11 Nëntor 2025
11:14
Alfred Lleshi
Rikthimi i Neymar me Santosin ka shkaktuar polemika në Brazil. Gjatë humbjes 3-2 ndaj Flamengos, sulmuesi, titullar për herë të parë pas dy muajsh, u tregua nervoz, mori karton të verdhë për protesta dhe kritikoi gjyqtarin në pushimin mes dy pjesëve.
Ai u irritua me shokët e skuadrës, përshkoi gjithë fushën për të ekzekutuar një goditje dënimi dhe reagoi keq ndaj zëvendësimit, duke u larguar nga fusha pa u ulur në stol. Kritikat nuk vonuan. Opinionisti Neto e akuzoi Neymar se mund ta tërheqë Santosin drejt rënies në Serie B. Kritika më e rëndësishme erdhi nga Vanderlei Luxemburgo, ish-trajneri i Real Madridit dhe Brazilit:
“Një lider i vërtetë nuk motivon vetëm me fjalë, por me veprime. Neymar duhet të tregojë talentin në momentet e vështira. Ankesa ndaj gjyqtarit apo largimi i irrituar nga fusha nuk e ndihmon ekipin. Duhet të luftosh deri në minutën e fundit, t’i mbështesësh shokët dhe ta kthesh frustrimin në energji kolektive”.
Neymar iu përgjigj indirekt duke postuar një foto enigmatike të Kobe Bryant në Instagram, simbol i vendosmërisë dhe forcës mendore.