Tag: laertit

Në Gjykatën e Posaçme Kundër Korrupsionit dhe Krimit të Organizuar është mbajtur këtë të mërkurë seanca e dytë e dhënies së dëshmisë së bashkëpunëtorit të drejtësisë, Artan Tafani, i cili ka rrëfyer përfshirjen e tij në një sërë krimesh të rënda, në kuadër të grupit kriminal të drejtuar nga Laert Haxhiu.

Në vijim të dëshmisë së dhënë një javë më parë, Tafani ka detajuar për gjykatën mënyrën sesi është organizuar dhe realizuar vrasja e Albi Bashaliut.

Rrëfimi në gjykatë:

Tafani: Pasi mbaruam punë, nuk na ndezi makina Audi që kishim. Mora një Benz gri me targa greke.
Pasi kaluam Kavajën, çmontova armën. Në atë kohë kalonin edhe makina të tjera dhe nuk duhej të na shikonin teksa hidhnim pjesë të armës. Kur erdhëm në Tiranë, kemi lënë Benzin në Astir dhe, për të humbur gjurmët, kemi ecur në këmbë. Kemi marrë 30 mijë euro; na i solli i ati i Laertit, Qamil Haxhiu. Ato 30 mijë i kemi ndarë në tri pjesë: unë, Lulzim Arapi dhe Laerti.
Këto lekë i ka dhënë një person që e thërrisnin “Limi”. Para ngjarjes, Laerti komunikonte me të.
Pas një muaji, erdhën edhe lekë të tjera, dy herë nga 10 mijë euro. Na i solli Qamili, babai i Laertit. I ati i Laertit, Qamili, një herë në dy-tre muaj vinte tek ne dhe qëndronte disa ditë.

Prokurori Behar Dibra: Si jua ka prezantuar Laert Haxhiu viktimën, Albi Bashaliu, para vrasjes?

Tafani: Pasi ka komunikuar me Lorenc Lalën, na e ka shpjeguar edhe ne që do t’i bënim nder “Limit”.

Prokurori: Mund të na sqarosh kush janë çunat e vrarë?

Tafani: Di që ishin dy çuna që ishin vëllezër, Enriko Xhahysa dhe një tjetër. Më tha që i kishin vrarë babain.
Pasi ka folur Laerti me “Limit”, na ka çuar një video që kishte dërguar Enriko. Në video ishte një makinë, e cila ishte e viktimës. Pas videos, kam takuar Enrikon në qendër të Rrogozhinës, ku më priste që të më tregonte shtëpinë e viktimës.
Enriko kishte veshur një bluzë gri me kapuç. Hyri në makinë dhe u shtri.
U nisëm për në fshat, më tregoi lokalin, shtëpinë, dhe pak më lart kishte shtëpinë vetë Enriko. Nuk kam pasur takime të tjera.

Prokurori: Është përmendur emri i Laertit?

Tafani: Emri i Laertit nuk është përmendur. Enriko më ka thënë që është nipi i “Limit”, që është Lorenc Lala.

Tafani: Për vrasjen përdorëm dy makina: një Audi të bardhë dhe një Mercedes-Benz.
Makinën Mercedes-Benz e lamë te një dyqan që shiste lule, në autostradë. Në Gjocaj, ku kishte banesën viktima, shkuam me Audin e bardhë. Pas vrasjes, u larguam me makinën e viktimës deri te makina tip Benz dhe u nisëm për në Tiranë.
Makinën e viktimës e dogjëm, ndërsa gjatë rrugës çmontova edhe armën.

Tafani: Lili është krahu i djathtë i Sajmir Taullahut. Ai mbante lekët e të gjithëve – të Laertit, të Sajmirit, të gjithë të përfshirëve.

Audi i bardhë drejtohej nga Lulzimi, ndërsa unë kisha Benzin, derisa arritëm në Rrogozhinë. Më pas mora Audin, ndërsa Benzin e lamë aty që ta kishim për t’u kthyer.

Lulzimi kaloi pasagjer dhe unë isha në timon. Parkuam rreth 10 metra larg vendit ku ndodhi ngjarja. Viktima ka ardhur rreth orës 8 të mëngjesit. Audi ndodhej te garazhi i Elisjano Abedinit, ndërsa targat ishin të vjedhura – i kishte marrë Lulzimi në Tiranë.

Prokurori: Pas ngjarjes, u kthyet përsëri te Benz-i?

Tafani: U rikthyem me makinën e viktimës. Lulzimi ndezi Benzin dhe më priste. Audi nuk ndezi dhe e dogjëm në vendngjarje. E dogjëm sepse ashtu mendova në atë moment – kishim në makinë dy bidona me benzinë. Djegia e Audit në vendngjarje nuk ishte planifikuar; do ta digjnim atje ku kishim lënë Benzin.

Tafani: Për vrasjen blemë një pistoletë tip TT, për 1 milion lekë, te Bledar Berberi. Kishim më parë edhe një armë tjetër me fishekë shumë të vegjël, por ajo nuk u përdor në vrasje.
Fishekët e TT-së i mbaruam. Në momentin kur doli pronari i lokalit, nxora armën e vogël, thjesht për ta trembur.

Në drejtim të Bashaliut qëllova 6 herë. Mbaj mend që e qëllova dy herë në gjoks dhe katër herë në kurriz. /Raporton nga GJKKO – Fatjon Gjinaj