Tag: komisionerja

Shqipëria ka hapur sot zyrtarisht një tjetër grupkapitull në kuadër të negociatave për anëtarësim në Bashkimin Europian. Në Konferencën e gjashtë Ndërqeveritare u çel Grupkapitulli IV: “Agjenda e Gjelbër dhe Ndërlidhja e Qëndrueshme”, një tjetër hap i rëndësishëm drejt integrimit europian.Në konferencën e përbashkët për shtyp të Kryeministrit Edi Rama me Marie Bjerre, Ministre e Çështjeve Europiane, Mbretëria e Danimarkës dhe Marta Kos, Komisionere Europiane për Zgjerimin, zonja Kos, vlerësoi progresin e Shqipërisë, duke e quajtur mbresëlënës ritmin e ecurisë së reformave.“Sot kemi hapur grupkapitullin e katërt, dhe mbetet vetëm një i fundit për t’u çelur. Shqipëria ka qenë një kandidate jashtëzakonisht e zellshme dhe e përkushtuar. Qëllimi ynë është përmbyllja e negociatave deri në fund të vitit 2027, dhe unë mbështes plotësisht këtë vizion të ndarë me Kryeministrin Rama dhe ekipin e tij”.Ajo theksoi se përkundër vështirësive që sjell hapja e çdo kapitulli, Shqipëria ka arritur të tregojë rezultate konkrete falë përkushtimit institucional dhe bashkëpunimit të ngushtë me BE-në.“Ka një trekëndësh të fortë që mbështet këtë proces: institucionet shqiptare, Komisioni Europian dhe Presidenca Daneze e radhës. Ky progres është fryt i një pune të palodhur nga autoritetet shqiptare dhe një vizioni të qartë për integrimin.”Komisionerja nënvizoi gjithashtu rëndësinë e përfshirjes së parlamentit, shoqërisë civile dhe sektorit privat në proces, sidomos për reformat në drejtësi, forcimin e shtetit ligjor dhe garantimin e të drejtave të pronësisë.Duke folur pas hapjes së kapitullit të pestë në vetëm 11 muaj, Kryeministri Edi Rama theksoi vendosmërinë e qeverisë shqiptare për të vijuar me intensitet dhe përgjegjësi drejt përmbylljes së negociatave.“Presim me padurim të hapim edhe grupkapitullin e fundit brenda këtij viti. Kjo nuk ka të bëjë me marrjen e një shpërblimi përfundimtar, por me një proces sfidues që kërkon përpjekje të vazhdueshme. Kjo është hera e parë në histori që ne zgjedhim me dëshirë se me kë duam të “martohemi”. Më parë jemi martuar me perandori, por sot bëhet fjalë për një perandori vlerash një hapësirë sigurie, të drejtash dhe lirish për qytetarët tanë.”Rama falënderoi partnerët europianë dhe theksoi rolin që ka luajtur mbështetja dhe “trysnia miqësore” e BE-së në përshpejtimin e reformave.“Jemi vënë plotësisht në përmbushje të detyrimeve tona dhe do të mbështetemi te përvoja dhe dijet europiane për ta çuar këtë proces deri në fund.”Ministrja për Çështjet Europiane të Danimarkës, Marie Bjerre, vend që do të mbajë Presidencën e radhës të BE-së, vlerësoi përparimin e Shqipërisë, veçanërisht në fushën e reformës në drejtësi dhe në përputhjen me politikën e jashtme të Unionit.“Shqipëria po jep rezultate konkrete. Ju meritoni që ky progres të njihet dhe të mbështetet. Ka ende rrugë për të bërë, por ajo që keni arritur është domethënëse. Faleminderit për bashkëpunimin dhe përkushtimin”.Sipas të dhënave nga Barometri i fundit i BE-së: 91% e shqiptarëve dëshirojnë anëtarësimin në BE, 92% i besojnë BE-së dhe 80% kanë një imazh pozitiv për BE-në, ku komisionerja për zgjerimin e BE,  i konsideroi si nivelet më të larta në rajon. Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.