Lajmidites.com

Tag: kremlini

  • Kremlini ‘hedh poshtë’ Kremlinin: Nuk e kemi refuzuar të gjithë planin e SHBA-së

    Kremlini ‘hedh poshtë’ Kremlinin: Nuk e kemi refuzuar të gjithë planin e SHBA-së

    Kremlini i mohoi raportet që mbushën mediat botërore sipas të cilave pesë orë bisedime me të dërguarin e posaçëm të SHBA-së, Steve Witkoff nuk mjaftuan për ta bindur Vladimir Putinin për planin 28 pikësh të paqes me Ukrainën, për miratimin e të cilit Shtetet e Bashkuara janë angazhuar maksimalisht

    Në Moskë tani thonë se është gabim të pretendohet se Vladimir Putin hodhi poshtë të gjithë pjesët e planit amerikan që synon fundin e konfliktit.
    “Nuk do të ishte korrekte të thuhej se Presidenti Putin hodhi poshtë propozimet e SHBA-së për paqe gjatë bisedimeve me Steve Witkoff dhe Jared Kushner.  Dje ishte hera e parë që u zhvillua një shkëmbim i drejtpërdrejtë mendimesh. Diçka u pranua, diçka u shënua si e papranueshme. Ky është një proces normal pune dhe një kërkim për kompromis”, tha Dmitry Peskov.
    Peskov refuzoi sakaq të zbulonte ndonjë detaj të negociatave. “Ekziston një lloj mirëkuptimi se sa më të rrethohen me qetësi të tilla bisedime, aq më produktive janë ato. Ne do t’i përmbahemi këtij parimi dhe shpresojmë që edhe homologët tanë amerikanë ta bëjnë këtë, ishte komenti i tij. Deklarata e zëdhënësit të Kremlinit erdhi pak pas pohimeve të kreut të NATO-s, Mark Rutte, sipas të cilit Rusia po përgatitet për një përballje afatgjatë. Këtë, Rutte e bëri të qartë edhe në tryezën e rrumbullakët që ministrat e jashtëm të aleancës zhvilluan me urgjencë.
    “Rusia vazhdon të testojë aftësinë tonë parandaluese. Duhet të kuptojmë të gjithë se po përballemi me rreziqe reale dhe afatgjata. Rusia ka shkelur hapësirën ajrore të aleancës me avionë dhe me dronë, ka kryer sabotime e ka dërguar anije spiune në ujërat e saj. Të gjitha këto veprime janë të pamatura dhe të rrezikshme”, tha ai.
    Rutte shtoi se Rusia po “punon ngushtë” me Kinën, Korenë e Veriut dhe Iranin “për të dëmtuar shoqëritë tona dhe për të shkatërruar rregullat globale”. Vendet e NATO-s po “rrisin investimet në mbrojtje, por të gjithë duhet të kontribuojmë”, theksoi ai.

    Top Channel

  • Kremlini shton presionin, Putin urdhëron gatishmëri të plotë për luftë edhe gjatë dimrit

    Kremlini shton presionin, Putin urdhëron gatishmëri të plotë për luftë edhe gjatë dimrit

    Teksa vizitonte një qendër komande për trupat e angazhuara në konfliktin në Ukrainë, Presidenti rus Vladimir Putin tha se forcat e Moskës duhet të përgatiten për të vazhduar luftimet edhe gjatë dimrit.

    “Putin,” shkroi Kremlini në kanalin e tij Telegram, “falënderoi komandantët dhe personelin e njësive për operacionet e tyre të suksesshme dhe vendosi qëllimin për të siguruar që forcat ruse të kenë gjithçka që u nevojitet për të kryer operacione ushtarake edhe gjatë dimrit.”

