Të gjithë individët, të cilët kanë në pronësi pasuri të paluajtshme mund të kanë të drejtë , të bëjnë rivlerësimin e kësaj pasurie me vlerën e tregut nga data 1 janar deri në 30 shtator 2026.
Për procesin e llogaritjes së vlerës së pronës, tatimi do të jetë 5%, nga 15% që paguhet sot, nëse shet pronën. Tatimi paguhet për diferencën e vlerës mes asaj të regjistruar në kadastër dhe asaj me të cilën shitet.
Konkretisht, nëse një person ka blerë një pronë 100 mijë euro dhe sot e shet 120 mijë euro, ai do të duhet të paguaj 15% tatimin për këtë diferencë prej 20 mijë eurosh qytetari i detyrohet shtetit 3 mijë euro, ndërsa me këtë ndryshim ligjor kur bëhet përafrimi i çmimit me vlerën e tregut tatimi zbret në 5%, dhe paguan 1000 euro.
Rivlerësim të pronës, apartamentit, apo truallit nuk do të bëjnë vetëm qytetarët por edhe bizneset, po me normë tatimore 5%. Përfitues të këtij procesi do të jenë edhe ata individë që janë në proces legalizimi dhe regjistrimi të pasurisë por për këtë rast procedurat e rivlerësimit dhe pagesës për rastet e parashikuara në këtë nen përcaktohen me vendim të Këshillit të Ministrave.
Procesi i fundit i rivlerësimit kishte tatim 3% në vitet 2020-2022, dhe nga i cili kaluan në proces 168.000 prona dhe buxheti i shtetit përfitoi 12.7 miliardë lekë.
Tag: paluajtshme
-
Tregu i pasurive të paluajtshme, nga 1 janari 2026 nis rivlerësimi/ Tatimi i shitjes do të jetë 5%, ja si kryhet llogaritja
-
‘Ndërtimi’ përballë dy realiteteve ekonomike, ekspertët: Ja efekti që do sjellë eliminimi i parasë cash në këtë sektor
Tregu i pasurive të paluajtshme në Shqipëri po përballet me dy realitete të ndryshme ekonomike gjatë viteve 2024–2025: çmimet vijuan të rriten me ritme dyshifrore, ndërsa koha e shitjes u zgjat dukshëm, një sinjal i qartë i ngadalësimit të kërkesës reale.
Përpjekjet e intensifikuara të qeverisë dhe SPAK për të goditur pastrimin e parave, të shoqëruara me presionin e BE-së për të dalë nga “lista gri”, pritet të ngushtojnë më tej kanalet e financimit e sekorit,
“Një rregullim kaq i mirë i tregut të pasurive të paluajtshme siç është në Bashkimin Evropian do të thotë siguri. Aty ku ka siguri kapitalet çlirohen dhe investohet. Prandaj ne nuk presim të ketë ndonjë rënie…“, shprehet Reinaldo Pipiria, Drejtor Ekzekutiv, NAREA. Ndërsa ekspertja e ekonomisë Romina Radonshiqi, thekson se ”kufizimet e vendosura në kapitujt e Bashkimit Evropian por edhe kufizimet që qeveria shqiptare po bën drejt eliminimit të parasë kesh, do të ndikojë pozitivisht“.
Një tjetër faktor me ndikim vjen nga politika fiskale, ku ndryshimet e reja pritet të ndikojnë në taksimin e “stokut” të banesave të pashitura, duke krijuar presion shtesë mbi ndërtuesit.
‘Në janar të 2028-s pritet që të hyjë në fuqi taksa e re për pasuritë e paluajtshme e cila do të incentivojë për të dalë në treg ato prona të cilat janë të papërdorura. Efekti i daljes i disa apo shumë banesave në treg mund të neutralizohet nga efekti i tërheqjes së blerësve apo investitorëve të huaj të cilët do të duan të vijojnë të investojnë në pasuritë e paluajtshme në Shqipëri”,ka theksuar Reinaldo Pipiria.
Rritja e fortë e viteve të fundit duket se ka prekur tavanin, ndërkohë që një korrigjim i çmimeve mbetet i mundshëm, sidomos nëse qeveria zbaton me rigorozitet taksimin e pronave.
“Ne bëjmë parashikime që shkojnë drejt një stabiliteti, drejt një korrigjimi të shpejtësisë së rritjes së çmimeve, por asnjëherë drejt një uljeje sepse nuk ka asnjë shenjë..”, shtoi Pipiria.
Ekspertët theksojnë se demografia do të ketë rol përcaktues në të ardhmen e sektorit të ndërtimit. Largimi i vazhdueshëm i shqiptarëve pritet të ulë kërkesën e brendshme, ndërsa mbetet e paqartë nëse ekonomia shqiptare do të arrijë të tërheqë mjaftueshëm qytetarë të huaj për të blerë prona në vend, sidomos nëse Shqipëria avancon drejt anëtarësimit në Bashkimin Evropian. -
Reforma e re e taksës së pronës, eksperti shpjegon rritjen e kostove dhe ngadalësimin e shitjeve
Shqipëria ka nisur zyrtarisht zbatimin e reformës së re të taksës dhe pasurisë së paluajtshme, një nismë që synon krijimin e një sistemi modern dhe transparent të taksimit të pronës, të bazuar në vlerën reale të tregut. Reforma pritet të forcojë rolin e bashkive në mbledhjen e të ardhurave dhe ta afrojë vendin me standardet e Bashkimit Evropian.
