Tag: njësia

Rigels Seliman
Kryeministri Edi Rama ka “ndezur motorët” për zgjedhjet në Bashkinë e Tiranës. Edhe pse Erion Veliaj e ka ankimuar në Gjykatën Kushtetuese vendimin e Presidentit Begaj dhe ka kërkuar pezullim të procesit, kryeministri Rama duket i pashqetësuar në këtë aspekt. Për rreth 40 minuta, Edi Rama mblodhi dje strukturat drejtuese të Partisë Socialiste të kryeqytetit për zgjedhjet në Bashkinë e Tiranës. Takimi mes Ramës dhe socialistëve të kryeqytetit, që nisi në orën 17:00 dhe përfundoi rreth orës 17:40, u zhvillua në një prej hoteleve në qendër të Tiranës. Partia Socialiste ka zgjedhur Ogerta Manastirliun si kandidate për Bashkinë e Tiranës, ndërsa Belinda Balluku është caktuar si drejtuesja e fushatës së PS për zgjedhjet e parakohshme në kryeqytet. Edhe pse pak ditë më parë deklaroi se Manastirliu e ka të sigurt fitoren, Rama nuk ka lënë njeri pa i kërkuar të dalë në terren, duke vënë në lëvizje gjithë peshat e rënda. Ai ka angazhuar plot 33 deputetë dhe ish-deputetë. Gazeta “SOT” mëson se kryeministri Rama u ka ndarë detyrat dhe zonat për ekipin e Tiranës. Kushdo nga ministrat, drejtuesit politik dhe deputetët që është rezident në Tiranë dhe që nuk kanë zgjedhje në qarkun që kanë mbuluar më herët, janë vendosur në Tiranë për zgjedhjet e pjesshme. Kështu, Toni Gogu do të mbulojë zonën e Ndroqit, Fatmir Xhafaj do të jetë i angazhuar në Njësinë 10. Blendi Klosi dhe Eduard Shalsi rikthehen në Tiranë vetëm për fushatën për zgjedhjet e 9 nëntorit. Ulsi Manja po ashtu do të angazhohet në Tiranë. Ish-deputeti i PS, Xhemal Qefalia, do të jetë i angazhuar në zonën e Dajtit, të cilën e ka pasur edhe më herët. Igli Hasani dhe Bora Muzhaqi do të angazhohen në Njësinë Nr.8. Ndërsa Elisa Spiropali do të jetë e paangazhuar në këto zgjedhje të parakohshme të Tiranës, Rama nuk e ka deleguar në asnjë zonë. Por teksa mbledhja me strukturat zgjati 40 minuta, Edi Rama vijoi takimin me dyer të mbyllura vetëm me Ogerta Manastirliun dhe Belinda Ballukun.
Drejtuesit e PS në Njësitë administrative të Tiranës:

Lindita Nikolla, Adea Pirdeni, Ervin Hoxha – Njësia 1
Olta Xhaçka, Arben Pellumbi, Blendi Klosi – Njësia 2
Klotilda Bushka, Ermonela Felaj, Delina Ibrahimaj – Njësia 3
Blerina Gjylameti, Eduard Shalsi – Njësia 4
Erion Braçe, Niko Peleshi, Taulant Balla – Njësia 5
Blendi Gonxhe, Ceno Klosi – Njësia 6
Etilda Gjonaj, Iris Luarasi, Ulsi Manja – Njësia 7
Igli Hasani, Milva Ekonomi, Bora Muzhaqi – Njësia 8
Mimi Kodheli, Besfort Lamallari – Njësia 9
Fatmir Xhafa, Ermal Elezi – Njësia 10
Albana Koçiu, Erion Malaj, Rakip Suli – Njësia 11
Xhemal Qefalia, Ornaldo Rakipi për zonat rurale
Anila Denaj, Sofjan Jaupaj – Njësia 13 (Farkë)

