Tag: lojtarin

Adriatik BALLA
Futbollisti më i mirë i të gjitha kohërave duket se nuk gjendet në mënyrë unanime, pasi përzgjedhja është pjesë e emocioneve të të gjithë atyre që pyeten për këtë temë. Një ikonë e Ligës së Kampionëve, i cili ka luajtur përkrah Lionel Mesit dhe Kristiano Ronaldos, duket se e ka ndryshuar mendimin e tij në debatin për lojtarin më të madh të të gjitha kohërave. Mesi dhe Ronaldo konsiderohen gjerësisht si dy prej futbollistëve më të mirë ndonjëherë, me një total prej 13 Topa të Artë dhe nëntë tituj të Ligës së Kampionëve.
Legjenda Deko është një nga ata pak lojtarë që ka pasur fatin të luajë me të dy ikonat e futbollit. Më herët, Deko e kishte përmendur Ronaldinjon si lojtarin “më të mirë” me të cilin kishte luajtur ndonjëherë. “Që në fillim, është e qartë që Leo dhe Kristiano janë më të mëdhenjtë,” kishte thënë Deko më parë. “Sidomos sepse askush nuk e mendonte që ata mund të luanin për kaq shumë vite në këtë nivel, por ai që më bëri më shumë përshtypje, edhe pse jo aq vendimtar, ishte Ronaldinjo.
Për mua, ai gjithmonë do të jetë më i miri. Momentet që kam jetuar me të janë të vështira për t’u krahasuar me ndonjë gjë tjetër. Ai ishte magjik”, theksoi ai. Por duket se Deko ka ndryshuar mendim. Duke folur për “BBC Match of the Day” për yllin e ri Lamine Jamal, drejtori sportiv i Barcelonës e bëri të qartë se kush e mban vendin e parë si “GOAT”-i i futbollit. Ish-mesfushori i Çelsit tha: “Lamine është Lamine. “Leo është Leo. Ai ishte lojtari më i mirë në historinë e këtij klubi dhe, për mua, lojtari më i mirë në histori”, nënvizoi ai më tej. Deko kaloi katër vite te Barcelona midis viteve 2004 dhe 2008, me Mesin që bëri debutimin e tij në ekipin e parë në tetor të vitit 2004.
Në vitin 2006, gjigantët katalanas fituan Ligën e Kampionëve, duke mposhtur Arsenalin 2-1 në finale. Paraqitjet mbresëlënëse të Dekos atë sezon bënë që ai të shpallej mesfushori më i mirë i UEFA-s. Megjithatë, Mesi nuk arriti të siguronte një vend titullari deri në sezonin 2006/07, kur shënoi 17 gola në të gjitha garat. Kjo bëri që periudha e Dekos te Barcelona të përkonte me fazat e hershme të ngritjes së Mesit në klub. Deko u largua në fund të sezonit 2007/08 për 10 milionë euro (8 milionë paund) për t’u bashkuar me Çelsin.
Ndeshjet e tij përkrah Ronaldos erdhën në nivel ndërkombëtar. Megjithëse Deko ka lindur në Brazil, ai e kaloi karrierën e tij të klubit duke luajtur për ekipe portugeze midis viteve 1997 dhe 2004. Si rezultat, ai plotësoi kriteret për të marrë shtetësinë portugeze, pasi kishte jetuar në vend për gjashtë vite, gjë që i mundësoi të përfaqësonte kombëtaren. Të dy, Ronaldo dhe Deko, debutuan me Portugalinë në vitin 2003.