I ftuar në emisionin “Mirëmëngjesi Shqipëri” në RTSH1, vlerësuesi i pasurive të paluajtshme, Ervin Demirxhiu, theksoi se ndryshimet e reja kanë sjellë ndikime të menjëhershme në tregun e pasurive të paluajtshme.
“Një pronë e pa rivlerësuar është një pronë që taksohet 15% ndërsa prona e rivlerësuar është 5% sigurisht që ka diferencë. Ne kemi pasur një treg shumë dinamik vitet e fundit që mund të themi se zona dhe prona të caktuara janë dyfishuar që vlera e dyfishuar goxha e lartë. Sot e kemi të pamundur të gjejmë një pronë për një klient që ka kredi. Qëkur u shpall se do të bëhej rivlerësimi kemi pasur një stopim të shitjeve. Ky quhet tatim dhe i takon shitësit sepse ai është pronari i pronës por sot të gjitha këto kosto i shkojnë blerësit”, u shpreh Demirxhiu.
Eksperti theksoi gjithashtu se, ndonëse tatimi i takon shitësit si pronar i pasurisë, aktualisht kostot po i kalojnë blerësit.
Reforma pritet të sjellë efekte të mëtejshme në tregun imobiliar në muajt në vazhdim, ndërsa aktorët e tregut presin qartësim më të madh të procedurave dhe ndikimit real të skemës së re. -
SPAK sekuestron pasuritë e një personi, ndikim i paligjshëm ndaj funksionarëve publikë
Kronikë E Mërkurë, 3 Dhjetor 2025 17:08
Prokuroria e Posaçme ka sekuestruar pasuritë e një shtetasi të akuzuar për ndikim të paligjshëm ndaj funksionarëve publikë. SPAK bën të ditur se janë sekuestruar pasuritë e paluajtshme të shtetasit, Nikolla Hafësllari dhe personit të lidhur, Erjol Mekshi. Po ashtu bëhet e ditur se janë sekuestruar disa apartamente e garazhe, si dhe një automjet tip ‘Audi A6’. Për ekzekutimin e këtij vendimi janë ngarkuar oficerët e Policisë Gjyqësore dhe përfaqësuesit e Agjencisë për Administrimin e Pasurive të Sekuestruara dhe të Konfiskuara (AAPSK).
Njoftimi i SPAK:SPAK sekuestron pasuritë e një shtetasi të akuzuar për ushtrim të ndikimit të paligjshëm ndaj funksionarëve publikë. Prokuroria e Posaçme kundër Korrupsionit dhe Krimit të Organizuar ka paraqitur ankimin në Gjykatën e Posaçme të Apelit, për procedimin pasuror nr.9 të vitit 2025, për të cilin vijojnë hetimet. Procedimi ka të bëjë me sekuestrimin e pasurive të paluajtshme të shtetasit, Nikolla Hafësllari dhe personit të lidhur, Erjol Mekshi.
Shtetasi Hafësllari akuzohet për veprën penale; “Ushtrim i ndikimit të paligjshëm ndaj personave që ushtrojnë funksione publike”, kryer në bashkëpunim (nenet 245/1 dhe 25 të Kodit Penal). Ankimi është bërë kundër vendimit nr.18 datë 24.10.2025 të Gjykatës së Posaçme të Shkallës së Parë. Gjykata e Apelit me vendimin 262, datë 2.12.2025 vendosi: Ndryshimin e vendimt nr.18, datë 24.10.2025 të Gjykatës së Posaçme së Shkallës së Parë dhe pranimin e kërkesës së Prokurorisë së Posaçme për:
Sekuestrimin e pasurive të luajtshme dhe të paluajtshme si më poshtë:Garazh me nr 6, kati -1, me adresë rruga ‘Pjetër Bogdani”, Mëzez, Tiranë,Garazh me nr.7 , kati -1, me adresë rruga ‘Pjetër Bogdani”, Mëzez, Tiranë,Automjet i markës “Audi”, modeli A6, viti i prodhimit 2005.Apartament, nr.19/1, shkalla 2 kati III, me sip totale 87.89 m2, me adresë të pasurisë, rruga “Pjetër Bogdani”, Mëzez, Tiranë.Apartament, nr 21, shkalla 2 kati III, me sip totale 61.89 m2, me adresë të pasurisë, rruga ‘Pjetër Bogdani”, Mëzez, Tiranë.
Për ekzekutimin e këtij vendimi janë ngarkuar oficerët e Policisë Gjyqësore dhe përfaqësuesit e Agjencisë për Administrimin e Pasurive të Sekuestruara dhe të Konfiskuara (AAPSK). Për administrimin dhe përdorimin e pasurive të luajtshme dhe paluajtshme ngarkohen administratorët e kësaj agjecie. Sqarim: Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë. -
I vodhi kompanisë ku punonte mbi 1 mln euro, arrestohet një grua në Tiranë
Prokuroria e Tiranës, ka vendosur sot, 3 dhjetor, masën e sigurimit “Arrest në shtëpi” për shtetasen E.D., e akuzuar për falsifikim dokumentesh dhe pastrim të produkteve të veprës penale ose veprimtarisë kriminale.
Sipas hetimeve të Prokurorisë, E.D. në vitin 2013, si përfaqësuese ligjore e shoqërisë “Prodhim Veshje nr.02” sh.a, ka transferuar në mënyrë të paligjshme të gjitha pasuritë e paluajtshme të shoqërisë, toka dhe ndërtesa, tek një tjetër kompani, e cila në atë kohë i përkiste 100% asaj.
