Prokuroria e Lezhës kërkoi për herë të dytë pushimin e hetimeve, në lidhje me koncesionin e dhënë për ndërtimin e 4 hidrocentraleve në zonën e Kaçinarit në Mirditë. Sipas organit të akuzës nga hetimet e kryera pas kallëzimit të banorëve, nuk janë konstatuar elementë të veprës penale të “Shpërdorimit të Detyrës” dhe “Falsifikimit të dokumenteve”, siç pretendohej nga komuniteti.
Kërkesa për pushimit e hetimeve i është paraqitur gjykatës dhe po shqyrtohet nga gjyqtarja Iva Caca, e cila do të vendosë në lidhje me këtë çështje. Ndërkohë vendimi i prokurorisë nuk është pritur mirë nga banoret e zonës, të cilët thonë se organi i akuzës është bërë palë me paligjshmërinë, duke mos e hetuar këtë çështje.
“Ne jemi në këtë betejë prej 7 vitesh dhe për fat të keq, prokuroria është bërë palë me shkelësit e ligjit, në lidhje me këtë koncesion,” tha Gjon Pjetri, banor i Kaçinarit.
“Ne kemi bërë padi ndaj firmës koncesionare dhe Bashkisë Mirditë, për falsifikim dokumentesh dhe firmash të banorëve. Por pavarësisht detyrave të lëna nga gjykata në dy raste, prokuroria sërish ka ardhur me kërkesë për pushim, duke mos kryer asnjë veprim hetimor. Kemi dy herë që po dështojnë seancat, pasi mungon prokurori – dhe kjo është absurditet,” shtoi Pjetri.
Koncesioni për ndërtimin e 4 HEC-eve të vogla në zonën e Kaçinarit në Mirditë është dhënë në vitin 2018 dhe pas rinovimit të lejeve, Kompania “Shpërdhaza Energji”, ka nisur punën në tërren për zbatimin e këtyre projekteve.
Banorët e Kaçinarit paditën koncesionarin dhe zyrtarët e Bashkisë Mirditë që kishin dhënë lejet në Prokurorinë e Posaçme, por kjo e fundit regjistroi procedim penal për veprat e “shpërdorimit të detyrës” dhe “falsifikimit të dokumenteve” dhe ia transferoi çështjen Prokurorisë së Lezhës.
