë, qytetarë dhe vizitorë, me qëllim promovimin e prodhimeve lokale dhe traditave gastronomike të zonës.

  • Elsa Skënderi: Juria e panairit librat i ka shqyrtuar e gjykuar, por gjykimin përfundimtar për to, mbetet që ta japë..

    Elsa Skënderi: Juria e panairit librat i ka shqyrtuar e gjykuar, por gjykimin përfundimtar për to, mbetet që ta japë..

    Nga Julia Vrapi
    Panairi i Librit në Tiranë një ngjarje e rëndësishme kulturore që dhe këtë vit vijoi mes librave, titujve të rinj në stenda apo dhe aktiviteteve të ndryshme. Midis shumë ngjarjeve letrare të panairit, është edhe përzgjedhja e veprave më të mira. Juria e këtij panairi që përbëhej nga Elsa Skënderi Rakipllari (kryetare), Beti Njuma, Maniela Sota, Teuta Dhima dhe Zija Vukaj këtë vit mori në shqyrtim rreth 260 vepra të paraqitura për konkurrim. I kthyer në një traditë të përvitshme, Panairi i Librit 2025 vlerësoi autorët dhe përkthyesit që kanë spikatur për kontributet e tyre në letërsinë shqipe dhe atë të përkthyer, ku çmimi “Autori më i mirë i vitit” i shkoi shkrimtarit dhe akademikut Artan Fuga për romanin “Ndëshkimi i dytë i Evës”. Kryetarja e jurisë së Panairit të 28 të Librit Elsa Skënderi Rakipllari në fjalën e saj, në ceremoninë e dhënies së çmimeve u shpreh se me rëndësi ka qenë trajtimi me përpikëri i të gjithë lëndës letrare apo studimore.
    Ndër të tjera ajo u shpreh se juria e panairit librat i ka shqyrtuar e gjykuar, por gjykimin përfundimtar  për to, mbetet që ta japë lexuesi dhe koha. Ajo tha se puna e jurisë është organizuar në përputhje me disa parime formale, që lidheshin me kriteret e pranimit të veprave apo të autorëve në konkurrim. “Në radhën e këtyre kritereve, p.sh., ishte kriteri sipas të cilit një autor/përkthyes i vlerësuar me çmim Panairi brenda tri viteve të fundit nuk mund të klasifikohej si pretendent për çmim këtë vit. Sa iu takon parimeve përmbajtjesore që kemi ndjekur si juri, ato kanë pasur të bëjnë me: risinë për zhanrin përkatës, përmbajtjen e spikatur letrare dhe me aspektet gjuhësor të veprave (gjuhë e pasur dhe vepra të redaktuara si duhet). Po kështu, për jurinë me rëndësi ka qenë trajtimi me përpikëri i të gjithë lëndës letrare apo studimore, të dorëzuar për konkurrim brenda afateve dhe pasja në konsideratë e botuesve dhe e krijuesve si nga Shqipëria ashtu edhe nga Kosova e Maqedonia e Veriut. Letërsinë shqipe, studimet e librat shqip i kemi bashkë, ndaj dhe vlerësimet, që padyshim parakusht kanë meritën, duhet t’i kemi bashkë”, tha Elsa Skënderi Rakipllari kryetare e jurisë.
    Tematika e botimeve
    Sa i takon tematikës së librave të paraqitur në konkurrim këtë vit, Elsa Skënderi Rakipllari kryetare e jurisë u shpreh çfarë u vu re në prozë apo dhe risitë. Sipas saj, risi vihen re edhe në zgjerimin e tematikës letrare. “Në prozë vërehet një rimarrje e motiveve të së shkuarës komuniste te autorët e Shqipërisë shtetërore, ndërsa te disa prej autorët e Kosovës këto motive të së shkuarës lidhen me Luftën Çlirimtare të Kosovës; Sakaq, një pjesë e veprave letrare po transfigurojnë edhe zhvillime më bashkëkohore të lidhura, për shembull, me lëvizjet demografike të shoqërisë (tematika e emigracionit), me zhvillimin e teknologjisë ose me pandeminë Covid-19. Risi vihen re edhe në zgjerimin e tematikës letrare që nuk mbetet thjesht te rravgimi i çështjeve të identitetit apo i çështjeve historike-politike, por mëton të bëjë pjesë të universit letrar edhe konceptet apo diskursin shkencor.
    Kjo risi është më se e mirëpritur në letërsinë tonë, pasi më herët kjo lloj përmase ka munguar. Veçanërisht, në dritën e zhvillimeve teknologjike e shkencore që shoqëria po përjeton, bëhet e nevojshme kjo lloj letërsie që t’i përfaqësojë artistikisht zhvillimet e tilla”, vijoi kryetarja e jurisë.  Këtë vit në panair sa u takon autorëve, Elsa Skënderi Rakipllari tha se kishte më tepër rikthime të autorëve (të konsoliduar) që e ruajnë periudhën e panairit, si kohën e artë, për të nxjerrë librin e tyre më të ri. “Kurse zërat e rinj, janë më të paktë si numër, por jo si talente. Kemi prurje syresh që bien në sy për nga teknikat e shkrimit. Edhe ndërsa flasim për “shkrimtarë të rinj”, të tillët jo përherë janë të rinj në moshë, por të rinj në shkrimtarinë artistike.
    Në këtë Panair kemi edhe figura publike apo njerëz të botës akademike që kanë sjellë veprat e tyre fiksionale, duke veshur kësaj radhe rrobën e shkrimtarit”, tha ajo. Sa i takon përkthimeve,  Elsa Skënderi Rakipllari vijoi se shkrimtarët e veprat letrare më në zë vijnë të përkthyera në gjuhën shqipe, dhe sipas saj në mënyrë mjeshtërore. “Kjo i jep mundësi lexuesit që të njohë e shijojë të njëjtat referenca letrare që janë lart të përfillura anembanë botës”, u shpreh ajo. Ceremonia e ndarjes së çmimeve të panairit u mbajt në datën 15 nëntor, ku këtë vit kanë qenë në konkurrim edhe prurjet në letërsinë për fëmijë. Sipas studiueses Elsa Skënderi Rakipllari, juria vërejti se veprat letrare për fëmijë, pak a shumë kanë qenë të një niveli tematik e përmbajtjesor. “Gjithsesi, ato janë pjesë e realitetit të krijimtarisë së këtij viti dhe ne besojmë se veprat e letërsisë për fëmijë, kultivojnë te lexuesi i ri, shprehi e koncepte tipike për gjuhën shqipe, duke i ardhur në ndihmë edukimit emocional dhe mëkimit me vlera sa universale aq edhe kombëtare”, u shpreh Elsa Skënderi Rakipllari, studiuese, pedagoge e letërsisë UT.

