Tag: mbështetja

Rigels Seliman
Përkundër akuzave dhe debatit të ndezur politik që ka përfshirë Shqipërinë sa i takon rolit të institucioneve të drejtësisë së re dhe mbështetjes së partnerëve ndërkombëtarë ndaj tyre pas ardhjes së administratës “Trump” në pushtet, Shtetet e Bashkuara të Amerikës konfirmojnë se nuk kanë ndërmend të tërhiqen nga mbështetja e tyre për reformën në drejtësi dhe institucionet e saj, përfshirë SPAK-un. Kjo mbështetje mbetet një shtyllë e fortë e angazhimit të SHBA në Shqipëri, pavarësisht se opozita dhe qeveria shqiptare në disa raste kanë vënë në dyshim paanshmërinë e këtyre strukturave dhe ndikimin e ndihmës amerikane në këtë proces.
Reagimi i DASH
Gazeta “SOT” iu drejtua Departamentit Amerikan të Shtetit me pyetje të drejtpërdrejta, për të marrë një qëndrim zyrtar mbi temën. Konkretisht, “SOT” pyeti: Cili është reagimi juaj ndaj kritikëve që pretendojnë se mbështetja e SHBA për SPAK-un ka pasur ndikime të mëdha politike në Shqipëri? Si mund të sigurohet që mbështetja amerikane të mbetet e paanshme dhe të fokusohet vetëm në luftën kundër korrupsionit dhe sa e rëndësishme është për Departamentin e Shtetit të SHBA të vazhdojë mbështetjen për një reformë të thellë në drejtësi në Shqipëri, përfshirë struktura si SPAK, veçanërisht në një kohë kur të dyja palët politike po akuzojnë këto institucione për anshmëri politike?
Në përgjigje të këtyre pyetjeve, Departamenti Amerikan i Shtetit ka dhënë deklaratën e mëposhtme zyrtare për gazetën “SOT”, e cila është atribuueshme një zëdhënësi të tij: “Në përputhje me Urdhrin Ekzekutiv të Presidentit Trump të datës 20 janar për Rishikimin dhe Riorganizimin e Ndihmës së Jashtme të Shteteve të Bashkuara, Sekretari Rubio nisi një rishikim të gjithë ndihmës së jashtme amerikane për të siguruar që programet të jenë efikase dhe në përputhje me politikën e jashtme amerikane sipas agjendës ‘America First’. Disa programe që janë konsideruar thelbësore për interesat kombëtare të SHBA janë rifilluar, ndërsa rishikimi i ndihmës së jashtme është ende në vazhdim”, thuhet në reagim.
Mesazhi
Por ky qëndrim i Departamentit të Shtetit, është mjaft domethënës. Ai nënkupton se, pavarësisht se SHBA po rishikon të gjithë ndihmën e saj të jashtme në kontekstin e prioriteteve kombëtare të përcaktuara nga administrata amerikane, disa programe siç mund të konsiderohet edhe mbështetja për drejtësinë shqiptare janë rifilluar pikërisht sepse janë vlerësuar si thelbësore për interesat kombëtare të SHBA. Këtu përmendim rikthimin e ekspertëve amerikanë të OPDAT në SPAK pas pezullimit që iu bë në janar, kur Trump erdhi në pushtet. Përkrahja për SPAK-un dhe reformën në drejtësi ka qenë prej vitesh një gur themeli i bashkëpunimit SHBA-Shqipëri.
Shtetet e Bashkuara kanë investuar jo vetëm fonde, por edhe mbështetje teknike dhe politike për ngritjen e institucioneve të reja të drejtësisë që synojnë të luftojnë korrupsionin dhe krimin e organizuar. Përballë një klime të polarizuar politike, ku çdo veprim i drejtësisë interpretohet si favorizim ndaj një pale apo si sulm ndaj tjetrës, angazhimi i SHBA-ve për ruajtjen e paanshmërisë mbetet jetik. Pikërisht kjo është arsyeja pse Shtetet e Bashkuara, nëpërmjet instrumenteve të saj të ndihmës dhe mbështetjes institucionale, vazhdojnë të monitorojnë nga afër proceset, duke kërkuar transparencë, integritet dhe rezultate konkrete në luftën kundër korrupsionit në nivelet më të larta.