As 4 muaj pas zgjedhjeve të 11 majit, kryetari i Partisë Demokratike, Sali Berisha nuk e ka ende një përgjigje se sa i kushtoi kontrata me amerikanin Chris LaCivita, i cili me “strategjinë” e tij, dështoi ta rikthejë në pushtet në zgjedhjet parlamentare të 11 majit. Para SPAK, nga ku u paraqit për aferën “Partizani”, kreu i PD iu shmang dje pyetjeve që gazetarët i drejtuan për të mësuar se sa ka qenë fatura e kripur që i ka marrë Partisë Demokratike arkitekti i fitores së Donald Trump. Ish-kryeministri thotë se nuk shpenzuar asnjë qindarkë nga xhepi i tij, pasi si kryetar fushatën elektorale ia ka mbuluar PD. “Nuk them që s’kam deklaruar.
Deputetët po deklarojnë shpenzimet personale, sepse nga deputetët që kanë bërë fushata janë detyruar kanë shpenzuar me dhjetarë, qindra, mijëra euro. Berisha nuk ka shpenzuar asnjë qindarkë personale, sepse fushatën time e ka mbuluar PD. Çfarë shpenzimesh kam bërë unë, është bërë nga PD”, tha Berisha për gazetarët. Pra përmes kësaj deklarate Berisha vijon të fsheh paratë që u pagua LaCivita, pasi ka frikë nga drejtësia për origjinën e parave, ndërsa ia faturon Flamur Nokës skemën e financimit të lobimit, duke qenë se ai është Sekretari i Përgjithshëm i Partisë Demokratike dhe ka të drejtën e vulës dhe firmës. Por, insistimit të gazetarëve, Berisha iu shmang sërish duke thënë se për momentin KQZ u ka dërguar formularë vetëm deputetëve, të cilët kanë nisur me deklarimet.
“PD ka një ligj që përcakton afatin ligjor kur PD do deklarojë shpenzimet. PD do ti deklarojë çdo qindarkë. Cila është koha që përcakton ligji, këtë nuk të them. KQZ ka shpërndarë formularë për deputetë për të deklaruar shpenzimet, por jo partitë. Partitë, kanë një afat ligjor”, shtoi Berisha. Por, gjithsesi shifra e kontratës nuk mund të mbetet sekret. PD ka afat ta deklarojë në KQZ deri në 60 ditë pasi Kolegji Zgjedhor të vendosë përfundimisht për rezultatin e 11 majit, pasi PD ankimoi dje vendimin e Komisionit Rregullator që certifikoi rezultatin e zgjedhjeve.
Berisha akuza për zgjedhjet
Ndërkohë po dje kreu i opozitës, Sali Berisha, deklaroi në një konferencë për shtyp se opozita ndodhet para frontit më të gjerë dhe më të vështirë të betejës në historinë e saj. Ai akuzoi institucionet zgjedhore dhe KQZ-në se prej 20 marsit kanë marrë çdo vendim në favor të Partisë Socialiste, duke injoruar qindra dokumente për shkelje dhe krime elektorale. Berisha theksoi se edhe Kolegji Zgjedhor ka vepruar kundër opozitës, duke u treguar i bindur ndaj partisë në pushtet. Sipas tij, Shqipëria është kthyer në “kopshtin e Sorosit”, ndaj opozita duhet të angazhohet për rikthimin e votës së lirë dhe desorosifikimin e vendit. Ai shtoi se është inkurajues fakti që presidenti Donald Trump ka shpallur rrjetin e Sorosit organizatë kriminale dhe ka përcaktuar bazën ligjore për hetimin e tij.
“Siç keni konstatuar ju, nga data 20 mars gjer sot, çdo vendim i institucioneve të administrimit të zgjedhjeve është marrë në favor të PS. Nga 20 marsi gjer sot, të gjitha shkeljet e mëdha të ligjit, të gjitha krimet elektorale janë injoruar totalisht me gjithë qindra e mijëra dokumente zyrtare, janë injoruar nga narkopolicia, janë injoruar nga institucionet e shqyrtimit të ankesave, KQZ-ja, janë injoruar tërësisht nga Altin Troplini. Të gjitha. Çdo vendim i atij që quhet Kolegj Zgjedhor ka qenë kundër opozitës. Megjithatë, thjesht dhe strikt për procedurë, ne kemi paraqitur rastet në Kolegj, të bindur se ai do i qëndrojë me besnikëri të madhe partisë shtet. Opozita ndodhet para frontit më të gjerë dhe më të vështirë të betejës në tërë ekzistencën e saj. Ajo duhet të bëjë çdo përpjekje për rikthimin e votës së lirë tek shqiptarët dhe desorosifikimin e Shqipërisë.
Nuk ka vend tjetër në Europë dhe në botë që të jetë shndërruar në kopshtin e Sorosit si Shqipëri. Prandaj një front i dytë, por kësaj here ne jemi të inkurajuar dhe vlerësojmë faktin se për herë të parë në histori, presidenti Donald Trump i shpall këta persona dhe rrjetin e tij organizatë kriminale. Dhe ka përcaktuar edhe aktin ligjor mbi të cilin ata do të hetohen”, nënvizoi dje Berisha.