    Ritualet kulturore të domosdoshme
    Si çdo vit Panairi i Librit në Tiranë organizohet nga Shoqata e Botuesve Shqiptarë.  Tema e përzgjedhur për edicionin e këtij viti të Panairit të Librit në Tiranë ishte një shprehje e shkrimtarit Ismail Kadare: “Ndërgjegjja jonë ka nevojë për librat”. Elsa Skënderi Rakipllari studiuese, pedagoge e letërsisë UT kryetare e jurisë ndër të tjera u shpreh se Panairi i Librit, ndër vite, është përjetuar si kremte jo vetëm nga botuesit, shkrimtarët e përkthyesit, por edhe nga lexuesit, të cilët thotë ajo u drejtohen mjediseve të panairit, si në një ritual kulturor. “Ritualet kulturore, nuk i kemi aq të shpeshta, por i kemi të domosdoshme, jo vetëm për të pasur një komunikim më të drejtpërdrejtë shkrimtar-lexues, por edhe për të sjellë në vëmendjen e publikut rëndësinë e leximit dhe dobinë e letërsisë. Të dashur shkrimtarë, studiues, përkthyes, librat tuaj, të mirë a bukur të mirë, i janë shtuar një herë e përgjithmonë botës sonë letrare, kjo është arritja më domethënëse. Kjo juri e panairit këta libra i ka shqyrtuar e gjykuar, por gjykimin përfundimtar për to, fatlumësisht e si në çdo rast, mbetet që ta japë lexuesi dhe koha!”, vijoi në fjalën e saj Elsa Skënderi Rakipllari studiuese, pedagoge e letërsisë UT.
    Çmimet e Panairit të Librit
    Këtë vit në Panairin e Librit në edicionin e 28-të, çmimi “Autori i librit më të mirë studimor”, iu dha Ali Xhikut, për veprën “Faqeve të historiografisë shqiptare”, botuar nga “Onufri”. Çmimi u dha për kontributin e vyer për ndriçimin teorik dhe metodologjik të çështjeve kyçe të historisë së letërsisë shqipe, në një vepër ku ndërthuren njohja e thellë e sistemit letrar shqiptar, analiza e teksteve themelore të historisë së letërsisë sonë dhe angazhimi i përkushtuar jetësor në studimet letrare. Çmimi “Autori më i mirë i vitit” i shkoi shkrimtarit dhe akademikut Artan Fuga për romanin “Ndëshkimi i dytë i Evës” botuar nga “Papirus”. Juria e panairit gjykoi se ky libër është një strukturë romaneske mbresëlënëse, ku ndërthuren miti i zanafillës, dramat e jetës familjare e urbane dhe zhvillimet teknologjike të bashkëkohësisë. Ndërthurja e dimensionit filozofik dhe psiko-social me një letraritetit të spikatur dëshmojnë një të kuptuar të thellë të njeriut, të shoqërisë dhe të kohës, kur jetojmë.
    Përkthyesi më i mirë i vitit u shpall Virgjil Muçi, për përkthimin mjeshtëror të veprës “Xhejmsi” të Percival Everett, fitues i Çmimit “Pulitzer 2025”, botuar nga “Dituria”. Motivacioni për këtë çmim ishte: “Libri eflekton njohuritë e thella të natyrës së shqipes, por edhe talentin prej shkrimtari të Virgjil Muçit. Gjuhësimi me zhdërvjelltësi të admirueshme i dy regjistrave të idiomës së romanit, e bën këtë vepër madhore të bashkëkohësisë t’i flasë lexuesit shqiptar, duke ruajtur ngjyresat dhe kompleksitetin e tekstit origjinal”. Këtë vit, në ndryshim nga një vit më parë, u nda edhe çmimi “Autori i librit më të mirë për fëmijë”.
    Çmimi iu dha shkrimtares Valbona Banka për romanin për fëmijë “Aria, në dorën time”, botuar nga “Dita Books”, për rrëfimin e këndshëm dhe me humor, që ndërkall në tekstin letrar edhe shenja identitare të vendit dhe të gjuhës sonë, që nxisin formimin e identitetit kombëtar te lexuesit e vegjël, dhe edukimin emocional përmes letërsisë. Çmimi për përkthimin më të mirë letrar nga frëngjishtja në shqip iu dha Urim Nergutit për përkthimin e romanit “Hyrija” të Kamel Daoud, fitues i çmimit Goncourt 2024, botuar nga “Buzuku”.  Motivacioni i këtij çmimi ishte: “Përmes nuancimeve të larmishme të fjalës e sintaksës së zhdërvjellët përkthyesi sjell besnikësërisht në shqip një histori drithëruese duke ruajtur stilin e autorit me heshtjet, belbëzimet dhe shumësinë e zërave të këtij romani tronditës”. Në panairi u ndanë edhe dy diploma mirënjohjeje, e para nga Ambasada e Bullgarisë për përkthyesen Janka Trifonova Selimi, e cila u mor nga e bija Melina Selimi. Ndërsa diploma e dytë e mirënjohjes u dha nga ambasada e Polonisë për profesorin Arqile Teta.
    Panairi i Librit
    Si çdo vit Panairi i Librit në Tiranë organizohet nga Shoqata e Botuesve Shqiptarë, që është e themeluar në vitin 1992 me seli në Tiranë dhe zhvillon aktivitetin e saj në të gjitha qytetet e vendit, por edhe jashtë saj. Panairi i Librit është një ngjarje e rëndësishme kulturore me në qendër librin dhe u zhvillua këtë vit dhe me një sërë aktivitetesh, por botuesit sollën në vëmendje dhe problemet me të cilat përballen në punën e tyre. Përgjatë ditëve të panairit u zhvillua edhe aktiviteti “Sofaja e librit”, një format letrar që bën pjesë tashmë në Panairin e Librit që prej vitit 2021. Panairi i Librit në Tiranë organizohet çdo vit në muajin nëntor, dhe mbledh botues, autorë, përkthyes, lexues dhe dashamirës të librit, ku edicioni i 28-të këtë vit u zhvillua nga data 12 deri më 16 nëntor në Pallatin e Kongreseve.