Pas transferimit të pasurive, E.D. ka zhvendosur pronësinë e kuotave të kompanisë në fjalë për të fshehur origjinën e paligjshme të kapitalit.
Pasuritë e paluajtshme janë shfrytëzuar për qira dhe shitje, duke sjellë përfitime që shkojnë në më shumë se 1 milion euro, ndërsa aksionarët e tjerë të shoqërisë “Prodhim Veshje nr.02”, kryesisht pensionistë dhe ish-punonjës, janë përjashtuar nga këto përfitime.
“Pasuritë e paluajtshme të transferuara në mënyrë të paligjshme tek shoqëria “Empire Investment Solution (EIS)” sh.p.k, janë dhënë me qira duke realizuar të ardhura të larta, një pjesë e tyre janë shitur në vlerën 1,000,000 Euro ndërsa me kontratën e sipërmarrjes të datës 18.12.2019, pasuria me nr.2/2337( transferuar në mënyrë të paligjshme) ndodhur në Rrugën “Muhamet Gjollesha” Tiranë, me sipërfaqe totale 5989 m2, nga të cilat ndërtesë me sipërfaqe 1375 m2 është dhënë për ndërtimin e objektit shumëkatësh multifunksional mbi sipërfaqen prej 12,201,36 m2.
Në këmbim të pasurisë të përshkruar më sipër, porositësi do të përfitojë në objektin shumëkatësh multifunksional të ndërtuar nga Sipërmarrësi 35% të sipërfaqes ndërtimore korresponduese të sipërfaqes prej 5989 m2″, thuhet në njoftimin e Prokurorisë.
Transferimi i pasurive është kryer jo vetëm mbi bazën e dokumenteve të falsifikuara, por edhe përmes akteve të tjera të paligjshme, me qëllim dëmtimin e interesave të aksionarëve në minorancë. -
Martin Mane: Balfin Americas, një kapitull i ri në udhëtimin global të Grupit BALFIN
Në një intervistë ekskluzive për Gri Institute, rrjetin global të pasurive të paluajtshme dhe infrastrukturës, Martin Mane, CEO i Balfin Americas dhe Zv. President i Grupit BALFIN për Amerikën e Veriut, ndau hapat e parë të kompanisë, ambicien për të konsoliduar pozicionin e saj në tregun amerikan të pasurive të paluajtshme dhe vizionin afatgjatë drejt industrive të tjera, me një fokus të veçantë në teknologji dhe shkencë.
Balfin Americas është një lojtar relativisht i ri në tregun amerikan të pasurive të paluajtshme, që ka zgjeruar prezencën e Grupit BALFIN në Shtetet e Bashkuara që nga viti 2023. Aktualisht, kompania ka katër investime, tre prej të cilëve janë zhvillime rezidenciale dhe një përfshin blerjen e një ndërtese zyrash premium. Gjatë dy viteve të saj të para, të karakterizuara nga sfida dhe mundësi, kompania ka treguar potencial të jashtëzakonshëm.
Martin Mane, me një formim akademik në disa nga institucionet më prestigjioze në botë dhe me përvojë të gjerë në menaxhim dhe financë, sjell një perspektivë me të vërtetë globale për Balfin Americas. Kjo perspektivë duket në çdo projekt, nga zhvillimet rezidenciale në New York deri te blerjet strategjike komerciale në New Jersey. Në vend që të trembet nga kompleksiteti i këtyre tregjeve, ai i sheh ato si mjedise të gjalla dhe dinamike që nxisin inovacion dhe rritje të biznesit.
Duke e parë përpara, Martin thekson se Balfin Americas nuk do të kufizohet vetëm në pasuri të paluajtshme. Kompania po eksploron tashmë mundësinë për të investuar në startup- e, veçanërisht në fushat e Inteligjencës Artificiale dhe Bioteknologjisë. Kjo qasje e diversifikuar, thotë ai, jo vetëm që do të ngrejë Balfin Americas në një nivel tjetër, por gjithashtu do t’i mundësojë zgjerimin në qytete të reja në të gjithë Shtetet e Bashkuara, duke forcuar më tej pozicionin e saj si një kompani ambicioze dhe me vizion për të ardhmen.
1. Përshëndetje Martin, a mund të na japësh një përmbledhje mbi Balfin Americas, rolin që luan brenda Grupit BALFIN, si dhe rrugëtimin tënd deri në këtë pikë?
Balfin Americas përfaqëson një kapitull të ri dhe emocionues në ambicien e Grupit BALFIN për t’u bërë një korporatë me të vërtetë multinacionale. Deri në vitin 2023, Grupi ishte i pranishëm në nëntë vende në Europë, dhe zgjerimi në Amerikën e Veriut ishte natyrshëm hapi i radhës. Pas më shumë se një viti kërkim të tregut, pashë potencialin e SHBA- ve dhe themelova selinë tonë rajonale në New York City.
Filluam me zhvillime rezidenciale nga e para në New York dhe shpejt u diversifikuam në blerje komerciale me vlerë të shtuar në New Jersey. Ajo që filloi si një zyrë investimesh është rritur në një platformë për zgjerim afatgjatë në një nga tregjet më dinamike të botës.
