Lajmidites.com

Tag: muzikës

  • Kur muzika bashkon brezat/ Mbrëmë nisi Festivali i Këngës në RTK

    Kur muzika bashkon brezat/ Mbrëmë nisi Festivali i Këngës në RTK

    Në Pallatin e Rinisë, nata e parë e edicionit të tretë të Festivalit të Këngës solli emocion, nostalgji dhe performanca të jashtëzakonshme nga artistë të rinj dhe të afirmuar, duke dëshmuar ringjalljen e muzikës shqiptare në Kosovë.

    Mbrëmë, Pallati i Rinisë u mbush me dritë, ritëm dhe emocion. Edicioni i tretë i Festivalit të Këngës në Radiotelevizionin e Kosovës u hap në mënyrën më madhështore, duke e kthyer këtë event në një manifestim të artit muzikor që përbashkon breza dhe stile.

    Në një atmosferë solemne e festive, Kori Siparantum, nën dirigjimin e Memli Kelmendit, interpretoi veprën e kompozitorit Musa Piperku, “Këngë Moj”, duke e shndërruar hapjen e festivalit në një përjetim që preku çdo zemër në sallë. Tingujt e fuqishëm të korit ishin si një ftesë për t’u kthyer tek rrënjët e muzikës sonë, për ta dëgjuar të shkuarën me veshët e së tashmes.

    Energjia e skenës dhe larmia e emocioneve

    Moderuar me elegancë nga Dukagjin Podrimaj dhe Rina Krasniqi, nata e parë u shndërrua në një mozaik emocionesh, ku çdo performancë tregoi një rrëfim të ndryshëm artistik.Teutë Halili hapi garën me këngën “Amin”, një këngë që përcolli mesazhin e vetëdashurisë dhe forcës së gruas. Pas saj, Almir Kraba solli energjinë urbane të “Nuk ka si ti”, ndërsa Elmedinë Ramushi me “A po m’sheh” krijoi një atmosferë të ngrohtë e melodike.

    Semi Tafaj u përqafua nga publiku me “Vazhdoj”, një pop-baladë e brishtë dhe e ndjerë, ndërsa Art Lokaj, Kiara Juba, Egzon Pireci, Arsi Bako dhe Laorjan Ejlli sollën radhazi performanca të fuqishme, duke i dhënë skenës dinamizëm dhe shumëllojshmëri zhanresh.

    Një homazh për “Akordet e Kosovës”

    Një moment që ngjalli emocione të thella ishte përmbledhja retrospektive kushtuar “Akordeve të Kosovës”, festivalit legjendar të dekadave ’60–’80. Në ekranin gjigant u shfaqën pamje arkivore me Nexhmije Pagarushën, Muharrem Qenën, Jusuf Gervallën e shumë artistë të tjerë, duke kujtuar periudhën kur muzika kosovare ndërtonte identitetin e saj.

    Moderatorja Rina Krasniqi kujtoi me emocion:

    “Kur kthejmë kokën pas, shohim figura që na kanë bërë këtë që jemi sot. Është detyrim ta ruajmë këtë kujtesë kolektive.”

    Në këtë frymë, u shpall edhe rikthimi i çmimit “Okarina e Artë”, që sivjet do të jepet si vlerësim për arritje jetësore, një urë mes brezave dhe një nderim për krijimtarinë që ka ndërtuar themelet e muzikës sonë.

    Një jurí me peshë dhe një homazh që ndali frymën

    Juria e këtij edicioni, përbërë nga Dren Abazi, Eneda Tarifa, Jeta Dida Bujari, Rreze Kryeziu dhe kryetari Xhevdet Gashi, u prezantua si një ekip që përfaqëson të gjitha dimensionet e muzikës, nga arti skenik, te arsimi, nga krijimtaria te interpretimi. Prania e tyre i dha festivalit peshën e vlerësimit profesional që publiku e kërkon.

    Në mes të mbrëmjes, ndodhi momenti më i ndjerë i natës: një homazh për artisten e paharruar Violeta Rexhepagiqi. Rina Krasniqi, e shoqëruar nga orkestra, interpretoi një improvizim kushtuar saj.

    “E ndjeva se sa e vështirë është të dalësh në këtë skenë. Kjo ishte për Violetën, që kujtimi i saj të mos shuhet kurrë,” tha ajo me zë të dridhur, ndërsa salla shpërtheu në duartrokitje.

    Kulmi i mbrëmjes , një bashkim simbolik

    Në fund, të gjithë konkurruesit e natës u ngjitën në skenë për të interpretuar bashkë “Baresha”, këngën ikonike të Rexho Mulliqit, duke e mbyllur mbrëmjen me një simbolikë të fuqishme: një urë mes traditës dhe modernitetit, mes trashëgimisë dhe krijimtarisë së re.

    Nga “Këngë Moj” deri te “Baresha”, mbrëmja e parë e Festivalit të Këngës në RTK dëshmoi se muzika kosovare po hyn në një fazë të re, më e vetëdijshme për historinë e vet dhe më e hapur ndaj formave bashkëkohore të shprehjes artistike.

    Publiku u largua me emocionet ende të freskëta dhe me pritje për atë që do të sjellë nata e dytë, e cila do të mbahet të premten, në orën 21:00, sërish në Pallatin e Rinisë.Organizatorët kanë paralajmëruar surpriza, performanca të ftuarish specialë dhe ritme të reja që do ta mbajnë të gjallë frymën e këtij festivali që po bëhet traditë.