  • Panairi i Librit dhe Panairi i Rrjeteve Sociale

    Panairi i Librit dhe Panairi i Rrjeteve Sociale

    Nga Roland Lami

    Çdo vit, në të njëjtin vend ku dikur rreshtoheshin lexues të uritur sot mbushet një tjetër lloj oreksi: ai për poza. Panairi i Librit është shndërruar ngadalë në një skenë të madhe vetë-prezantimi, ku libri përdoret më shumë si aksesor sesa si tekst që duhet hapur, kuptuar, përjetuar.

    Në stendat e botuesve, pas kopertinave që rrallë preken, endet shpresa e brishtë se ndoshta dikush do ta zgjedhë vërtet një libër për ta lexuar. Ndërkohë, përballë, vizitorët rendin drejt atij këndi me dritë të mirë apo dekor me ngjyra ku një foto me libër në dorë i jep profilit të tyre një kombinacion me veshjen dhe ajo që është më e rendësishme një shkëlqim të rremë intelektual.

    Shoqëria jonë lexon gjithnjë e më pak, por pozon me libra gjithnjë e më shumë. Është një lloj performancë kulturore, ku aparenca zë vendin e përmbajtjes. Mjafton një foto, një filtër dhe një frazë e kopjuar për t’u vetëshpallur “lexues”, ndërsa libri shpesh nuk hapet kurrë.

    Në këtë skenografi të re, botuesit bëjnë ç’është e mundur për të mbijetuar: tituj ngjyrash, kopertina tërheqëse, ulje çmimesh, evente, nënshkrime gjithçka për t’i dhënë librit një shans mes një audience të shpërqendruar. Por libri nuk garon më me librin tjetër: ai garon me ekranin, me rrjedhën e pafundme të imazheve, me simbolikën bosh të “librit si dekor”.

    Në rrugicat e panairit mund të dallosh ndonjë fëmijë që pyet me sinqeritet: “Pse bëjnë foto me libra?”Sepse fotoja duket, ndërsa leximi nuk shihet. Dhe ne jetojmë në një kohë ku vlera e një gjëje matet me sa mund të ekspozohet, jo me sa mund të kuptohet.

    Mbrëmja bie, panairi mbyllet, dritat shuhen. Fotot mbeten në rrjetet sociale si suvenire të një kulture të pozimit. Ndërsa librat kthehen në kuti, duke pritur vitin tjetër, një vit tjetër shprese, një vit tjetër iluzioni, një vit tjetër ku ndoshta dikush do t’i kërkojë për atë që janë, jo për atë që duken në foto.

    Nëse vazhdojmë kështu, Panairi i Librit rrezikon të kthehet në panairin e një kujtese kolektive, një kujtim nostalgjik për kohën kur njerëzit shkonin aty për të blerë libra jo për t’i përdorur si dekor në një fotografi të radhës.

    Ndoshta kjo është rruga ku po shkojmë, librat do të vazhdojnë të dalin çdo vit, të rreshtohen në stenda, të ndriçohen bukur për kamera, ndërsa leximi do të zvogëlohet ngadalë, pa zhurmë, si një zakon i vjetër që askush s’e mban mend pse ekzistonte. Panairi do të mbetet i mbushur plot njerëz jo sepse libri ka fituar, por sepse fotografia ka nevojë për një sfond të mirë. Dhe kështu, libri do të vazhdojë të jetë prezent kudo… përveç vendit ku ka rëndësi: në mendjen e njerëzve.

    ObserverKult

    Lexo edhe:

  • Nis Panairi i 28-të i Librit, botuesit: Kemi probleme të mëdha me punën rreth librit, sidomos me piraterinë…

    Nis Panairi i 28-të i Librit, botuesit: Kemi probleme të mëdha me punën rreth librit, sidomos me piraterinë…

