Tag: lleshi

Prokuroria e Posaçme (SPAK) dyshon se një lokal i njohur në Myslym Shyri në Tiranë fsheh një sagë të përgjakshme hakmarrjeje si dhe një rrjet i pastrimit të parave që rrjedhin nga aktivitete të paligjshme. Rreth orës 6:30 të mëngjesit të premten, lokali u rrethua nga forca të shumta policore të repartit të ndërhyrjes së shpejtë, ndërkohë që hetuesit e Prokurorisë së Posaçme ushtruan kontrolle edhe më vonë gjatë ditës, duke urdhëruar shoqërimin e dy personave. Sipas burimeve të prokurorisë, kontrollet janë ushtruar në kuadër të hetimit ndaj pronarit të lokalit, A.Hoxha, 36 vjeç, i dyshuar si porositësi i rrëmbimit dhe vrasjes së të riut Klevis Lleshi pesë vjet më parë. Po ashtu, Hoxha po hetohet për pastrim parash që dyshohet se janë përfituar nga trafiku i narkotikëve. “Njerëzit shkonin dhe pinin kafe të qetë aty. Unë s’kam qenë asnjëherë”, tha me habi një banore e zonës, pasi mësoi arsyen e kontrollit policor. Të tjerë kureshtarë, kur shikojnë automjetet e policisë, pyesin se çfarë ka ndodhur dhe pasi marrin informacion, largohen duke ngritur supet. Disa prej punonjësve të dyqaneve përreth i thanë BIRN se kur kishin mbërritur në punë, rreth orës 08:00, policia gjendej aty.
Pastrim parash dhe vrasje
Hetimi i Prokurorisë së Posaçme për zbardhjen e vrasjes së Klevis Lleshit në vitin 2020 u krye në bashkëpunim me Europol, Eurojust, si dhe autoritetet ligjzbatuese të Francës, Italisë, Belgjikës, Holandës dhe Gjermanisë. Ndaj katër personave të proceduar rëndojnë akuzat “Vrasje me pagesë dhe për gjakmarrje”, përfshirë fshehjen e kufomës dhe mbajtjen pa leje të armëve të zjarrit; si dhe “Pastrimi i produkteve të veprës penale” përmes investimeve të dyshimta në Shqipëri dhe jashtë saj. Sipas SPAK, hetimet janë përqendruar tek disa shtetas shqiptarë të përfshirë në organizimin dhe realizimin e vrasjeve kundrejt pagesës të territorin e Shqipërisë. Prokuroria vlerëson se këta persona kanë vepruar në formën e grupit kriminal dhe disa prej anëtarëve dyshohet se kanë mundësuar injektimin e parave të përfituara në mënyrë të paligjshme në sistemin financiar shqiptar. Kjo është realizuar përmes investimeve me karakter dyshues, ndërkohë që një pjesë e parave është përdorur për rrëmbimet dhe vrasjet. Si organizator i grupit që merrej me pastrimin e parave akuzohet A.Hoxha, pronari i lokalit. Të ardhurat e kundraligjshme dyshohen se janë krijuar nga aktiviteti i kundraligjshëm i trafikimit të narkotikëve nga vendet e Amerikës së Jugut, drejt vendeve të Bashkimit Evropian dhe Shqipërisë. Këto të dhëna janë siguruar nga autoritetet ligjzbatuese të disa vendeve të Bashkimit Europian, si dhe nga analiza e komunikimeve në platformën e enkriptuar Sky ECC. “Nga ky aktivitet i paligjshëm dyshohet se janë krijuar të ardhura monetare të cilat kanë shërbyer për investime në aktivitete tregtare, pasuri të paluajtshme dhe pasuri të luajtshme, këmbimin apo transferimin e pasurive, me qëllim fshehjen ose mbulimin e origjinës së paligjshme të tyre, kryerjes së veprimeve financiare ose transaksioneve