Partia Socialiste, e cila për dekada ka synuar të shfaqet si forcë e unitetit dhe stabilitetit politik, ndodhet sot në një krizë të thellë që rrezikon ta shembë nga themelet. Vetëm pak ditë para zgjedhjeve të 11 majit, prapaskenat janë mbushur me luftë brutale për mandate, përçarje të theksuar dhe konflikte të brendshme që po paralizojnë çdo përpjekje për një fushatë të organizuar. Mimi Kodheli pranon publikisht abuzimet dhe xhelozitë që kanë përfshirë garën socialiste, duke e pranuar indirekt krizën e brendshme. Kurse Erion Braçe, një ndër figurat më të njohura të PS, hedh në erë çdo fasadë të garës së ndershme, duke denoncuar publikisht se listat e kandidatëve janë një mashtrim i turpshëm dhe se Parlamenti i ri do jetë më i korruptuari në histori.
“Këto nuk janë zgjedhje, janë pazare dhe lista turpi”, ulëriu Braçe, duke paralajmëruar shkatërrimin moral të institucionit të deputetit. Në të njëjtën kohë, Blendi Gonxhja pranon hapur rivalitetin e egër mes vetë socialistëve, duke zbuluar për herë të parë publikisht luftën për zonat dhe sabotimin e ndërsjellë brenda PS. Por kjo tregon se kandidatët po shkelin njëri-tjetrin, betejat janë bërë personale, ndërsa secili kërkon të mbijetojë mbi trupin e kolegëve të tij. Ndërkohë Pandeli Majko përpiqet të qetësojë situatën, duke folur për “mosmarrëveshje normale”, por askush nuk e beson më, pasi realitet është se PS po përjeton ndoshta ndarjen më të madhe që nga themelimi i saj.
Në vend të një force politike të bashkuar, mazhoranca po shkon drejt zgjedhjeve si një koalicion interesash personale, xhelozish të ulëta dhe luftërash klanore. Megjithatë të gjitha këto tensione kanë sjellë një efekt domino: socialistët hyjnë në 11 maj të copëzuar, të demoralizuar dhe të përçarë si kurrë më parë. Pra për herë të parë në 20 vite, mazhoranca përballet me rrezikun real të një disfate që mund të ndryshojë balancën politike të vendit. Thënë troç Shqipëria hyn në këto zgjedhje me një mazhorancë në agoni, ndërsa shqiptarët janë dëshmitarë të rënies spektakolare të një partie që dikur pretendonte të ishte sinonimi i stabilitetit.
Qëndrimi i Kodhelit
Konkretisht kandidatja për deputete e Partisë Socialiste në Tiranë, Mimi Kodheli, ka komentuar dje situatën politike dhe fushatën zgjedhore, ndërsa vendi i afrohet zgjedhjeve të 11 majit. Në një intervistë për mediat, ajo theksoi rëndësinë e leximit të drejtë të votës, përtej çështjeve të Kodit Zgjedhor. “Nuk është i rëndësishëm Kodi Zgjedhor, por mënyra si lexohet vota. Ka abuzime, ka votim familjar, ka përpjekje për të ndikuar votuesin pa u fokusuar tek vlerat e kandidatëve apo të forcave politike”, deklaroi Kodheli. Një nga risitë që ajo vlerësoi si pozitive ishte pjesëmarrja e diasporës në këto zgjedhje. Sipas Kodhelit, vota e shqiptarëve jashtë vendit do të ndikojë ndjeshëm në rezultat, duke parashikuar se ajo do t’i sjellë një mandat më shumë Partisë Socialiste në kryeqytet.
Në lidhje me garën në listën e hapur të kandidatëve, Kodheli pranoi se brenda forcave politike ekziston xhelozi dhe konkurrencë, por e cilësoi këtë si normale në një proces zgjedhor. “Ka gjithmonë interesa të ndryshme brenda forcave politike. Është një proces që e marr me qetësi dhe që kalon lehtësisht”, u shpreh ajo. Më tej Kodheli shtoi gjithashtu se, ndonëse sistemi aktual zgjedhor nuk është perfekt për maksimizimin e votave, sfida kryesore mbetet respektimi i ligjit dhe menaxhimi i procesit në mënyrë korrekte. Në përfundim, kandidatja e PS theksoi se java e fundit e fushatës duhet t’i kushtohet menaxhimit të punës së kryer deri tani, për të garantuar një pjesëmarrje sa më të gjerë të qytetarëve në votime. “Është ngritur një mini-infrastrukturë për të mundësuar pjesëmarrjen dhe tani duhet ta menaxhojmë me përgjegjësi”, përfundoi Kodheli.