Në aspektin personal, ky ka qenë një rrugëtim sfidues dhe shpërblyes. Kërkoi që të merrja rreziqe të llogaritura, të përshtatesha shpejt dhe të ndërtoja një ekip të talentuar i aftë të realizonte vizionin tonë. Së bashku, po vendosim baza të forta për suksesin e Balfin Americas dhe zgjerimin e rolit të saj brenda portofolit global të Grupit.
2. Me një prezencë në rritje në tregun shumë konkurrues amerikan që nga 2023, si po poziciononi kompaninë për ta dalluar nga konkurrentët dhe cilat kanë qenë disa nga sfidat dhe sukseset fillestare?
Hyrja në tregun amerikan erdhi me sfida të mëdha, sidomos në ndërtimin e strukturës dhe ekipit të duhur nga zero. Rregulloret, proceset dhe ritmi i përgjithshëm i biznesit këtu janë shumë të ndryshme nga Europa. Thelbësore ishte të harmonizohemi me qeverisjen dhe kulturën e Grupit BALFIN, duke përshtatur gjithashtu operacionet tona për kontekstin amerikan.
Dallimi ynë qëndron në shkathtësinë dhe gatishmërinë për të marrë rreziqe të llogaritura. Marrim vendime shpejt dhe mbështetemi si në ekspertizën tonë globale ashtu edhe në rrjetin tonë të fortë për të vepruar më shpejt se shumë konkurrentë. Kjo na ka mundësuar të sigurtojmë mundësi herët dhe të ndërtojmë kredibilitet. Ajo që filloi si një sfidë është bërë një nga forcat tona, pasi kemi treguar se mund të përshtatemi dhe të japim rezultate në një mjedis shumë konkurrues.
3. Blerja e 340 Mount Kemble në New Jersey shënon një hap të rëndësishëm në strategjinë tuaj të pasurive të paluajtshme komerciale. Mund të na tregoni më shumë për këtë projekt dhe pse është një investim strategjik për Balfin Americas?
Blerja e 340 Mount Kemble është një pikë kthese për ne, pasi shënon investimin e parë të Grupit BALFIN në pasuri të paluajtshme komerciale në Shtetet e Bashkuara. Deri tani, portofoli ynë ka qenë kryesisht rezidencial, dhe ky hap diversifikon ekspozimin tonë duke u përshtatur me parashikimin tonë pozitiv afatmesëm dhe afatgjatë mbi tregun komercial.
Ndërtesa vetë është një zyrë e kategorisë A prej 40,000 metrash katrorë, me qiraxhinj prestigjiozë si Morgan Stanley dhe Marcum. Është një aset “trofe” që rrit ndjeshëm profilin tonë në tregun amerikan të pasurive të paluajtshme.
Këtë lëvizje e bëmë në partneritet me First Mile Capital, një nga firmat kryesore të pasurive të paluajtshme në New York. Duke kombinuar ekspertizën e tyre lokale me përvojën tonë në menaxhimin e aseteve nga projekte si TEG dhe QTU. Kështu krijuam një platformë të fortë për të shfrytëzuar potencialin e ndërtesës dhe për të krijuar vlerë për qiraxhinjtë dhe komunitetin përreth.
4. Si ka ndikuar partneriteti me First Mile Capital në strategjinë tuaj në tregun amerikan dhe çfarë roli luajnë bashkëpunimet strategjike në qasjen tuaj të investimeve?
Partneriteti ynë me First Mile Capital ka qenë thelbësor në zgjerimin tonë në SHBA. Ekspertiza e tyre e thellë lokale na ndihmoi të shohim përtej sipërfaqes dhe të identifikojmë 340 Mount Kemble si pika ideale hyrëse për blerjen tonë të parë komerciale. Po ashtu, strategjia e tyre e fokusuar tek qiraxhinjtë përputhet në mënyrë perfekte me qasjen tonë “people-first”, të zhvilluar gjatë tre dekadave të operacioneve ndërkombëtare.
Ne i japim rëndësi të madhe partneriteteve që ndërtohen mbi vizion, strategji dhe përfitime të përbashkëta. Këto bashkëpunime na lejojnë të minimizojmë rreziqet, të përfitojmë nga njohuritë lokale dhe të ndajmë përvojën ndërkombëtare të Grupit. Qoftë në SHBA apo në Europë, partneritetet strategjike kanë qenë gjithmonë kyçe për suksesin e BALFIN dhe do të vazhdojnë të udhëheqin qasjen tonë në tregje të reja.
5. Si balancon Balfin Americas fokusin e portofolit të saj mes pasurive komerciale dhe zhvillimeve rezidenciale në SHBA dhe cilët sektorë po ofrojnë mundësitë më të mira?
Aktualisht, portofoli ynë ka më shumë peshë tek pasuritë komerciale, pasi ato ofrojnë potencial të fortë afatmesëm. Megjithatë, ne e shohim gjithashtu zhvillimin rezidencial si një motor kyç afatgjatë të rritjes. Qëllimi ynë është të arrijmë një ekuilibër të barabartë mes të dyjave me kalimin e kohës, duke krijuar një portofol të diversifikuar që mund të përballojë cikle të ndryshme tregu.
Njëkohësisht, Balfin Americas operon me një strukturë fleksibile që na lejon të shohim përtej pasurive të paluajtshme. Po eksplorojmë aktivisht mundësi në sektorë të tjerë me rritje të lartë, si Inteligjenca Artificiale dhe Bioteknologjia, ku besojmë se inovacioni do të krijojë vlerë të konsiderueshme në të ardhmen. Ambicia jonë nuk është vetëm të investojmë në asete, por të njihemi si mbështetës të ideve të guximshme dhe me vizion.
