Tag: manastirliu

Deputetja socialiste Ogerta Manastirliu po shfaqet çdo ditë e më shumë si drejtuesja “de facto” e Tiranës, duke marrë pjesë dhe duke udhëhequr pothuajse çdo takim publik me banorët e kryeqytetit, nga Lapraka në Kombinati, nga Kashari në Astir dhe lagje të tjera të kryqytetit. Në takimet e fundit, ajo ka folur dhe ka drejtuar diskutimet për buxhetin e Bashkisë së Tiranës sikur të ishte kryebashkiake e zgjedhur, ndërsa përfaqësuesit zyrtarë të bashkisë qëndronin në sfond. Mbështetja e hapur e kryeministrit Edi Rama e ka konsoliduar edhe më shumë perceptimin se Manastirliu po merr kontrollin politik të kryeqytetit në një moment vakumi institucional. Ekspertët paralajmërojnë se ky rol publik shkel kufijtë e autonomisë vendore dhe përbën një “uzurpim” të funksioneve të bashkisë, ndërsa Tirana ka mbetur pa drejtim të zgjedhur për shkak të pezullimit të zgjedhjeve. Kritikët theksojnë se Manastirliu po vepron si kryebashkiake pa mandat, ndërkohë që në debatin publik rikthehen akuzat e mëparshme ndaj saj për tenderë sekretë dhe koncesione të debatueshme në sektorin e shëndetësisë, akuza që vetë Manastirliu i ka mohuar, por që vijojnë të përdoren nga kundërshtarët politikë dhe që po hetohen nga Prokuroria e Posaçme (SPAK). Për organizatat e qeverisjes vendore, kjo situatë është “alarmante” dhe e ngjan me një model kontrolli të centralizuar ku qeveria udhëzon, drejton dhe vendos edhe në nivelet që, sipas ligjit, duhet të jenë autonome. Shkarkimi i Veliajt dhe situata e tij e pazgjidhur ligjore kanë krijuar një vakum që, sipas kritikëve, po shfrytëzohet politikisht për të vendosur njerëz të besuar në terren. Ndërkohë që takimet e Manastirliut shtohen dita-ditës në çdo lagje të Tiranës, ekspertët paralajmërojnë se ky proces mund të personalizojë pushtetin lokal dhe të anashkalojë institucionet zyrtare të qytetit. Nga ana tjetër, kundërshtarët e quajnë këtë një “farsë politike”, një manovër të orkestruar për të marrë kontrollin e kryeqytetit para çdo verdikti të Gjykatës Kushtetuese. Në këtë klimë tensioni, Tirana gjendet mes akuzave, vakumit institucional dhe një lufte të hapur për kontrollin e pushtetit në kryeqytet. Më poshtë po pasqyrojmë një investigim të “BIRN” për këtë çështje.
Investigimi
Konkretisht “BIRN” shkruan se në një sallë të mbushur me banorë të Laprakës dhe Kasharit, deputetja socialiste Ogerta Manastirliu u ngjit në podium më 24 nëntor dhe udhëhoqi diskutimet për buxhetin e Bashkisë së Tiranës për vitin e ardhshëm. E shpallur si kandidate për kryebashkiake që prej shtatorit, Manastirliu foli sikur të ishte një kryetare e zgjedhur, drejtoi diskutimet me banorët dhe iu përgjigj pyetjeve të tyre, ndërkohë që përfaqësuesit zyrtarë të Bashkisë së kryeqytetit shërbyen si dekor përgjatë aktivitetit. Sjellja e saj si kryetare “de facto” gjatë diskutimeve për buxhetin e Tiranës u legjitimua nga kryeministri Edi Rama, i cili në një takim të parë tha se po e mbështesnin Bashkinë “që të bënte më të mirën” me Manastirliun në krye si drejtuese politike e qarkut dhe deputete e Tiranës. Megjithatë, kjo sjellje ka ngritur shqetësime për politizim të buxhetit lokal dhe ‘uzurpimin’ politik nga partia në pushtet të drejtimit të bashkisë më të madhe në vend, në kundërshtim me Kushtetutën e Shqipërisë, legjislacionin vendor si dhe Kartën Europiane të Vetëqeverisjes Vendore. Manastirliu është kandidatja e përzgjedhur e kryeministrit Edi Rama që kur qeveria vendosi të shkarkonte kryetarin e Bashkisë, Erion Veliaj, i cili ndodhet në qeli prej shkurtit të këtij viti i akuzuar për veprat penale të korrupsionit dhe pastrimit të parave. Veliaj e kundërshtoi në Gjykatën Kushtetuese vendimin e shkarkimit të qeverisë, duke sjellë si rrjedhojë pezullimin e dekretit të presidentit të Republikës për mbajtjen e zgjedhjeve në Bashkinë e Tiranës. Agron Haxhimali nga Instituti i Bashkive e sheh me shqetësim protagonizmin e Manastirliut në prezantimin e buxhetit të bashkisë Tiranë, duke e konsideruar këtë një politizim të buxhetit “që u përket qytetarëve”. “Manastirliu nuk mund të sillet si kryebashkiake ‘de facto’ e Tiranës dhe kjo periudhë tranzicioni nuk duhet të shfrytëzohet për kapital dhe qëllime kontrolli të qeverisë mbi bashkinë”, tha Haxhimali për BIRN. “Për buxhetet e bashkive duhet të jenë politikanët lokalë që të udhëheqin konsultimet, pasi ata do t a zbatojnë buxhetin dhe ata kanë përgjegjësi para qytetarëve”, shtoi ai. Edhe Ylli Asllani, kryetar i Shoqatës së të Zgjedhurve Vendorë, e dënon uzurpimin e pushtetit vendor në Tiranë, ndërsa e sheh këtë si pjesë të një presioni më të gjerë që kryeministri Edi Rama ushtron mbi pushtetin vendor. “Mbi këtë deformim të demokracisë vendore dhe ligjit, Manastirliu, i jep mandat vetes për të ushtruar kompetenca të të zgjedhurve vendorë, qoftë duke u shfaqur si ofruese e ‘karotës së projekteve’ pas dhunës dhe arrogancës së lartpërmendur,” tha Asllani. “Qëllimi është i njëjtë, denigrimi dhe uzurpimi i kompetencave të këshilltarëve bashkiakë dhe të kryebashkiakut të kryeqytetit,” shtoi ai. Manastirliu nuk iu përgjigj pyetjeve se në çfarë atributesh ligjore ajo i drejton këto takime dhe as kritikave të ekspertëve për ndërhyrje antiligjore në kompetencat e pushtetit vendor.
“Uzurpimi” i funksioneve vendore
Komandimi “de facto” i Manastirliut në krye të punëve të Bashkisë së Tiranës nuk është një rast i izoluar i ndërhyrjes së ekzekutivit në pushtetin vendor. Vetëm pak javë pas fitores së mandatit të katërt qeverisës në zgjedhjet e 11 majit, kryeministri Rama shpalli nismën për të “reformuar” administratën vendore të bashkive, duke diktuar tek kryetarët e bashkive shkarkimet e nëpunësve vendorë. I gjithë procesi i shkarkimeve dhe emërimeve të reja u monitorua në terren nga të deleguar të PS-së nëpërmjet grupeve të punës, të përbëra kryesisht nga drejtues politikë për qarqet dhe deputetë. Fushata e “dorëzimit” të bashkive në duart e Partisë Socialiste vijoi gjatë gjithë korrikut, me dorëheqje të drejtuesve vendorë pas kërkesave publike të Ramës dhe shkarkime masive në administratë, duke ngritur shqetësime për shkelje të autonomisë së pushtetit vendor të garantuar me Kushtetutë dhe personalizim i të gjitha pushteteve në një dorë në modelin e ‘partisë-shtet’. Duke iu referuar kësaj situate, Ylli Asllani e sheh situatën si alarmante dhe sugjeron që sjellja dhe roli i qeverisë është antiligjor, përfshirë edhe buxhetimin vendor. Sipas tij, qeverisja vendore ka ‘parlamentin’ e vet dhe çdo diskutim e rekomandim rreth buxhetimit me pjesëmarrje kryhet aty me pjesëmarrje dhe transparencë, ndërkohë që procesi është finalizimi i një diskutimi të gjatë të këshillave bashkiakë me administratën vendore, qytetarët, specialistët dhe kushdo tjetër që dëshiron të jetë kontribuues. “Qeveria nuk dëshiron të kuptojë se në Kushtetutën e Shqipërisë, projekt/buxhetet vendore i hartojnë njësitë vendore, i miratojnë Këshillat Vendorë dhe vetëm Parlamenti ka të drejtë t’i aprovojë pa hallka politike të ndërmjetme”, tha Asllani duke kritikuar përfaqësuesit politikë të partisë në pushtet për “uzurpim” të dialogut lokal për buxhetet. Sipas tij, e gjithë kjo shfaqje është një “farsë” dhe përtej propagandës, qeveria sërish vijon të mbajë të njëjtin nivel të ulët mbështetje buxhetore për pushtetin lokal. “Me 1% të PPB, buxheti i njësive vendore nuk mund të plotësojë shërbimet për qytetarët, apo të realizojë strategjitë kombëtare për luftimin e korrupsionit, frenimin e shpopullimit dhe nuk do të mund të zbusë varfërinë që ka prekur 70% të popullsisë të njësive vendore”, sugjeroi ai. Të njëjtin shqetësim ndan dhe Haxhimali, një kritik i vazhdueshëm i ndërhyrjeve politike në autonominë vendore, i cili apelon që politika qendrore duhet të bëjë kujdes sa i përket ndërhyrjeve në pushtetin vendor. “Nuk duhet të interferojë përveçse në rrugë ligjore të bashkëpunimit,” thekson Haxhimali, duke kërkuar nga ana tjetër dhe nga vetë drejtuesit e bashkive që të jenë në lartësinë e detyrës dhe “të mos lejojnë dhe lëshojnë autoritetin e tyre”.