Tag: medalje

Ertjan Kofsha dhe Enkileda Carja janë dy sportistët shqiptarë që patën sukses në Kampionatin Europian të të rinjve dhe U23 që u zhvillua në Durrës pak ditë më parë. Kofsha theu disa rekorde por në fund u gëzua me dy medalje bronzi, kurse Enkileda Carja fitoi në peshën e saj trupore 63 kg në të tre stilet, duke merituar medaljen e artë dhe duke thyer gjithashtu disa rekorde për moshën. Padyshim që është një e ardhme e madhe e peshëngritjes shqiptare, nisur dhe nga të dhënat sportive mjaft cilësore për moshën e saj dhe natyrisht për punën intensive që po bën me trajneren e saj Eglantina Kalemi.
Kjo e fundit u kontaktua nga gazeta “SOT”, dhe u pyet në lidhje me jehonën e këtij suksesi, si është pritur triumfi i sportistes dhe cilat janë pritshmëritë e sportistes së saj gjatë vitit të ardhshëm dhe më tej. Kalemi u shfaq e rezervuar, duke dhënë përgjigje të shkurtra, por të mjaftueshme për të kuptuar se ajo po stërvit një aset të madh të shtangës shqiptare, një sportiste që në vitet në vijim mund t’i sjellë Shqipërisë medalje olimpike. Kujtojmë që Carja ngriti në stilin e shkëputjes 95, 96 dhe 98 kg, tri prova të sakta dhe që i dhanë medaljen e padiskutueshme të artë. Më pas ngriti në shtytje 111, 116 dhe 118 kg, e saktë në të tria provat dhe me medalje ari. Me 216 kg në dygarësh ajo meritoi medaljen e tretë të artë. Në këtë aktivitet ajo u bë rekordmene e Europës në shkëputje, shtytje dhe në dygarësh, por edhe rekordmene e botës për Youth në shkëputje e dygarësh.  Enkileda Carja është vetëm 17 vjeç, në janar do të mbushë 18 vjeç, por rezultatet i ka të krahasueshme me të rriturat.
– A është Europiani i fundit për të rinj që u zhvillua në Durrës arritja më e madhe e sportistes tuaj dhe e juaja si trajnere e saj sa i takon rezultatit dhe rëndësisë së medaljeve?
– Po Europiani ishte një nga garat më të rëndësishme për ne për vitin 2025. Garat e këtij aktiviteti treguan se qëndrojmë në pozita të mira dhe premtuese edhe për më tej. Rëndësi kanë medaljet dhe vendi i parë e me rekord. Arritja ishte e madhe për sportin tonë në tërësi.

– Provat ishin të sakta, a dëshmon kjo një për një sportiste të pjekur tashmë që ka përmirësuar teknikën, apo ju realizuat pesha që i keni të përditshme në stërvitje?
– Provat dëshmojnë dhe njëherë që Enkileda është një sportiste gare. Ajo më të mirën e saj e jep në pedanë dhe gjatë garës. Padyshim që kjo tregon përmirësim të vazhdueshëm dhe pjekuri.
– Sportistja u ndje mirë në vendin e saj, mos kjo ndikon pozitivisht në rezultate apo është rastësi krahasuar me garat që bëhen jashtë vendit?
– Sigurisht që ndihet mirë në vendin e vet, por kishte dhe një përgjegjësi mbi supe edhe më të madhe në Shqipëri. Kjo dhe për faktin se vinte nga vendi i tretë në botë me junior (të rejat), garë e cila është zhvilluar më 2 maj në Peru.
– Kur mendoni ta fusni sportisten në garat për të rritura?
– Enkileda i kishte mundësitë që këtë vit të hynte në kampionatin europian të të rriturave, madje mund të merrte dhe medalje në shkëputje por unë kisha menduar të hyjë në botërorin e youth pasi ishin afër e afër si kohë. Po ashtu dhe në Botëror në Norvegji, por përsëri mendova të japim maksimumin në Junior dhe kështu bëmë. Mendoj se ishte zgjedhje e drejtë dhe këtë të drejtë na e dha gara, na e dhanë rezultatet dhe medaljet.
– A jeni e kënaqur deri tani me trajtimin financiar që ju është bërë ty e sportistes?