6. Duke pasur parasysh sfidat e hyrjes në tregun amerikan, sidomos në një mjedis me rregullore të rrepta, cilat strategji po përdor Balfin Americas për të naviguar hyrjen në treg dhe për të siguruar sukses afatgjatë?
Strategjia jonë bazohet tek njerëzit dhe partneritetet. Së pari, investojmë në ndërtimin e ekipeve të forta që ndajnë vizionin tonë dhe kanë ekspertizën për të operuar në një treg të shpejtë dhe të rregulluar. Së dyti, bashkëpunojmë me firma lokale të besueshme që ofrojnë njohuri të thella të tregut dhe na ndihmojnë të ulim rreziqet dhe të përshpejtojmë mësimin.
Ky kombinim, përvoja ndërkombëtare e shoqëruar me ekspertizën lokale, ka rezultuar formula e duhur për të vendosur prezencën tonë në SHBA dhe për të pozicionuar kompaninë për rritje afatgjatë.
7. Duke parë përpara, si e shihni evoluimin e tregut amerikan të pasurive të paluajtshme në 5 deri në 10 vitet e ardhshme dhe çfarë roli parashikoni që do të luajë Balfin Americas në këtë zhvillim?
Besoj se tregu amerikan i pasurive të paluajtshme do të evoluojë ndjeshëm gjatë dekadës së ardhshme. Zhvillimet me përdorim të përzier dhe projektet e orientuara nga komuniteti do të fitojnë rëndësi, gjithashtu teknologjia do të transformojë mënyrën se si ndërtesat projektohen, menaxhohen dhe përjetohen.
Balfin Americas synon të jetë në krye të këtyre ndryshimeve. Me portofolin aktual, strukturën në rritje dhe strategjinë e përparuar, jemi mirë pozicionuar për të përfituar nga këto tendenca. Roli ynë do të jetë të realizojmë projekte që kombinojnë qëndrueshmërinë, inovacionin dhe vlerën afatgjatë, duke siguruar që të luajmë një pjesë të rëndësishme në formësimin e së ardhmes së tregut amerikan të pasurive të paluajtshme. -
Çfarë do të ndodhë me pronat në 2026-ën dhe sa do të paguajnë qytetarët për rivlerësimin e pasurive të paluajtshme…
Prej janari deri në dhjetor të vitit 2026, i gjithë vendi do të përfshihet në fushatën e rivlerësimit të pasurive të paluajtshme. Ky proces do të bëhet përmes një norme tatimore prej 5%, ndryshe nga sa është aktualisht prej 15% nëse shitet prona. Kjo është norma më e lartë tatimore e aplikuar ndonjëherë për këtë proces, që prej kur ka ndodhur rivlerësimi i parë, që është e njëjtë si për bizneset dhe për individët. Tatimi paguhet për diferencën e vlerës mes asaj të regjistruar në kadastër dhe asaj me të cilën shitet. Konkretisht nëse një person ka blerë një pronë 100 mijë euro dhe sot e shet 120 mijë euro, ai do të duhet të paguaj 15% tatimin për këtë diferencë prej 20 mijë eurosh qytetari i detyrohet shtetit 3 mijë euro, ndërsa me këtë ndryshim ligjor kur bëhet përafrimi i çmimit me vlerën e tregut tatimi zbret në 5%, dhe paguan 1000 euro. “
Do të jetë tërheqëse për ata që kanë më shumë se një pronë të paluajtshme. Ulja me 3 herë e tatimit, sepse tani është 15% është pozitive. Por për ne që kemi të ardhura të mesme është e lartë norma 5%. Dakord për biznesin 5% sepse është i konsoliduar por për qytetarët është e lartë, dhe duhet të jetë 3%. E para qytetari që nuk ka ndërmend ta shesë, por duhet ta rivlerësojë pasi do të marrë një kredi, dhe është mirë ti rritet kolaterali. Por kur ke të ardhura të pakta 5% është normë e lartë”, deklaroi dje eksperti Fatos Çoçoli në një media. Pas procesit të rivlerësimit tregu sipas ekspertëve do të ndryshojë. Më shumë prona do të hidhen në treg për tu shitur, dhe më shumë mundësi do të ketë nga qytetarët për të blerë, pasi përfitojnë si nga tatimi i reduktuar, po ashtu edhe nga fakti që vlera e pronës është e njëjtë me atë të tregut.
“Mendoj se në tregun imobiliar do të futet një numër i lartë apartamentesh, nga ata që nuk e kanë pasur prioritet shitjen por edhe për ata që nuk e kanë pasur prioritet blerjen. Tregu është frenuar deri më tani duke pritur rivlerësimin”, tha dje në një media eksperti i Pasurive të Paluajtshme, Orgest Beti. Rivlerësimi do të kryhet me dy procedura. E para përmes një vlerësuesi të pasurive të paluajtshme, i cili e vlerëson pronën duke e përafruar me çmimet në treg, dhe së dyti përmes Agjencisë Shtetërore të Kadastrës, por këtë herë vlera e pronës afrohet vetëm me referencat që ka zona.
