Tag: koncert

Nga Julia Vrapi
Një udhëtim përmes tingujve klasikë premton mbrëmja kur do të zhvillohet koncerti i tenorit shqiptar Saimir Pirgu. Një mbrëmje unike muzikore, ku koncerti do të zhvillohet në mbrëmjen e  datës 5 shtator në Shirokë në Shkodër. Tenori shqiptar me famë botërore Saimir Pirgu këto ditë ishte dhe në një koncert që u zhvillua në Kalanë e Kaninës, ku pjesë ishin edhe të tjerë artistë, ndërsa në Shirokë do të jetë për një koncert të tij gala. Me grupin e punës dhe drejtuesen e Orkestrës Simfonike të qytetit të Shkodrës, Elda Laro po zhvillohen këto ditë edhe përgatitjet e fundit për koncertin e tenorit me famë botërore Saimir Pirgu, ndërsa pritet që të sjell një program të pasur artistik. Për këtë koncert ka reaguar edhe tenori Saimir Pirgu, që ka ndarë në faqen e tij njoftimin për zhvillimin  e tij. “Ju falënderoj përzemërsisht për ftesën. Shihemi në Shirokë”, shprehet tenori Pirgu në një postim në rrjete sociale. Ndërsa kryetari i Bashkisë së Shkodrës Benet Beci shprehet se koncerti i tenorit Saimir Pirgu është një ngjarje, që sjell artin e madh ndërkombëtar në Shkodër, duke e bërë qytetin epiqendër të kulturës dhe muzikës klasike. “Më 5 shtator 2025, në sheshin qëndror të Shirokës, tenori me famë botërore Saimir Pirgu do të sjellë një koncert gala magjepsës, duke e kthyer këtë hapësirë në një skenë të artit dhe emocioneve të mëdha. Nën drejtimin e maestros Elda Laro, me Orkestrën Simfonike të Shkodrës dhe Korit të Qendrës Kulturore të Fëmijëve “Kujtim Alija”, mbrëmja premton një udhëtim të paharrueshëm përmes tingujve klasikë. Moderatorja e këtij eventi do të jetë Ema Ndoja”, shprehet Benet Beci në rrjete sociale për këtë koncert, që do të zhvillohet në sheshin qëndror në Shirokë.  Koncerti që do të zhvillohet këtë shtator është në vijim dhe të tjerë aktiviteteve artistike dhe kulturore më parë, që janë zhvilluar me mbështetjen e Bashkisë së Shkodrës.
Një aktivitet i pasur artistik
Tenori shqiptar me famë ndërkombëtare Saimir Pirgu ka një aktivitet të pasur artistik në skena të ndryshme. Me një axhendë tejet të ngjeshur, në teatrot më prestigjiozë në botë, tenori Saimir Pirgu me interpretimet e tij ka qenë pjesë e produksioneve të ndryshme operistike. Ndërsa vjet në muajin nëntor tenori u rikthye në skenën e Teatrit Kombëtar të Operës dhe Baletit (TKOB) pas 13 vitesh mungesë. Tenori u ngjit në skenë për operën “Tosca” vepër e kompozitorit Giacomo Puccini me rolin e Mario Cavaradossi-t. Vlerësuar për autoritetin dramatik dhe skenik të interpretimeve të tij, tenori Saimir Pirgu është cituar në shtypin ndërkombëtar si një nga zërat më të bukur që mund të dëgjohen sot dhe si një nga interpretuesit më të rëndësishme botërorë të roleve të tenorit lirik, etj. Me një aktivitet  të vlerësuar nga kritika dhe publiku, në çmimet që ka marrë tenori Saimir Pirgu përmendim edhe çmimin prestigjioz “Pavaroti D’Oro” (Pavaroti i Artë).