Tag: largimi

Largimi i papritur dhe i pazakontë i Endri Fugës nga Shqipëria ka tronditur thellë rrethet e qeverisë socialiste dhe ka ndezur alarmin në zyrën e kryeministrit. Për shumë vite, Fuga ka qenë “eminenca gri” e Edi Ramës, njeriu i fshehtë që ka kontrolluar fijet e komunikimit politik dhe strategjitë mediatike të kryeministrit dhe Partisë Socialiste. Por kur hetimet e SPAK filluan të përfshijnë edhe emrin e tij në linja të dyshimta që lidhen me bizneset, tenderët dhe kompanitë fantazmë pranë Bashkisë së Tiranës dhe Erion Veliajt, situata u përkeqësua përtej çdo pritjeje.
Sipas burimeve të besueshme brenda PS-së, situata është aq e rëndë sa kryeministri Rama dyshohet se i ka dërguar një mesazh paralajmërues në Xhakarta pas arratisjes së Fugës. Mesazhi erdhi përmes një ndërmjetësi, shumë të afërt me të dy, dhe përmbante një paralajmërim të qartë: “Mbyll gojën dhe çdo gjë do të mbetet nën kontroll.” Ky urdhër joformal tregon frikën që mbizotëron në kryeqendrën e pushtetit, një frikë që mund të përmbytë edhe vetë kryeministrin nëse ecuria e hetimeve do dalë jashtë kontrollit.
Nga “hija” e Ramës në skenën e nxehtë të krizës
Fuga nuk ka qenë thjesht një zëvendësues i Ramës në komunikimin publik. Ai ka qenë menaxheri i heshtur i marrëdhënieve mes qeverisë, oligarkëve dhe pronarëve të mediave të lidhura me pushtetin. Me ndikim të madh mbi ministrat dhe emërimet, ai u bë një pikë referimi për shpërndarjen e tenderëve dhe kontrollin e medias. Por gjatë kohës, lidhjet e tij të vjetra me Erion Veliajn, Arbi Maznikun dhe grupin e ish-G99 krijuan dyshime se Fuga kishte nisur të punonte për skenarë të ndryshëm, përtej Ramës, që parashikonin një pushtet pas Ramës. Konflikti arriti kulmin në mars 2023, kur tensionet midis Ramës dhe Veliajt u përshkallëzuan, dhe Fuga u largua nga Kryeministria. Përgjimet e BKH-së në një lokal të njohur në Pazarin e Ri kapën biseda sekrete mes Fugës, Maznikut dhe bashkëpunëtorëve të Veliajt, ku diskutoheshin plane për tendera, sulme mediatike dhe ndarje fondesh, aktivitete që i provokuan nervozizmin e Ramës dhe i nxorën marrëdhëniet në sipërfaqe.
Alarmi në zyrën e Ramës dhe largimi drejt Xhakartës
Në momentin që informacionet përfshinin edhe emrin e kryeministrit në dosjet e SPAK, frika në zyrën e Ramës u shtua ndjeshëm. Fuga, duke parë presionin e rritur dhe situatën e pasigurt pasi Rama vazhdonte të shiste çdo bashkëpunëtor të tij, zgjodhi të largohej drejt Xhakartës, një vend pa marrëveshje ekstradimi me Shqipërinë dhe ku dyshohet se ka arritur të pozicionohet në një projekt këshillues të rrjetit të George Sorosit. Kjo lëvizje i siguron mbulim ligjor dhe mbrojtje politike që pak kush mund ta sfidojë.
Prapaskenat
Gjatë viteve pranë Ramës, Fuga kishte ndërtuar një pushtet të fortë, duke komanduar ministra, media dhe tenderë, duke u bërë një nga figurat kyçe në prapaskenë. Por fuqia e tij dhe lidhjet me grupin G99 – ku bënin pjesë emra si Erion Veliaj, Arbi Mazniku dhe Marinela Lika – krijuan tensione që përfunduan me përplasjen dhe largimin e tij në 2023. Përplasjet dhe urrejtja në raportin Rama-Veliaj, përshkallëzuan situatën, dhe Fuga u bë pjesë e kësaj lufte të brendshme, e cila shpesh përshkruhej si “luftë nën rrogoz”. Në përgjimet e SPAK ndaj Veliajt në burg Veliaj përmendi shpesh termin “flisni me redaktorin”, pa ia zbuluar emrin. Dyshohet se pas redaktorit qëndron vetë Endri Fuga.
Detajet
Në një kohë kur dosjet e SPAK po përfshijnë gjithnjë e më shumë njerëz në afërsi të kryeministrit dhe strukturave të qeverisë, largimi i Endri Fugës tregon se frika dhe pazaret e pushtetit janë në nivele të papara. Mesazhi i koduar i Ramës për të heshtur dhe largimi i Fugës në mërgim janë vetëm një kapitull i këtij konflikti të brendshëm, që mund të ketë pasoja të mëdha për të ardhmen e qeverisjes shqiptare. E ndërsa Fuga qëndron larg, në distancë të sigurt, kryeministri dhe rrethi i tij më i ngushtë janë të detyruar të jetojnë me frikën se një ditë, njeriu që për vite i ka mbajtur sekretet, mund të flasë dhe kur kjo të ndodhë, goditja nuk do të jetë e vogël.