    Nga Julia Vrapi
    Panairi i Librit në Tiranë një ngjarje e rëndësishme kulturore, që mes librave, titujve të rinj në stenda e aktiviteteve të ndryshme sjell në vëmendje dhe problemet me të cilat përballet prej vitesh sektori i librit në vend. Panairi i Librit, që po vijon në Pallatin e Kongreseve në Tiranë këtë nëntor nisi të mërkurën edicionin e 28-të tij. Një ngjarje e rëndësishme kulturore me në qendër  librin, ku botuesit një ditë më parë sollën në vëmendje dhe një sërë problemesh me të cilat përballen në punën e tyre. Pirateria, bibliotekat që janë në situatë katastrofike apo dhe numri në rënie i librarive në vendin tonë, janë disa prej problemeve për të cilat ata u shprehën në ditën e parë të Panairit të Librit në Tiranë. Kryetari i Shoqatës së Botuesve Shqiptarë Petrit Ymeri, si dhe të tjerë botues shprehen se edhe pse këto janë problematika që janë bërë me dije prej vitesh, situata vijon e vështirë në punën e tyre. “Nuk është dita për t’u ankuar, por botuesit kanë probleme të mëdha të punës me librin, duke filluar që nga pirateria digjitale dhe ajo në shtypshkrime, bibliotekat që janë në situatë katastrofike, si dhe numri në rënie i librarive”, u shpreh Ymeri, sipas të cilit për këto probleme askush nuk i ka dëgjuar e marrë masa serioze dhe kjo situatë është e vështirë. Panairi i Librit në Tiranë organizohet si çdo vit nga Shoqata e Botuesve Shqiptarë, që dhe pse mes vështirësive që hasen çdo edicion e sjell panairin edhe me aktivitete të shumta. Për kryetarin e Shoqatës së Botuesve Shqiptarë Petrit Ymerin, edicioni i 28-të i panairit vjen në një moment kur letërsia shqipe po jep vepra shumë të mira që mirëpriten nga lexuesit. “Shqipëria ende nuk ka hyrë në Evropë, por ne botuesit shqiptarë jemi në Evropë prej shumë e shumë vitesh. Jo vetëm me veprat që botojmë, jo vetëm me kryeveprat që përkthehen nga shumë gjuhë evropiane e përtej, por ne jemi pjesë e Evropës edhe me projektet evropiane më të rëndësishme të librit”, vijoi botuesi Petrit Ymeri ndër të tjera. Në ceremoninë e nisjes së Panarit të Librit në Tiranë në Pallatin e Kongreseve ishin të pranishëm Petrit Ymeri kryetar i Shoqatës së Botuesve Shqiptarë, Ina Zhupa, kryetare e Komisionit të Kulturës, Turizmit dhe Diasporës, drejtoresha e Qendrës Kombëtare të Librit dhe Leximit Alda Bardhyli, Alessandro Ruggera, drejtori i Institutit Italian të Kulturës, botues të ndryshëm, etj.
     Mospasurimi i fondit të bibliotekave në rrethe me libra
    Edhe për botuesin Frano Kulli problemet me të cilat ata përballen prej vitesh nuk kanë gjetur zgjidhje, ndërsa kritikat kanë vijuar edhe në drejtim të institucioneve përgjegjëse, që merren me politikat për librin në vendin tonë. Herë pas here në reagimet e tij botuesi i njohur Frano Kulli ka sjellë edhe më parë në vëmendje problemet në fushën botimeve, por gjithashtu ai thotë se bibliotekat janë në një gjendje katastrofike. Sipas tij, bibliotekat e qyteteve janë pronë publike, për të cilat entet shtetërore kanë detyrimin të kontribuojnë për mirëfunksionimin e tyre dhe për nxitjen e leximit. “Janë probleme që prej vitesh nuk kanë gjetur ndonjë zgjidhje. Ne sot kemi biblioteka nëpër rrethe, që janë në situata katastrofike. Ka vite e vite që ka biblioteka publike që nuk blejnë libra, nuk pasurojnë fondet e tyre dhe presin dhurata, që