Nuk e shkarkoi qeveria Erion Veliajn, por Këshilli Bashkiak!
Ndërkohë kryeministri Edi Rama, ka reaguar për herë të parë për dekretimin e zgjedhjeve të parakohshme në 6 bashki të vendit, përfshirë edhe Tiranën që është futur në një debat kushtetues. Në mbledhjen me socialistët e mbajtur pasditen e djeshme te Hotel Tirana për zgjedhjet në Tiranë, Rama mësohet t’u jetë  drejtuar të vetëve duke thënë se: “Presidenti e ka firmosur me vullnetin e tij dekretin”. Konkretisht Rama u ka thënë të pranishmëve të qëndrojnë larg debateve për mënyrën si presidenti e firmosi dekretin. Ky është komenti i parë që vjen nga kryeministri, në një kohë që dekreti për Tiranën ka hapur një kurs përplasjesh, në lidhje me ligjshmërinë e këtyre zgjedhjeve të parakohshme. Por teksa në konferencën e djeshme me gazetarët refuzoi të përgjigjej mbi përplasjen me Erion Veliajn, Rama ka folur në këtë mbledhje mbi këtë çështje. Përveç deklaratës se “Presidenti e ka dekretuar me vullnet të plotë datën e zgjedhjeve për Tiranën”, Rama mësohet se ka thënë gjithashtu: “Nuk e shkarkoi qeveria Erion Veliajn, por Këshilli Bashkiak”. Pra duket se Rama po tenton të lajë duart me këtë deklaratë, ndërkohë që harron se më 11 shtator në Asamblenë e PS, ishte ai që urdhëroi Këshillin Bashkiak të shkarkonte kryebashkiakun.
Shkarkimi i Erion Veliajt dhe debati juridik për zgjedhjet e pjesshme në Bashkinë e Tiranës
Megjithatë theksojmë se kryeministri duket se është i pashqetësuar nga lëvizjet që ka ndërmarrë Erion Veliaj, i cili bëri ankimim në Gjykatën Kushtetuese kundër vendimit të 25 shtatorit për shkarkimin si kryebashkiak i Tiranës dhe më pas dekretin e presidentit Bajram Begaj për zgjedhjet. Dy ditë më parë, avokatët e Veliajt iu drejtuan sërish Kushtetueses duke kërkuar pezullimin e dekretit të Begajt. Kreu i shtetit i dekretoi zgjedhjet edhe për kryeqytetin pavarësisht ankimimit të Veliajt me argumentin  se ankesën duket ta kishte bërë në Gjykatën Administrative, e jo në Kushtetuese. Këshilli i Ministrave shkarkoi më 25 shtator nga detyra me kërkesë të Këshillit Bashkiak të Tiranës Erion Veliajn. 4 ditë më vonë kryebashkiaku ankimoi në Gjykatën Kushtetuese vendimin e Qeverisë. Veliaj pretendon për një proces të parregullt ligjor, pasi jo vetëm nuk është dëgjuar, por sipas tij nuk është marrë në konsideratë neni 115 i Kushtetutës, i cili parashikon se kryetari i bashkisë mund të shkarkohet për shkak të shkeljeve të rënda. Veliaj thotë se jo vetëm që nuk ka shkelje të provuara, por edhe mungesa e tij në punë, që u bë shkak për shkarkim, nuk varet nga vullneti i tij. Edhe pse neni 115 pezullon shkarkimin e Veliajt, Begaj nuk priti Kushtetuesen dhe dekretoi datën 9 Nëntor për zhvillimin e zgjedhjeve në Tiranë. Presidenca argumenton se pezullimi i shkarkimit do të vinte vetëm në rast se Veliaj do ishte ankuar në një Gjykatë Administrative, e do të kishte një vendim prej saj. Por teksa socialistët po vijojnë punën për zgjedhjet në Tiranë dhe kanë zgjedhur Ogerta Manastirliun si kandidate, nga ana tjetër opozita po vijon takimet negociuese për të përzgjedhur një kandidat të përbashkët.