Qëndrimi i Braçes
Ndërkohë kandidati i Partisë Socialiste në Qarkun e Tiranës, Erion Braçe ishte i ftuar dje në një media, ku u shpreh se nuk ishte i kënaqur me emrat në listat e partive pasi sipas tij me ata që duan të zgjidhen deputetë, nuk mund të krijohet një Parlament i denjë. Më tej Braçe shton se nuk ka më garë elektorale, garë e drejtë dhe e ndershme ishte ajo e vitit 1996. “Nuk ka më garë elektorale. Kur më tregon këto lista nuk nënkuptoj garë. Gara duhet të jetë e drejtë, e ndershme dhe e barabartë, unë nuk e shikoj këtë në qarkun e Tiranës. Kjo listë dhe këta emra që shikoni nuk do të sjellin Parlament të denjë. Sidomos me këto listat e mbyllura e them me plot gojë që këto nuk janë zgjedhje, zgjedhje ishin ato të vitit 1996. Jam bërë shumë pishman që e kam votuar por kështu është kur shkon pas asaj idesë që gjithmonë duhet të bindesh dhe të mos bësh atë personin që duhet të përballesh. I përmend zgjedhjet e vitit 1996 sepse atëherë kam hyrë në politikë me garë, atëherë garoja. Nëse unë kthehem në Parlament do të loboj për tjetër sistem zgjedhor. Një reformë për t’i dhënë rëndësi deputetit sepse shumica e këtyre emrave nuk e dinë se çfarë është të jesh deputet. Deputet do të thotë punë dhe këta nuk e dinë. Ka emra plot në PD dhe në PS që nuk e dinë këtë gjë”, deklaroi Braçe.
Qëndrimi i Majkos
Ndërkaq edhe ministri Blendi Gonxhja, i cili garon në listë të hapur në Qarkun e Tiranës, la të nënkuptohet se ka një rivalitet mes kandidatëve socialiste për deputetët. “Unë e kam targuar fushatën time: ‘Ju flet Kombinati’. Unë aty kam lidhur veten time sepse zona ka nevojë patjetër të ketë përfaqësim prioritar prej një deputeti që e ka në vëmendje zonën. Duke qenë se janë zgjedhje qarku, ne nuk mund t’i bëjmë këto zona që të hyhet me viza në to. S’mund ti mbyllim këto zona me polici që të mos hyjë e të mos dalë asnjë kandidat tjetër. Nuk diskutohet që 37 kandidatët e tjerë do hyjnë e do dalin në të gjitha zonat dhe do ketë pa dyshim vota, simpati, afrimitet, njohje, familje, detyrime që do i votojnë për kandidatë të tjerë, po flas brenda PS. Ndaj më duhet të punoj edhe jashtë Njësisë 6 sepse më duhen votat edhe jashtë njësisë. Prandaj misioni tjetër i PS dhe i imi doemos, është që t’i sjell PS edhe më shumë vota në qoftë se mundem që të marrim mandatin e 19 dhe të 20”, deklaroi Gonxhja pak ditë më parë.
Qëndrimi i Majkos
Nga ana tjetër, Pandeli Majko, i cili garon në listat e hapura të PS-së në qarkun e Tiranës, shprehet se në këtë parti nuk ka konflikte, por mosmarrëveshje lidhur me ndarjen e zonave elektorale. Duke folur mbi zgjedhjet e 11 majit, Majko shprehet i bindur se PS do të sigurojë mandatin e 4 radhazi të qeverisjes, ndërsa opozita nuk do të jetë PD, por Brukseli. Majko theksoi se opozita shqiptare është ndarë në disa fraksione dhe nuk ka më unitet, siç kishte ndodhur në vitin 2005 kur u gjet një gjuhë e përbashkët mes grupeve opozitare. Ai shtoi se, në PS nuk ka konflikte të brendshme, përveç ndonjë mosmarrëveshjeje të mundshme në lidhje me ndarjen e zonave elektorale. Ai theksoi se për herë të parë, vota për PS, veç integrimit evropian, mund të shihet si një votë që nuk është thjesht për të majtën.
“Jemi kaq afër procesit të integrimit evropian, sa shumë shpejt do ta kuptojmë që vota për PS është një votë për Shqipërinë, për integrimin dhe për të ardhmen tonë evropiane”, theksoi Majko, duke shtuar se lufta në Ukrainë ka ndryshuar rregullat e lojës dhe që Shqipëria mund të bëhet pjesë e Bashkimit Evropian shumë shpejt, ndoshta brenda tre viteve. Sa i përket opozitës, Majko u shpreh se ajo është angazhuar në një fushatë për të ruajtur atë që është e nevojshme për ta, konkretisht listën e sigurt të deputetëve. Sipas tij, opozita ka një qëndrim të qartë për drejtësinë, ku ka shpallur se do të shpërbëjë SPAK-un. “Është një doktrinë që ka përfaqësues një njeri që drejton opozitën, ‘të mitë janë të pafajshëm, të fajshëm janë ata të palës tjetër’”, nënvizoi Majko pak ditë më parë.
