Geron Gunbardhi, avokat dhe këshilltar i opozitës, ka reaguar ashpër ndaj situatës së ujësjellësit dhe menaxhimit të mbetjeve urbane në Vlorë. I ftuar në emisionin “Kafe Shqeto”, ai ka kritikuar projektet e qeverisë dhe investimet e huaja që, sipas tij, nuk u kanë sjellë zgjidhje reale qytetarëve.
“Të rrethohesh me burime pa fund uji dhe të mos kesh ujë për qytetarët e Vlorës, ndërsa shtohen vetëm bojlerët dhe pompat, kjo është e papranueshme,” deklaroi Gunbardhi.
Ai iu referua investimit të KFV-së gjermane për ndërtimin e një landfilli të ri në qytet, duke e cilësuar atë si një dështim. “Pavarësisht se KFV gjermane hodhi lekët për të bërë këtë landfill, kjo është një gropë,” tha ai. Gunbardhi kujtoi se në takimet e para me përfaqësuesit gjermanë dhe bashkinë, ka ngritur shqetësime për standardet e ulëta të projektit:
“Kur erdhën për të prezantuar projektin, i pyeta: kjo që doni të bëni në qytetin tim, në çfarë viti është ndaluar në Gjermani? Sepse mesa di unë, në Gjermani kjo është ndaluar që në ’65 apo ’70.”
Sipas tij, ajo që po ndërtohet në Vlorë është e krahasueshme me fushën ekzistuese të mbetjeve urbane. “Kjo gropa që po bëhet këtu, që ata e quajnë landfill, është njësoj si fusha e mbetjeve, thjesht me disa milionë euro më shumë investim. Ky nuk është një landfill sipas parametrave të duhur,” theksoi Gunbardhi, duke shtuar se “lekët u morën, dhe tani ai funksionon pjesërisht – mbetjet nuk hidhen të gjitha në të, por vetëm një pjesë.”
Në një tjetër pjesë të intervistës, Gunbardhi përmendi flotën e mjeteve të pastrimit, duke thënë se të gjitha janë të reja dhe moderne: “Makinat në projekt, për hir të së vërtetës, Vlora i ka të gjitha të reja me kilometrazh zero. Të gjitha janë model.” Por sipas tij, kjo nuk mjafton nëse nuk ka një zgjidhje të qëndrueshme për sistemin e pastrimit.
“Vlora ka nevojë për një projekt serioz. Kam dhënë edhe një zgjidhje që të bëhet pa lekë, por kur është pa lekë, këto nuk i pëlqejnë,” përfundoi ai, duke kritikuar mungesën e vullnetit për të përfshirë alternativa efikase dhe ekonomike në politikat publike.
Gunbardhi: Të rrethohesh me burime pa fund uji dhe të mos keni ujë për qytetarët e Vlorës dhe të shtohen vetëm bojlerët dhe të shtohen vetëm pompat, kjo është e papranueshme.
Pavarësisht se KFV gjermane hodhi lekët për të bërë këtë landfill, kjo është një gropë.
Për herë të parë kur kanë ardhur këto zotërinjtë për të bërë këtë gjë, kam shkuar dhe i kam bërë pyetje në konsultimin me publikun dhe përfaqësuesit e bashkisë.
I thashë përfaqësuesit gjerman: kjo që ju do të bëni në qytetin tim, në çfarë viti është ndaluar në Gjermani, se mesa di unë është ndaluar në ’65, ’70.
Pra kjo gropa që po bëhet këtu, që këta e quajnë landfill, është njësoj si kjo e fushës së mbetjeve së Vlorës, thjesht kjo është me ca milionë euro investim.
Pra ky nuk është një landfill me parametrat e një landfilli, dhe këtu si gjithë landfillet e tjerë u morën lekët dhe tani është vënë në punë pjesërisht, pra nuk po hidhen mbetjet tek fusha, po hidhet një pjesë atje.
Makinat në projekt, për hir të së vërtetës, Vlora i ka të gjitha të reja me km 0, që të gjitha makinat e pastrimit të Vlorës janë model.
Por Vlora do një projekt, do… kam dhënë edhe një zgjidhje që të bëhet pa lekë, por po qe zgjidhja pa lekë, këto nuk i pëlqejnë.