    ObserverKult

  • Festivali “Flauti Magjik” edicioni i 12-të në RTSH, në program kompozitorë të mirënjohur botërorë

    Festivali “Flauti Magjik” edicioni i 12-të në RTSH, në program kompozitorë të mirënjohur botërorë

    Festivali “Flauti Magjik” rikthehet me edicionin e 12-të, duke vijuar traditën e promovimit të muzikës së dhomës dhe interpretimit me flaut. Ky aktivitet i përvitshëm sjell një dialog të veçantë mes traditës dhe risisë muzikore, duke afruar publikun me tingujt elegantë të klasikes, romantizmit dhe muzikës bashkëkohore.

    “Koncerti i mbrëmjes i datës 7 i cili zhvillohet në ambientet e sallës Ferdinand Deda, do të përmbajë një repertor të muzikës së dhomës dhe më të gjerë”, u shpreh dirigjenti Fatos Qerimaj.

    Në këtë edicion i cili vjen në bashkëpunim me Orkestrën Simfonike të Radio Televizionit Shqiptar, si edhe nën drejtimin e dirigjentit Fatos Qerimaj marrin pjesë artistet e Trio ANIMATO nga Maqedonia e Veriut.

    “Koncerti përmban një trio që vijnë nga Maqedonia dhe më pas do të jetë ansambli i harqeve të RTSh që do të përformojë bashkë me klaniretistin Roland Berbiu dhe do të ketë dhe uverturën e flautit magjik”, tha ai.

    I ftuar në skenë është edhe klarinetisti shqiptar Roland Berbiu, që bashkohet me për të sjellë një program të larmishëm me vepra nga kompozitorët  Alexey Shor, Trajko Prokopiev, F. Doppler, Aaron Copland e autorë të tjerë.

    Koncerti do të mbahet më datën 7 nëntor në Sallën “Ferdinand Deda” të RTSH-së.

    ObserverKult

    Lexo edhe:

    SONTE FILLON EDICIONI I TRETË I FESTIVALIT TË KËNGËS NË RTK

  • Kompozitorë dhe muzikologë: Hartimi i një strategjie kombëtare me fokus te muzika, të krijohet fondi vjetor i…

    Kompozitorë dhe muzikologë: Hartimi i një strategjie kombëtare me fokus te muzika, të krijohet fondi vjetor i…

     
    Nga Julia Vrapi
    Politikat kulturore, mbështetja institucionale, transmetimi i muzikës kombëtare, statusi i artistit dhe një sërë çështjesh të tjera u trajtuan në konferencën shkencore mbarëkombëtare “Muzika shqiptare si krijimtari, interpretim, muzikologji dhe edukim artistik”. Në këtë konferencë u rikthye në qendër të vëmendjes debati shkencor mbi artin dhe krijimtarinë muzikore, ku të pranishëm ishin studiues, muzikologë, kompozitorë nga Shqipëria, Kosova e Maqedonia e Veriut dhe ndër të tjera u soll në vëmendje edhe hartimi i një strategjie kombëtare me fokus të veçantë te muzika. Në konferencën organizuar në Akademinë e Shkencave u trajtuan një sërë problemesh e çështjesh ligjore, mes tyre edhe se duhet më shumë mbështetje institucionale për krijimtarinë muzikore shqiptare. Kjo konferencë është një iniciativë e komisionit të përhershëm të arteve pranë Akademia e Shkencave, i cili disa kohë më parë nën drejtimin e kryetarit akademik Vasil S. Tole zhvilloi një mbledhje mbi programin e saj. Ndërsa komiteti organizativ i konferencës përbëhej nga akad. prof. dr. Vasil S. Tole, prof. Arben Llozi, prof. asoc. dr. Rovena Vata Mikeli, prof. asoc. dr. Armira Kapxhiu, dr. Denis Bizhga. Përfundimet e konferencës shkencore mbarëkombëtare “Muzika shqiptare si krijimtari, interpretim, muzikologji dhe edukim artistik”, e mbajtur në Tiranë më 30 tetor organizuar nga Akademia e Shkencave e Shqipërisë dhe Fakulteti i Muzikës në Universitetin e Arteve me pjesëmarrës studiues, përfaqësues institucionesh, muzikologë e kompozitorë nga Shqipëria, Kosova dhe Maqedonia e Veriut u përmblodhën në disa rekomandime drejtuar institucioneve kryesore në vend.
    Rekomandime në fushën e krijimtarisë muzikore
     Në rekomandimet në fushën e krijimtarisë muzikore, të hartohet dhe të aprovohet një strategji kombëtare me fokus të veçantë te muzika dhe edukimi përmes saj (Ministria e Turizmit, Kulturës dhe Sportit dhe Ministria e Arsimit); Të krijohet fondi vjetor i mbështetjes së krijimtarisë së re muzikore pranë Ministrisë së Kulturës, në Teatrin e Operës dhe të Baletit dhe në Radio Televizionin Shqiptar dhe të ketë konkurse për krijimtarinë e re muzikore (Ministria e Turizmit, Kulturës dhe Sportit, TKOB, RTSH); Të plotësohet detyrimi i ligjit nr. 10352 “Për artin dhe kulturën”, kreu VIII “Tarifat e shpërblimit të cilësisë artistike”, neni 34 “Masa dhe kriteret e shpërblimit”, ku përmes VKM-së përkatëse duhet të aprovohet masa e shpërblimit të gjinive artistike sipas fushave të artit apo për kontributin e angazhimit të përkohshëm në projektet artistike (Ministria e Turizmit, Kulturës dhe Sportit, Këshilli i Ministrave).  Po ashtu në rekomandime drejtuar institucioneve është dhe të plotësohet detyrimi i ligjit nr. 10352 “Për artin dhe kulturën”, kreu VIII “Tarifat e shpërblimit të cilësisë artistike”, neni 34 “Masa dhe kriteret e shpërblimit”, ku përmes VKM-së përkatëse duhet të aprovohet masa e shpërblimit për rezultate të larta, të arritura në konkurrime ndërkombëtare për artin e kulturën (Ministria e Turizmit, Kulturës dhe Sportit, Këshilli i Ministrave)apo dhe plotësohet detyrimi i ligjit nr. 10352 “Për artin dhe kulturën”, kreu VIII “Tarifat e shpërblimit të cilësisë artistike”, neni 34, ku përmes urdhrit përkatës të ministrit të përcaktohet organizimi i konkurseve kombëtare dhe skema të tjera vlerësimi në gjini të ndryshme të artit (Ministria e Turizmit, Kulturës dhe Sportit). Ndër të tjera rekomandimet janë dhe që të zbatohen realisht të drejtat morale dhe financiare të krijuesve në fushën e muzikës (përmes monitorimit konkret të përdorimit të veprave nga subjektet publike dhe private (Ministria e Turizmit, Kulturës dhe Sportit, Ministria e Financave, RTSH, Albautor) apo dhe të rritet numri i studentëve që studiojnë për kompozicion pranë Fakultetit të Muzikës në UART, duke përdorur praktika të njohura e lehtësi të natyrës administrative për nxitjen e studentëve në kryerjen e studimeve për kompozicion (Ministria e Arsimit, UART). Po ashtu dhe të aprovohet një listë veprash muzikore të krijimtarisë muzikore shqiptare të detyrueshme për t’u njohur dhe interpretuar në shkollat muzikore artistike në vend dhe në Universitetin e Arteve. (Ministria e Arsimit, UART, Shkollat e Mesme Artistike në Tiranë, Shkodër, Vlorë, Korçë, Durrës, Fier, Gjirokastër).