Rivlerësimi, për herë të parë do njihet vjetërsia e pronës
Por për herë të parë në rivlerësimin e pasurive të paluajtshme do të njihet edhe amortizimi i pronave, pra vjetërsia e pronës, sa më e vjetër të jetë prona aq më pak do të paguhet tatim pas procesit të rivlerësimit. Në rast se keni një banesë me vjetërsi 10-vjeçare do t’ju zbritet nga çmimi pas rivlerësimit 10% e vlerës që ka dalë dhe më pas do të paguhet tatimi. “Është lehtësi dhe është drejtësi. Pse drejtësi? Sepse deri tani qytetarët që e kanë shitur me 15%, po edhe me 3% kur ka qenë më përpara gjithnjë ishin të trajtuar në mënyrë jo të barabartë. Në rast se ti ke një banesë që e ke të vjetër, e ke të periudhës së komunizmit, edhe pse çmimi tregut për metër katror aty është shumë i rritur dhe çmimi i referencës për zonën ku banon qytetari është prapë shumë i rritur nuk mund ta çosh ti duke patur 20-30 vjet amortizim.
Ka qenë një padrejtësi që i bëhej qytetarit sepse nuk i zbritej në momentin që e shiste atë”, u shpreh eksperti Fatos Çoçoli.Ndërkohë edhe eksperti i Pasurive të Paluajtshme, Orgest Beti, i ftuar në të njëjtën media, ku ishte prezent edhe z. Çoçoli, tha se përfshirja e elementit të amortizimit në rivlerësimin e një objekti është një kriter i logjikshëm dhe që duhej përfshirë më herët. “Në fakt kjo është një gjë shumë e mirë pasi në rast se marrim një apartament le të themi që në një pallat të para viteve ’90 dhe një apartament i cili është pas 2020, nuk mund të kemi të njëjtin çmim. Logjika është shumë e saktë. Duhej të ishte bërë më përpara por nuk është vonë”, u shpreh Beti. Ndërsa Çoçoli shtoi se tatimi aktual prej 15% ka ulur ndjeshëm transaksionet dhe si rrjedhojë ka rritur informalitetin.“
Shoqatat e kanë ngritur disa herë që 15% është një taksë shumë e lartë. Në momentin që ti e vendos 15%, e ke detyruar qytetarin të tkurret për ta shitur pronën, të mos ketë interes ta shesë, sepse 15% nuk është pak. Janë ndrojtur, dhe kemi pasur më pak transaksione. Edhe të ardhura më pak në buxhet sepse kemi pasur më pak tjetërsime, sepse kemi patur më pak blerje të pasurive të patundshme, nga ana tjetër dhe qytetarët janë tkurrur. Kjo nuk do të ndodhte nëse do kishim 3% e normës tatimore që kemi pasur në 2019-2022”, nënvizoi Çoçoli.
A do ketë në Shqipëri rënie të çmimeve të apartamenteve?
Nga ana tjetër, eksperti i Pasurive të Paluajtshme Orgest Beti thotë se pavarësisht shpresës së qytetarëve blerës, çmimi i apartamenteve në Shqipëri do të vazhdojë të rritet, ndikuar nga interesi i shtuar i huajve dhe shqiptarëve të diasporës për të blerë në vendin tonë, si dhe nga anëtarësimi i mundshëm dhe i pritshëm i vendit në Bashkimin Europian. “Fakti që së shpejti do të jemi pjesë e familjes europiane, këtu do të ndodhë një proces që unë e kam thënë shpesh, që u kanë ndodhur dhe vendeve të tjera që janë bërë anëtarë të Bashkimit Europian, dhe atje ka patur një rritje me 20% apo 30%, edhe më shumë. Shqipëria tashmë ne shikojmë se ka një interes të shtuar nga të huajt, madje sipas statistikave që ne kemi 20 apo 30% e blerësve në bregdet janë të huaj dhe shqiptarë të diasporës”, nënvizoi Beti. Po ashtu në vitin 2026, me përjashtim të Tiranës, vlera e pronës në të gjithë vendin do të rritet, pasi hyjnë në fuqi çmimet e reja të referencës, që janë konsultuar gjatë këtij viti.
Çfarë ka ndodhur?
Ndërkaq kujtojmë se gati në çdo tre vjet Shqipëria është përfshirë nga fushata të rivlerësimit të pasurive të paluajtshme, ose ndryshe afrim i vlerës së pronës me çmimet aktuale në treg. Në vitet 2011-2013 u rivlerësuan më shumë se 95 mijë prona, me një normë tatimore 1%, dhe buxheti i shtetit fitoi 39.8 milionë euro të ardhura, si rezultat i pagesës që bënë qytetar e biznese për diferencën midis vlerës që kishte prona e tyre dhe asaj që doli pas rivlerësimit. Tre vite më vonë në vitet 2016-2017 u realizua fushata e dytë rivlerësuese. Këtë herë interesi ishte më i ulët pasi interesi u dyfishua, nga 1 në 2%. Në total ju nënshtruan këtij procesi 64 mijë e 686 pasuri të patundshme, ndërsa buxheti i shtetit përfitoi më shumë 56.9 milionë euro si rezultat i tatimit më të lartë. I fundit rivlerësim u bë në periudhën 2020-2022, që pati normë tatimore 3%, dhe në total u afruan me çmimet e tregut 94 mijë pasuri të paluajtshme, të qytetarëve shqiptar apo bizneseve.Nga kjo fushatë e fundit buxheti i shtetit përfitoi 138.6 milionë euro, pasi edhe tatimi ishte më i lartë, por për shkak se edhe çmimet në treg ishin rritur ndjeshëm. -
Rivlerësimi i pasurive, NAREA kërkon tatim 3% për individët dhe zgjatje të afatit të zbatimit
Shoqata Kombëtare e Ndërmjetësve të Pasurive të Paluajtshme (NAREA) kërkoi ndryshime të rëndësishme në projektligjin “Për rivlerësimin e pasurive të paluajtshme”, gjatë dëgjesës për paketën fiskale në Komisionin për Ekonominë, Punësimin dhe Financat. Përfaqësuesi i NAREA, Reinaldo Pipiria kërkoi zgjatjen e afatit të zbatimit të procesit të rivlerësimit dhe uljen e tatimit të reduktuar nga 5% që është propozuar në 3% për banesat e individëve.