dhuratë mund të vijë çdo lloj libri. Një institucion shtetëror si biblioteka u mbaka me libra të dhuruar? Unë bashkohem me çfarë shpreh edhe kryetari i Shoqatës së Botuesve Shqiptarë Petrit Ymeri. Si rezultat i gjithë këtyre faktorëve që lidhen me qarkullimin e librit, me mbështetjen, me politikat librore në vend jemi tek kjo pikë. Libri nuk mbahet gjithmonë me forcën financiare të autorëve e botuesve, pa asnjë lloj suporti shtetëror, atë që bën në gjithë botën në mënyrë të tërthortë bibliotekat. Nuk është fjala se shteti ka për të financuar shtëpitë botuese. Jo. Por shteti sigurisht ka bibliotekat publike, që në mënyrë të tërthortë më pas vënë gjithë mekanizmin në lëvizje”, thotë botuesi Frano Kulli. Edhe në Panairin e të Librit në Tiranë, “Botimet Fishta” janë me botimet më të zgjedhura dhe librat më të rinj. Botuesi Frano Kulli sjell në vëmendje dhe bashkëpunimin e tyre me shtëpinë botuese “Drita” të Kosovës. “Si çdo vit shtëpitë botuese kryesore të Kosovës janë në panair. Ne me botimet tona kemi gjithmonë bashkëpunim me “Dritën” e Kosovës, si një prej shtëpive botuese shumë prestigjioze atje. Ne kemi bashkëpunim të përhershëm, ashtu siç ne shkojmë në Panairin e Librit të Prishtinës edhe këta vijnë tek ne në panair në kuadër të bashkëpunimeve”, thotë Frano Kulli botues dhe një ndër studiuesit e publicistët më të spikatur të vendit. Enti Botues “Gjergj Fishta” (Botimet Fishta) është themeluar në vitin 1993 në Lezhë. Mban emrin e poetit, shkrimtarit dhe intelektualit të shquar, akademikut Gjergj Fishta, madje edhe profili i editorisë së ndjekur ka qenë e vazhdon të jetë botimi dhe ribotimi kryesisht i letërsisë së traditës kombëtare.
    Panairi i Librit deri më 16 nëntor në Pallatin e Kongreseve
    Panairi i Librit në Tiranë mbetet një nga ngjarjet më të rëndësishme kulturore të vitit dhe në edicionin e 28-të të tij marrin pjesë rreth 100 shtëpi botuese nga Shqipëria, Kosova dhe Maqedonia e Veriut. Midis shumë ngjarjeve letrare të këtij panairi, është edhe përzgjedhja e veprave më të mira për vitin 2025, për çmimet e panairit. Në Panairin e Librit në Tiranë juria e edicionin të 28-të përbëhet nga Elsa Skënderi Rakipllari studiuese, pedagoge e letërsisë UT kryetare e jurisë, Beti Njuma- gazetare, përkthyese; Maniela Sota -përkthyese; Teuta Dhima – bibliotekare, publiciste dhe Zija Vukaj përkthyes, studiues i letërsisë. Ceremonia e ndarjes së çmimeve të panairit do të mbahet në datën 15 nëntor. Por deri më 16 nëntor, publiku do të mund të vizitojë stendat e shtëpive botuese në panair, të takohet me shkrimtarët e përkthyesit, të blejë botime me çmim të reduktuar, por edhe të marrë pjesë në aktivitetet promovuese. Tema e përzgjedhur për edicionin e këtij viti të Panairit të Librit në Tiranë është një shprehje e shkrimtarit Ismail Kadare: “Ndërgjegjja jonë ka nevojë për librat”. Përgjatë ditëve të panairit zhvillohen aktivitete të ndryshme, ku mes tyre që është edhe “Sofaja e librit”, një format letrar që siç bënte me dije më parë Shoqata e Botuesve Shqiptarë bën pjesë tashmë në Panairin e Librit që prej vitit 2021. Si çdo vit Panairi i Librit në Tiranë organizohet nga Shoqata e Botuesve Shqiptarë, që është e themeluar në vitin 1992 me seli në Tiranë dhe zhvillon aktivitetin e saj në të gjitha qytetet e vendit, por edhe jashtë saj.