     Rekomandime në fushën e interpretimit muzikor
    Në rekomandime në fushën e interpretimit muzikor përmendet statusi i artistit dhe mbështetja financiare mujore e muzikantëve në profesion të lirë sipas modelit të ligjit francez (Kuvendi i Shqipërisë, MTKS, UART); Ndryshimi i ligjit mbi sponsorizimet nga 2-3 për qind në të paktën 10 për qind, zbritja nga tatimfitimi për bizneset (MTKS Ministria e Financave, Kuvendi i Shqipërisë);  Krijimi i Fondit Kombëtar për Muzikantët e Rinj, bursë dhe mbulim i blerjeve të instrumenteve muzikore (MA, UART, MTKS); Formimi i Orkestrës Rinore Kombëtare, orkestrave rajonale dhe koreve rinore në shkolla dhe universitete, dhe praktikë profesionale të detyrueshme në orkestrat kombëtare për studentët e Akademisë (MTKS, Ministri i Shtetit për pushtetin vendor, TKOB dhe Orkestra simfonike e RTSH). Po ashtu rekomandimet janë dhe për ndërtimin e rrjetit kombëtar muzikor që lidh shkollat me drejtim artistik, Universitetin e Arteve dhe orkestrat muzikore (MA, MTKS, UART, Shoqata e Bashkive); Partneritete publike-private për financimin e muzikës dhe integrimi i muzikës në industrinë digjitale dhe kreative (Ministria e Ekonomisë dhe Inovacionit, Ministri i Shtetit për pushtetin vendor, Shoqatat e Biznesit); Krijimi dhe mbështetja në vijimësi e festivaleve kombëtare dhe ndërkombëtare që ofrojnë hapësira pune për artistët. (MTKS, Ministri i Shtetit për pushtetin vendor, shoqata e Bashkive; Financim i drejtpërdrejtë i instrumentistëve dhe këngëtarëve të rinj klasikë: subvencione për blerjen e instrumenteve dhe bursë për masterclass jashtë vendit, me detyrimin për të dhënë kontribut në Shqipëri brenda një periudhe 10-vjeçare nga koha e financimit (MTKS, MA,  AKKSHI). Në rekomandime është dhe program kombëtar “Muzika për të gjithë” – hapja e shkollave 9-vjeçare të muzikës në çdo qytet të Shqipërisë (në çdo 100 000 mijë banorë) sipas parametrave europianë në lidhje me raportin me popullsinë. Shkollat të kenë kabinetin e muzikës, instrument piano, bateri dhe aparate transmetimi videomuzikore me cilësi stereofonike, si lexues CD-je, videoje apo medie të tjera (Ministria e Arsimit) apo dhe digjitalizim dhe promovim ndërkombëtar – platformë online ku promovohen talentet shqiptare në nivel global (Ministria e Ekonomisë dhe Inovacionit, Ministra e Turizmit, Kulturës dhe Sporti).