    Top Channel

  • Putin do të vizitojë Indinë për herë të parë që nga fillimi i luftës

    Putin do të vizitojë Indinë për herë të parë që nga fillimi i luftës

    Kremlini njoftoi se Vladimir Putin do të vizitojë Indinë javën e ardhshme me ftesë të kryeministrit Narendra Modi.
    Do të jetë vizita e parë e udhëheqësit rus në vend që nga viti 2021.
    Kremlini thotë se vizita, që zgjat nga 4-5 dhjetori, “është me rëndësi të madhe, pasi ofron një mundësi për të diskutuar të gjithë fushëveprimin e gjerë të partneritetit strategjik të veçantë dhe të privilegjuar Rusi-Indi”.

    Putin do të takohet me Modin dhe presidentin indian Droupadi Murmu, dhe pritet të bëhet një deklaratë e përbashkët.
    Ministria e Jashtme e Indisë shton në një deklaratë se udhëtimi do t’u japë Nju Delhit dhe Moskës një shans për të “shkëmbyer pikëpamje mbi çështjet rajonale dhe globale me interes të ndërsjellë”.
     

  • Kremlini shpreson për takimin Putin-Trump dhe diskuton shkëmbimin e të burgosurve me Ukrainën

    Kremlini shpreson për takimin Putin-Trump dhe diskuton shkëmbimin e të burgosurve me Ukrainën

    Kremlini tha të martën se shpresonte që një samit midis Presidentit rus Vladimir Putin  dhe Presidentit të SHBA-së Donald Trump të mund të zhvillohej sapo të përfundojnë përgatitjet e nevojshme.
    Putin dhe Trump u takuan për herë të fundit në Alaska, ku nuk arritën të merrnin një vendim për luftën në Ukrainë.
    Ata njoftuan planet për një samit në Budapest muajin e kaluar, por Trump i anuloi.

    Duke informuar gazetarët, zëdhënësi i Kremlinit, Dmitry Peskov, tha gjithashtu të hënën se Moska e shihte shumë negativisht një projektligj që Trump tha se po hartohej nga republikanët në Shtetet e Bashkuara dhe që do të vendoste sanksione për çdo vend që bën biznes me Rusinë.
    Peskov tha gjithashtu të martën se diskutimet po vazhdonin mbi një shkëmbim të mundshëm të të burgosurve me Ukrainën, por nuk pranoi të jepte detaje të mëtejshme.
    Palët ndërluftuese kanë kryer disa shkëmbime të të burgosurve që nga shkurti i vitit 2022, kur Rusia dërgoi mijëra ushtarë të saj për të pushtuar Ukrainën./vizionplus.tv

  • Misteri mbi ministrin e Jashtëm rus/ A e ka dëbuar Putini aleatin e tij më të ngushtë nga Kremlini?

    Misteri mbi ministrin e Jashtëm rus/ A e ka dëbuar Putini aleatin e tij më të ngushtë nga Kremlini?

    A e ka dëbuar Putini aleatin e tij më të ngushtë nga Kremlini? Kjo është tema më e nxehtë politike në Rusi, por edhe në vendet perëndimore.

    Spekulimet mbi një ndryshim prapa skenave në Kremlin u ndezën javën e kaluar pasi Sergei Lavrov, ministri i jashtëm i Rusisë, ishte i vetmi anëtar i përhershëm i këshillit të sigurisë që mungonte në seancën e së martës së kaluar.
    Duke shtuar misterin, Lavrov u la gjithashtu jashtë delegacionit të Rusisë në samitin e ardhshëm të G20 në Afrikën e Jugut, me një zyrtar më të ulët të emëruar në vend të tij.
    Analisti ushtarak, Profesor Michael Clarke, thotë se zhdukja e Lavrovit nga ngjarjet ‘live’ të Kremlinit “nuk do të thotë se ai është i izoluar diku”, vetëm se ai është “larg syve të njerëzve”.
    Ai e krahason situatën me Valery Gerasimov, ish-shefin e shtabit të ushtrisë ruse, i cili u fajësua për inkursionin e Ukrainës në Kursk në vitin 2024 dhe më pas u shkarkua.
    “Kremlini përdor shumë klipe të vjetra për të pretenduar se njerëzit janë përreth kur ata nuk janë – Gerasimov nuk është parë në një paraqitje të verifikuar drejtpërdrejt që nga prilli, dhe Lavrov nuk është parë në një paraqitje të verifikuar drejtpërdrejt për disa javë tani.

