Tag: lapaj

Opozita vijon të shfaqet e copëzuar në aksionin e saj politik. Arlind Qori ka njoftuar një tubim para Kuvendit nesër në orën 18:00, ku “Lëvizja Bashkë” synon të mbledhë qytetarët për të kërkuar më shumë përgjegjshmëri nga institucionet. Paralelisht, Adriatik Lapaj ka zgjedhur një formë proteste përpara Kryeministrisë, i ulur në një karrige dhe me çadra, ndërsa Sali Berisha vijon me “Foltoret” e tij të hënave. Këto lëvizje të ndara tregojnë edhe një herë mungesën e bashkimit brenda opozitës, teksa secila palë kërkon të imponojë kauzën e vet në skenën publike.
Paralajmërimi i Qorit
Arlind Qori, kryetari i Lëvizjes Bashkë theksoi se kjo protestë ka për qëllim rikthimin e Kuvendit në nivelin e duhur, atë të shërbimit të qytetarëve si dhe për të kërkuar shkarkimin e kryeministrit Edi Rama dhe të zv/ministres së pezulluar, Belinda Balluku. Duke marrë parasysh numrin e pakët të qytetarëve që së fundmi kanë marrë pjesë në protestat e organizuara nga partitë opozitare, Qori tha se asgjë nuk është e parealizueshme dhe se bashkimi i mijëra qytetarëve të enjten përpara Kuvendit, do të detyronte një pjesë të madhe të socialistëve të diskutonin vijimësinë e tyre në politikë. “Nuk me duket sikur rrogat e gjyqtarëve, ministra e deputetë janë përparësia e vendit tonë. Ditën e enjte në orën 18 Lëvizja Bashkë ka thirrur të gjithë qytetarët që të shkojmë tek Kuvendi i Shqipërisë, si institucioni më i rëndësishëm. Do të mblidhemi te Kuvendi për t’i kërkuar që të bëj detyrën në kushtet e një krize të madhe morale të qeverisjes, në kushtet e korrupsionit të gjithanshëm. Kuvendi duhet të votojë shkarkimin e Ramës dhe të Ballukut. Fundja Kuvendi ishte ai që i mandatoi këta abuzues. Nën presionin e qytetarëve kërkojmë që Kuvendi t’i shkarkojë. Nuk ka gjëra të parealizueshme nëse dhjetëra mijëra qytetarë i bashkohen kësaj proteste. Nëse të enjten mblidhen shumë qytetarë, të siguroj që Rama nuk do të ketë më shumicën parlamentare”, tha Arlind Qori. Teksa komentoi numrin gjithnjë e më të pakët të pjesëmarrësve në protestën e çdo të hëne të Berishës përpara kryeministrisë, Qori tha se Partia Demokratike është një parti e vdekur ndërsa tha se e njëjtë do të ishte dhe nëse Rama do të organizonte një miting. “Ne e kemi thirrur protestën të hënën paradite, si e vetja parti me reputacion moral për të thirrur protestë, do parti tjetër është pjesë e sistemit të pandershëm. Ne gjerat i planifikojmë dhe përpiqemi t’i realizojmë. Shumica e Ramës nuk është e shkruar në gurë. 83 deputetët janë 83 njerëz që nga një vesh i kap Rama dhe tjetrin e kanë bosh. Nëse në protestën e të enjtes do të marrin pjesë mijëra qytetarë, një pjesë e madhe e deputetëve të PS do të fillojnë të bëjnë llogari, ja vlen të rrimë në një varkë që po mbytet, apo të kërcej e të iki. Do të protestojmë në mënyrë periodike. Do ti tregojmë Shqipërisë sesi mund të bëhet një vend i jetueshëm ku nuk largohen 50-60 mijë të rinj në vit. Nuk më habit përmasa e protestës së PD se ajo është një parti e vdekur. Sikur dhe Rama të thërrasë një miting dhe mos të marrë njeri me dhunë nga administrata, përfundon dhe më keq se PD. Njerëzit janë të neveritur, e tregojnë zgjedhjet e fundit lokale”, tha Qori.
Protesta e Adriatik Lapajt
Nga ana tjetër Nisma “Shqipëria Bëhet”, e Adriatik Lapajt, ka nisur protestat përpara Kryeministrisë, kundër pushtetit që sipas tyre ka kapur gjithçka. Gjatë mbrëmjes së djeshme protesta është shoqëruar edhe më një përplasje mes forcave të policisë dhe Lapajt. Policia i ka kërkuar Lapajt që të largojnë karriget dhe çadrat të cilat kanë vendosur para godinës së Kryeministrisë për të qëndruar gjatë natës, ndërsa ky i fundit ka kundërshtuar. Adriatik Lapaj u shpreh se kjo sjellje e policisë është e papranueshme.  Erdhën forcat e policisë dhe bënë një sjellje barbare. Edi Rama t’i do japësh dorëheqjen se je kapur në flagrancë për vjedhjen e parave të shqiptarëve. Ne do të vëmë jo një çadër, por qindra”, u shpreh Lapaj. Ai tha se asgjë nuk do t’i ndal për të vijuar protestën. Ai ka bërë thirrrje që qytetarët ti bashkohen kësaj proteste. “Kur ne shohim punonjësit e policisë duhet që të shohim shtetin. Ishte sjellje e pabazuar në ligj dhe kjo gjë ne s’na ndal, as heqja e çadrave. Nuk na intimodojnë dot dhe as nuk na trembin dot, unë jam i qetë në këtë fazë por nuk është qetësia frikë, por respekt për uniformën. Ne do të vazhdojmë pa ndalim, kjo do të jetë protestë e gjatë dhe njerëzve i bëjë thirrje që të na bashkohen edhe në ditët na vazhdim”, tha ai. Lapaj qëndroi gjithë natën para Kryeministrisë. Kreu i Lëvizjes “Shqipëria Bëhet” u bëri thirrje qytetarëve që t’i bashkohen protestës së tij çdo ditë në orën 5 të pasdites për të protestuar kundër qeverisë.
A do të bashkohet opozita?
Për të bashkuar opozitën ka menduar Belind Këlliçi, i cili paralajmëroi se shumë shpejt opozita do të mbajë një protestë kombëtare. Po ashtu ai tha se i shtrin dorën çdo lëvizjeje që është kundër qeverisë Rama. “Kudo ku kam qenë kam dhënë dorën e bashkëpunimit. Arlind Qori është koherent në qëndrimet e tij, ka të njëjtin emërues kur vjen puna te debati dhe kundërshti ndaj Ramës. Për sa kohë Qori, Lapaj, Agron Shehaj, apo çdo drejtues tjetër i një forcë është në konflikt të hapur dhe është në oponencë e Ramën, jam pro bashkëpunimit. Do të bashkëpunoja dhe me zotin Braçe. S’mund të heq një paralele mes Ballukut dhe Majkos. Është mirë që zoti Arlind Qorri ka njoftuar të enjten një protestë, e Lapaj ka nisur një të tillë. Ne ende nuk e kemi thirrur një protestë kombëtare. Ai formati që ndodh para Kryeministrisë, është vetëm për një target të caktuar. Shumë shpejt do të kemi një protestë kombëtare. Por sa i përket planeve, apo dhe për realizimin e veprimeve të deputetëve apo dhe ngujimin tonë në Kuvend, ka një plan dhe hapa. Çdo gjë do të merret me hapa. Kemi një plan të qartë, që shihet deri përtej vjeshtës tjetër që duam të arrijmë”, tha ai dje në një studio televizive.