      Rekomandime në fushën e edukimit artistik muzikor
    Në përfundimet e kësaj konference janë dhe rekomandime në fushën e edukimit muzikor, si të ndërmerren nisma konkrete për zbatimin e 5 të drejtave muzikore bazë dhe të standardeve të “Road map for arts education”, dokument i UNESCO-s i aprovuar në konferencën kushtuar edukimit përmes artit, mbajtur në Lisbonë në mars të vitit 2006 (Ministria e Arsimit, Ministria e Turizmit, Kulturës dhe Sportit); Të zbatohen detyrimet që rrjedhin nga “Konventa kuadër e të drejtave të fëmijëve”, neni 29 dhe 31, ku theksohet fakti se shtetet duhet të promovojnë të drejtën e fëmijëve për të marrë pjesë në jetën kulturore dhe artistike, si dhe të drejtën për të pasur mundësi të barabarta rikrijuese në të gjitha llojet e formave kulturore dhe artistike, pasi përmes edukimit fëmijët dhe të rinjtë do të ndërgjegjësohen për larminë e formave kulturore dhe përmes tyre do të mund të njohin tjetrin dhe kulturën e tij, për t’i shërbyer një të ardhmeje në paqe dhe zhvillim (MA, MTKS) apo dhe të krijohet Komiteti i Edukimit Artistik, që do të diskutojë dhe sugjerojë politikat e arsimit, muzikës, artit, kulturës dhe përfshirjen e tyre edhe në arsimin parauniversitar e universitar, por edhe në politikat e kulturës, duke krijuar harmoni midis tyre (Ministria e Arsimit, Akademia e Shkencave, Ministria e Turizmit, Kulturës dhe Sportit). Në rekomandime drejtuar institucioneve është dhe rishikim i Planit Mësimor të Arsimit Parauniversitar 2025,  duke rikthyer lëndën e Muzikës në arsimin 9-vjeçar me 2 orë në javë, sikurse ka qenë në Planin Mësimor të vitit 2000-2007 (MA, ASH). Të rikthehet tradita e konkurrimeve vjetore të ansambleve artistike dhe koreve të shkollave 9-vjeçare dhe gjimnazeve. Rekomandimet janë dhe që në shkollat artistike, një herë në dy-tre vjet të organizohen konkurrime kombëtare në qytete të ndryshme (MA)  apo dhe rikonceptimi i programeve muzikore në RTSH publik dhe përmes koncerteve  të Orkestrës Simfonike të RTSH-së. Transmetimi i muzikës kombëtare në radiot kombëtare dhe vendore, shtimi i programeve të edukimit muzikor nga TKOBAP përmes organizimit të “Koncerte për familje”, etj.
    Rekomandime në fushën e muzikologjisë dhe studimeve muzikore
     Përfundimet e konferencës “Muzika shqiptare si krijimtari, interpretim, muzikologji dhe edukim artistik” u përmblodhën në disa rekomandime drejtuar institucioneve kryesore në vend edhe në fushën e studimeve muzikore e muzikologjisë, si themelimi pranë ASHSH-së i një reviste muzikore online (ASH, Komisioni i Përhershëm i Arteve), Hapja e programeve të reja të studimit në fushën e etnomuzikologjisë, muziko-terapisë dhe teknologjive digjitale të regjistrimeve audio. Në vijim është dhe mbështetja e studiuesve të rinj, duke u ofruar mjetet, burimet dhe rrjetet e nevojshme për kërkim shkencor dhe krijimtari muzikore, duke nxitur, mbështetur dhe orientuar studiuesit e rinj (MA, ASH, Fakulteti i Muzikës-UART, Akademia e të Rinjve pranë ASH) apo dhe krijimi i një baze të dhënash për kompozitorët dhe veprat shqiptare (Qendra e Studimit të Arteve pranë ASH, UART); Krijimi i një biblioteke dhe arkivi shkencor muzikor, që përmbledhin literaturë, partitura, disertacione dhe publikime kërkimore, bibliotekat publike të kenë fonde të veçanta për blerjen e produkteve muzikore si CD, DVD, partitura dhe parte muzikore (Biblioteka Kombëtare, UART Biblioteka, Shoqatat e Bashkive, Qendra e Studimit të Arteve pranë ASH), etj.