  • Nis Panairi i Librit në Tiranë/ Zhvillohet mes 13 dhe 17 nëntorit, përzgjidhen veprat më të mira për vitin 2025

    Nis Panairi i Librit në Tiranë/ Zhvillohet mes 13 dhe 17 nëntorit, përzgjidhen veprat më të mira për vitin 2025

    Sot u çel edicioni i 28-të i Panairit të Librit, ngjarja më e rëndësishme kulturore në vend që bën bashkë autorë, shkrimtarë, botues e lexues.

    “Ndërgjegjja jonë ka nevojë për librat” është shprehja e Ismail Kadaresë që u caktua si moto e këtij viti për të theksuar nevojën që ka libri për të mos u shkëputur nga lexuesi i tij.
    Rreth 100 shtëpi botuese janë pjesë e Panairit, por ky edicion, sikurse e konfirmojnë organizatorët e gjen panairin me më pak tirazhe të prodhuara dhe më pak tituj të rinj.
    Më shumë se panair, ky aktivitet është një festë e librit dhe një periudhë ku aktorët e tij ndalojnë dhe reflektojnë, duke analizuar sfidat e kohës dhe duke vënë në qendër lexuesin.

    Top Channel

  • Çelet Panairi i 28 i Librit, 5 ditë në Pallatin e Kongreseve për të gjithë të pasionuarit pas leximit

    Çelet Panairi i 28 i Librit, 5 ditë në Pallatin e Kongreseve për të gjithë të pasionuarit pas leximit

    Ka nisur sot në Pallatin e Kongreseve panairi i 28-të i librit, i cili do të jetë i hapur deri më 16 nëntor. Për 5 ditë me radhë të gjithë të pasionuar pas leximit do të gjejnë botimet më të reja.
    Tema e përzgjedhur për edicionin e këtij viti është një shprehje e të madhit Kadare: “Ndërgjegjja jonë ka nevojë për librat”.
    Në ceremoninë e nisjes së këtij edicioni, kreu i Shoqatës së Botuesve Shqiptarë, Ymeri tha se sot kemi një letërsi shqipe që po jep vepra shumë të mira që mirëpriten nga lexuesit, teksa renditi edhe disa problematika.
    “Botuesit kanë probleme të mëdha të punës me librin, duke filluar që nga pirateria digjitale dhe ajo në shtypshkrime, bibliotekat që janë në situatë katastrofike si dhe numri në rënie i librarive”, tha ai.
    Ashtu si vitet e tjera, panairi do të ketë një kënd për biseda me shkrimtarë, përkthyes, botues e kritikë, në katin e dytë të Pallatit të Kongreseve ku është vendosur “Sofaja e librit”. Ceremonia e ndarjes së çmimeve të panairit do të mbahet në datën 15 nëntor.