“Afati i zbatimit të ligjit të jetë shumë më i gjatë. Nga viti 2011 ka rreth 250 mijë pasuri të paluajtshme që duhet të rivlerësohen. Sikur të jenë vetëm rivlerësime të banesave, censusi ka treguar se rreth 500 mijë banesa kanë nevojë për rivlerësim. Kapacitetet e Agjencisë Shtetërore të Kadastrës (ASHK) janë 30–33 mijë aplikime në vit. Nëse marrim parasysh se kemi të bëjmë me banesa dhe jo prona komerciale, 12 muaj janë të pamjaftueshme dhe nuk do të sjellin efektet e duhura. Pjesa më e madhe e aplikuesve janë nga diaspora.
Në këtë projektligj, entitetet komerciale dhe individët trajtohen të barabartë. Individët ngarkohen me 5% tatim, dhe po aq edhe entitetet komerciale. Por entiteti komercial këtë 5% e përfshin si shpenzim të zbritshëm, ndërsa individit i thuhet se duhet ta paguajë menjëherë. Entitetet komerciale kanë kapacitet financiar për të kryer rivlerësimin, ndërsa individët jo. Kjo çon drejt bllokimit të pronave të tyre. Për banesat, ne propozojmë të jetë 3%, jo 5%.
Jemi të habitur që në draftin e parë të Ministrisë së Financave përfshiheshin edhe pronat në proces legalizimi për rivlerësim rreth 1.2 milion prona. Në draftin final ky nen është hequr. Ne kërkojmë të përfshihen sërish. Në janar jemi gati të ngremë një grup pune, si në vendet e Europës, që të ketë një task-forcë për të parë gjithë legjislacionin. Në BE, kur një pronë është banim dhe përdoret mbi 50%, ajo përjashtohet nga tatimi mbi fitimin kapital. Shqipëria është shumë mbrapa në këtë drejtim”, pohoi përfaqësuesi i shoqatës NAREA.
Projektligji “për rivlerësimin e pasurive të paluajtshme” parashikon normën të reduktuar të tatimit në 5% nga 15% që aktualisht aplikohet. Afati i zbatimit do të jetë i kufizuar nga 1 janar 2026 deri më 31 dhjetor 2026. Në relacionin shoqërues të draftit shpjegohet se rishikimi i çmimeve mesatare referuese të banesave në Bashkinë Tiranë dhe propozimi i çmimeve të reja referuese për të gjitha zonat e tjera, duke i përafruar gradualisht me çmimet reale të tregut, është një ndër faktorët kryesorë që nxit propozimin e këtij projektligji.
Sipas relacionit përvoja e mëparshme nga aplikimi i ligjeve të ngjashme ka treguar se ekziston një interes i lartë nga qytetarët për të përfituar nga mundësia e rivlerësimit të pasurisë, gjë që është reflektuar në rritjen e ndjeshme të numrit të aplikimeve dhe të transaksioneve të regjistruara pranë Agjencisë Shtetërore të Kadastrës. Nga të dhënat e publikuara rezulton se nga viti 2011 deri në 2022 janë kryer 254,665 aplikime për rivlerësim me vlerë tatimi të paguar prej 23,5 mld lekë./Monitor.al -
Tatimi për rivlerësimin e banesave, shoqata NAREA: Të ulet në 3% dhe të mos përjashtohen shtëpitë në proces legalizimi
Një ndryshim të tatimit dhe kohëzgjatje të fushatës, Shoqata Kombëtare e Ndërmjetësve të Pasurive të Paluajtshme ka paraqitur 3 propozime sa i përket projektligjit që bashkëshoqëron paketën fiskale 2026.
Ndërsa projektligji parashikon një normë tatimi prej 5%, shoqata e kundërshton duke sugjeruar uljen e saj në 3% dhe të jetë e diferencuar me subjektet tregtare.
“Tatimi që i ngarkohet banesës. Në këtë projektligj, entitete komerciale me individin të barabartë. Individi ngarkohet me 5% dhe entiteti komercial po ashtu. Këtë 5% e fut si shpenzim të zbritshëm. Ndërsa individit i themi jo, do e paguash tani. Nëse entiteti tregtar ka kapacitetet për të kryer rivlerësimin, individët s’kanë mundësi. Dhe i bën t’i mbajnë të bllokuara pronat”, shprehet Reinaldo Pipiria nga shoqata “NAREA”.
Një tjetër shqetësim që shoqata ngre për këtë projektligj është dhe përjashtimi nga rivlerësimi i banesave në procesin e legalizimit.
“Jemi të habitur që në draftin e parë të Ministrisë së Financave përfshiheshin edhe pronat në proces legalizimi për rivlerësim, rreth 1.2 milion prona. Në draftin final ky nen është hequr. Ne kërkojmë të përfshihen sërish. Në janar jemi gati të ngremë një grup pune, si në vendet e Europës, që të ketë një task-force për të parë gjithë legjislacionin. Në BE, kur një pronë është banim dhe përdoret mbi 50%, ajo përjashtohet nga tatimi mbi fitimin kapital. Shqipëria është shumë mbrapa në këtë drejtim”, shton Pipiria.