  • Simon Cowell bën një ndryshim të madh në karrierën e tij

    Simon Cowell bën një ndryshim të madh në karrierën e tij

    Simon Cowell po fillon një sipërmarrje të re.
    Manjati 66-vjeçar i muzikës do të lançojë një linjë syzesh dhe po planifikon të shesë lente me ngjyra që do të ndihmonin në luftimin e migrenës. Simon shpreson që marka e tij, Soothe, të mund të “lançohet brenda 12 muajve”.
    Një burim i tha gazetës The Sun: “Simon e di nga afër sa të dhimbshme janë migrenat.”
    Ata thane, “Fillimisht ai mori një palë syze anti-migrenë nga Amazon për më pak se 20 paund për të parë nëse funksiononin dhe nëse vërtet funksionon.”
    “Ai planifikon ta quajë markën e tij Soothe dhe shpresojmë që ato të lançohen brenda 12 muajsh“, përfundoi burimi i brendshëm.
    Simon në fakt iu desh të humbiste audicionet e Britain’s Got Talent në fillim të këtij muaji për shkak të gjendjes së tij shëndetësore, dhe ish- ylli i X Factor, Stacey Solomon, e zëvendësoi atë. Në janar, biznesmeni humbi gjithashtu dy audicione në shfaqjen e talenteve të ITV për shkak të migrenës.
    Për më tepër, Simon do të luajë në një reality show të ri për Netflix, të titulluar Simon Cowell: The Next Act, një serial dokumentar që do të dalë në dhjetor.
    Sinoni i shfaqjes thotë: “Ajo që thotë Simon, bëhet. Dhe ajo që thotë Simon tani është se bota ka nevojë urgjente për sensacionin e radhës të grupit të djemve.”
    “Mongati i muzikës dhe drejtuesi i divizioneve muzikore Simon Cowell ka krijuar i vetëm disa nga superyjet më të mëdhenj të muzikës në botë. Në serialin e ri dokumentar Simon Cowell: The Next Act, që do të lançohet në dhjetor 2025, kamerat e ndjekin atë ndërsa ai nis ta bëjë këtë edhe një herë”, thuhet më tej në dokumentar.
    Vazhdon: “Nga thirrjet e para për përzgjedhjen e aktorëve deri te publikimi i këngës debutuese të grupit, kjo është një biletë me akses të plotë për shikuesit për të parë çdo moment të kapitullit të ardhshëm të Cowell. A do ta thyejë ai përsëri rekordin e artë në industri?”
    “Që nga viti 2001, ai është shfaqur si gjyqtar në disa seriale konkursesh reality show muzikor, duke përfshirë Pop Idol, American Idol, The X Factor dhe The X Factor UK, Britain’s Got Talent dhe America’s Got Talent. Në këto shfaqje, ai u bë famëkeq për vërejtjet e tij sarkastike dhe kritikat e ashpra. Megjithatë, tani, shikuesit do të kenë një pamje edhe më të afërt të procesit të Cowell dhe aftësisë së tij të pakrahasueshme për të identifikuar dhe nxitur talentin”, përfundon kronika e serialit dokumentar të Simon Cowell.

  • Tish Daija, kompozitori që la pas vetes shumë kryevepra

    Tish Daija, kompozitori që la pas vetes shumë kryevepra

    Kompozitori dhe muzikanti shqiptar Tish Daija ka lindur më 30 janar të vitit 1926 në Shkodër.

    Lindi në Shkodër ndërsa pa mbushur moshën shkollore, u bë pjesëtar i “Korit Françeskan”, ku nën drejtimin e P. Martin Gjokës dhe Filip Mazrekut merr mësimet e para muzikore bashkë me Tonin Harapin, Çesk Zadejën, Lukë Kaçajn, Simon Gjonin.

    Ndërsa në moshën 10-vjeçare bëhet instrumentist i bandës muzikore “Antoniane” që drejtohej nga Prenk Jakova.

    Krijimtarinë muzikore e filloi nën tingujt e fizarmonikës. Kompozimet e para janë këngët “Çik, o mori çikë”, “Ndal, bre vash”, “Me lule të bukura”, “Bjeri Gajdes Gajdexhi” etj.

    Shkollën e mesme e kreu në vitin 1947 në qytetin e lindjes. Më 1956, Tish Daija kreu studimet në konservatorin “Çajkovski” të Moskës. Gjithashtu, Tish Daija ka dhënë një kontribut themelor në krijimin dhe zhvillimin e muzikës instrumentalo-simfonike, muzikës së dhomës dhe për krijimin e një tradite të çmuar shqiptare të muzikës klasike.

    Së bashku me Çesk Zadejën e Tonin Harapin krijuan klasën e kompozicionit në Konservatorin Shtetëror të Tiranës, ku ka dhënë kontributin e tij si pedagog në formimin e disa brezave kompozitorësh, muzikologësh e instrumentistësh.

    Pas përfundimit të studimeve emërohet në Ministrinë e Arsimit dhe Kulturës. Tish Daija ka qenë udhëheqës artistik i Asamblit të Këngëve dhe Valleve Popullore për 18 vjet me radhë (1962-1980).

    Ai njihet si autor i shumë veprave të mëdha muzikore si, opereta “Lejlaja”, opera “Pranvera”, baleti i parë shqiptar “Halili dhe Hajria”, “Bijtë e Peshkatarit” etj.

    E për gjithë veprimtarinë, kontributin dhe punën e palodhur që dha për muzikën shqiptare, u nderua me titullin e lartë “Artist i Popullit” si dhe me titullin “Profesor”.

    U nda nga jeta më 3 tetor 2003 në moshën 78-vjeçare.

    ObserverKult  

    Lexo edhe:

    VENDOS JURIA/ NJIHUNI ME 10 GJYSMËFINALISTËT E ÇMIMIT KADARE

    Juria e Çmimit Kadare ka zgjedhur 10 dorëshkrimet më të mira, nga 32 të tilla që morën pjesë në konkursin letrar. Më 15 shkurt do të publikohen 5 finalistët dhe fituesi shpallet në fund të muajit.

    Anëtarët e jurisë, Nasi Lera, Gazmend Krasniqi, Armand Bora, Ermir Nika dhe Suadela Balliu, kanë bërë të ditur 10 autorët që kalojnë fazën e parë të Çmimit Kadare. Pra një nga më prestigjiozët që jepet sot për prozën shqipe.