  • Panairi i 28-të i Librit/ Botuesit sinjalizojnë rënie, kosto më të larta dhe mungesë infrastrukture

  • Në Tiranë nis sot Panairi i Librit

    Në Tiranë nis sot Panairi i Librit

    Edicioni i 28-të i Panairit të Librit 2025, do të hapet nga sot e deri më 16 nëntor në Pallatin e Kongreseve në Tiranë.

    Ceremonia e hapjes fillon në orën 11:00, ku në stendat shumëngjyrëshe të këtij panairi do të prezantohen botime të reja, takime me autorë, aktivitete për fëmijë, ndarje të çmimeve dhe shumë aktivitete të tjera.

    Në këtë edicion, përgjatë pesë ditëve do të zhvillohen rreth 15 intervista dhe panele diskutimi, ku flasin autorë shqiptarë, përkthyes dhe lexues.

    Panairi i Librit në Tiranë 2025 mbetet një nga ngjarjet më të rëndësishme kulturore të vitit, një festë për të gjithë ata që besojnë se një libër mund të hapë horizonte të reja në gjuhë, në kulturë dhe në mënyrën se si e shohim botën

    ObserverKult

    Lexo edhe:

    PANAIRI NË KRIZË/ YMERI: ÇMIMET E LIBRAVE JANË TË PAPËRBALLUESHME

  • Panairi në krizë/ Ymeri: Çmimet e librave janë të papërballueshme

    Panairi në krizë/ Ymeri: Çmimet e librave janë të papërballueshme

    Panairi i 28-të i Librit, që do të hapet më 12 nëntor në Tiranë, shënohet nga një rënie e numrit të botimeve për shkak të krizës ekonomike dhe emigracionit.

    Kryetari i Shoqatës së Botuesve të Shqipërisë, Petrit Ymeri, paralajmëron se çmimet e larta të librave dhe mosfurnizimi i bibliotekave po varfërojnë tregun e leximit, ndërsa motoja e këtij viti “Ndërgjegjja e shqiptarëve ka nevojë për librat” mbetet një thirrje për reflektim.

    Në prag të hapjes së Panairit të 28-të të Librit, që do të zhvillohet nga data 12 deri më 16 nëntor në Pallatin e Kongreseve, Shoqata e Botuesve Shqiptarë zhvilloi një konferencë për shtyp, duke shpalosur problematikat dhe pritshmëritë për këtë edicion.

    Panairi i këtij viti do të ketë më pak tituj të rinj në qarkullim, një pasqyrim i drejtpërdrejtë i krizës ekonomike, emigracionit dhe rritjes së kostove të botimit, faktorë që po e vështirësojnë ndjeshëm tregun e librit.

    Krahas problemeve strukturore të tregut, Petrit Ymeri vuri në dukje mungesën e librarive në shumë qytete dhe faktin që bibliotekat publike nuk furnizohen, çka ndikon si te lexuesit, ashtu edhe te botuesit.

    Në këtë edicion, i cili mban moton “Ndërgjegjja e shqiptarëve ka nevojë për librat”, pritet të marrin pjesë 96 deri në 100 shtëpi botuese nga Shqipëria, Kosova, Maqedonia e Veriut dhe Mali i Zi.

    Dominon prania e botuesve shqiptarë, ndërsa botimet e Kosovës sjellin risi dhe prurje cilësore, duke konkurruar denjësisht edhe në tregun vendas.

    Megjithë vështirësitë, panairi do të ofrojë një hapësirë të gjerë për lexuesit e të gjitha moshave, me takime, promovime dhe diskutime në “Sofanë e Librit”, ku do të zhvillohen aktivitete me autorë, përkthyes dhe studiues./syritv

    ObserverKult

    Lexo edhe:

    BEGZAD BALIU: BAJRAM KRASNIQI – SINONIM I STUDIUESIT DHE INTELEKTUALIT

  • Hapet sot ne Tirane edicioni i 31-të i Klik Ekspo Group, një ekspoze gjigande me 250 kompani nën moton “Windows into…

    Hapet sot ne Tirane edicioni i 31-të i Klik Ekspo Group, një ekspoze gjigande me 250 kompani nën moton “Windows into…

