Kandidati për deputet i PD Myslim Murrizi duke folur në MCN Live tha se Kodi Zgjedhor aktual është “bastard” dhe “paçavure”, duke theksuar se është për sistem mazhoritar dhe lista 100 për qind të hapura.
“Personalisht jam kundër këtij Kodi Paçavure zgjedhor, është një kod bastard që vret sovranitetin e votës. Personalisht pëlqej sistemin mazhoritar. Do doja një kod burrëror, s’kanë pse fshihen në lista të mbyllura, njerëz i tremben votës qytetare. Ka 5 palë zgjedhje që elita vendimmarrëse politike ia fsheh kandidatët votuesve, njëlloj si në kohën e shokut Enver. Më vjen shumë mirë që e shoh Damianin në listën e hapur, sepse është gatuesi i një çorbe të prishur bashkë me Oerdin.Nëse ma japin mandatin, që në shtator do nisë këtë betejë për t’ua prishur atë çorbë të gatuar që në 2008-ën. Një pjesë e këtyre që janë xhenaze politike, brenda listave të mbyllura, refuzuan të hyjnë edhe në primare! Është ngritur autokracia në kulm falë këtij ligji bastard zgjedhor”.
Murrizi tha se do t’i demaskojë kandidatët në listat e mbyllura, nëse do të vërej preferenca prej tyre.
“Nëse unë dhe kandidatë të tjerë do ta vërej një farë preference të këtyre në lista të mbyllura, do t’i demaskoj publikisht. Te unë asnjë nga këta lider s’do ketë vend për t’u faktorizuar në çdo takim që Myslim Murrizi bën. Nuk shkoj për të promovuar kloun politikë, që duan të faktorizohen, që unë të bëj punën edhe këta të bëjnë si udhëheqës të mëdhenj!”
Murrizi tha se do të kërkojë rinumërim në 9 ZAZ edhe sikur të marrë 100 mijë vota, për t’i futur disa hajdutë në burg.
“Deputetët që do dalin nga firmat e kryetarëve janë të punësuar të partisë, s’i quaj fare deputetë. S’janë realisht deputet, si mund të jesh deputet pa votë qytetarësh. Unë deputet quaj 48 ata që vijnë nga votat e qytetarëve. Dhe do përpiqem fort që shqiptarët të zgjedhin 140 deputetë”.
Tag: mbyllura
-
Myslim Murrizi paralajmëron: Nëse vërej preferenca, do demaskoj kandidatët e listave të mbyllura
-
“Në 2021 punuan kundër fitores sonë, sot janë fshehur në listat e mbyllura”, Basha: Lista jonë hapur është votë për…
Drejtuesi politik i Koalicionit Euroatlantik, Lulzim Basha, zhvilloi një takim me strukturat dhe mbështetësit e Degës 15 në Tiranë, ku theksoi rëndësinë historike të votës më 11 maj dhe dallimin e qartë mes listave të hapura dhe listave të mbyllura.
“Për herë të parë pas një kohe shumë të gjatë, shqiptarët kanë mundësinë të votojnë për ata që duan t’i përfaqësojnë në Parlament. Këtë mundësi ua jep vetëm Koalicioni Euroatlantik – numri 4 në fletën e votimit,” u shpreh Basha.
Ai kritikoi listat e mbyllura si një formë që i shërben vetëm kryetarëve të partive dhe jo qytetarëve. “Listat e mbyllura janë vezët e qyqes. Votoni ku të doni, prapë del ai që ka vendosur kryetari. Lista e hapur është ndryshe – aty ku keni besim, aty votoni,” theksoi ai.
Basha kujtoi se shumë prej atyre që sot janë futur në listat e mbyllura, janë të njëjtët që në vitin 2021 punuan kundër fitores së demokratëve dhe bashkëpunuan me Edi Ramën. “Sot kanë hyrë si vezët e qyqes, të strukur te listat e mbyllura,” u shpreh ai.
Sipas tij, listat e hapura i japin qytetarit fuqinë për të zgjedhur realisht përfaqësuesit e vet, ndërsa listat e mbyllura prodhojnë vetëm servilizëm ndaj kryetarëve. “Kur kryetari do të mbrohet nga SPAK-u, ata janë garda e tij. Kur vjedh kryetari me ministrat, ata bëhen rrogozët e tij. Sepse nuk janë zgjedhur nga qytetarët, por janë vendosur nga lart,” përfundoi Basha.
Ai theksoi se Koalicioni Euroatlantik përfaqëson të vetmen alternativë me lista të hapura dhe me një program të qartë për drejtësi, zhvillim ekonomik dhe luftë kundër korrupsionit.
