Me dhimbje të thellë, bota akademike, komuniteti i intelektualëve dhe gjithë ata që patën fatin ta njohin, i japin sot lamtumirën një prej figurave më të shquara të arsimit shqiptar, Profesor Doktor Menduh Dërgutit. Lajmi për ndarjen e tij nga jeta ka prekur thellë jo vetëm familjen dhe miqtë, por edhe shumë breza studentësh, kolegë e bashkëpunëtorë të shumtë.I lindur në një familje qytetare shkodrane me tradita fisnikërie dhe qytetarie, Prof. Dërguti jetoi një jetë në shërbim të dijes, edukimit dhe përparimit shoqëror. Që nga fillimet e tij si mësues i përkushtuar në skajet më të largëta të rrethit të Shkodrës, deri te roli si rektor i Universitetit të Shkodrës, ai e shndërroi arsimin në mision dhe vendosmërisht punoi për të ngritur standardet akademike në një kohë të vështirë për vendin.Një prej deputetëve të parë të opozitës në vitet e para të demokracisë, profesor Dërguti dha kontribut të çmuar edhe në fushën e politikës, duke mbrojtur parimet e lirisë, të mendimit kritik dhe të dialogut. Ai ishte një zë i qartë për reformimin e arsimit të lartë, për hapjen e fakulteteve të reja dhe për ndërtimin e një universiteti të denjë për brezat e ardhshëm.Autor dhe bashkautor i mbi 35 teksteve shkollore dhe akademike, ai ka ndihmuar në formimin e mijëra nxënësve e studentëve në gjithë Shqipërinë. Tekstet e tij kanë qenë për vite me radhë pjesë e sistemit arsimor dhe kanë mbajtur vulën e cilësisë dhe përkushtimit.Motoja e tij: “Arsimi meriton një hap të ri në rrugën drejt përmirësimit dhe rifitimit të vlerave” – nuk ishte vetëm një thënie, por thelbi i jetës së tij profesionale. Për meritat e tij të veçanta, ai është nderuar me shumë tituj dhe dekorata, mes të cilave “Medalja Naim Frashëri”, “Mësues i Merituar” dhe “Urdhri i Trimërisë”.Por përtej dijes dhe kontributit publik, ai mbetet i paharruar si një figurë e dashur familjare. Mbështetje e pakushtëzuar për motrën Bukurije, vëllain Çezar, kunatën Vjollca dhe gjithë të afërmit e tij, ai ishte shembulli i përkryer i një njeriu që ndërton rreth vetes dashuri, edukatë dhe respekt.Në fjalët e Maxhid Cungut, që i jep lamtumirën mikut të tij:“Do ngelesh krenari gegnie në përjetësi…”Profesor Menduh Dërguti largohet fizikisht, por lë pas një trashëgimi të pasur dijesh, vlerash dhe kujtimesh që do të jetojnë gjatë. Ngushëllime të sinqerta familjes, kolegëve, studentëve dhe gjithë atyre që patën fatin ta njohin.