    Top Channel

  • “I dëgjojmë duke folur në front”, Kremlini kërcënon luftëtarët e huaj në Ukrainë

    “I dëgjojmë duke folur në front”, Kremlini kërcënon luftëtarët e huaj në Ukrainë

    Kremlini ka deklaruar se trupat ruse dëgjojnë vazhdimisht gjuhë të huaja të folura nga ata që luftojnë për Ukrainën në vijën e frontit dhe ka paralajmëruar se do t’i “shkatërrojë” ata.
    Zëdhënësi i Kremlinit, Dmitry Peskov, i bëri këto komente në përgjigje të një pyetjeje lidhur me një raport të agjencisë së inteligjencës së jashtme ruse SVR, e cila thotë se Franca po përgatitet të dërgojë një kontingjent ushtarak prej 2 mijë ushtarësh dhe oficerësh në Ukrainë.
    Siç shkruan SKY News, Peskov gjithashtu pretendoi se Rusia nuk mund të vlerësojë ecurinë e negociatave për paqe me Ukrainën, pasi Kievi i ka pezulluar ato dhe nuk është i gatshëm të përgjigjet ndaj pyetjeve të Moskës.
    Vullnetarë të huaj kanë luftuar në të dyja anët e konfliktit mes Rusisë dhe Ukrainës.
    Sipas vlerësimeve të Ukrainës dhe Koresë së Jugut, më shumë se 10 mijë trupa koreano-veriore janë dërguar për të luftuar në anën ruse në këmbim të ndihmës ekonomike dhe teknologjisë ushtarake.
    Agjencia e inteligjencës së Koresë së Jugut vlerësoi në shtator se rreth 2 mijë ushtarë koreano-veriorë janë vrarë.
    Po ashtu, Sky News raporton se politikanët rusë kanë miratuar një projektligj që detyron thirrjen ushtarake gjatë gjithë vitit, jo vetëm në vjeshtë dhe pranverë, ndërsa forcat e armatosura synojnë të plotësojnë radhët e tyre.
    Projektligji duhet tani të shqyrtohet nga dhoma e lartë dhe të nënshkruhet si ligj nga presidenti Vladimir Putin. Ky projektligj do t’i lejojë oficerët të thërrasin rekrutët për ekzaminime mjekësore dhe procedura të tjera në çdo kohë të vitit.
    Autorët e ligjit thonë se masa synon të lehtësojë presionin mbi zyrat e thirrjes ushtarake dhe të rregullojë aktivitetet e tyre, që përfshijnë kryerjen e kontrolleve fizike dhe caktimin e rekrutëve në degë të ndryshme të ushtrisë. Ligji parashikon se rekrutët do të hyjnë në shërbim ushtarak vetëm gjatë disa muajve të pranverës dhe verës, ashtu si më parë.

  • Putini drejton stërvitjen bërthamore, Rusia teston raketën balistike ndërkontinentale

    Putini drejton stërvitjen bërthamore, Rusia teston raketën balistike ndërkontinentale