Pjesë nga fjala e Bashës:
Për herë të parë, prej një kohe shumë të gjatë, ju keni mundësinë të votoni atë që ju doni të dërgoni në Parlament.Këtë mundësi ua jep Koalicioni Euroatlantik, numri 4, nu kua jep askush tjetër. Në veçanti nuk ua japin ata që në 2021punuan kundër fitores së demokratëve dhe që sot janë futur si vezët e qyqes, te një listë e mbyllur, që ti voton ku të duash, por prap vezët e qyqes dalin.Ata që në 2021 bashkëpunuan me Edi Ramën kundër fitores tonë. Kurse lista e hapur fletë vetë, aty ku keni besim, aty votoni.Listat e mbyllura janë vezët e qyqes, listat e hapura janë kandidatët sot, nesër deputetët e njerëzve. Ata te listat e mbyllura kanë vetë një serivilizmin ndaj kryetarit. Interesat e kyretarit janë interesat e tyre.Do krytari të mbrohet nga SPAK-u, ata janë garda e tij, vjedh kryetari bashkë me ministrat, ata bëhen rrogozi i tij, nuk kanë asnjë lidhje me qytetarët, sepse nuk i kanë vendosur qytetarët aty. -
Zgjedhjet e 11 majit, Rama-Berisha bashkë kundër partive të reja, ja si dy pazarxhinjtë e ndryshimeve kushtetuese…
Prej më shumë se 30 vitesh, skena politike shqiptare ka qenë një duel i paracaktuar mes dy forcave që ndajnë pushtetin sipas radhës. PS dhe PD kanë sunduar, duke krijuar një sistem ku ndryshimi është vetëm rotacion, jo një revolucion i vërtetë politik. Por zgjedhjet e 11 majit 2025 mund të shënojnë një prishje të këtij monopoli. Në horizont janë shfaqur forca të reja politike, të drejtuara nga individë që nuk vijnë nga tregu i zakonshëm i politikanëve të ricikluar, por edhe politikanë të pastër dhe mbështetës të fortë të SPAK. Forcat politike si partia Demokratët Euroatlantikë e Lulzim Bashës, Lëvizja Bashkë e Arlind Qorit, Shqipëria Bëhet e Adriatik Lapajt, Nisma Thurje e Endri Shabanit dhe Mundësia e Agron Shehajt po kërkojnë të marrin një rezultat historik në 11 maj, por që beteja e tyre është e vështirë pasi Edi Rama dhe Berisha, dy figurat më të vjetra të politikës shqiptare, dy arkitektët e ndryshimeve kushtetuese që shkatërruan pluralizmin, po punojnë me një objektiv të përbashkët: të mos lejojnë që këto forca të reja politike të çajnë monopolin e tyre të pushtetit.
Mjafton të analizosh sjelljen e Ramës gjithë këtë kohë për të kuptuar se ai humbet shumë nëse Berisha izolohet apo, në skenarin më të keq për të, përfundon në burg. Po të ndodhte kjo, opozita do të çlirohej nga hijet e së shkuarës dhe do të krijonte alternativa reale, që nuk janë të varura nga pazaret me një leje ndërtimi apo një emërim në administratë. Për Edi Ramën, Berisha është kapital politik. Një opozitë e lirë dhe e pavarur, me figura të reja që nuk mund të blihen apo shantazhohen lehtësisht, do të ishte një kërcënim i drejtpërdrejtë për mbajtjen e pushtetit të tij.
Prandaj, çdo skenar që i jep Berishës një rol, sado të deformuar, është një investim për vijimësinë e sundimit të Ramës. Plani i tyre është që sërish të mbajnë monopolin e sistemit politik që i ka fillesat që nga viti 2008, por që këtë herë nuk është vetëm për karrige, pasi dyshohet se planet e tyre ogurzeza janë për të goditur SPAK-un, nëpërmjet kontrollit të sistemit të drejtësisë që vetë ata dhe bashkëpunëtorët e tyre të zhytur në afera t’ia hedhin paq si dikur.
Rama-Berisha sulme të koordinuara ndaj partive të vogla
Berisha ka sulmuar partitë e reja duke i quajtur ‘paterica të Ramës’ dhe komentoi listat e mbyllura të tyre në garën e 11 Majit të cilët vendosën emrat e familjarëve të tyre në listat e mbyllura. Koalicioni “Nisma Shqipëria bëhet’ me bashkëkryetarë Adriatik Lapaj, Pano Soko e Endri Shabani dhe koalicioni ‘Djathtas për Zhvillim” të Enkelejd Alibeajt e Dashamir Shehit vunë emrat e familjarëve në lista duke e quajtur si strategji për të ironizuar dhe luftuar pazarin nga PD e PS me ndryshimet kushtetuese të korrikut 2024. “Ishte i frikshëm vendimi i disa partive që quhen të reja gjoja, por që janë paterica të Edi Ramës, kur pashë që futën familjarët e tyre në listat e mbyllura. Nga dy dhe tre familjare në listat e mbyllura.
Do bënin atë që bën Edi Rama sot që ndan paratë me baxhanakun, ndan pronat me vëllain, ndan shuma me familjarët e vet. Këto janë origjina e tmerrshme e korrupsionit.” tha Berisha pak ditë më parë gjatë një bashkëbisedimi me qytetarët online. Në të njëjtën linjë si Berisha është edhe Rama. Sulmi më i fundit i kryeministrit ishte ditën e djeshme. Edi Rama ironizoi partitë e vogla, duke iu referuar si “shitësa të vegjël qilimash”. Kryeministri tha se ata janë të njëjtat vegla, thjesht kanë ndryshuar moshën dhe fytyrat e tyre. “Sot shpresa e tyre e vetme, e dëshpëruar dhe e mjerë është që SPAK dhe gjykata speciale do të shkatërrojë PS dhe më në fund do t’u vijë dita e tyre, ndërkohë që ajo që ata nuk kuptojnë, bashkë me shitësit e vegjël të qilimave, që janë të gjithë vegla dhe që të re kanë vetëm fytyrën dhe moshën e tyre.
I patë edhe futën baballarë, krushq e teze në lista. Nuk kuptojnë një gjë që ne nuk jemi në një punë por në një mision, e që ta bëjmë Shqipërinë njëherë e mirë pjesë të familjes evropiane”, u shpreh kryeministri. Nga ana tjetër dalja në skenë e Lulzim Bashës duket se e ka trazuar situatën mes Ramës dhe Berishës. Basha, tashmë i distancuar nga Sali Berisha dhe me qëndrime pro SPAK, është në vënë në sulm. Vetë Berisha bëri thirrje që mos jepni votë për Lulzim Bashën. Madje kreu i PD u përpoq të hynte në mesin e replikave të fundit mes Ramës dhe Bashës për kredot e veta personale politike.