Në zgjedhjet e 11 majit për qarkun e Durrësit, janë vjedhur votat brenda Partisë Demokratike dhe duhet bërë transparenca, vendosur një precedent dhe standard, duke ndryshuar edhe Kodi Zgjedhor.
Nga verifikimet e deritanishme të 10% të kutive nga filmimet që posedon, janë evidentuar 39 kuti me probleme të ndryshme, ndaj kërkon rinumërimin e mbi 500 kutive në Durrës dhe 84 të tjerave të diasporës.
Kalaja theksoi se beteja e tij ishte për transparencë dhe jo personale, për të vendosur një standard, sepse “nuk është ushtar rreshti” dhe i del partisë edhe përballë kur ka probleme. Gazetari që është përfshirë në politikë, nënvizoi se ka ardhur koha që në PD të hapin krahun shumë njerëz pas dështimit në zgjedhje, por pa e përmendur kryetarin Sali Berisha në emër, nëse edhe ai duhet të largohej.
“Jam kandidati i parë që kam kërkuar rinumërimin pa u shpallur ende rezultati nga KQZ, që më 14 maj, sepse kam pasur objeksionet e mia fillimisht me një qendër votimi. KAS bëri interpretimin e tij dhe nga shqyrtimi e këqyrja e mëvonshme rezultoi se unë e kam parë më pas se ka pasur lëvizje si mes partive, ku PS i ka marrë PD, por edhe brenda partisë, PD-së në këtë rast. Unë kam dyshimet e mia dhe këto prova i kam dorëzuar. KAS e ka pranuar kërkesën e depozituar për shqyrtim dhe tani pritet verifikimi i tyre. Kam prova me video kur vota ime devijojet”, e nisi fjalën e tij kandidati Kalaja në një studio televizive
Ai theksoi se gara e tij nuk është betejë për mandatin e deputetit, por për transparencë dhe për të vendosur një precedent, që votat të mos vidhën më dhe që kandidatët të kenë të drejtën e përfaqësimit në ankimime, njëlloj si partia, duke sugjeruar ndryshimin e menjëhershëm të Kodit Zgjedhor në këtë nen që krijoi edhe debate të forta në KAS.
“Unë nuk e kam nisur betejën për mandatin tim, por për garën, transparencën dhe për të vendosur një standard për herë të parë, sepse do vijnë edhe zgjedhjet e ardhshme. Në politikë kam hyrë për disa kauza dhe jo për rrogën e deputetit, sepse atë e marr edhe si gazetar. Kodi Zgjedhor thotë se duhet të ankimojë subjekti, beteja ime është që të ndryshojë kjo pikë e Kodit, që të shqyrtohet edhe ankimimi i kandidatit. Unë nuk u konsultova me partinë, ishte iniciativë e imja, pas meje edhe Ilir Alimehmeti. Kur na thanë se duhej përfaqësimi nga partia, kam hyrë në diskutime me PD-në që të vihej në lëvizje për transparencë. Më tej iu kërkua edhe Partisë së Ballit Kombëtar Demokrat që ishin pjesë e koalicionit tonë që të përfshihej në përfaqësim. Të kenë të drejtë edhe kandidatët përveç partisë për ankimim. Kjo parti vuri në lëvizje KAS-in dhe më pas edhe ajo e Legalitetit u bashkua për këtë qëllim dhe jam legjitimuar nëpërmjet saj”, shpjegoi gazetari Kalaja, i cili tashmë i ka hyrë politikës për të përfaqësuar aktualisht qytetarët e krujës dhe Fushë-Krujës.
Ai shpjegoi edhe procesin e verifikimit që ka bërë deri tani, ku nënvizoi se ka gjetur problematika, deri në transferimin e votës dhe për këtë qëllim ka kërkuar hapjen dhe rinumërimin e mbi 500 kutive në Durrës dhe të 84 kutive të diasporës.
“U kërkua edhe metodologjia e provave, që të mbahej shënim vota dhe të caktohej procesverbali me shënim. Rusmali kërkoi përmbledhjen e këtyre në 1 minutë, që është e vështirë dhe unë e kam bërë këtë, pavarësisht. Deri tani kam parë 60 kuti, nga të cilat 39 janë me probleme, teksa Durrësi ka mbi 500 kuti. Unë kam parë 10% të kutive deri tani. Madje ka pasur medhe probleme ku PS merr vota të pavlefshme. Ka edhe vota të një kandidati me pak vota që i është marrë nga numëruesit, se janë parë si të dobët. PD ka kërkuar edhe transparencë, ka kërkuar hapjen e kutive, atë që kërkoj dhe unë, e në parim jemi me një objektiv të përbashkët. Debati në KAS ka qenë më shumë juridik”, shpjegoi Kalaja .
Pyetjes nëse PD-ja po ruante komisionerët duke mos i përfaqësuar në ankimime për rinumërim votash, pasi rrezikojnë burgun, kandidati iu përgjigj se ai ndodhet vetëm 1 mijë vota larg mandatit dhe kërkon transparencë dhe standard.