    Me marrjen e krijimtarisë së 32 autorëve, e paraqitur me sinopse dhe 15 faqe të dorëshkrimit, nisi puna e kujdesshme e leximit dhe vlerësimit të tyre. Kjo për të përzgjedhur hap pas hapi atë vepër që sjell diçka të re në letërsinë shqipe apo evidenton një talent të ri.

    Tekstin e plotë mund ta lexoni KËTU:

    BESIM ZYMBERI: SIKUR TË FSHIHESHA PËR NDONJË DITË…

    Poezi nga Besim Zymberi

    Sikur të fshihesha për ndonjë ditëSa të pyesnin njerëzit: ku mbet’ ai…E kishte me ne a me perënditëDhe a do të kthehet këtej përsëri…Ndoshta një ditë edhe do të fshihemNë një skutë të braktisur dikuDhe nga kurreshtja e njerëzve tê përpihem‘Ç’u bë me të, pse s’duket më këtu…”Do të më mjaftonin netët plot qetësiGurgullimë e krojeve, e barit farfurimëCa tyje të shkëlqimta në qiellin e ziDhe agime që zgdhijnë në varg a në rimë

    Poezinë e plotë mund ta lexoni KËTU:

    ObserverKult

  • Fedez njofton tërheqjen e tij nga mediat sociale: Do të flas vetëm përmes muzikës

    Fedez njofton tërheqjen e tij nga mediat sociale: Do të flas vetëm përmes muzikës

    Fedez ka vendosur të kufizojë përdorimin e mediave sociale:
    “Siç mund ta shihni, kam vendosur të flas vetëm përmes muzikës dhe prodhimeve të mia krijuese (podkasteve)”, njoftoi reperi në kanalin e tij në Instagram “Gruppettino Segretino”.
    Siç është raportuar, ndër të tjera, nga «Sky TG24» , reperi ka deklaruar se që tani e tutje do t’i përdorë profilet e tij vetëm për të promovuar publikimet e tij të reja muzikore dhe projektet krijuese, siç është podkasti «Pulp» të cilin e drejton së bashku me Marra.
    Ky vendim përfaqëson një largim rrënjësor nga e kaluara, pasi ish-bashkëshorti i Chiara Ferragni ishte i njohur për ndarjen e detajeve të shumta të jetës së tij private në internet.
    Në një mesazh të ndarë në grupin e Instagram-it “Gruppettino Segretino”, Fedez shpjegoi: “Siç mund ta shihni, kam vendosur të flas vetëm përmes muzikës dhe prodhimeve të mia krijuese (podkasteve). Kjo do të jetë mënyra ime e vetme e komunikimit që tani e tutje. Thjesht sepse kështu mund ta shpreh veten më së miri. Përqafime të gjithëve.”

    Në fakt, në muajt e fundit Fedez është shfaqur rrallë në Instagram Stories, ku ka ndarë fragmente nga podkasti «Pulp» dhe disa foto me partneren e tij të re, Giulia Honegger, një sipërmarrëse milaneze.
    Për më tepër, ia vlen të kujtojmë se pas ndarjes së tij nga Chiara Ferragni, profilet e tij pësuan një ndryshim drastik: çifti ndante çdo ditë fotografi të jetës së tyre me fëmijët e tyre, Leonen dhe Vittorian.
    Pas divorcit, të dy ranë dakord të kërkonin leje nga njëri-tjetri për të publikuar foto dhe video të fëmijëve të tyre. Si rezultat, fëmijët praktikisht nuk ekzistojnë në mediat sociale.

  • “Wine & Stories” rikthehet në Berat/ Tri netë festë me verë, muzikë dhe traditë

    “Wine & Stories” rikthehet në Berat/ Tri netë festë me verë, muzikë dhe traditë

    Në datat 3, 4 dhe 5 tetor, qyteti historik i Beratit do të shndërrohet në një pikëtakim të dashamirësve të verës, muzikës dhe traditës, përmes festivalit “Wine & Stories”, një aktivitet që premton netë magjike në qytetin e ‘një mbi një dritareve’.

    Lajmin e ka bërë të ditur Kryeministri Edi Rama përmes një postimi në rrjetet sociale, ku ftoi qytetarët të bëhen pjesë e kësaj feste unike. “Miqtë e verës dhe muzikës i presin tri netë magjike në Festivalin e Verës ‘Wine & Stories’, në Berat. Aty ku vera jo vetëm prodhohet, por edhe shijohet”, shkruan Rama në Facebook, duke e shoqëruar njoftimin me datat e festivalit dhe simbole të verës.

    Eventi pritet të mbledhë prodhues verërash nga e gjithë Shqipëria, artistë të njohur të muzikës live, si dhe vizitorë vendas dhe të huaj që do të shijojnë përvojën e veçantë kulturore dhe kulinare që ofron Berati.
    Ky festival jo vetëm që promovon verën shqiptare dhe trashëgiminë kulturore të qytetit, por synon të forcojë më tej turizmin elitar dhe agroturizmin në një nga destinacionet më të veçanta të vendit.