– Në këtë pikë mund të them shkurt që për këtë vit ne jemi shumë të lumtura për arritjet tona dhe jemi të bindura që edhe shpërblimet do të vijnë sipas ligjit. Kush punon shpërblehet me rezultate dhe rezultatet shpërblehen financiarisht sipas ligjit.
– Në këndvështrimin tuaj si do ta quanit vitin 2025 në aspektin profesional për ju si trajnere por edhe për sportisten e shtangën shqiptare në tërësi?
– Viti 2025 ka qenë nga më të mirët deri tani dhe uroj dhe shpresoj që vitet e tjera të jenë edhe më të arta. Kam besim të madh për rezultatet në vazhdim. Vitet e ardhshme na presin më shumë punë, përkushtim e seriozitet nga të dyja.
– Çfarë keni si objektiv në planin afatshkurtër dhe afatgjatë?
– Më 6 nëntor deri më 14 nëntor marrim pjesë në Lojërat Islamike në Arabinë Saudite dhe në dhjetor në kampionatin Ballkanik shpresoj dhe uroj te paraqitemi sa më mirë. Më tej kemi kohë të mendojmë dhe analizojmë ku do të marrim pjesë dhe çfarë objektivash kemi. Për momentin mendojmë për garën e radhës, atë në Arabi.
– Duke parë sukseset e Enkiledës, cili është mesazhi që ju mund të përcillni për vajzat e reja e adoleshente në sport?
– Çdo vajze, çdo të reje i tregoj shembullin më të mirë jo vetëm të një kampioneje në sport, por dhe në jetë, një vajzë model. Enkileda është mishërim i këtij suksesi, në mënyrë të padiskutueshme.
– Pak e dinë rutinën tuaj ditore, në të ushqyer dhe në të stërvitur. Cila është rutina e sportistes dhe trajneres së saj? Çfarë bëjnë ato të dyja jashtë sportit por që i shërbejnë suksesit të tyre në sport?
– Rutina jonë është si e çdo sportisteje të niveleve të larta dhe trajneres së saj, që do të thotë punë-stërvitje-familje dhe asnjë mundësi, sado e vogël qoftë, argëtimi. Enkileda ka qejf pikturën, e unë si trajnere e saj ndoshta pëlqej më shumë udhëtimet me familjen. Nga intensiteti i lartë i përgatitjes pak herë na del koha të bëjmë diçka ndryshe, qoftë dhe për të lëvizur.
– A keni marrë së fundmi premtime për mbështetje nga FSHP, KOKSH, ministria e linjës apo pushteti vendor për shpërblime apo plotësim kushtesh, ose vlerësim tjetër?
– Jemi duke bashkëpunuar me Federatën Shqiptare të Peshëngritjes për periudhën 2026, për të bërë një projekt për mbështetjen e sportistes drejt Lojërave Olimpike 2028 që zhvillohen në SHBA. Po ashtu, sportistja ka aplikuar për bursë olimpike 2028 dhe duhet të shtoj se ka pasur mbështetjen e Komitetit Olimpik Kombëtar Shqiptar prej tre vjetësh. Ajo merr bursë olimpike youth, pra në varësi të kategorisë së moshës së saj. Presim të kemi një takim me ministrinë e linjës, një farë mbështetjeje për sukseset tona të fundit, por në ministri po ndodhin ndryshime pasi së shpejti do të kemi një ndryshim të emërtimit, ku ministria jonë nga Ministri e Arsimit dhe Sportit do të bëhet Ministri e Turizmit, Kulturës dhe Sportit. Për shkak të ndryshimit të emrit ka pasur vonesa, por jam i sigurt se sportisten kampione do ta presin siç duhet, pasi ajo i ka dhënë vendit medalje të rëndësishme dhe është mjaft premtuese.
– Të flasim pak për garën e radhës, atë në Arabi, çfarë qëllimi keni?
– Për ne është hera e parë që shkojmë. Nuk kemi qenë ndonjëherë në këtë format lojërash dhe nuk e kemi idenë as të deklarimeve të kundërshtareve e as ide të tjera si qëndron konkurrenca. Por ne shkojmë atje për të dhënë më të mirën tonë, për të marrë medalje, pse jo.
Intervistoi: Adriatik BALLA