“Unë nuk e di a hyjnë apo jo në burg, por kur nisa fushatën u kam premtuar qytetarëve që do e ruaja votën e tyre. Unë kam 8100 vota, me një diferencë me 1 mijë vota nga fituesi i këtij mandati (Arjan Ndoja). Por beteja ime tani është çështja e përfaqësimit, që të jemi palë në përfaqësim dhe ndaj kam edhe gjyqin dhe do e çoj deri në Kushtetuese, më 12 qershor kam seancën e radhës. Ndaj edhe Venecia e ka vendosur që të përfaqësohen edhe kandidatët dhe kjo duhet të përfshihet edhe në Kodin Zgjedhor. Beteja ime është për të vendosur një precedent dhe përtej emrit të Aulonit. Mund ta fitojmë edhe në Kolegj, por rruga do shkojë deri në Kushtetuese. Me rëndësi është që jam pranuar si palë përfaqësuese dhe kam kërkuar që të rinumërohen. Mendoj se do procedohet si Tirana, Durrësi ka mbi 500 kuti. Kam kërkuar edhe rinumërimin e 84 kutive të diasporës”, tha kandidati i PD-së.
Kalaja pretendoi se pati manipulim dhe blerje votash, përdorim të patronazhistëve dhe administratës nga pushteti, apo çështja e bonusit të pensioneve dhe faljes së gjobave, për të cilat ka bërë denoncim edhe në KAS. Ai kritikoi edhe Prokurorinë e Posaçme për mosveprimin në kohë, duke kujtuar operacionin e Durrësit pas zgjedhjeve.
“Fushata është një masakër elektorale, madje edhe zjghedhjet. Falja e gjobave para zgjedhjeve është kriminale. Ka pasur manipulim dhe blerje të votës. Pati edhe tutorë votash, morën deri në 21 mijë vota preferenciale pa kontribut publik. Janë mandate me flamur të kuq. Ai kaloi e edhe shefin e tij të qeverisë me vota këto zgjedhje në qarkun ku kandidova edhe unë, në Durrës. SPAK-u nuk veproi në kohë reale, sidomos në qarkun ku kandidova unë, në Durrës, që pas zgjedhjeve u godit menjëherë grupi që ndihmoi kandidatët e PS-së atje. Si ka mundësi që ky njeri (Arkend Balla) merr më shumë vota se Edi Rama? Ndaj pritet më shumë nga intelektualët dhe media për të reaguar. Cilësia e Parlamentit duhet të rritet, ndaj bëhet kjo betejë. Rama është strateg politik, di ta bëjë strategjinë dhe e ndryshon, por një gjë nuk e ndryshon dot, lidhjen me krimin. Por unë i bëj sfidë edhe PD-së, shpesh nuk i shkoj edhe pas partisë në çdo gjë, i kam dalë edhe kundër”, tha kalaja.
Ai kujtoi se nuk është ushtar rreshti, por i del kundër Partisë kur e ka gabim, teksa u shpreh se ishte kundër Komisioneve Parlamentare dhe pro denoncimit të farsës zgjedhore në arenën ndërkombëtare, por pa e dëmtuar integrimin e Shqipërisë në BE.
“Nuk jam unë “ushtar rreshti”, unë kërkoj votat e mia. Puna është se duhet bërë një Kod tjetër zgjedhor, duhet ndryshuar, sepse edhe ata numëruesit dhe komisionerët u torturuan atje 9 ditë, ata janë heronj, pavarësisht se çfarë ka ndodhur. Unë jam kundër Komisiobeve hetimore Parlamentare, jam pro rrugës së Uashingtonit dhe Brukselit, me denoncim të zgjedhjeve, sepse Ramës me komisione nuk ia mbush dot mendjen. Do vijë një mision faktmbledhës këtu, asgjë e keqe nuk ndodh nga transparenca. Unë nuk jam kundër integrimit të Shqipërisë në BE, por jam për transparencë”, vijoi ai.
Në fund kandidati demokrat, që aktualisht përfaqësohet ligjërisht në ankimim nga Partia e Legalitetit në KAS, teksa iu pranua ankimimi për shqyrtim, vuri theksin edhe te analiza e brendshme në PD për dështimin zgjedhor, rezultatet e dobëta dhe mbajtjen e përgjegjësive.
“Shumë njerëz në PD duhet të hapin krahun pas dështimit në zgjedhje dhe analizës që do bëhet pas betejës juridike. Duke filluar edhe nga vetja ime, të shikohet edhe rezultati nëse është i duhuri. Edhe ata që kanë humbur në kutitë e veta duhet të mbajnë përgjegjësi. Unë do jap njëherë shembullin tim, pastaj të tjerët. Unë jam kundër idhujve dhe kultit të individit. Në lidhje me strategjinë e koalicionit dhe Berishës për fushatën duhet pyetur ai nëse duhet të dilte si kandidat për kryeministër apo jo”, përfundoi Kalaja.