    Top Channel

  • “Balkan Jazz Showcase” në edicionin e pestë në Universitetin e Arteve, një festival që po merr përmasa ndërkombëtare

    “Balkan Jazz Showcase” në edicionin e pestë në Universitetin e Arteve, një festival që po merr përmasa ndërkombëtare

     Nga Julia Vrapi
    Grupe muzikore me artistë shqiptarë dhe të huaj në koncertet e “Balkan Jazz Showcase”, që këtë vit zhvillon edicionin e pestë të tij. Festivali që vjen i fokusuar te artistët dhe muzika xhaz sjell një program të pasur muzikor. Festivali nis nga teatri i Vlorës, për të vijuar dhe me të tjerë grupe artistësh në netët e tij në Universitetin e Arteve.
    Jo vetëm muzikantë të njohur janë pjesë e këtij festivali, por një hapësirë e veçantë i kushtohet edhe artistëve të rinj. “Balkan Jazz Showcase 2025 (25-28 shtator) thuhet në njoftim për këtë edicion përfaqëson identitetin e një festivali gjithnjë e më ndërkombëtar, i cili mbi bazat e muzikës jazz ndërton një program të larmishëm, të hapur ndaj ideve të reja dhe në gjendje të përmbushë shijet e një publiku që rritet vit pas viti. “Ky organizim muzikor është i vetmi i këtij lloji në hapësirën ballkanike. I fokusuar totalisht tek artistët dhe Jazz-i ballkanik. Krahas promovimit të muzikës së artistëve të njohur të rajonit, një ndër qëllimet kryesore është krijimi i hapësirave për debutimin e muzikantëve të rinj. Vendosja e urave të komunikimit që marrin jetë edhe në projekte të tjera të përbashkëta. Në çdo edicion këto lloj bashkëpunimesh nuk kanë munguar. Çdo vit artistët shqiptarë vijnë me projekte të përbashkëta me muzikantë nga Ballkani dhe më gjerë. Veçanti e këtij edicioni të “Balkan Jazz Showcase 2025” është se zhvillohet në kuadër të veprimtarive që mbahen në Tiranë, si kryeqyteti mesdhetar i kulturës dhe dialogut”, thuhet në njoftimin e festivalit ndër të tjera. Festivali mirëpret yje ndërkombëtarë, talente në ngritje, virtuozë të muzikës jazz, muzikës etno-jazz ballkanike dhe ndërdisiplinore, performues eksperimentalë dhe inovatorë.  Në materialin rreth festivalit thuhet se “Jazz in Albania” në edicionin e tij të 15-të dhe projekti “Balkan Jazz Showcase” në edicionin e pestë do t’i japin vendit, sidomos qendrës së Tiranës, atë atmosferë që i shkon për shtat natyrës mikpritëse të kryeqytetit. Dy tipare janë karakteristike dhe mbeten të pandryshuara për organizatorët, cilësia e programit dhe formula që është konsoliduar ndër vite.
    Pjesëmarrësit në “Balkan Jazz Showcase 2025”
    “Adriatik Jazz Ensemble” nga Italia në festival është një formacion që ofron një mozaik tingujsh dhe një dialog të hapur ndërmjet dy kulturave (Itali-Shqipëri) ku muzika jazz merr trajta të reja, duke i mbajtur rrënjët në traditë, por edhe duke u frymëzuar nga jazz-i bashkëkohor dhe eksplorimi. Në vijim është “Argalios” nga Greqia. Një trio muzikore bashkëkohore që përzien rrënjët tradicionale me eksperimentime të guximshme. “Argalios” është vetë personifikimi i “Balkan Jazz Showcase”, sepse nuk paraqet thjesht traditën e Ballkanit, por i jep asaj një shpirt të ri, për ta ringjallur në kohët moderne. Pjesëmarrës në festival edhe Muhamed Ibrahimi nga Maqedonia e Veriut, një instrumentist dhe kompozitor, i cili vjen në skenën e “Balkan Jazz Showcase” me një prani të rrallë dhe origjinale. Me kitarë akustike, mandolinë, saze dhe instrumente të tjera me tela, ai krijon një gjuhë muzikore unike. İZ / ARA / SEYİR, Turkish Modal Music & Jazz, është një udhëtim muzikor që bashkon thellësinë e makame-ve turke me lirinë shprehëse të jazz-it dhe fuqinë e improvizimit. Në muzikën turke, arabe ose indiane modaliteti është thelbësor: makam-et ose raga-t përcaktojnë strukturën e melodisë, intervalet, lulet dhe strukturën që krijohet.  “Just Trio” nga Shqipëria është një hapësirë eksperimentale muzikore, ku secili prej instrumentistëve kontribuon me stilin dhe idetë e tij personale, duke krijuar një tingull unik që ndërthur folklorin ballkanik me ritmet dhe harmonitë e jazz-it modern. “UART Combo” është në vijim në programin e festivalit. Një ansambël i përbërë nga studentë të Degës së Muzikës Jazz në Universitetin e Arteve, i udhëhequr nga mentorët Andi Kongo (piano) dhe Emiljan Dhimo (bateri). Repertori i grupit përfshin kompozime të njohura standarde të jazz-it. Për organizatorët pjesëmarrja e këtij grupi në Balkan Jazz Showcase (Jazz in Albania) është shumë e rëndësishme, sepse u ofron studentëve të Universitetit të Arteve Tiranë të degës së muzikës jazz dhe jo vetëm- mundësinë për të përmirësuar aftësitë e tyre me profesorë që përfaqësojnë një nga metodat më prestigjioze të mësimdhënies në botë.

