Përfaqësuesi ligjor i PD-së në Komisionin Qendror të Zgjedhjeve, Marash Logu, i ftuar në ‘A Shoë’ me Adi Krastën në SYRI TV, ka folur në lidhje me zgjedhjet dhe situatën politike të pas 11 majit.
Gjatë bisedës në studio, Logu theksoi se një pushtet që vjedh/blen zgjedhjet nuk jep më llogari, duke u bërë më pak transparent.
‘Problemi qe kemi ne në Shqipëri me zgjedhjet, janë probleme të atilla që nuk kanë të bëjnë vetëm me partitë politike, por me jetën dhe përditshmërinë e secilit prej nesh.
Një pushtet që vjedh zgjedhjet bëhet më pak transparent dhe llogaridhënës dhe nuk e qan kokën për njeri, sepse nuk ka pse të japë llogari.
Njerëzit duhet të kuptojnë se, problemi që kemi me zgjedhjet, ndikon në përditshmërinë e tyre.
Një popull apo një shtet që nuk ka një traditë të fortë të demokracisë, zgjedhjeve, standardeve, respektimit të lirisë dhe të drejtave të njeriut, e ka më të vështirë të ketë ndërgjegjësimin se çfarë ndodhur kur i humbet këto vlera dhe standarde.
Ka qenë një punë sistematike e bërë ndër vite nga njerëz që kanë në dorë pushtet financiar dhe mediatik, dhe kanë bërë një punë shumë të fortë që njerëzit të bëhen të painteresuar ndaj këtyre standardeve.
Është për keqardhje të themi se, në disa raste njerëzit janë dorëzuar përballë këtij realiteti. Ka një gjë, vërtetë në këto zgjedhje ka probleme të mëdha, por duhet pasur parasysh dhe fakti se këtu votuan 42% e qytetarëve që jetojnë brenda vendit dhe në diasporë 14% e diasporës shqiptare.
Këto shifra tregojnë se njerëzit në një lloj forme janë bërë të painteresuar ndaj zgjedhjeve se, kanë kuptuar se me votën e tyre nuk e ndryshojnë realitetin’, u shpreh Marash Logu në SYRI TV.
