Tërmeti “i madh” të cilit i druhen të gjithë në Japoni mund të vrasë gati 300,000 njerëz përgjatë bregut të saj të urbanizuar në Paqësor, të krijojë 12.3 milionë të evakuuar dhe të shkaktojë 1.8 trilion dollarë dëme ekonomike, sipas një parashikimi të ri qeveritar.
Raporti, i publikuar të hënën si përditësimi i parë pas një dekade, përqendrohet në një skenar më të keq për shkatërrimin që mund të shkaktojë një tërmet me magnitudë 9 në një hendek oqeanik 900 km të gjatë, ku plakat tektonike ndërthuren, i njohur si Hendeku i Nankait.
Planifikuesit e emergjencave bazuan parashikimet e tyre mbi një tërmet dhe cunami të lidhur me të, që do të godiste shumicën e vijës bregdetare të Japonisë, në perëndim të Tokios.
Raporti i ri tha se një megatërmet me të njëjtën forcë si tërmeti me magnitudë 9.0 që shkatërroi bregun verilindor të Japonisë në mars të vitit 2011 do të shkaktonte shembje masive të ndërtesave, cuname dhe zjarre.
Dëmet më të rënda dhe numri më i lartë i viktimave dhe dëmeve materiale do të ndodhnin nëse tërmeti godiste në një mbrëmje dimri, kur shumë njerëz do të ndodheshin në transportin publik dhe stacione, ose duke gatuar dhe ngrohur veten në shtëpi prej druri, të rrezikuara nga zjarret.
Në këto kushte, numri i viktimave mund të arrijë në 298,000. Dëmet ekonomike nga shkatërrimi i drejtpërdrejtë i ndërtesave dhe infrastrukturës, së bashku me ndërprerjet më të gjera, do të arrinin në 270 trilionë jen (1.8 trilion dollarë), rreth gjysmën e PBB-së vjetore të vendit, tregoi raporti.
Si tërmeti i vitit 2011, një cunami i fuqishëm do të ishte shkaktari më i madh i viktimave, me qeverinë që vlerëson se ai do të merrte rreth tri herë më shumë jetë se vetë tërmeti dhe shembjet e ndërtesave. Së bashku, ato mund të lëndonin rreth 950,000 njerëz dhe të shkatërronin 2.35 milionë shtëpi.
Numri më i lartë i mundshëm i viktimave është më i ulët se vlerësimi prej 330,000 i bërë në versionin e mëparshëm të raportit dhjetë vjet më parë, një rënie që i atribuohet forcimit të ndërtesave, zhvillimit të sistemeve të paralajmërimit përmes telefonave celularë dhe përgatitjes më të mirë të qeverisë.
Megjithatë, parashikimi i ri rrit dëmet ekonomike të mundshme me 26 për qind nga raporti i mëparshëm, një ndryshim që pasqyron tre vjet inflacioni në rritje dhe një aftësi më të madhe për të analizuar të dhënat mbi mënyrën se si cunamet dhe përmbytjet do të ndikojnë në zona të ndryshme.
Spektri i një tërmeti masiv dhe shkatërrues ka ndjekur gjithmonë Japoninë, e cila është një nga zonat më aktive sizmike në botë, vuan shpesh nga shkatërrimet natyrore dhe ka një përqendrim të madh të popullsisë në disa qytete bregdetare.
Në vitin 2017, një sistem i ri paralajmërimi u instalua për të përmirësuar gatishmërinë e Japonisë për një megatërmet në Nankai. Për të dhënë alarmin, paralajmërimi i parë i këtij sistemi u aktivizua gushtin e kaluar nga një tërmet i madh, por jo shkatërrues, me magnitudë 7.1.
Fill më pas, ekspertët e sizmologjisë thanë se një tërmet masiv ishte bërë relativisht më i mundshëm, duke shkaktuar një rritje të blerjeve të furnizimeve dhe pajisjeve emergjente nga qytetarët e shqetësuar.
Një panel ekspertësh qeveritarë tha në janar se ekzistonte një mundësi “rreth 80 për qind” që një tërmet me magnitudë 8-9 të ndodhte në hendekun e Nankait në 30 vitet e ardhshme, pak më ilartë se vlerësimi i mëparshëm.
Më shumë se 20 nga 47 prefekturat e Japonisë, duke përfshirë metropolet e dendura si Tokio dhe Osaka, do të prekeshin drejtpërdrejt nga një tërmet i tillë. Sipas raportit të ri, numri më i lartë i viktimave do të ndodhte në zemrën industriale të Prefekturës së Shizuokës, ku qeveria frikësohet se mund të humbin jetën mbi 100,000 njerëz. / Financial Times – Syri.net