    Panairi i Klikut  “Shqipëria 2030 Hap Dritaren e së Ardhmes në TIF 2025”
    ​Panairi I Klikut ​“Tirana Shkëlqen me Vizionin e së Ardhmes në Edicionin e 31-të të TIF”
    ​​“Windows into the Future: Panairi që Transformon Shqipërinë”
    ​Paniri I Klikut ​“TIF 2025 – Katër Ditë Për të Prekur të Ardhmen e Shqipërisë”
    Klik Ekspo Group mban Edicionin 31-të i Panairit Ndërkombëtar të Tiranës (TIF), nga 5–8 Nëntor 2025 në Pallatin e Kongreseve. Këtë vit, Panairi vjen me moton “Windows into the Future”, duke shënuar nisjen e një faze të re zhvillimi që lidhet ngushtë me vizionin “Shqipëria 2030” dhe proceset transformuese që po përjeton vendi në fushat e infrastrukturës, energjisë, inovacionit, arsimit dhe ekonomisë digjitale.
    Panairi bën bashkë, 250 kompani vendase dhe ndërkombëtare, të cilat konkurrojnë denjësisht me emrat dhe logot e tyre në ekspozenë gjigante për 4 ditë me radhë. Ky edicion është konceptuar si një platformë kombëtare dhe ndërkombëtare e bashkëpunimit, që bashkon aktorë nga qeveria, biznesi, akademia dhe shoqëria civile për të prezantuar dhe diskutuar mbi drejtimet e reja të zhvillimit ekonomik të Shqipërisë dhe rajonit.
    Në qendër të TIF 2025 qëndron ideja e “dritareve drejt së ardhmes” – hapësira ku vizitorët, partnerët dhe institucionet mund të shohin, përjetojnë dhe kuptojnë projektet që po ndërtojnë Shqipërinë e dekadës së ardhshme.
    Eksperienca Imersive – Shqipëria 2030
    Në një prej hapësirave më interesante të Panairit Ndërkombëtar të Tiranës – katin -1 të Pallatit të Kongreseve – do të ndodhë diçka ndryshe.
    Publiku nuk do të shohë një ekspozitë klasike, por do të udhëtojë në kohë, drejt vitit 2030.
    Dritat, ngjyrat dhe tingujt do të udhëheqin vizitorët përmes një rrugetimi multisensorial, ku çdo hap sjell një tjetër pamje të së ardhmes së Shqipërisë.
    Nëpërmjet projeksioneve 3D do të shfaqen projektet që po ndërtojnë një vend të ri – qytetet moderne, hapësirat gjelbëruese, infrastrukturat që po transformojnë jetën tonë të përditshme.
    Është një eksperiencë që nuk e sheh, por e jeton. Dhe për disa minuta, secili vizitor bëhet pjesë e vizionit të vendit për dekadën që po vjen.
    Pavijoni “Windows into the Future”
    “Windows into the Future” është pavijoni qendror dhe konceptual që përmbledh thelbin e këtij edicioni — shikimin drejt së ardhmes së Shqipërisë përmes zhvillimit dhe vizionit strategjik “Shqipëria 2030”. Pavijoni i përbërë nga 4 institucione dhe kompani të cilat po formësojnë të ardhmen, përfaqëson një instalim vizual dhe narrativ, i ndërtuar mbi idenë e dritares si simbol i hapjes dhe vizionit përpara. Çdo “dritare” përfaqëson një sektor strategjik që po formëson Shqipërinë e së nesërmes.
    Panelet
    Me hovin e turizmit dhe projekteve infrastrukturore, të cilat zhvillojnë ekonominë e bregdetit dhe ekonomitë lokale, në Panair do të diskutohet për tema që synojnë integrimin e projekteve eficente, të cilat i përkasin fjalës së fundit të teknologjisë dhe inovaconit.
    Panairi do të bëjë bashkë sipërmarrës dhe ekspertë të fushave në 11 panele diskutimi, të cilat ngrejnë siparin me tryezën e prezantimit për potencialin turistik të vendit dhe vijojnë më tej me tema si megaprojektet e Infrastrukturës dhe Energjisë, me qasjen dhe mundësitë për të ndërtuar një të ardhme të sigurt dhe të qëndrueshme.
    Edhe Siguria Ushqimore, Tregjet, Infrastruktura Digjitale e Siguria Kibernetike do të jenë në fokus të diskutimit, ku ekspertë të fushave do të tregojnë përvojat më të mira të cilësisë dhe sistemeve të mbrojtjes.
    I konceptuar për të përmbushur angazhimet edhe në fushën e Mbrojtjes, në Panair do të demonstrohet edhe një simulim i mbrojtjes nga zjarri, përmes sistemeve të fundit të sigurisë.
    Një vend i veçantë në këtë edicion i dedikohet edhe Kulturës, ku do të mbahen dy panele të dedikuara për konceptet e reja në Kinematografi dhe transformimin e Teatrit të Operës dhe Baletit deri në vitin 2030.