    Rusia tregon forcën duke kryer një stërvitje të madhe që përfshinte armë bërthamore, një ditë pasi Shtetet e Bashkuara njoftuan një vonesë në planet për një samit të dytë midis presidentëve Vladimir Putin dhe Donald Trump. Kremlini publikoi një video që tregonte Gjeneralin Valery Gerasimov, kreun e Shtabit të Përgjithshëm, duke i raportuar Putinit mbi stërvitjet. Ato përfshinin lëshime praktike të raketave balistike ndërkontinentale, të cilat janë të afta të godasin Shtetet e Bashkuara. 
    Kremlini njoftoi të mërkurën se një raketë balistike ndërkontinentale Yars u lançua nga vendi i lëshimit Plesetsk në Rusinë veriperëndimore si pjesë e manovrave. 
    Përveç kësaj, një tjetër raketë balistike ndërkontinentale u testua nga një nëndetëse në Detin Barents. Në ushtrime morën pjesë edhe bombardues strategjikë Tu-95, që qëllonin raketa lundrimi me rreze të gjatë veprimi. Kremlini tha se stërvitja ishte hartuar për të testuar aftësitë e strukturave të komandës ushtarake. Shefi i Shtabit të Përgjithshëm Valery Gerasimov i tha Putinit nëpërmjet një lidhjeje video se stërvitjet kishin për qëllim të simulonin “procedurat për autorizimin e përdorimit të armëve bërthamore”. Presidenti theksoi se manovrat ishin planifikuar paraprakisht. 
    Në momente kyçe të luftës në Ukrainë, Putin ka lëshuar shpesh kujtesa për fuqinë bërthamore të Rusisë si një sinjal paralajmërues për Kievin dhe aleatët e saj në Perëndim. NATO gjithashtu ka kryer ushtrime parandaluese bërthamore këtë muaj. Putin dhe Trump folën javën e kaluar dhe ranë dakord të mbanin një samit në Hungari që Kremlini tha se mund të zhvillohej brenda disa javësh. 
    Por pas një telefonate të hënën midis diplomatëve më të lartë të të dy vendeve, Shtëpia e Bardhë tha të nesërmen se Trump nuk kishte plane për t’u takuar me Putinin “në të ardhmen e afërt”. Trump tha se nuk donte të kishte një takim të çuar dëm – diçka që Moska gjithashtu thotë se dëshiron ta shmangë. 

  • Kremlini zbulon qëllimin e takimit Putin–Trump ne Hungari: Marrëveshja e paqes në fokus

    Kremlini zbulon qëllimin e takimit Putin–Trump ne Hungari: Marrëveshja e paqes në fokus

    Kremlini shpreson se takimi i ardhshëm në Hungari midis presidentëve të Rusisë dhe Shteteve të Bashkuara, Vladimir Putin dhe Donald Trump, do të çojë përpara një marrëveshje paqeje me Ukrainën.
    Kështu deklaroi zëdhënësi Dmitry Peskov, duke theksuar se “qëllimi kryesor është të bëhet përparim drejt një marrëveshjeje paqeje”.
    Peskov shtoi se Moska synon ta përdorë takimin “për të diskutuar marrëdhëniet dypalëshe me Uashingtonin”.
    “Po zhvillohet një punë serioze. Do të shohim se çfarë ndodh më pas”, tha Peskov, duke specifikuar se për momentin “nuk ka detaje” në lidhje me praninë e Presidentit ukrainas Volodymyr Zelensky.
    Zëdhënësi shpjegoi se “përgatitjet për takimin nuk kanë filluar ende. Peskov gjithashtu ia atribuoi zgjedhjen e Budapestit si vend të takimit “marrëdhënieve të ngrohta midis Trump dhe Orbán dhe marrëdhënieve shumë konstruktive midis Putin dhe Kryeministrit hungarez”.
    Në fund ai sqaroi se Moska “nuk ka marrë asnjë njoftim zyrtar nga Uashingtoni” në lidhje me furnizimin e mundshëm të raketave Tomahawk në Ukrainë.

  • Kremlini: Putin paralajmëroi Trump për Tomahawk, mund të dëmtojë procesin e paqes

    Kremlini: Putin paralajmëroi Trump për Tomahawk, mund të dëmtojë procesin e paqes

    Kremlini njoftoi se presidenti rus, Vladimir Putin, e paralajmëroi presidentin amerikan Donald Trump gjatë telefonatës së tyre të sotme se furnizimi i Ukrainës me raketa me rreze të gjatë veprimi Tomahawk nga SHBA do të kishte pasoja të rënda për marrëdhëniet dypalëshe dhe për procesin e paqes në Ukrainë.