Afati i rivlerësimit të pasurive të paluajtshme është parashikuar nga 1 janari 2026 deri në fund të vitit, por Shoqata Kombëtare e Ndërmjetësve të Pasurive të Paluajtshme propozon zgjatjen e mëtejshme të afatit.Top Channel
-
Tregu i pasurive të paluajtshme në Shqipëri, eksperti: Staniacioni është i rremë, pritet shpërthim në 2026
Në një intervistë në emisionin “Pro Business” në TV Klan, Reinaldo Pipiria, Drejtor Ekzekutiv i shoqatës së real estate-t “NAREA”, hodhi dritë mbi gjendjen aktuale dhe trendet e tregut të pasurive të paluajtshme në Shqipëri, duke ofruar një panoramë të perspektivave të ardhshme.
Pipiria e përgënjeshtroi kategorikisht idenë e një staniacioni në treg, duke e shpjeguar se ajo që perceptohet si ngadalësim është në fakt një fazë pritjeje. Sipas tij, shkaku kryesor i kësaj ngadalësimi të dukshëm të transaksioneve është pritja për përfundimin e procesit të rivlerësimit të pronave.
Ai sqaroi se aktualisht në treg po nënshkruhen kryesisht kontrata premtim shitjeje, pra marrëveshje që do të realizohen në praktikë në fillim të vitit 2026, pasi të ketë përfunduar rivlerësimi. Pipiria njohu se çmimet e larta që shfaqen ndonjëherë në media sociale mund të krijojnë një efekt psikologjik, por theksoi se ato nuk pasqyrojnë realitetin e përgjithshëm të tregut.
Duke iu përgjigjur interesit për investimet e huaja, Pipiria konfirmoi një prurje të konsiderueshme, duke vlerësuar se rreth një e treta e të gjithë investimeve të huaja në Shqipëri po drejtohet në sektorin e pasurive të paluajtshme. Ai theksoi se investimet kryesore aktualisht vijnë nga vendet si Emiratet e Bashkuara Arabe dhe Arabia Saudite, si dhe nga fonde amerikane, dhe se fokusi i tyre kryesor mbetet zhvillimi në zonat bregdetare. Sidoqoftë, Pipiria vuri në dukje potencialin e papërfituar të zonave malore, duke përmendur specifikisht Thethin dhe Valbonën si destinacione me perspektivë për projekte të mëdha investimi në të ardhmen.
Kur u kërkua të komentonte lajmet që e vendosin Tiranën si më të shtrenjtë se kryeqendrat e tjera rajonale si Beogradi dhe Zagrebi, Pipiria i quajti këto krahasime të paqarta dhe shpesh të bazuara në burime të tilla si Numbeo, të cilat nuk janë plotësisht transparente. Duke u mbështetur në burime ndërkombëtare si “Global Property Guide” dhe “Delo Property Index”, ai paraqiti një pamje të ndryshme, duke treguar se çmimi mesatar për ndërtimet e reja në Tiranë është rreth 2 mijë euro për metër katror, ndërsa në Zagreb ai arrin në 2917 euro, dhe në Beograd rreth 2436 euro.
Pipiria theksoi se nuk po mohon se Tirana është e shtrenjtë, por kundërshtoi paraqitjen e një pamjeje të pjerrtë të tregut të tërë bazuar vetëm në çmimet e zonave më premium. Një shqetësim më të madh ai e shikoi në mospërputhjen midis çmimeve të larta dhe cilësisë së ndërtimeve që shpesh nuk i përgjigjet standardeve.
Për familjet që kërkojnë të blejnë shtëpinë e tyre të parë, Pipiria ofroi këshilla të qarta dhe praktike. Ai i inkurajoi ata të bëjnë blerjen nëse gjejnë mundësi për financim bankar, me kusht që kësti mujor i kredisë të mos kalojë 25-30% të të ardhurave totale familjare dhe afati i kredisë të jetë në shumicën e rasteve midis 15 dhe 20 vjetëve. Ai këshilloi që të kërkohen projekte me raport të mirë cilësi-çmim, të cilat shpesh gjenden jashtë zonave qendrore absolutisht, si për shembull përgjatë bulevardit të ri ose në zonën e Yzberishit.
Duke parë përpara, Pipiria parashikoi një dinamizëm të ri të tregut dhe një “shpërthim” të aktivitetit në vitin 2026, pas përfundimit të rivlerësimit. Ai shprehu besim se kërkesa do të mbetet e qëndrueshme për shkak të pozicionit gjeostrategjik të Shqipërisë si një portë hyrëse për investime nga rajoni dhe nga Bota Arabe.
Sfidën dhe mundësinë më të madhe për të ardhmen, Pipiria e shikoi në rinovimin dhe rivitalizimin e pasurisë ekzistuese, veçanërisht të ndërtesave të vjetra në Tiranë. Ai sugjeroi krijimin e mekanizmave inovative të partneritetit publik-privat për të lehtësuar rindërtimin e këtyre objekteve, një proces që do të përmirësonte jetën e banorëve, do të rrisë efikasitetin energjetik dhe do të mund të tërhiqte fonde nga Bashkimi Evropian, duke kontribuar në një zhvillim më të qëndrueshëm të tregut dhe të qytetit në tërësi.