  • Zhani Ciko: Festivali i Këngës, ngjarja që ndryshoi fytyrën e muzikës shqiptare

    Zhani Ciko: Festivali i Këngës, ngjarja që ndryshoi fytyrën e muzikës shqiptare

    Në studion e emisionit “Mirëmëngjes Shqipëri” në RTSH 1, maestro Zhani Ciko foli për rëndësinë e historike të Festivalit të Këngës, duke rikujtuar atmosferën e veçantë dhe ndikimin që ky festival ka pasur në jetën artistike shqiptare.

    Maestro Ciko theksoi se ky festival ishte një “bum” artistik në vitet e para të organizimit, që ndryshoi gradualisht imazhin e këngës shqiptare, duke e bërë atë një platformë të rëndësishme publike dhe televizive.
    “Populli është kronika e gjallë e jetës, dhe ato njerëz që akoma sot jetojnë janë ato që nuk i harrojnë mbresat e para. E ndoqa kolegun tim Jetmir Barbullushin i cili tregoi se e ndiqnin nga radio Festivalin e Këngës, ku festivali ishte një “bum” artistik në atmosferën e atyre viteve. Populli e priti shumë mirë, dyert e sallës që sot është universiteti i arteve ruheshin me polic. Festivali ndërroi imazhin e këngës shqiptare pak nga pak që nga edicioni i parë nga një faktor që merrte pjesë në jetën e njeriut u bë një paradë e cila doli në skenë dhe më pas në ekran”, u shpreh Maestro Ciko.

    Një tjetër moment i rëndësishëm i festivalit sipas Cikos ishte prezantimi i autorit të këngës në mikrofon, një risi që nisi me emrin e Avni Mulës. Ai theksoi gjithashtu rolin e dy dirigjentëve të orkestrës, Kristo Kotes dhe Agim Krajkës, të cilët sollën një kombinim të muzikës klasike dhe ritmike.
    “Në atë edicion nuk u dha çmimi i parë, por u dhanë 3 çmime të dyta, dhe 2 çmime të treta. Këngët këndoheshin në dy variante, për shembull kënga “Fëmija e parë” e këndoi Vaçe Zela por e këndoi dhe Qemal Kërtusha për të treguar se çfarë sjell një interpretim. Diçka tjetër e rëndësishme ishte se formacioni orkestral u dirigjua nga Kristo Kote, një muzikant shumë i mirë i cili drejtoi orkestrën tonë ;por ishte dhe formacioni ritmik i drejtuar nga Agim Krajka. Një fenomen i ri ishte që për herë të parë u shfaq në mikrofonin shqiptar vendi i këngë autorit, dhe ky ishte i pari në historinë e muzikës shqiptare që ishte Avni Mula. Pavarësisht prirjeve politike të asaj kohe në këngë nuk kishte të tilla”, tha ai.

  • Dua Lipa shkarkon agjentin pas fushatës kundër Palestinës në Glastonbury

    Dua Lipa shkarkon agjentin pas fushatës kundër Palestinës në Glastonbury

    Ylli botëror i muzikës pop me origjinë nga Kosova, Dua Lipa, ka vendosur të përfundojë bashkëpunimin profesional me agjentin e saj disavjeçar, David Levy, pas zbulimit të përfshirjes së tij në një fushatë kundër Palestinës.Mediat britanike raportojnë se Levy ishte pas një iniciative që synonte pengimin e grupit irlandez Kneecap, i njohur për orientimin e tij propalestinez, nga pjesëmarrja në Festivalin e famshëm Glastonbury. Letra private dhe konfidenciale, e nënshkruar nga Levy dhe dërguar themeluesit të festivalit, Michael Eavis, i bënte thirrje këtij të fundit të anulonte performancën e grupit, për shkak të mbështetjes së tyre për kauzën palestineze.Pasi letra u bë publike, Dua Lipa reagoi menjëherë, duke shkarkuar agjentin dhe duke marrë masa që të mos kishte më asnjë rol në karrierën e saj. Një burim nga industria e muzikës tha se: “Dua u sigurua që David Levy të mos prodhonte më muzikën e saj. Artistja është një zë i fuqishëm në mbështetje të kauzës palestineze dhe nuk mund të toleronte taktika të tilla.”Fituesja e çmimit Grammy ka qenë prej kohësh aktive në mbrojtje të të drejtave të palestinezëve. Në maj të vitit të kaluar, ajo përdori platformën e saj në Instagram me 88 milionë ndjekës për të dënuar atë që e quajti “gjenocid izraelit në Gaza”, dhe ka marrë pjesë në protesta për të denoncuar bashkëfajësinë e vendeve të ndryshme në konflikt.Në gusht të këtij viti, gjatë festivalit të përvitshëm “Sunny Hill Festival” në Prishtinë, mesazhi “Liri për Palestinën” u shfaq në ekranin kryesor, duke përforcuar qëndrimin e saj të qartë publik.Pavarësisht përpjekjeve të Levy, grupi Kneecap performoi në Glastonbury në korrik. Policia ndërhyri pas disa ankesave, por çështja u mbyll shpejt për mungesë provash. Grupi e përshkroi hetimin si një “frikësim politik nga policia”.Që nga 7 tetori 2023, Izraeli ka nisur një ofensivë në Rripin e Gazës, ku janë raportuar mbi 65.300 të vrarë, shumica gra dhe fëmijë, një situatë që është cilësuar nga shumë organizata ndërkombëtare si krim humanitar dhe gjenocid.