Tag: kuqezi

Adriatik BALLA
Mbrojtësi dhe njëherësh kapiteni i përfaqësueses kuqezi, Berat Gjimshiti, doli dje së bashku me trajnerin Silvinjo në konferencën për shtyp dhe dha mendimet e tij për këtë sfidë, por u tregua optimist për realizimin e fitores në duelin me Andorrën, një rivale që shpesh u hap punë edhe skuadrave të mëdha. “Sigurisht që kemi ardhur këtë për një qëllim, të gjithë, për 3 pikë sepse na nevojiten për kualifikueset dhe çfarë kemi mësuar, sigurisht kemi parë ndeshjet e Andorrës në vend të tij me Serbinë dhe Anglinë, që i ka vendosur në vështirësi. Prapë ne do luajmë futbollin tonë, do jemi me vetbesim të madh për 3 pikë. Të respektojmë kundërshtarin, do jenë momente të vështira për 90 minuta, por duhet të jemi mendërisht të fortë që t’i përballojmë të gjitha. Jam shumë i lumtur dhe krenar për 300 ndeshje me Atalantën. Ndeshja shumë e rëndësishme, siç gjithmonë është ndeshja e radhës. Sigurisht momentet që kemi, jemi të mirë, do hyjmë për maksimumin dhe 3 pikë, që të vazhdojë ëndrra. A e kam menduar sfidën e parë? Nëse me pyesnit para 10 viteve, jo, nëse do më pyesnit pak më parë po. Besoj te mundësitë që futbolli jep. Çdo gjë është e arritshme dhe pse jo të provosh”, tha Gjimshiti.
Ardhja e të rinjve e forcoi ekipin
I pyetur se çfarë e bën më të efektshme skuadrën ku ai është kapiten, Gjimshiti shtoi se janë prurjet e reja që kanë rritur cilësinë e grupit. “Mundësitë për lojtarët që kemi me cilësi, besoj kanë ardhur të rinj, të fortë dhe të talentuar. Kanë vendosur trajnerin më shumë në vështirësi, për ekipin është më e thjesht. Sigurisht që kualiteti është rritur në disa aspekte, është mbajtur grupi dhe besoj është gjëja më e rëndësishme që kemi ne”, nënvizoi ai. Më tej Gjimshiti u pyet nëse mund të shënonte një gol në këtë sfidë. “Sigurisht që unë si mbrojtës pothuajse në çdo lojë futem për të mos pësuar gol, por nëse më vjen rasti pse jo. E kisha një rast me Letoninë, nesër nëse më vjen mundësia do jap gol. Për mua gjëja më e rëndësishme ekipi, që të fitojmë”, shtoi ai.
Mesazhi për tifozët
Në fund Gjimshiti e ka një mesazh për tifozët, duke dashur që të jenë një shtytje më shumë drejt realizimit të objektivave dhe ku ai shpreson që ekipi t’i bëjë të lumtur. “Si gjithmonë, kur dëgjova që do jetë plot me tifozët tonë të jep një shtyrje akoma më shumë. Besoj se mesazhi që do japim gjithmonë ne, është falenderues. Ajo që ne mund të bëjmë është të japim maksimumin në fushë dhe ata jashtë, shpresojmë t’i bëjmë të lumtur pas ndeshjes. Besoj do ia arrijmë”, theksoi në fund kapiteni i skuadrës sonë kombëtare, i cili llogaritet si një nga lojtarët më të qëndrueshëm në ekipin kuqezi dhe me performancë të lartë dhe me Atalantën e tij.
Shorti i Botërorit më 5 dhjetor
Tërheqja e shortit për Kupën e Botës 2026 do të zhvillohet të premten, më 5 dhjetor, në Kenedy Center në Uashington DC, në orën 17:00 GMT (12:00 ora lokale). Do të jetë Kupa e Botës më e madhe deri tani, me 48 kombëtare që do të marrin pjesë – një rritje e numrit të ekipeve nga 32 sa ka qenë më parë. Të tre vendet nikoqire kualifikohen automatikisht, ndërsa kombëtaret nga konfederatat e tjera do të kenë ndeshjet e tyre kualifikuese. Gjithashtu, në ditën e tërheqjes, presidenti i FIFA-s, Gianni Infantino, do të japë FIFA Çmimin për Paqe për herë të parë. Kupa e Botës 2026 do të zhvillohet në SHBA, Meksikë dhe Kanada, nga 11 qershori deri më 19 korrik.