të copëzuara për shmangien nga raportimi, sipas legjislacionit për parandalimin e pastrimit të parave”, citohet në njoftimin e SPAK. Me të ardhurat e fituara nga pastrimi i parave të paligjshme, dyshohet se është sponsoricuar dhe vrasja e të riut Lleshi. Nga hetimet ka rezultuar se Klevis Lleshi është rrëmbyer dhe më pas ekzekutuar kundrejt vlerës së 50 mijë eurove. Në njoftim thuhet se vrasja e tij është kryer në shenjë hakmarrje për vrasjen e vëllait të A.Hoxhës në Mbretërinë e Bashkuar në vitin 2012. Si ndihmës dhe ndërmjetës për të realizuar vrasjen e Lleshit dyshohet të jetë shtetasi me inicialet S.K., ndërsa si ekzekutor shtetasi S.N. Policia ka ndaluar dy nga të dyshuarit, ndërsa një i tretë u arrestua në Itali. Ndërkohë, A. Hoxha me origjinë nga fshati Shqefën i Macukullit dhe me banim të mëvonshëm në Mamurras dhe Tiranë është shpallur në kërkim. Ndaj Hoxhës rëndojnë akuzat “Vrasje për gjakmarrje”, kryer në formë të veçantë të bashkëpunimit, atë të grupit të strukturuar kriminal; “Mbajtja pa leje dhe prodhimi i armëve, armëve shpërthyese dhe municionit”, kryer në bashkëpunim në formën e grupit të strukturuar kriminal; “Fshehja ose asgjesimi i kufomës”; “Grupi i strukturuar kriminal”; “Kryerja e veprave penale nga grupi i strukturuar kriminal dhe organizata kriminale”; si dhe “Pastrimi i produkteve të veprës penale ose veprimtarisë kriminale”, kryer në formë të veçantë të bashkëpunimit, atë të grupit të strukturuar kriminal. Sipas SPAK, dyshohet se ka dhe bashkëpunëtorë të tjerë të paidentifikuar.
Saga e vrasjeve për gjakmarrje
Në prill të vitit 2012, një prej djemve të familjes Hoxha, Agim Hoxha 25 vjeç u gjet i vrarë dhe i djegur në një automjet nga autoritetet ligjzbatuese britanike në afërsi të Southampton, një qytet port në jug të Britanisë. Atëherë u dyshua si autor Arben Lleshi nga Burreli, djali i xhaxhait të Klevisit, i cili u arrestua në Itali me kërkesë të autoriteteve britanike. Sipas një raportimi të BBC më 20 shkurt të vitit 2013, Arben Lleshi u dënua me burgim të përjetshëm, me një afat minimal prej 32 vitesh. Sipas deklaratave të atëhershme të hetuesit Scott Clarke, edhe pse nuk mund të dihej kurrë motivi i saktë i vrasjes 25-vjeçarit Hoxha me origjinë nga fshati Shtjefën i Macukullit, ata dyshonin se ngjarja kishte lidhje me përfshirjen në tregtinë e drogës. Vrasja e Agim Hoxhës është pasuar me vrasjen e katër anëtarëve të familjeve Lleshi dhe zhdukjen e një tjetri. Në tetor të 2013-ës u vra babai i Klevisit, Xhavit Lleshi dhe në maj të vitit 2016 u vra vëllai i këtij të fundit, Hajredin Lleshi. Në vitin 2017 u rrëmbye djali i Hajredinit, Artan Lleshi, i cili konsiderohet i zhdukur. Të njëjtin fat pësoi dhe  Klevisi në vitin 2020, por trupi i tij i pajetë u zbulua vetëm në vitin 2023 në fshatin Shpërdhet të Mamurrasit. Pas zhdukjes, nëna e Klevisit, Fatbardha Lleshi akuzoi familjen Hoxha për zhdukjen e djalit të saj. Në vitin 2023, u vra në burgun e Peqinit edhe Arben Lleshi, autori i vrasjes së Agim Hoxhës, pasi ishte ekstraduar në Shqipëri në vitin 2016.