Ish-lojtari i Alavés dhe i Real Madridit, Jorge Franco Alviz, i njohur si “Burgui”, sot 31 vjeç, i cili u detyrua të largohej nga futbolli në moshën 28-vjeçare për shkak të një bakteri, ka rikujtuar karrierën e tij, ka trajtuar edhe çështje aktuale në një intervistë për gazetën “As”.
“Burgui” është stërvitur nga Zidane, Ancelotti dhe Mourinho. I pyetur për këtë, ai tha: “Secili kishte stilin e vet. Mourinho kërkonte shumë, të çonte në limite për të nxjerrë më të mirën nga ti. Ancelotti është shumë më i qetë, ndërsa Zidane ka lënë më shumë gjurmë tek unë. Më trajtonte si një djalë të vetin, më inkurajonte, më jepte këshilla dhe qëndronte me mua pas stërvitjeve për të punuar me finalizimet para portës, që të përmirësohesha. U soll shumë mirë me mua”.
Për Mourinhon tregoi një episod të veçantë: “Një ditë, Mourinho bëri një rreth me ekipin dhe më vuri shumë në siklet. Tha që kisha dy muaj në ekip dhe ende nuk e dinte si flisja. Më detyroi të thoja disa fjalë, shokët e skuadrës më bënë një ‘tunnel’ nderimi dhe që nga ajo ditë integrimi im në ekip u përmirësua shumë”.
“Burgui” foli edhe për transferimin e tij tek Alavés, tërheqjen nga futbolli dhe situatën aktuale të Real Madridit, i cili po përgatitet për një përmbysje të vështirë ndaj Arsenalit (3-0) në Ligën e Kampionëve.
Ndër pjesët më të rëndësishme të intervistës është deklarata e tij për Ancelottin: “Sipas mendimit tim, duhet të qëndrojë në Madrid, çfarëdo që të ndodhë. Do të shohim se si do të mbyllet sezoni, por është një trajner që e ka fituar besimin. Edhe pse në Madrid nuk tolerohet një vit i dobët, Ancelotti i ka dhënë shumë klubit. Edhe pa fituar asnjë trofe të madh, duhet të vazhdojë”.