    “Putin theksoi se një veprim i tillë do të dëmtonte rëndë jo vetëm marrëdhëniet SHBA–Rusi, por edhe do të kompromentonte çdo përpjekje për zgjidhje paqësore të konfliktit,” u shpreh ndihmësi i Kremlinit, Yuri Ushakov, në një deklaratë për mediat.
    Sipas Ushakov, presidenti rus i bëri të ditur Trump-it se forcat e armatosura ruse kanë aktualisht “iniciativë të plotë strategjike” përgjatë gjithë vijës së frontit në Ukrainë.
    Biseda mes dy liderëve, e cila zgjati afro dy orë e gjysmë, u zhvillua me iniciativën e Moskës, sipas Kremlinit.
    Ushakov konfirmoi gjithashtu se takimi i paralajmëruar mes Trump dhe Putin në Budapest do të paraprihet nga një telefonatë diplomatike mes Sekretarit të Shtetit të SHBA, Marco Rubio, dhe ministrit të Jashtëm të Rusisë, Sergei Lavrov, e cila pritet të ndodhë brenda ditëve në vijim.
    Ky zhvillim vjen në një kohë kur tensionet në frontin lindor janë intensifikuar dhe përpjekjet ndërkombëtare për një armëpushim të qëndrueshëm kanë mbetur të bllokuara.

    Top Channel

  • Kremlini: Rusët e dëbuar nga Letonia, të mirëpritur në shtëpi

    Moska do të mirëpresë me krahë hapur më shumë se 800 qytetarë rusë, të cilëve Letonia u ka treguar derën për shkak të mosrespektimit të rregullave të reja të imigracionit. 

    “Nëse janë shtetas rusë… ata mund të kthehen në atdheun e tyre, në Rusi. Dhe të ndërtojnë një jetë këtu”, u tha gazetarëve të hënën zëdhënësi i Kremlinit, Dmitry Peskov. 

    Komentet e tij erdhën pasi POLITICO  raportoi  në fund të javës së kaluar se autoritetet në vendin baltik kishin urdhëruar 841 rusë të largoheshin nga vendi deri më 13 tetor, pasi nuk kishin provuar në kohë njohuritë e tyre të gjuhës letoneze, nuk kishin kaluar një kontroll sigurie dhe nuk kishin aplikuar për statusin e rezidentit afatgjatë.

    Deportimi efektiv i qindra rusëve ka të ngjarë të sillet nga Kremlini si provë e armiqësisë së Evropës – dhe veçanërisht të vendeve baltike – ndaj fqinjit të tyre dhe qytetarëve të saj.

    Më herët të hënën, Irina Volk, një zëdhënëse e ministrisë së brendshme të Rusisë, tha se autoritetet ruse kishin përgatitur “një sërë masash” për të ndihmuar grupin e prekur “të sistemohet dhe të përshtatet”. 

    “Me të mbërritur në Rusi, atyre do t’u ofrohet ndihmë gjithëpërfshirëse”, shkroi Volk në një postim në Telegram. 

    Ministria e Brendshme nuk ishte e arritshme në telefon për detaje mbi atë që përfshinin këto masa.

    Pas sulmit në shkallë të plotë të Rusisë kundër Ukrainës në vitin 2022, Letonia shtrëngoi rregullat për qytetarët rusë që jetojnë në vend. 

    Sipas Madara Puķe, drejtuese e marrëdhënieve me publikun në Zyrën e Çështjeve të Shtetësisë dhe Migracionit (OCMA) të Letonisë, rreth 30,000 rusë janë prekur nga rregullat më të rrepta. Rreth 2,600 prej tyre tashmë e kanë lënë Letoninë vullnetarisht, tha ajo. / Politico.