Adriatik BALLA
Qazim Laçi, mesfushori energjik i përfaqësueses tonë, mbrëmjen e dy ditëve më parë kompletoi lëvizjen e tij nga Çekia në Turqi, pasi la Spartën e Pragës dhe zgjodhi të luajë për klubin turk Rizespor. “Qazim Laçi vendosi ta vazhdojë karrierën te Rizespor në Turqi. Klubi i Superligës turke ka paguar 800 mijë euro te Sparta e Pragës. Mesfushori i Kombëtares ishte pjesë e çekëve nga janari i vitit 2023. Gjatë kësaj kohe luajtur 113 ndeshje ku shënoi 6 gola dhe asistoi 18 të tjerë. Laçi do e ketë për herë të parë eksperiencën në Turqi. 29-vjeçari ka luajtur më parë në Greqi dhe Francë”, shkruajnë mediat. Tani Laçi do të ketë një shans më shumë për karrierën e tij, e nga ana tjetër do të përfitojë më tepër në planin financiar.
Broja në fokusin e katër klubeve, por lëvizja ende s’po vjen
Për Armando Brojën ka mjaft interesim, por lëvizja ende nuk po ndodh, duke bërë që lojtari të jetë në stresin e sezonit të ardhshëm. Tani është momenti i tij, të gjejë skuadër ku të mund të luajë, ndryshe “digjet”, pasi Çelsi nuk e ka më në planet e tij. Sipas mediave, Armando Broja mund të jetë përpara një kapitulli të ri në karrierën e tij, teksa katër klube jashtë Anglisë kanë shfaqur interes konkret për të. Pas një periudhe të vështirë të mbushur me dëmtime dhe pak minuta loje, sulmuesi shqiptar i Çelsit është në kërkim të një transferimi që mund ta ndihmojë të rikthehet në formën më të mirë të tij. Sipas mediave britanike, Çelsi ka hyrë në fazën e largimeve këtë verë, dhe ndonëse vëmendja është përqendruar te emra si Nikolas Xhekson apo Aksel Disasi, edhe e ardhmja e Brojës është një çështje e hapur. Pas një huazimi zhgënjyes te Everton sezonin e kaluar – ku luajti në 13 ndeshje pa shënuar apo asistuar – duket se ka ardhur momenti që ai të zbresë një nivel për të grumbulluar minuta dhe të fokusohet në zhvillimin personal. Në këtë panoramë, emri i PSV Eindhoven është shtuar së fundmi në listën e klubeve që e duan. Fituesit e Tripletës dhe kampionët në fuqi të Holandës e kujton mirë periudhën e Brojës te Viteshe, ku u shfaq si një talent premtues dhe tani po konsideron seriozisht të bëjë një ofertë, sipas asaj që shkruajnë mediat e huaja. Përveç PSV-së, edhe tre klube të tjera kanë hyrë në garë për sulmuesin 23-vjeçar: Parma në Serie A, që kërkon të zëvendësojë Ange-Yoan Bony pas kalimit të tij te Interi; Shtutgart në Bundesliga, në rast se humb Nik Voltemade që kërkohet nga Bajern Munih; RB Leipzig, që po ndjek zhvillimet dhe mbetet në pritje. Broja mbetet një lojtar me potencial të madh, por dëmtimet e përsëritura e kanë penguar që ta tregojë plotësisht. Aktualisht, prioriteti kryesor për të është të gjejë një ekip ku të luajë rregullisht dhe të rikthejë vetëbesimin. Nëse arrin të qëndrojë i shëndetshëm dhe të gjejë një ambient të qëndrueshëm, sulmuesi kuqezi ka ende kohë për ta kthyer karrierën në drejtimin e duhur. Të gjitha ekipet që e duan ofrojnë një mundësi reale për ringritje – tani gjithçka varet nga zgjedhja e duhur dhe rikthimi në formë.
